ព័ត៌មានជាតិ

វិទ្យាស្ថានប៉ាស្ទ័រ តែមួយ ធ្វើតេស្តកូវីដ-១៩ កើនឡើង ២ ទៅ ៣ដង ក្នុងមួយថ្ងៃ បើធៀបដើមឆ្នាំ

បានផុស

៤ years មុន

នៅ

ថ្ងៃសុក្រ ១៨ កុម្ភៈ ២០២២

ដោយ

ក្នុងចំណោមទីតាំងទាំងឡាយក្នុងប្រទេសកម្ពុជាដែលមានម៉ាស៊ីនធំ PCR សម្រាប់ធ្វើតេស្តសំណាករកមេរោគកូវីដ-១៩ វិទ្យាស្ថានប៉ាស្ទ័រកម្ពុជា បានទទួលកំណើននៃសំណាក កើនឡើងរហូត ២ ទៅ ៣ដងក្នុងមួយថ្ងៃ បើប្រៀបធៀបខែមករា ដើមឆ្នាំ ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត ដួង វាសនា ប្រធានផ្នែកវិរុសាស្ដ្រនៃវិទ្យាស្ថានប៉ាស្ទ័រកម្ពុជា ប្រាប់កម្ពុជាថ្មី នៅថ្ងៃនេះថា ចំនួនសំណាកធ្វើតេស្តនៅវិទ្យាស្ថានប៉ាស្ទ័រកម្ពុជា គឺជាមួយផ្នែក នៃចំនួនកន្លែងធ្វើតេស្តទាំងអស់ទូទាំងប្រទេស ដែលគ្រាន់តែមួយរយៈចុងក្រោយនេះ វិទ្យាស្ថានបានទទួលចំនួនសំណាកធ្វើតេស្តមានច្រើន ២ ទៅ ៣ ដង បើប្រៀបធៀបកាលដើមឆ្នាំ ២០២២នេះ។

លោកវេជ្ជបណ្ឌិត ដួង វាសនា មានប្រសាសន៍បន្តថា៖ “អាចចន្លោះពី ៤០០ ទៅ ៦០០សំណាក ក្នុងមួយថ្ងៃ។ ជាធម្មតា កាលពីមុនគឺចម្លោះពី ២០០ ទៅ ៣០០ ជាងសំណាក បន្ទាប់ពីចំនួនឆ្លងថយចុះច្រើន ហើយរដ្ឋាភិបាល និងក្រសួងសុខាភិបាលសម្រេចធ្វើតេសត្តតែអ្នកនៅមន្ទីរពេទ្យវិញ”។

ប្រធានផ្នែកវិរុសាស្ដ្រនៃវិទ្យាស្ថានប៉ាស្ទ័រកម្ពុជា រូបនេះបន្តថា អ្នកធ្វើតេស្តមិនមែនមហាជនទូទៅទេ គឺទាល់តែអ្នកដែលមានអាការៈសង្ស័យ ដែលត្រូវបានធ្វើតេស្ត និងបានបញ្ជូនសំណាកពីភ្នាក់ងារក្រសួងសុខាភិបាល តាមពីមន្ទីរពេទ្យ។

លោកវេជ្ជបណ្ឌិត ដួង វាសនា បញ្ជាក់ថា៖ “សម្រាប់សំណាកដែលយកមកធ្វើតេស្តគឺសឹងតែ ១០០ ភាគរយ បានរកឃើញវិជ្ជមានអូមីក្រុង ប៉ុន្តែយើងអត់ធ្វើតេស្តរកមេរោគអូមីក្រុងពីបណ្ដាតេស្តវិជ្ជមានទាំងអស់ទេ គឺធ្វើចុះៗ ដោយសារចំនួនច្រើន ហើយបើធ្វើទាំងអស់ ក៏អត់មានន័យ។ អ៊ីចឹង យើងជ្រើសរើសតាមទីតាំង តាមខេត្ត តាមប្រភេទនៃអ្នកជំងឺ។ យើងឃើញថា សម្រាប់ពេលឥឡូវ សឹងតែ ១០០ ភាគរយនៃចំនួនសំណាកដែលយើងធ្វើតេស្តហ្នឹងសុទ្ធតែជាប្រភេទមេរោគប្រភេទ អូមីក្រុង ដោយសារអូមីក្រុង មានការឆ្លងលឿន អ៊ីចឹងការរាតត្បាត គឺលឿនខ្លាំង”។

គួរបញ្ជាក់ថា គិតត្រឹមព្រឹកនេះ ថ្ងៃទី១៨ ខែកុម្ភៈ ឆ្នាំ២០២២ កម្ពុជាបានរកឃើញអ្នកឆ្លងកូវីដ-១៩ ថ្មី ចំនួន ៤១៤ ករណី ជាករណីអូមីក្រុងក្នុងសហគមន៍ចំនួន ៣៨៨ ករណី នាំឱ្យករណីអូមីក្រុងក្នុងសហគមន៍សរុបកើនដល់ ៤ ០៦៤ ករណី ទន្ទឹមពេល ករណីឆ្លងកូវីដ-១៩ ក្នុងប្រទេសកម្ពុជាសរុប មានចំនួន ១២៥ ២០១ ករណី ព្យាបាលជាសះស្បើយចំនួន ១១៩ ៨៨០ ករណី និងអ្នកបាត់បង់ជីវិតសរុប ៣ ០១៥ ករណី។ រដ្ឋាភិបាល តែងចាត់វិធានការបន្ទាន់ជាបន្តបន្ទាប់ ទទ្ទឹមនឹងការអំពាវនាវប្រជាពលរដ្ឋអនុវត្ត ៣កុំ ៣ការពារ និងចាក់វ៉ាក់សាំងបង្ការជំងឺកូវីដ-១៩៕

អត្ថបទ៖ ច័ន្ទ វីរៈ