ក្នុងឱកាសនោះ លោកស្រី Odette TOMESCU-HATTO បានជម្រាបជូននូវការប្តេជ្ញាចិត្តរបស់វិទ្យាស្ថានប៉ាស្ទ័រប៉ារីស ក្នុងការចូលរួមគាំទ្រគំនិតផ្តួចផ្តើមផ្នែកសុខាភិបាលនៅកម្ពុជា និងបន្តធ្វើការជាមួយវិទ្យាស្ថានប៉ាស្ទ័រកម្ពុជា ក្នុងដើរតួនាទីដ៏សំខាន់ឆ្លើយតបបានទៅនឹងតម្រូវការនៃសុខភាពសាធារណៈរបស់កម្ពុជា តាមរយៈក្រសួងសុខាភិបាល។ ភាគីទាំងពីរបានទទួលស្គាល់ពីសារៈសំខាន់នៃការបន្តការផ្លាស់ប្តូរបទពិសោធន៍ របកគំហើញវិទ្យាសាស្ត្រ និងគម្រោងកិច្ចសហប្រតិបត្តិការនានា ក្នុងការដោះស្រាយបញ្ហាប្រឈមផ្នែកសុខភាពជាសកល។

ជាមួយគ្នានេះ លោករដ្ឋមន្ត្រីក្រសួងសុខាភិបាល បានសម្តែងនូវការកោតសរសើរ វិទ្យាស្ថានប៉ាស្ទ័រកម្ពុជា ដែលរួមចំណែកជាមួយក្រសួងសុខាភិបាល ក្នុងការលើកកម្ពស់សុខភាពសាធារណៈនៅកម្ពុជារយៈពេលជិត៧០ឆ្នាំ មកហើយ។ ការពិភាក្សា បានផ្តោតលើការពង្រឹងភាពជាដៃគូដែលមានស្រាប់ និងពិនិត្យលទ្ធភាពលើកិច្ចសហប្រតិបត្តិការបន្ថែមទៀតដូចជា ការស្រាវជ្រាវជំងឺឆ្លង ការកសាងសមត្ថភាពមន្ទីរពិសោធន៍ និងការបណ្តុះបណ្តាលអ្នកជំនាញ។

លោករដ្ឋមន្ត្រី បានបញ្ជាក់ពីសារៈសំខាន់នៃកិច្ចសហប្រតិបត្តិការ រវាងវិទ្យាស្ថាន និងក្រសួងសុខាភិបាល និងស្នើសុំឱ្យពង្រីកកិច្ចសហការ និងបន្តការផ្ទេរបច្ចេកវិទ្យា ចែករំលែកបទពិសោធន៍ ជូនដល់មន្ត្រីសុខាភិបាល ក្នុងការពង្រឹងសមត្ថភាពមន្ទីរពិសោធន៍ឱ្យកាន់តែប្រសើរឡើង ព្រមទាំងបានជម្រាបជូនថា ដំណើរទស្សនកិច្ចនេះ បង្ហាញពីទំនាក់ទំនងដ៏រឹងមាំ និងយូរអង្វែងរវាងកម្ពុជា និងបារាំងក្នុងវិស័យសុខាភិបាល និងការយកចិត្តទុកដាក់រួមគ្នាក្នុងការជំរុញចំណេះដឹង វិទ្យាសាស្ត្រ និងសុខភាពសាធារណៈ។

ជាទីបញ្ចប់ លោករដ្ឋមន្ត្រី បានថ្លែងអំណរគុណចំពោះការប្តេជ្ញាចិត្តរបស់វិទ្យាស្ថានប៉ាស្ទ័រប៉ារីស ក្នុងការពង្រឹងកិច្ចសហប្រតិបត្តិការជាមួយក្រសួងសុខាភិបាល ចូលរួមដំណើរការអភិវឌ្ឍន៍សុខាភិបាលឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

The post វិទ្យាស្ថានប៉ាស្ទ័រប៉ារីស គាំទ្រគំនិតផ្តួចផ្តើមផ្នែកសុខាភិបាលនៅកម្ពុជា និងបន្តធ្វើការជាមួយវិទ្យាស្ថានប៉ាស្ទ័រកម្ពុជា appeared first on Kampuchea Thmey Daily.

ភាពជោគជ័យនេះ បន្ទាប់ពីវិទ្យាស្ថានប៉ាស្ទ័រកម្ពុជា មានកិច្ចសហការក្រោមគម្រោង CAPFISH-Capture ផ្ដោតលើការអភិវឌ្ឍផ្នែកជលផលក្រោយប្រមូលផល ក្រោមការគាំទ្រថវិកាពី សហភាពអឺរ៉ុប (EU) អនុវត្តរួមគ្នាដោយ រដ្ឋបាលជលផល (FiA) និងអង្គការ UNIDO ដែលក្នុងនោះ ការលើកកម្ពស់សមត្ថភាពការធ្វើតេស្តរបស់មន្ទីរពិសោធន៍ផ្តោតលើសុវត្ថិភាពម្ហូបអាហារគឺជាសកម្មភាពដ៍សំខាន់មួយរបស់គម្រោង ដើម្បីធានាគុណភាពនិងសុវត្ថិភាពលើផលិតផលជលផលនៅកម្ពុជា។ នេះបើតាមសេចក្តីប្រកាសព័ត៌មានរួមចេញផ្សាយនៅថ្ងៃទី​០៤ ខែវិច្ឆិកា ឆ្នាំ ២០២៤។

តាមរយៈជំនួយបច្ចេកទេសពីគម្រោង CAPFISH-Capture មន្ទីរពិសោធន៍បរិស្ថាននិងសុវត្ថិភាពចំណីអាហាររបស់ វិទ្យាស្ថានប៉ាស្ទ័រកម្ពុជា ទទួលបានស្តង់ដា ISO/IEC 17025/2017 ក្នុងខែកញ្ញា ឆ្នាំ២០២២ ពីស្ថាប័នផ្តល់សេវាកម្មវាយតម្លៃទទួលស្គាល់ប្រព័ន្ធគ្រប់គ្រងគុណភាពជាអន្តរជាតិ (IAS) លើសមត្ថភាពធ្វើតេស្តប៉ារ៉ាម៉ែត្រមីក្រូជីវសាស្ត្រនៃម្ហូបអាហារ។ នាពេលថ្មីៗនេះ ដោយមានជំនួយបន្ថែមពីគម្រោង វិទ្យាស្ថានប៉ាស្ទ័រកម្ពុជា ក៏បានពង្រីកវិសាលភាព និងសមត្ថភាពធ្វើតេស្តរបស់ខ្លួនលើប៉ារ៉ាម៉ែត្រមីក្រូជីវសាស្ត្រនៃម្ហូបអាហារ និងទឹកចំនួន ៩ ប៉ារ៉ាម៉ែត្របន្ថែមទៀត ក្រោយពីត្រូវបានវាយតម្លៃទទួលស្គាល់ជាអន្តរជាតិដោយ IAS។ ដូចនេះ អតិថិជនក្នុងវិស័យកែច្នៃម្ហូបអាហារដែលបំណងចង់វិភាគសំណាកម្ហូបអាហារនិងទឹក អាចមកទទួលយកសេវាកម្មធ្វើវិភាគប្រកបដោយទំនុកចិត្តនិងទទួលស្គាល់ជាលក្ខណៈអន្តរជាតិ។

លោក សុខ ណារិន តំណាងប្រចាំព្រះរាជាណាចក្រកម្ពុជារបស់អង្គការ UNIDO មានប្រសាសន៍ថា៖«កិច្ចខិតខំប្រឹង​ប្រែងនិងការអភិវឌ្ឍខាងលើនេះបានគូសបញ្ជាក់អំពីការប្ដេជ្ញាចិត្តរបស់យើងក្នុងការបង្កើនសមត្ថភាពមន្ទីរពិសោធន៍នៅកម្ពុជា ដើម្បីផ្ដល់ប្រយោជន៍សម្រាប់ជំរុញការធ្វើពាណិជ្ជកម្មផល ផលិតផលជលផល និងផលិតផលកសិកម្មផ្សេងទៀត ដើម្បីជួយឱ្យសហគ្រាសផ្នែកម្ហូបអាហារអាចសន្សំសំចៃពេលវេលានិងកាត់បន្ថយការចំណាយលើការបញ្ជូនផល និងផលិតផលរបស់ខ្លួនទៅធ្វើតេស្តនៅមន្ទីរពិសោធន៍របស់ប្រទេសជិតខាងបានយ៉ាងច្រើនផងដែរ»។

លោកសាស្ត្រាចារ្យ André – SPIEGEL នាយកវិទ្យាស្ថានប៉ាស្ទ័រកម្ពុជា បានថ្លែងអំណរគុណចំពោះកិច្ចសហការល្អ ជាមួយគម្រោង CAPFISH-Capture ដោយបានលើកឡើងថា «ការវាយតម្លៃទទួលស្គាល់ប្រព័ន្ធគ្រប់គ្រងគុណភាពមន្ទីរពិសោធន៍ដោយ IAS បានឆ្លុះបញ្ចាំងពីការប្តេជ្ញាចិត្តឥតងាកររបស់វិទ្យាស្ថាន ក្នុងការលើកកម្ពស់គុណភាពសេវាកម្មធ្វើតេស្ត ជាពិសេសលើកិច្ចការពាក់ព័ន្ធនឹងគុណភាពនិងសុវត្ថិភាពម្ហូបអាហារ។ លោកបញ្ជាក់ថា៖« លទ្ឋផលដែលសម្រេច​បាននេះ បង្កើនសមត្ថភាពរបស់យើងក្នុងការគាំទ្រសុខភាពសាធារណៈតាមរយៈការពង្រឹងសុវត្ថិភាពម្ហូបអាហារនិងជួយឱ្យវិស័យជលផលនិងវិស័យឧស្សាហកម្មម្ហូបអាហាររបស់កម្ពុជាអាចឆ្លើយតបទៅនឹងបទដ្ឋានជាតិនិងអន្តរជាតិ ដែលចុងក្រោយផ្ដល់អត្ថប្រយោជន៍ ដល់ម្ចាស់អាជីវកម្មនិងអ្នកបរិភោគ»។

ជាមួយគ្នានេះ លោក  ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល បានសម្ដែងនូវសុទិដ្ឋិនិយមថា តាមរយៈការពង្រីកវិសាលភាព លើសេវាកម្មធ្វើតេស្តរបស់វិទ្យាស្ថានប៉ាស្ទ័រកម្ពុជានឹងអាចជំរុញកិច្ចសហការបានកាន់តែល្អប្រសើរឡើងថែមទៀត ជាពិសេសសម្រេចបាននូវគោលបំណងរួមគឺលើកកម្ពស់គុណភាព និងសុវត្ថិភាពនៃផល ផលិតផលជលផលកម្ពុជាចាប់តាំងពីការប្រមូលផលរហូតដល់តុអាហារ។ លោកបញ្ជាក់ដែរថា៖« ការអនុវត្តកន្លងមក រដ្ឋបាលជលផលតែងតែបញ្ជូនសំណាកនៃផល ផលិតផលជលផលទៅធ្វើតេស្តនៅវិទ្យាស្ថានប៉ាស្ទ័រកម្ពុជា ដើម្បីទទួលបានលទ្ធផលវិភាគតាមស្តង់ដាដែលអាចជឿជាក់ និងទទួលស្គាល់ដោយអាជ្ញាធរមានសមត្ថកិច្ច ជាពិសេសបំពេញនូវលក្ខខណ្ឌតម្រូវរបស់ប្រទេសនាំចូល»។

ចំណែកលោក អ៉ីហ្គ័រ ទ្រីសមែន ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានលើកឡើងថា៖«ការពង្រីកវិសាលភាពទទួលស្គាល់ប្រព័ន្ធគ្រប់គ្រងគុណភាពមន្ទីរពិសោធន៍របស់វិទ្យាស្ថានប៉ាស្ទ័រកម្ពុជា គឺជាជំហានវិជ្ជមានមួយទៀត ដែលនឹងគាំទ្រដល់ប្រព័ន្ធត្រួតពិនិត្យផ្លូវការនិងអនុលោមភាពស្របតាមលក្ខខណ្ឌតម្រូវរបស់ទីផ្សារដែលសហគ្រាសផ្នែកម្ហូប​អាហារ​ពីវិស័យឯកជនត្រូវអនុលោមតាម»៕

The post វិទ្យាស្ថានប៉ាស្ទ័រកម្ពុជា ជោគជ័យមួយជំហានទៀតលើការធ្វើតេស្តសុវត្ថិភាពម្ហូបអាហារស្តង់ដាអន្តរជាតិ appeared first on Kampuchea Thmey Daily.

ថ្លែងបើកកិច្ចប្រជុំក្រុមប្រឹក្សាទំនាក់ទំនងប្រចាំឆ្នាំ២០២២ នៃវិទ្យាស្ថានប៉ាស្ទ័រកម្ពុជា នៅរសៀលថ្ងៃទី ២៤ ឧសភានៅវិទ្យាស្ថានប៉ាសកទ័រកម្ពុជា លោករដ្ឋមន្ត្រី បានកោតសរសើរចំពោះការចូលរួមរបស់វិទ្យាស្ថានប៉ាស្ទ័រកម្ពុជា ដែលបានដើរតួនាទីយ៉ាងសំខាន់ក្នុងការធ្វើរោគវិនិច្ឆ័យជំងឺកូវីដ១៩ និងត្រួតពិនិត្យមេរោគនៃប្រភេទតាមលំដាប់លំដោយនិងបានការកែលម្អលទ្ធភាពទទួលបានការព្យាបាលប្រឆាំងនឹងជំងឺឆ្កែឆ្កួតផងដែរ ។

លោកសាស្ត្រាចារ្យ André Spiegel នាយកវិទ្យាស្ថានប៉ាស្ទ័រកម្ពុជាបានមានប្រសាសន៍ថា ឆ្លើយតបទៅនឹងការរាតត្បាតនៃជំងឺកូវីដ-១៩ របស់ក្រសួងសុខាភិបាលវិទ្យាស្ថានប៉ាស្ទ័រកម្ពុជា ធ្វើតេស្តបានជាង៦០ម៉ឺនតេស្ត RT-PCR  និងការសិក្សាវីរុសបំបែកបន្តៗគ្នាចំនួន ២ពាន់ វីរុស ដើម្បីកំណត់រកមេរោគបំប្លែងខ្លួនថ្មីព្រមទាំងសកម្មភាពស្រាវជ្រាវនៅតែបន្តហើយទទួលបានលទ្ធផលសំខាន់ៗនៅក្នុងវិស័យផ្សេងៗ ដែលជាប្រធានបទនៃការបោះពុម្ពផ្សាយអត្ថបទផ្នែកវិទ្យាសាស្ត្រចំនួន ៤៩ នៅក្នុងទិនានុប្បវត្តិអន្តរជាតិកម្រិតខ្ពស់។

លោកបានបន្តថា វិទ្យាស្ថានប៉ាស្ទ័រកម្ពុជា (IPC) ក៏កំពុងពង្រឹងសេវាកម្មដ៏ទូលំទូលាយរបស់ខ្លួនដល់សាធារណជនតាមរយៈ មន្ទីរពិសោធន៍ជីវវេជ្ជសាស្រ្ត មជ្ឈមណ្ឌលវ៉ាក់សាំងអន្តរជាតិ មជ្ឈមណ្ឌលព្យាបាលជំងឺឆ្កែឆ្កួតនៅរាជធានីភ្នំពេញដែលមានអ្នកជំងឺជាង ៤ម៉ឺននាក់ ត្រូវបានព្យាបាលនៅ ខេត្តបាត់ដំបង និងខេត្តកំពង់ចាម និងមន្ទីរពិសោធន៍  បរិស្ថាន និងសុវត្ថិភាពចំណីអាហារ៕

អត្ថបទ៖ សំអឿន

The post រដ្ឋមន្ត្រីសុខាភិបាល ចាត់ទុកវិទ្យាស្ថានប៉ាស្ទ័រ ជាដៃគូដ៏យូរអង្វែងរបស់កម្ពុជា appeared first on Kampuchea Thmey Daily.

លោក​វេជ្ជបណ្ឌិត ដួង វាសនា ​ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា មានប្រសាសន៍ប្រាប់ “កម្ពុជាថ្មី” ថា នៅភ្នំពេញ ក្រៅពី វិទ្យាស្ថានប៉ាស្ទ័រកម្ពុជា មាននៅពេទ្យព្រះកេតុមាលា មជ្ឈមណ្ឌលផ្តល់ឈាម ចំណែកតាមខេត្តជាច្រើនទៀតដូចជា សៀមរាប បាត់ដំបង ប៉ោយប៉ែត តាកែវ កំពង់ចាម ជាដើម ដែលមន្ទីរពិសោធន៍ទាំងនោះមានទីតាំងស្ថិតនៅ មន្ទីរពេទ្យបង្អែកខេត្តនីមួយៗ។

ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា រូបនេះបញ្ជាក់បន្ថែមថា ក្រសួងសុខាភិបាលបានតម្រូវឱ្យមន្ទីរពិសោធន៍តាមបណ្ដាខេត្តធ្វើតេស្តលើសំណាករកមេរោគកូវីដ-១៩ ដើម្បីកុំឱ្យចាល់មកភ្នំពេញច្រើនពេក ពិសេសក្នុងករណីប្រញាប់បន្ទាន់។

លោកវេជ្ជបណ្ឌិត ដួង ​វាសនា បានឱ្យដឹងថា មួយរយៈចុងក្រោយនេះ វិទ្យាស្ថានប៉ាស្ទ័របានទទួលចំនួនសំណាកធ្វើតេស្តមានច្រើន បើប្រៀបធៀបពីដើមឆ្នាំ ពោលអាចចន្លោះពី ៤០០ ទៅ ៦០០សំណាក ក្នុងមួយថ្ងៃ ខណៈកាលពីមុនគឺចម្លោះពី ២០០ ទៅ ៣០០ ជាងសំណាក។ សម្រាប់សំណាកដែលយកមកធ្វើតេស្តគឺសឹងតែ ១០០​ភាគរយនៃចំនួនសំណាកដែលបានធ្វើតេស្ត សុទ្ធតែជាប្រភេទមេរោគប្រភេទ អូមីក្រុង ដោយសារអូមីក្រុង មានការឆ្លងលឿន។

លោកវេជ្ជបណ្ឌិត ដួង វាសនា មានប្រសាសន៍ឱ្យដឹងថា វិទ្យាស្ថានប៉ាស្ទ័រកម្ពុជា អាចធ្វើតេស្តរកមេរោគកូវីដ-១៩ ក្នុងស្ថានភាពធម្មតា បានជាង ១,០០០ សំណាក ក្នុងមួយថ្ងៃ និងក្នុងករណីផ្ទុះខ្លាំង គឺអាចធ្វើតេស្តរកមេរោគកូវីដ-១៩ បានជាង ៣,០០០ សំណាក ក្នុងមួយថ្ងៃ។

លោកស្រីវេជ្ជបណ្ឌិត ឡូរ៉ង់ បារីល នាយកវិទ្យាស្ថានប៉ាស្ទ័រកម្ពុជា បានមានប្រសាសន៍ប្រាប់ “កម្ពុជាថ្មី” ថា វិទ្យាស្ថានប៉ាស្ទ័រកម្ពុជា មានសមត្ថភាពពិនិត្យរកមើលគ្រប់ប្រភេទវីរុសថ្មី​ទាំងអស់នៅ​ក្នុង​ពិភពលោក។ លោកស្រីវេជ្ជបណ្ឌិត បញ្ជាក់ថា ទាក់ទងទៅនឹងការពិនិត្យរកមេរោគកូវីដ-១៩ ប្រភេទថ្មី គឺក្រុមការងារពិនិត្យរកតែលើសំណាកណាដែលមានវីរុសច្រើន ដើម្បីចង់ដឹងថា សំណាកដែលមានមេរោគច្រើននោះ វាជាប្រភេទមេរោគអ្វី។

គួរបញ្ជាក់ថា នាយកដ្ឋានប្រយុទ្ធនឹងជំងឺឆ្លង បានបង្ហាញទិន្នន័យថា ចាប់តាំងពីថ្ងៃទី២៧ ខែមករា ឆ្នាំ២០២០ មក កម្ពុជាបានធ្វើតេស្តចំនួន ២ ៨៥៤ ៩៤២ នាក់។ នៅថ្ងៃទី២៥ ខែកុម្ភៈ នេះ នាយកដ្ឋានបានរកឃើញករណីជំងឺកូវីដ-១៩​ សរុបចំនួន​ ៤៧៩ នាក់​ (ឆ្លងសហគមន៍:​ ​​៤៥៣ នាំចូល:​ ២៦ នាក់) និងមានជាសះស្បើយ​ ៥០៣ នាក់។ ដូច្នេះចំនួនករណីជំងឺកូវីដ-១៩សរុប​កើន​ ១២៩ ០៧៨​​​​​​​​​​​​​​ នាក់ និងចំនួនជាសះស្បើយសរុប​កើន​ ១២១ ៣៨០ នាក់​​​​​​​​​​​​​​​​​ និង ស្លាប់ថ្មី​ ១នាក់​ (មិនបានចាក់វ៉ាក់សាំង​ ០នាក់)​ សរុប​ស្លាប់ ៣ ០២៧ នាក់៕

អត្ថបទ៖ ច័ន្ទ វីរៈ

The post បច្ចុប្បន្ន ក្រៅពីភ្នំពេញ តើខេត្តណាខ្លះមានមន្ទីរពិសោធន៍រកកូវីដ-១៩ និងប្រភេទ អូមីក្រុង? appeared first on Kampuchea Thmey Daily.

លោក​វេជ្ជបណ្ឌិត ដួង វាសនា ​ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា ប្រាប់កម្ពុជាថ្មី នៅថ្ងៃនេះថា ចំនួនសំណាកធ្វើតេស្តនៅវិទ្យាស្ថានប៉ាស្ទ័រកម្ពុជា គឺជាមួយផ្នែក នៃចំនួនកន្លែងធ្វើតេស្តទាំងអស់ទូទាំងប្រទេស ដែលគ្រាន់តែមួយរយៈចុងក្រោយនេះ វិទ្យាស្ថានបានទទួលចំនួនសំណាកធ្វើតេស្តមានច្រើន ២ ទៅ ៣ ដង បើប្រៀបធៀបកាលដើមឆ្នាំ ២០២២នេះ។

លោកវេជ្ជបណ្ឌិត ដួង វាសនា មានប្រសាសន៍បន្តថា៖ “អាចចន្លោះពី ៤០០ ទៅ ៦០០សំណាក ក្នុងមួយថ្ងៃ។ ជាធម្មតា កាលពីមុនគឺចម្លោះពី ២០០ ទៅ ៣០០ ជាងសំណាក បន្ទាប់ពីចំនួនឆ្លងថយចុះច្រើន ហើយរដ្ឋាភិបាល និងក្រសួងសុខាភិបាលសម្រេចធ្វើតេសត្តតែអ្នកនៅមន្ទីរពេទ្យវិញ”។

ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា រូបនេះបន្តថា អ្នកធ្វើតេស្តមិនមែនមហាជនទូទៅទេ គឺទាល់តែអ្នកដែលមានអាការៈសង្ស័យ ដែលត្រូវបានធ្វើតេស្ត និងបានបញ្ជូនសំណាកពីភ្នាក់ងារក្រសួងសុខាភិបាល តាមពីមន្ទីរពេទ្យ។

លោកវេជ្ជបណ្ឌិត ដួង វាសនា បញ្ជាក់ថា៖ “សម្រាប់សំណាកដែលយកមកធ្វើតេស្តគឺសឹងតែ ១០០ ភាគរយ បានរកឃើញវិជ្ជមានអូមីក្រុង ប៉ុន្តែយើងអត់ធ្វើតេស្តរកមេរោគអូមីក្រុងពីបណ្ដាតេស្តវិជ្ជមានទាំងអស់ទេ គឺធ្វើចុះៗ ដោយសារចំនួនច្រើន ហើយបើធ្វើទាំងអស់ ក៏អត់មានន័យ។ អ៊ីចឹង យើងជ្រើសរើសតាមទីតាំង តាមខេត្ត តាមប្រភេទនៃអ្នកជំងឺ។ យើងឃើញថា សម្រាប់ពេលឥឡូវ សឹងតែ ១០០ ភាគរយនៃចំនួនសំណាកដែលយើងធ្វើតេស្តហ្នឹងសុទ្ធតែជាប្រភេទមេរោគប្រភេទ អូមីក្រុង ដោយសារអូមីក្រុង មានការឆ្លងលឿន អ៊ីចឹងការរាតត្បាត គឺលឿនខ្លាំង”។

គួរបញ្ជាក់ថា គិតត្រឹមព្រឹកនេះ ថ្ងៃទី១៨ ខែកុម្ភៈ ឆ្នាំ២០២២ កម្ពុជាបានរកឃើញអ្នកឆ្លងកូវីដ-១៩ ថ្មី ចំនួន ៤១៤ ករណី ជាករណីអូមីក្រុងក្នុងសហគមន៍ចំនួន ៣៨៨ ករណី នាំឱ្យករណីអូមីក្រុងក្នុងសហគមន៍សរុបកើនដល់ ៤ ០៦៤ ករណី ទន្ទឹមពេល ករណីឆ្លងកូវីដ-១៩ ក្នុងប្រទេសកម្ពុជាសរុប មានចំនួន ១២៥ ២០១ ករណី ព្យាបាលជាសះស្បើយចំនួន ១១៩ ៨៨០ ករណី និងអ្នកបាត់បង់ជីវិតសរុប ៣ ០១៥ ករណី។ រដ្ឋាភិបាល តែងចាត់វិធានការបន្ទាន់ជាបន្តបន្ទាប់ ទទ្ទឹមនឹងការអំពាវនាវប្រជាពលរដ្ឋអនុវត្ត ៣កុំ ៣ការពារ និងចាក់វ៉ាក់សាំងបង្ការជំងឺកូវីដ-១៩៕

អត្ថបទ៖ ច័ន្ទ វីរៈ  

The post វិទ្យាស្ថានប៉ាស្ទ័រ តែមួយ ធ្វើតេស្តកូវីដ-១៩ កើនឡើង ២ ទៅ ៣ដង ក្នុងមួយថ្ងៃ បើធៀបដើមឆ្នាំ appeared first on Kampuchea Thmey Daily.

យោងតាមការបញ្ជាក់របស់វិទ្យាស្ថានប៉ាស្ទ័រកម្ពុជា នៅថ្ងៃទី២៨ ខែកុម្ភៈ ឆ្នាំ២០២១ សំណាករបស់ជនជាតិចិន និងបងប្អូនកម្មករដែលកំពុងសាងសង់សំណង់នៅមជ្ឈមណ្ឌលពាណិជ្ជកម្មវឌ្ឍនៈ ក្រុងកំពង់ចាម ចំនួន៥៥នាក់ និងបងប្អូនប្រជាពលរដ្ឋដែលជាប់ពាក់ព័ន្ធនឹងពិធីមង្គលការនៅ ភូមិកោះតូច ឃុំពាមជីកង ស្រុកកងមាស ខេត្តកំពង់ចាមចំនួន២៩២នាក់  មានលទ្ធផលអវិជ្ជមានកូវីដ១៩។

ដោយផ្អែកលើលទ្ធផលនេះ នៅថ្ងៃទី០១ ខែមីនា រដ្ឋបាលខេត្តកំពង់ចាមបានអនុញ្ញាតិឱ្យជនជាតិចិន និងបងប្អូនកម្មករដែលកំពុងសាងសង់សំណង់នៅមជ្ឈមណ្ឌលពាណិជ្ជកម្មវឌ្ឍនៈ ក្រុងកំពង់ចាម ដែលមានការសង្ស័យចំនួន៥៥នាក់ឱ្យ វិលត្រឡប់ទៅបំពេញការងារតាមធម្មតាវិញ។​

ដោយឡែក ចំពោះបងប្អូនប្រជាពលរដ្ឋដែលជាប់ពាក់ព័ន្ធនឹងពិធីមង្គលការនៅនៅភូមិកោះតូច ឃុំពាមជីកង ស្រុកកងមាស ត្រូវបន្តធ្វើចត្តាឡីស័កនៅមជ្ឈមណ្ឌលចត្តាឡីស័ករបស់រដ្ឋបាលខេត្ត និងនៅតាមគេហដ្ឋានដើម្បីពិនិត្យសំណាកលើកទី២ មុននឹងអនុញ្ញាតិឱ្យវិលត្រឡប់ទៅលំនៅដ្ឋានវិញ។

ជាមួយគ្នានេះ រដ្ឋបាលខេត្តកំពង់ចាមបានអំពាវនាវដល់បងប្អូនដែលជាប់ពាក់ព័ន្ធនឹងពិធីមង្គលការនៅភូមិកោះតូច ឃុំពាមជីកង បន្តធ្វើចត្តាឡីស័កឱ្យបានត្រឹមត្រូវ និងអនុវត្តយ៉ាងម៉ឺងម៉ាត់តាមការណែនាំរបស់មន្ត្រីសុខាភិបាល និងអំពាវនាវដល់បងប្អូនប្រជាពលរដ្ឋក្នុងខេត្តកំពង់ចាម ឱ្យបន្តបង្កើនការប្រុងប្រយ័ត្នខ្ពស់ ប្រកាន់ខ្ជាប់វិធានការអនាម័យ និងអនុវត្តវិធានការទប់ស្កាត់ ការពារជំងឺកូវីដ១៩ «៣កុំ និង៣ការពារ»។

អត្ថបទ៖ វ៉ាត វិន

The post សំណាកអ្នក​ពាក់ព័ន្ធព្រឹត្តិការណ៍សហគមន៍ ២០ កុម្ភៈ នៅខេត្តកំពង់​ចាម​តេស្តអវិជ្ជមាន​កូវីដ១៩ ទាំងអស់ appeared first on Kampuchea Thmey Daily.

លោក​វេជ្ជបណ្ឌិត ដួង វាសនា ​ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា ប្រាប់កម្ពុជាថ្មី នៅថ្ងៃនេះថា បច្ចុប្បន្នមានកម្ពុជាមានមន្ទីរពិសោធន៍ធ្វើតេស្តរកមេរោគកូវីដ-១៩ ចំនួន២កន្លែងនៅភ្នំពេញ និង២កន្លែងទៀតនៅតាមបណ្ដាខេត្ត ទន្ទឹមពេលក្រសួងសុខាភិបាលកំពុងសាងសង់មន្ទីរពិសោធន៍រកមេរោគកូវីដ-១៩ នេះនៅខេត្តមួយទៀត។

លោក ដួង ​វាសនា មានប្រសាសន៍ថា៖ មន្ទីរពិសោធន៍រកវីរុសកូវីដ-១៩ នៅរាជធានីភ្នំពេញ មាននៅ វិទ្យាស្ថាន ប៉ាស្ទ័រ និងជាតិសុខភាពសាធារណៈ ចំណែកមន្ទីរពិសោធន៍ធ្វើតេស្ដរកមេរោគកូវីដ១៩ នៅតាមខេត្តគឺនៅ សៀមរាប និងបាត់ដំបង ហើយមន្ទីរពិសោធន៍នៅខេត្តព្រះសីហនុមិនទាន់ដំណើរការទេ ដោយកំពុងសាងសង់អគារជិតរួចរាល់ហើយ”។

លោក ដួង ​វាសនា បញ្ជាក់បន្ថែមទៀតថា មន្ទីរពិសោធន៍ធ្វើតេស្តកូវីដ-១៩ ទាំងនោះ មានទីតាំងស្ថិតនៅ មន្ទីរពេទ្យបង្អែកខេត្តនីមួយៗ។ ក្រសួងសុខាភិបាលបានតម្រូវឱ្យមន្ទីរពិសោធន៍តាមបណ្ដាខេត្តធ្វើតេស្តលើសំណាករកមេរោគកូវីដ-១៩ផងដែរ ដើម្បីកុំឱ្យចាល់មកភ្នំពេញច្រើនពេក ពិសេសក្នុងករណីប្រញាប់បន្ទាន់។

លោក រឿង ប៊ុនរេត ប្រធានមន្ទីរសុខាភិបាលខេត្តបាត់ដំបង បានមានប្រសាសន៍ប្រាប់ កម្ពុជាថ្មី ថា មន្ទីរពិសោធន៍ធ្វើតេស្តរកមេរោគកូវីដ១៩នៅ បាត់ដំបង ក៏ដូចជានៅខេត្តសៀមរាប គឺកំពុងសាងសង់មិនទាន់សាងសង់រួចរាល់ទាំងស្រុងដូចគ្នា។

លោក រឿង ប៊ុនរេត មានប្រសាសន៍បន្តថា៖ “នៅខេត្តបាត់ដំបង អាចធ្វើតេស្តរកមេរោគកូវីដ-១៩ បានចំនួនតិចតួច ឬករណីបន្ទាន់។ ក្នុងករណីពិសេស គឺត្រូវផ្ញើសំណាកទៅធ្វើតេស្តនៅវិទ្យាស្ថានប៉ាស្ទ័រនៅរាជធានីភ្នំពេញ”។

លោក ដួង វាសនា មានប្រសាសន៍ឱ្យដឹងថា វិទ្យាស្ថានប៉ាស្ទ័រកម្ពុជា អាចធ្វើតេស្តរកមេរោគកូវីដ-១៩ ក្នុងស្ថានភាពធម្មតា បានជាង ១,០០០ សំណាក ក្នុងមួយថ្ងៃ និងក្នុងករណីផ្ទុះខ្លាំង គឺអាចធ្វើតេស្តរកមេរោគកូវីដ-១៩បានជាង ៣,០០០ សំណាកឯណោះ ក្នុងមួយថ្ងៃ។

ប្រធាន​ផ្នែក​វិ​រុសាស្ដ្រ​នៃ​វិទ្យាស្ថាន​ប៉ាស្ទ័រ​កម្ពុជា រូបនេះ បានឱ្យដឹងថា ចំពោះមន្ទីរពិសោធន៍ធ្វើតេស្ដរកមេរោគកូវីដ-១៩នៅតាមបណ្ដាខេត្ត អាចធ្វើតេស្តរកមេរោគមិនច្រើនដូចនៅភ្នំពេញទេ។

លោក ដួង វាសនា មានប្រសាសន៍បញ្ជាក់ថា៖ “ដោយសារម៉ាស៊ីនធំរបស់គាត់អត់ទាន់មកដល់ ហើយមន្ទីរពិសោធន៍របស់គាត់ក៏មិនទាន់សាងសង់រួចរាល់ដែរ។ គាត់មានតែម៉ាស៊ីនប្រភេទផ្សេង ដែលអាចធ្វើតេស្តរកមេរោគតិចក្នុងមួយថ្ងៃ គឺអាចធ្វើតេស្តបានជាង១០០សំណាក”។

លោក វាសនា មានប្រសាន៍ថា សម្រាប់បច្ចុប្បន្ន នៅកម្ពុជា មានតែនៅវិទ្យាស្ថានប៉ាស្ទ័រកម្ពុជាមួយកន្លែងទេ ដែលអាចធ្វើតេស្តរក និងកំណត់ អត្តសញ្ញាណមេរោគកូវីដ-១៩បំប្លែងថ្មី។

លោក មានប្រសាសន៍បញ្ជាក់ថា៖ “នៅពេលនេះ កម្ពុជាមិនទាន់រកឃើញវីរុសកូវីដ-១៩បំប្លែងថ្មីបន្ថែមទៀតនោះទេ គឺមានតែ៦ករណីដដែល ដោយ៣ករណីរកឃើញក្នុង “ព្រឹត្តិការណ៍ ២០ កុម្ភៈ”។

លោកស្រីវេជ្ជបណ្ឌិត ឡូរ៉ង់ បារីល នាយកវិទ្យាស្ថានប៉ាស្ទ័រកម្ពុជា បានប្រាប់ កម្ពុជាថ្មី ថា ក្នុងចំណោមមេរោគថ្មីហ្នឹង វាមានចំនួន៦ករណី ហើយក្នុងនោះ៣ករណីមកពីព្រះរាជាណាចក្រអង់គ្លេស និង៣ករណីទៀត គឺពាក់ព័ន្ធនឹងការឆ្លងក្នុងសហគមន៍ “ព្រឹត្តិការណ៍ ២០ កុម្ភៈ” នេះ។

លោកស្រីវេជ្ជបណ្ឌិត ឡូរ៉ង់ បារីល មានប្រសាសន៍ថា៖ “ទាក់ទងទៅនឹងការពិនិត្យរកមេរោគកូវីដ-១៩ប្រភេទថ្មី គឺក្រុមការងារពិនិត្យរកតែលើសំណាកណាដែលមានវីរុសច្រើន ដើម្បីចង់ដឹងថា តើសំណាកដែលមានមេរោគច្រើននោះ វាជាប្រភេទមេរោគអ្វី”។

លោកស្រីវេជ្ជបណ្ឌិត ឡូរ៉ង់ បារីល មានប្រសាសន៍បញ្ជាក់ថា វិទ្យាស្ថានប៉ាស្ទ័រកម្ពុជា មានសមត្ថភាពពិនិត្យរកមើលគ្រប់ប្រភេទវីរុសថ្មីទាំងអស់នៅក្នុងពិភពលោក។

នាយកដ្ឋានប្រយុទ្ធនឹងជំងឺឆ្លង បានបង្ហាញទិន្នន័យនៅថ្ងៃទី២៧ ខែកុម្ភៈ នេះថា មកដល់ពេលនេះ នាយកដ្ឋានបានធ្វើតេស្តចំនួន ៤៨០,១០៥​ ស្មើនឹង​ ២៨,៥៧៧ ក្នុង១លាននាក់។

គួរបញ្ជាក់ថា គិតត្រឹមព្រឹកថ្ងៃទី២៧ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ-១៩ សរុបចំនួន ៧៦៦នាក់ ដោយបានព្យាបាលអ្នកជំងឺឱ្យជាសះស្បើយចំនួន ៤៧៧នាក់ និងអ្នកកំពុងសម្រាកព្យាបាល ចំនួន ២៨៧នាក់ និងពុំទាន់មានអ្នកបាត់បង់ជីវិតដោយសារមេរោគកូវីដនេះទេ។ ក្នុងចំណោមអ្នកជំងឺសរុប មានអ្នកជំងឺចំនួន២៥៩នាក់ ពាក់ព័ន្ធការឆ្លងចូលសហគមន៍លើកទី៣ “ព្រឹត្តិការណ៍សហគមន៍ ២០ កុម្ភៈ” ដោយបានរកឃើញ២៦ករណីថ្មីកាលពីម្សិលមិញ៕

អត្ថបទ៖ ច័ន្ទ វីរៈ

សូមអានព័ត៌មានពាក់ព័ន្ធ៖

ហេតុអ្វីការផ្ដល់ចាក់វ៉ាក់សាំងមិនធ្វើនៅថ្ងៃក្រៅម៉ោងធ្វើការផង?
សូមប្រយ័ត្ន! មេរោគកូវីដ-១៩ មិនមែនឆ្លងតាមតែច្រមុះ និងមាត់ទេ!

The post តើកម្ពុជាមានមន្ទីរពិសោធន៍រកវីរុសកូវីដ-១៩ នៅទីណាខ្លះ? appeared first on Kampuchea Thmey Daily.

លោកស្រីវេជ្ជបណ្ឌិត ឡូរ៉ង់ បារីល នាយិកាវិទ្យាស្ថានប៉ាស្ទ័រកម្ពុជា បានឆ្លើយតបទៅនឹងសំណួររបស់ កម្ពុជាថ្មី ដោយមានប្រសាសន៍បង្ហាញថា ក្នុងការធ្វើតេស្តរកមេរោគកូវីដ-១៩ វិទ្យាស្ថានប៉ាស្ទ័រអាចធ្វើតេស្តរហូតបានដល់ជាង ៣,០០០ សំណាកក្នុងមួយថ្ងៃ។

លោកស្រីវេជ្ជបណ្ឌិត ឡូរ៉ង់ បារីល មានប្រសាសន៍ថា៖ “សម្រាប់សមត្ថភាពក្នុងការធ្វើតេស្ដរកមេរោគកូវដ-១៩នេះ ជាទូទៅ នៅពេលផ្ទុះ ឬមានព្រឹត្តិការណ៍កើតឡើង វិទ្យាស្ថានប៉ាស្ទ័រតែងទទួលសំណើសំណូមពរធ្វើតេស្ដចំនួនច្រើន យើងអាចធ្វើតេស្តរហូតបានដល់ជាង ៣,២៣៣”។

នាយិកាវិទ្យាស្ថានប៉ាស្ទ័រកម្ពុជា មានប្រសាសន៍បន្តទៀតថា៖ “នាងខ្ញុំចង់ជម្រាប់ផងដែរថា ភ្នំពេញមិនមែនវិទ្យាស្ថានប៉ាស្ទ័រជាវិទ្យាស្ថានមួយសម្រាប់ធ្វើតេស្តរកមេរោគកូវីដ-១៩នោះទេ ក្នុងនោះយើងមានវិទ្យាស្ថានជាតិសុខភាពសាធារណៈដែលបានចូលរួមក្នុងការធ្វើតេស្តបន្ថែមទៀតទៅលើតេស្តCPRនេះផងដែរ”។

នាយកដ្ឋានប្រយុទ្ធនឹងជំងឺឆ្លង បានបង្ហាញទិន្នន័យនៅថ្ងៃនេះថា មកដល់ពេលនេះ នាយកដ្ឋានបានធ្វើតេស្តចំនួន ៤៦៤,៤៨០​ ស្មើនឹង​ ២៧,៦៤៧ ក្នុង១លាន នាក់។

គួរឱ្យដឹងដែរថា គិតត្រឹមព្រឹកថ្ងៃទី២៤ ខែកុម្ភៈ ឆ្នាំ២០២១នេះ កម្ពុជាបានរកឃើញអ្នកឆ្លងកូវីដ-១៩ សរុបចំនួន ៦៣៣នាក់ ដោយក្នុងនោះ មានអ្នកជំងឺចំនួន១៣៧នាក់ ពាក់ព័ន្ធការឆ្លងចូលសហគមន៍លើកទី៣ “ព្រឹត្តិការណ៍សហគមន៍ ២០ កុម្ភៈ”៕

អត្ថបទ៖ ច័ន្ទ វីរៈ

សូមអានព័ត៌មានពាក់ព័ន្ធ៖

កម្ពុជាបានរកឃើញវីរុសកូវីដ-១៩ប្រភេទថ្មី ចំនួន៦ករណី

WHOប្រចាំកម្ពុជាបង្ហាញប្រភពមេរោគកូវីដ-១៩ថ្មី កំពុងឆ្លងជាង១០០ប្រទេស

The post លទ្ធភាពវិទ្យាស្ថានប៉ាស្ទ័រធ្វើតេស្តរកកូវីដ-១៩ក្នុងមួយថ្ងៃ appeared first on Kampuchea Thmey Daily.