ជប៉ុនផ្តល់គ្រឿងចក្រកម្ទេចមីនថ្មី គាំទ្រ CMAC ពន្លឿនការបោសសម្អាតសំណល់យុទ្ធភណ្ឌសង្គ្រាម

នាថ្ងៃទី២៦ ខែកុម្ភៈ ឆ្នាំ២០២៦ គ្រឿងចក្រកម្ទេចមីនថ្មីទំនើបមួយគ្រឿងបានមកដល់ព្រះរាជាណាចក្រកម្ពុជា ដើម្បីចូលរួមបំពេញបេសកកម្មបោសសម្អាតមីន និងសំណល់យុទ្ធភណ្ឌសង្គ្រាម ក្នុងគោលដៅពង្រឹងសន្តិភាព និងសុវត្ថិភាពជូនប្រជាពលរដ្ឋ។

បើតាមការបញ្ជាក់របស់លោក ហេង រតនា អគ្គនាយកនៃ មជ្ឈមណ្ឌលសកម្មភាពកម្ចាត់មីនកម្ពុជា (CMAC) គ្រឿងចក្រកម្ទេចមីនធុនធ្ងន់ប្រភេទ Komatsu នេះ មានទម្ងន់ជាង ៤០ តោន និងជាសម្ភារបច្ចេកទេសសំខាន់សម្រាប់ការបង្កើនប្រសិទ្ធភាពនៃការងារកម្ទេចមីននៅតំបន់មានហានិភ័យខ្ពស់។

គ្រឿងចក្រប្រភេទនេះ ត្រូវបានអភិវឌ្ឍន៍ និងកែច្នៃបច្ចេកទេសនៅកម្ពុជា តាមរយៈកិច្ចសហការរវាងអង្គភាព CMAC និងក្រុមហ៊ុន Komatsu ចាប់តាំងពីចុងទសវត្សរ៍ឆ្នាំ១៩៩០ ហើយត្រូវបានដាក់ឱ្យដំណើរការប្រើប្រាស់ជាផ្លូវការនៅក្នុងអង្គភាព CMAC ចាប់ពីឆ្នាំ២០០៥មក។

លោក ហេង រតនា បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលជប៉ុន ដែលបានផ្តល់គ្រឿងចក្រកម្ទេចមីនធុនធ្ងន់នេះជូនរាជរដ្ឋាភិបាលកម្ពុជា ដើម្បីគាំទ្រដល់ប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមមនុស្សធម៌នៅកម្ពុជា ឲ្យកាន់តែមានល្បឿនលឿន និងមានប្រសិទ្ធភាពខ្ពស់។

ការគាំទ្រនេះ មានសារៈសំខាន់ជាពិសេសសម្រាប់ការបោសសម្អាតសំណល់យុទ្ធភណ្ឌសង្គ្រាមនៅតាមតំបន់ព្រំដែន និងតំបន់ដែលរងផលប៉ះពាល់ពីអតីតសង្គ្រាម ដើម្បីធានាសុវត្ថិភាពជូនប្រជាពលរដ្ឋ អាចវិលត្រឡប់ទៅរស់នៅភូមិឋានវិញ និងប្រើប្រាស់ដីធ្លីសម្រាប់ការកសាងជីវភាព និងអភិវឌ្ឍន៍សេដ្ឋកិច្ចក្នុងបរិយាកាសសន្តិភាព និងសុវត្ថិភាពយូរអង្វែង៕