វិបត្តិនយោបាយថៃ Archives - Kampuchea Thmey Daily

សភាថៃប្រជុំបោះឆ្នោតគាំទ្រ អានុទីន ឲ្យក្លាយជានាយករដ្ឋមន្ត្រីពេញលេញក្នុងអាណត្តិថ្មីចាប់ពីថ្ងៃនេះ

Rann Reuy — Thu, 19 Mar 2026 03:31:12 +0000

បើគ្មានអ្វីប្រែប្រួលទេ សភារបស់ប្រទេសថៃដែលទើបបោះឆ្នោតដំណើរការមុខងាររបស់ខ្លួនកាលថ្ងៃទី១៥ខែមីនានោះ នឹងប្រជុំបោះឆ្នោតជ្រើសរើសនយាយករដ្ឋមន្ត្រីថៃសម្រាប់អាណត្តិថ្មីនៅថ្ងៃទី១៩ខែមីនានេះ បន្ទាប់បីវិបត្តិនយោបាយក្នុងប្រទេសថៃកាលពីអាណត្តិមុននាំទៅដល់ការបង្កជម្លោះជាមួយកម្ពុជា រហូតដល់ផ្ទុះអាវុធទ្រង់ទ្រាយធំមិនធ្លាប់មាន។

លោក អានុទីន ឆានវីរៈគុល ត្រូវអ្នកកាសែតចោមរោមសួរកាលពីចុងខែកុម្ភៈ។ Thai Enquirer

មានការរំពឹងថា លោក អានុទីន ឆានវីរៈគុល ដែលដឹកនាំគណបក្សភូមិចៃថៃឈ្នះការបោះឆ្នោតកាលពីខែកុម្ភៈ និងបានកៀរគគណបក្សផ្សេងៗចូលរួមក្នុងរដ្ឋាភិបាលចម្រុះដែលមានអាសនៈសភាសរុប២៩០ នឹងទទួលបានការគំាទ្រពីសមាជិកសភាថៃ ឲ្យដឹកនាំរដ្ឋាភិបាលថៃសម្រាប់អាណត្តិថ្មី។

លោក អានុទីន ឆានវីរៈគុល នាយករដ្ឋមន្ត្រីចាំផ្ទះដែលបានឡើងកាន់អំណាចរយុៈពេលខ្លីក្នុងអាណត្តិមុន បានពន្យុះគំនិតជាតិនិយមបង្កជម្លោះព្រំដែនជាមួយកម្ពុជា បានរុញឲ្យគណបក្សភូមិចៃថៃរបស់លោក ឈ្នះការបោះឆ្នោតមុនអាណត្តិកាលថ្ងៃទី៨ខែកុម្ភៈ។

តាមសេចក្តីរាយការណ៍របស់រ៉យទ័រ លោក អានុទីន នឹងស្វែងរកការបោះឆ្នោតជ្រើសរើសលោកឱ្យឡើងកាន់អំណាចពេញលេញជាថ្មីនៅថ្ងៃទី១៩ ខែមីនានេះ ក្នុងការបោះឆ្នោតសភាជ្រើសរើសនាយករដ្ឋមន្ត្រី ដែលអាចនាំមកនូវស្ថិរភាពដ៏កម្រមួយសម្រាប់ប្រទេសដែលរងទុក្ខវេទនាជាយូរមកហើយដោយវិបត្តិនិងភាពចលាចលនយោបាយ។

គណបក្សភូមិចៃថៃរបស់លោក អានុទីន បានឈ្នះការបោះឆ្នោតសកលក្នុងប្រទេសថៃដោយមិននឹកស្មានដល់លើគួប្រជែង គឺគណបក្សប្រជាជនថៃដែលមានប្រជាប្រិយភាពតាំងពីការបោះឆ្នោតអាណត្តិមុន និង តាមរយៈការស្នង់មតិជាបន្តបន្ទាប់មុនការបោះឆ្នោតមកដល់។

ក្នុងការផ្លាស់ប្តូរដ៏គួរឱ្យភ្ញាក់ផ្អើលនៃជោគវាសនាសម្រាប់គណបក្សរបស់លោកអានុទីនដែលបានតស៊ូដើម្បីបន្សល់ទុកស្លាកស្នាមរបស់ខ្លួននៅក្នុងនយោបាយថៃ គណបក្សភូមិចៃថៃបានទទួលជ័យជម្នះយ៉ាងគួរឱ្យភ្ញាក់ផ្អើលនៅក្នុងការបោះឆ្នោតខែកុម្ភៈ បន្ទាប់ពីទាញយកប្រយោជន៍ពីរលកនៃការពន្យុះជាតិនិយមដែលកើតចេញពីជម្លោះយោធាជាមួយប្រទេសកម្ពុជាក្នុងឆ្នាំ២០២៥។

សេចក្តីរាយការណ៍របស់រ៉យទ័រ បានលើកឡើងថា ភាពជោគជ័យភាគច្រើនរបស់លោក អនុទីន បានមកពីកត្តាឱកាសនិយមរបស់អានុទីទក្នុងការទាញយកអត្ថប្រយោជន៍ពីការធ្លាក់ចុះនៃគណបក្សភឿថៃ ដែលធ្លាប់មានឥទ្ធិពលក្នុងឆាកនយោបាយថៃ។

ក្នុងការទាញប្រជាប្រិយភាពក្នុងឆាកនយោបាយថៃ ដំបូងឡើយ លោកអានុទីន បានប្រកាសផ្តាច់ខ្លួនពីសម្ព័ន្ធភាពក្នុងរដ្ឋាភិបាលចម្រុះជាមួយគណបក្សភឿថៃកាលពីខែមិថុនា២០២៥ ដោយសារតែ អតីតនាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ មានរឿងអាស្រូវក្នុងជម្លោះជាមួយក្រុមយោធាថៃដែលប្រកាសបិទច្រកព្រំដែនជាមួយកម្ពុជាជាឯកតោភាគីដែលធ្វើឲ្យជម្លោះព្រំដែនបានរីករាលដាលកាន់តែខ្លាំងឡើងៗ។

លោក អានុទីន ឆានវីរៈគុល បានទៅបញ្ចុះបញ្ចូលគណបក្សប្រជាជនថៃឲ្យគាំទ្រខ្លួនឡើងធ្វើជានាយករដ្ឋមន្ត្រីបណ្តោះអាសន្នត្រឹមរយៈពេល៤ខែ បន្ទាប់ពីតុលាការធម្មនុញ្ញសម្រេចបញ្ចប់តួនាទីរបស់លោកស្រី ផែថងថាន ស៊ីណាវ៉ាត្រ ពីនាយករដ្ឋមន្ត្រីថៃ ដោយសារតែរកឃើញកំហុសក្នុងការរំលោភក្រមរដ្ឋធម្មនុញ្ញ។

ក្រោយបានកាន់អំណាចដែលមានរយៈកាលត្រឹម៤ខែ រដ្ឋាភិបាលរបស់លោក អានុទីន ប្រឈមរឿងអាស្រូវជាច្រើនជាពិសេសការដោះស្រាយវិបត្តិនៅក្នុងប្រទេសមិនបានល្អ ដូចជា បញ្ហាទឹកជំនន់ គ្រោះធម្មជាតិនៅស្ទើរទូទាំងប្រទេស បញ្ហាធ្លាក់ចុះសេដ្ឋកិច្ច វិបត្តិនៅភាគខាងត្បូង និងកត្តាអសន្តិសុខជាច្រើន បានធ្វើឲ្យ លោក អានុទីន យកជម្លោះជាមួយកម្ពុជាដែលមានបញ្ហាស្រាប់ទៅហើយនោះ ទៅបញ្ឆេះកាន់តែខ្លាំងដើម្បីបង្កើតកំហឹងជាតិនិយមរបស់ប្រជាជនថៃ និង បានប្រកាសរំលាយសភាដើម្បីបោះឆ្នោតមុនអាណត្តិរយៈពេល៤ខែនោះទៅទៀត។

ការបញ្ឆេះកំហឹងជាតិនិយមនោះ បានធ្វើឲ្យគណបក្សរបស់លោក ដែលធ្លាក់ប្រជាប្រិយភាពដ៏ខ្លាំងនោះ បានក្លាយជាជម្រើសដ៏សំខាន់ក្នុងការបោះឆ្នោត ដែលធ្វើឲ្យគណបក្សលោកទទួលបានជ័យជម្នះរហូតដល់១៩៣អាសនៈសភា ខណៈបក្សប្រជាជនដែលជាគួប្រជែង បានត្រឹមតែ១១៨អាសន្នៈ ហើយគណបក្សភឿថៃដ៏សំខាន់បានត្រឹមតែ៧៤អាសន្នៈប៉ុណ្ណោះ៕

រ៉ាន់ រើយ

The post សភាថៃប្រជុំបោះឆ្នោតគាំទ្រ អានុទីន ឲ្យក្លាយជានាយករដ្ឋមន្ត្រីពេញលេញក្នុងអាណត្តិថ្មីចាប់ពីថ្ងៃនេះ appeared first on Kampuchea Thmey Daily.

របាយការណ៍អង្កេត៖ ថៃបំពានច្បាប់អន្តរជាតិក្នុងការបង្កសង្គ្រាមប្រឆាំងកម្ពុជា

Rann Reuy — Fri, 20 Feb 2026 07:26:29 +0000

មានការផ្សព្វផ្សាយនូវ«របាយការណ៍ស៊ើបអង្កេតថ្មីមួយ» ដែលបញ្ជាក់ថា ប្រទេសថៃបានបំពានច្បាប់អន្តរជាតិក្នុងការបង្កសង្គ្រាមជាមួយប្រទេសកម្ពុជាកាលពីឆ្នាំ២០២៥ ដោយសារតែការប្រើប្រាស់មធ្យោបាយប្រយុទ្ធដ៏សាហាវក្នុងបុព្វហេតុដ៏តូចតាចមិនសមរម្យបង្កទៅជាសង្គ្រាមប្រយុទ្ធដ៏សែនព្រៃផ្សៃ។

យន្តហោះចម្បាំង F-16 ដែលថៃប្រើក្នុងការប្រយុទ្ធចូលជ្រៅក្នុងទឹកដីកម្ពុជាកាលពីខែធ្នូឆ្នាំមុន។ The Nation

របាយការណ៍ស៊ើបអង្កេត ដែលផ្សព្វផ្សាយ ដោយ The New York Editorial នៅថ្ងៃទី២០ខែកុម្ភៈនេះ បានលើកឡើងថា អស់រយៈពេលជាច្រើនខែមកហើយក្នុងជម្លោះព្រំដែនដែលចោទប្រកាន់គ្នាទៅវិញទៅមក ហើយពេលនេះការស៊ើបអង្កេតដ៏សំខាន់១ បានបង្ហាញថា៖«ខណៈពេលដែលកម្ពុជាគ្រាន់តែលើកត្រឹមឈើគូសទេ ប្រទេសថៃវិញបានដុតបំផ្លាញប្រទេសជិតខាង»។

តាមរយៈការផ្សព្វផ្សាយលើផេកបណ្តាញសង្គមហ្វេសប៊ុក «The New York Editorial» ដោយបានអះអាងថា របាយការណ៍ដែលគាំទ្រដោយទិន្នន័យអន្តរជាតិ បានបង្ហាញពីរបៀបដែលជម្លោះព្រំដែនរវាងកម្ពុជានិងថៃប្រែក្លាយជាសង្គ្រាមខុសច្បាប់របស់ភាគីប្រទេសថៃដើម្បីឈ្នះការបោះឆ្នោតរបស់រដ្ឋាភិបាលដឹកនាំដោយគណបក្សភូមិចៃថៃរបស់លោក អានុទីន ឆានវីរៈគុល។

នៅក្នុងរយៈរបាយការណ៍អង្កេតនោះ ដោយសំអាងទៅលើធាតុផ្សំមួយចំនួនដែលវិសមមាត្រគ្នាក្នុងសង្គ្រាមពីរលើកមានរយៈពេលជិត១ខែនោះ រួមមានៈ វិសមមាត្រនៃកងកម្លាំង ការប្រើប្រាស់អាវុធខុសច្បាប់ដ៏សាហាវ សង្គ្រាមផ្លូវចិត្ត និង ការប្រើប្រាស់ល្បែងនយោបាយ។

ចំពោះវិសមមាត្រកងកម្លាំង របាយការណ៍នោះបានលើកឡើងថា នៅពេលដែលមីនកប់ក្នុងដីបានធ្វើឱ្យទាហានថៃម្នាក់រងរបួស ប្រទេសថៃបានឆ្លើយតបដោយប្រើប្រាស់យន្តហោះចម្បាំង F-16 និងការវាយប្រហារតាមអាកាសដ៏សាហាវមិនរើសទីតាំង មានប្រាសាទបុរាណ វត្តអារាម ស្ពានថ្នាល់ ផ្ទះប្រជាជន។ របាយការណ៍នេះហៅរឿងនេះថា «មិនសមាមាត្រយ៉ាងខ្លាំង»។

ត្រង់ចំណុចអាវុធខុសច្បាប់នោះ របាយការណ៍អង្កេត បានបញ្ជាក់ថា ប្រទេសថៃបានប្រើប្រាស់គ្រាប់បែកចង្កោម ដែលជាអាវុធត្រូវបានហាមឃាត់ដោយប្រទេសភាគច្រើននៅលើពិភពលោក ហើយក្រោយមក គ្រាប់បែកចង្កោមនោះបានឆក់យកជីវិតកុមារអាយុ ១០ឆ្នាំនៅខេត្តព្រះវិហារ។

ចំពោះសង្គ្រាមផ្លូវចិត្ត៖ របាយការណ៍នេះបានកត់ត្រាពីរបៀបដែលកងកម្លាំងថៃបានបំផ្ទុះ «សំឡេងខ្មោច» និងតន្ត្រីបុណ្យសពនៅពេលរាត្រី រហូតដល់ម៉ោងជិតភ្លឺ សំដៅចូលទៅក្នុងភូមិរបស់ប្រជាជន ដើម្បីបំភិតបំភ័យកុមារដែលកំពុងដេក។

ចំពោះល្បែងនយោបាយវិញ របាយការណ៍នោះ បានលើកឡើងថា មានភស្តុតាងបញ្ជាក់ថា រដ្ឋាភិបាលថៃបានប្រើប្រាស់ព្រំដែន និងជីវិតរបស់ប្រជាជននៃប្រទេសទាំងពីរជាយុទ្ធសាស្ត្រឃោសនាបោះឆ្នោត ដើម្បីឈ្នះការបោះឆ្នោតរបស់ពួកគេ។

សរុបសេចក្តីផ្អែកតាមកត្តាសំខាន់ៗខាងលើ របាយការណ៍នោះបានធ្វើសេចក្តីសន្និដ្ឋានដោយច្បាស់លាស់ថា ការបង្កើតវិបត្តិគឺអាក្រក់ ប៉ុន្តែកាន់តែអាក្រក់គឺការធ្វើសង្គ្រាមខុសច្បាប់ប្រឆាំងនឹងជនស៊ីវិល៕

The post របាយការណ៍អង្កេត៖ ថៃបំពានច្បាប់អន្តរជាតិក្នុងការបង្កសង្គ្រាមប្រឆាំងកម្ពុជា appeared first on Kampuchea Thmey Daily.

ប្រធានបក្សប្រជាជន ប្រកាសធ្វើជាបក្សប្រឆាំងមិនគាំទ្រលោកអានុទីនធ្វើជានាយករដ្ឋមន្ត្រីទេ

Rann Reuy — Sun, 08 Feb 2026 15:21:47 +0000

លោក Natthaphong Ruengpanyawut បេក្ខជននាយករដ្ឋមន្ត្រីនៃគណបក្សប្រជាជន (People Party) បានប្រកាសដាច់ណាត់ថា គណៈបក្សរបស់លោកនឹងធ្វើជាបក្សប្រឆាំង ដោយមិនចូលរួមគាំទ្រដាច់ខាតចំពោះលោក អានុទីន ឆានវីរៈរគុល ធ្វើជានាយករដ្ឋមន្ត្រីសម្រាប់ដឹកនាំរដ្ឋាភិបាលថៃបន្ទាប់នោះ។

គណបក្សប្រជាជនថៃដែលត្រូវបានព្យាករកន្លងមកថា ទំនងឈ្នះការបោះឆ្នោតថៃលើកនេះ ប៉ុន្តែលទ្ធផលជាក់ស្តែងពីការរាប់សន្លឹកឆ្នោតបណ្តោះអាសន្នបង្ហាញថា គណបក្សនេះមិនទំនងឈ្នះការបោះឆ្នោតនោះទេ។

ខណៈពេលដែលការរាប់សន្លឹកឆ្នោតបណ្តោះអាសន្នឈានដល់៣១%នោះ បង្ហាញថា គណបក្សរបស់ក្រុមយុវជននេះ គ្មានសង្ឃឹមលើការឈ្នះឆ្នោតជាថ្មីដូចការបោះឆ្នោតកាលពីឆ្នាំ២០២៣នោះទេ ដែលជាក្តីសង្ឃឹមថា អាចឡើងកាន់អំណាចដោយសារតែការបោះឆ្នោតប្រជាមតិលើការកែប្រែរដ្ឋធម្មនុញ្ញនោះ ប្រធានគណបក្សនេះបានជ្រើសរើសផ្លូវដើរនយោបាយរួចហើយ គឺធ្វើជាបក្សប្រឆាំង ដោយមិនគាំទ្រដល់គណបក្សភូមិចៃថៃដែលមានលោក អានុទីន ឆានវីរៈគុល ជានាយករដ្ឋមន្ត្រី ឡើយ៕

The post ប្រធានបក្សប្រជាជន ប្រកាសធ្វើជាបក្សប្រឆាំងមិនគាំទ្រលោកអានុទីនធ្វើជានាយករដ្ឋមន្ត្រីទេ appeared first on Kampuchea Thmey Daily.

បក្សរបស់អានុទីននាំមុខកាន់តែឆ្ងាយបណ្តោះអាសន្ន ប៉ុន្តែបក្សប្រជាជនឈ្នះដាច់នៅមណ្ឌលបាងកក

Rann Reuy — Sun, 08 Feb 2026 15:06:27 +0000

ការរាប់សន្លឹកឆ្នោតនៅប្រទេសកំពុងតែបន្ត ដោយបង្ហាញថា គណបក្សភូមិចៃថៃ (Bhumjaithai) របស់នាយករដ្ឋមន្ត្រីជំរុញជាតិនិយម លោក អានុទីន ឆានវីរៈគុល កំពុងនាំមុខបណ្តោះអាសន្ន គណបក្សប្រជាជនថៃនាំមុខទាំងអស់នៅមណ្ឌលក្រុងបាងកកទាំង៣៣អាសនៈ ហើយប្រធានគណបក្សប្រជាធិបតេយ្យ លោក អាប់ភីស៊ីត វេចាជីវ៉ា ដែលជាបក្សបានប្រកាសខ្លួនធ្វើបក្សប្រឆាំង។

លោក អានុទីន បានឱបប្រពន្ធនៅស្នាក់ការគណបក្ស ពេលនាងមកដល់ និងពេលអាសនៈសភាឡើងដល់២០០ ខណៈការរាប់សន្លឹកឆ្នោតបាន៣១%។ កាសែតថៃ

នៅពេលដែលការរាប់សន្លឹកឆ្នោតបានប្រហែល៣!% និងគ្មានសញ្ញាឈ្មះការបោះឆ្នោតលើកនេះ លោក អាប់ភីស៊ីត វេចាជីវ៉ា (Abhisit Vejjajiva) ដែលជាអតីតនាយករដ្ឋមន្ត្រីថៃពីឆ្នាំ២០០៨ ដល់ឆ្នាំ២០១១ ត្រូវបានសារព័ត៌មានថៃចុះផ្សាយថា លោកបង្ហាញពីការត្រៀមខ្លួនសម្រាប់ធ្វើជាគណបក្សប្រឆាំង ខណៈដែលគណបក្សប្រជាធិបតេយ្យរបស់លោកមានភាពយឺតយ៉ាវក្នុងការកើនឡើងសំឡេង ពីការរាប់សន្លឹកឆ្នោតដែលកំពុងបន្តនោះ។

កាសែតថៃ The Thai Enquirer បានផ្សាយថា លោក អាប់ភីស៊ីត វេចាជីវ៉ា មេដឹកនាំគណបក្សប្រជាធិបតេយ្យ បានអះអាងថា លោកបានត្រៀមខ្លួនរួចជាស្រេចសម្រាប់គណបក្សនេះ ដើម្បីបម្រើជាគណបក្សប្រឆាំង បន្ទាប់ពីលទ្ធផលបោះឆ្នោតក្រៅផ្លូវការបានបង្ហាញពីការកើនឡើងមានកំណត់សម្រាប់គណបក្សនេះ។

យោងតាមលទ្ធផលបឋមដែលផ្សព្វផ្សាយដោយសារព័ត៌មានថៃ គណបក្សភូមិចៃថៃ របស់លោកអានុទីន ឆានវីរៈគុល បាននាំមុខដាច់លើការបោះឆ្នោតនៅថ្ងៃអាទិត្យទី៨ខែកុម្ភៈនេះ ខណៈគណបក្សប្រជាជន និងគណបក្សភឿថៃ នៅដាច់ឆ្ងាយពីចំនួនដែលត្រូវការដើមឈ្នះការបោះឆ្នោត។

ជារឿងគួរឲ្យកត់សម្គាល់ គណបក្សប្រជាជនថៃ បានឈ្នះអាសនៈទាំងអស់នៅមណ្ឌលក្រុងបាងកកដែលមានចំនួន៣៣កៅអី ប៉ុន្តែគណបក្សភូមិចៃថៃ បានឈ្នះខ្លាំងនៅមណ្ឌលផ្សេងៗក្រៅពីក្រុងបាងកក។

ទន្ទឹមនឹងនោះដែរ ប្រជាជនថៃភាគច្រើនក៏បានបោះឆ្នោតគាំទ្រដល់ការកែប្រែរដ្ឋធម្មនុញ្ញផងដែរ៕

រ៉ាន់ រើយ

The post បក្សរបស់អានុទីននាំមុខកាន់តែឆ្ងាយបណ្តោះអាសន្ន ប៉ុន្តែបក្សប្រជាជនឈ្នះដាច់នៅមណ្ឌលបាងកក appeared first on Kampuchea Thmey Daily.

ការវាយប្រហារកើតឡើងនៅជិតផុតម៉ោងបោះឆ្នោតនៅយ៉ាឡា មន្ត្រីល្បាតម្នាក់របួស

Rann Reuy — Sun, 08 Feb 2026 11:18:25 +0000

ការបំផ្ទុះគ្រាប់បែក និងការបាញ់ប្រហារបានវាយប្រហារក្រុមល្បាតសន្តិសុខបោះឆ្នោតនៅខេត្តយ៉ាឡា បណ្តាលឲ្យមន្ត្រីម្នាក់រងរបួស នៅមុនម៉ោងបិទស្ថានីយបោះឆ្នោត។

រូបភាពនៃការវាយប្រហារដោយសារការបង្កៃគ្រាប់បែកនៅភាគខាងត្បូងថៃកន្លែងទៅថ្មីៗនេះ។

តាមសេចក្តីរាយការណ៍របស់សារព័ត៌មានថៃ ការផ្ទុះមួយបានកើតឡើងបន្ទាប់ពីការបាញ់ប្រហារគ្នាបានធ្វើឱ្យមន្ត្រីសន្តិសុខម្នាក់រងរបួសក្នុងអំឡុងពេលដើរល្បាត អំឡុងពេលបោះឆ្នោតនៅស្រុក Bannang Sata ខេត្តយ៉ាឡា នៅវេលាម៉ោងជិត៥ល្ងាច ជាពេលវេលាដែលត្រូវបិទការបោះឆ្នោតនៅថ្ងៃអាទិត្យ។

សារព័ត៌មានថៃ បានយោងតាមការបង្ហោះរបស់ NBT Yala នៃនាយកដ្ឋានទំនាក់ទំនងសាធារណៈ ហេតុការណ៍នេះបានកើតឡើងនៅម៉ោងប្រហែល ៤:៣៥ រសៀល នៅជិតស្ពាន Ban Wang Hin ក្នុងភូមិទី ៨ នៃBannang Sata។

របាយការណ៍បឋមបាននិយាយថា ការផ្ទុះ និងការបាញ់ប្រហារជាបន្តបន្ទាប់បានកំណត់គោលដៅលើការល្បាតយោធាមួយដែលត្រូវបានចាត់តាំងឱ្យធានាផ្លូវបោះឆ្នោតនៅក្នុងតំបន់នោះ។ ចាប់តាំងពីពេលនោះមក អាជ្ញាធរបានសម្របសម្រួលជាមួយអង្គភាពទាំងអស់ដើម្បីរឹតបន្តឹងវិធានការសន្តិសុខ និងបង្កើនការល្បាតតាមបណ្តោយផ្លូវសំខាន់ៗ។

មន្ត្រីម្នាក់ ដែលត្រូវបានគេស្គាល់ថាជាឧត្តមសេនីយ៍ Worawut បានរងរបួសនៅក្នុងហេតុការណ៍នេះ។ .

The post ការវាយប្រហារកើតឡើងនៅជិតផុតម៉ោងបោះឆ្នោតនៅយ៉ាឡា មន្ត្រីល្បាតម្នាក់របួស appeared first on Kampuchea Thmey Daily.

លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង

Rann Reuy — Sun, 08 Feb 2026 06:59:17 +0000

ការបោះឆ្នោតនៅក្នុងប្រទេសថៃកំពុងតែប្រព្រឹត្តទៅដើម្បីជ្រើសរើសរដ្ឋាភិបាលថ្មីជំនួសឲ្យអាណត្តិរដ្ឋាភិបាលដែលដើរតាមរដ្ឋធម្មនុញ្ញតាក់តែងដោយរបបយោធា និងការគាបសង្កត់ពីការប្រើប្រាស់អំណាចដ៏ខ្លាំងរបស់ស្តេចថៃដើម្បីបង្រ្កាបអ្នកប្រជាធិបតេយ្យ។

ទោះបីជាការបោះឆ្នោតនៅប្រទេសថៃលើកនេះបានរៀបចំ ក្រោមបរិយាកាសដ៏ឈឺចាប់នៃវិបត្តិសង្គម សេដ្ឋកិច្ច អស្ថិរភាពនយោបាយ និង ការបង្កសង្គ្រាមរបស់អ្នកនយោបាយថៃមកលើប្រទេសកម្ពុជា ក៏វិបត្តិខាងលើ មិនអាចដោះស្រាយបានដោយងាយដែរ។

ប្រទេសបានជួបប្រទះនូវវិបត្តិរដ្ឋធម្មនុញ្ញយ៉ាងធ្ងន់ធ្ងរ ដោយសារតែរដ្ឋធម្មនុញ្ញនោះរៀបចំឡើងដោយក្រោយយោធា លម្អៀងទៅរកស្ថាប័នរាជបល្ល័ង្ក ដោយសារតែច្បាប់រដ្ឋធម្មនុញ្ញនោះ កើតឡើងក្រោយ១ឆ្នាំនៃការឡើងសោយរាជរបស់ព្រះរាជាថៃបច្ចុប្បន្ន គឺ មហាវ៉ាជិរ៉ាឡុងកន រាមាទី១០ ក្រោយពីប្រទេសនេះបានធ្វើទុកបុកម្នេញអ្នកប្រជាធិបតេយ្យដែលឈ្នះការបោះឆ្នោតកន្លងមក មិនឲ្យឡើងកាន់អំណាចតាមឆន្ទៈដែលប្រជារាស្រ្តប្រគល់ឲ្យ។

ជាមួយគ្នានេះការបោះឆ្នោតនៅប្រទេសថៃលើកនេះ គឺ មានកម្រងសំណួរសម្រាប់ការធ្វើប្រជាមតិដើម្បីធ្វើវិសោធនកម្មផងដែរ។

ប៉ុន្តែលទ្ធផលនៃការស្ទង់មតិបង្ហាញថា គ្មានគណបក្សណាមួយទំនងជាទទួលបានសំឡេងភាគច្រើនសរុបនៃអាសនៈទាំង ៥០០ នៅក្នុងសភានោះទេ មានន័យថាពួកគេទំនងជាត្រូវបង្កើតរដ្ឋាភិបាលចម្រុះមួយ ដែលគេអាចមើលឃើញថា ក្រុមអ្នកប្រជាធិបតេយ្យកំណែទម្រង់ មានគណបក្សប្រជាជនថៃ និងគណបក្សភឿថៃ អាចនឹងបង្រួបបង្រួមជាមួយគណបក្សតូចៗផ្សេងទៀត។

លោក អានុទីន និង លោករឿងបញ្ញាវុឌ្ឍ ជាគូប្រជែងនយោបាយចុងក្រោយ។

ដោយឡែកគណបក្សភូមិចៃថៃរបស់លោក អានុទីន ឆានវីរៈគុល វិញក៏អាចមានលទ្ធភាពបង្កើតរដ្ឋាភិបាលចម្រុះដូចគ្នា បើខ្លួនទទួលបានការគាំទ្រច្រើន។ ទោះបីជាមានប្រជាប្រិយភាពក៏ដោយ ក៏ឱកាសនៅតែមានច្រើនប្រឆាំងនឹងគណបក្សប្រជាជន។

នៅឆ្នាំ ២០២៣ គណបក្សមុនរបស់គណបក្សប្រជាជនបច្ចុប្បន្ន គឺគណបក្ស Move Forward ត្រូវបានរារាំងមិនឱ្យបង្កើតរដ្ឋាភិបាល ទោះបីជាគណបក្សនេះបានឈ្នះការបោះឆ្នោតច្រើនបំផុតក៏ដោយ។ ការគាំទ្ររបស់គណបក្សនេះចំពោះការធ្វើវិសោធនកម្មច្បាប់ប្រមាថព្រះមហាក្សត្រដ៏ចម្រូងចម្រាសរបស់ប្រទេសថៃ បានធ្វើឱ្យគណបក្សនេះមានការខ្វែងគំនិតជាមួយក្រុមកម្លាំងអភិរក្សនិយមដ៏មានឥទ្ធិពលនៅក្នុងសភា ហើយ នៅទីបំផុត ក្រុមព្រឹទ្ធសមាជិកដែលកើតឡើងពីការតែងតាំងភាគច្រើនមិនគាំទ្រឲ្យកាន់អំណាចនោះទេ។

តាមសេចក្តីរាយការណ៍របស់ BBC មិនដូចឆ្នាំ ២០២៣ ទេ លើកនេះព្រឹទ្ធសភាមិនត្រូវបានអនុញ្ញាតឱ្យចូលរួមក្នុងការជ្រើសរើសរដ្ឋាភិបាលបន្ទាប់ទេ។

យ៉ាងណាក៏ដោយ មនុស្សគ្រប់គ្នានៅក្នុងប្រទេសថៃរំពឹងថានឹងមានចលនាមួយចំនួនដើម្បីរារាំងគណបក្សប្រជាជនម្តងទៀត។ មានសំណុំរឿងមួយត្រូវបានដាក់ប្តឹងប្រឆាំងនឹងឥស្សរជនឈានមុខគេចំនួន ៤៤ រូបរបស់ខ្លួន ដោយរួមទាំងបេក្ខជនសភាចំនួន ១៥ រូបរបស់ពួកគេ ជាមួយគណៈកម្មការប្រឆាំងអំពើពុករលួយជាតិ ជុំវិញការគាំទ្រផ្ទាល់ខ្លួនរបស់ពួកគេចំពោះសំណើប្រមាថព្រះមហាក្សត្រ។

បណ្តឹងដែលមានស្រាប់ស្ថិតនៅក្នុងដៃរបស់អាជ្ញាធរស៊ើបអង្កេតស្រាប់នោះអាចត្រូវបានប្រើដើម្បីហាមឃាត់ពួកគេទាំងអស់មិនឱ្យចូលរួមក្នុងនយោបាយ៕

រ៉ាន់ រើយ

The post លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង appeared first on Kampuchea Thmey Daily.

ឥទ្ធិពលថាក់ស៊ីននៅតែខ្លាំងក្នុងនយោបាយថៃ ដែលត្រៀមធ្វើនយោបាយលើកទី២ក្រោយបោះឆ្នោត

Rann Reuy — Sun, 08 Feb 2026 04:23:53 +0000

ត្បិតតែស្ថិតនៅក្នុងមន្ទីរឃុំឃាំងចាប់តាំងពីដើមខែកញ្ញាឆ្នាំ២០២៥ លោក ថាក់ស៊ីន ស៊ីណាវ៉ាត្រ អតីតនាយករដ្ឋន្ត្រិថៃដែលបានចូលកាន់អំណាច់ដំបូងក្នុងឆ្នំា២០០១ បានបន្តឥទ្ធិពលនយោបាយរបស់លោកដ៏ខ្លាំងក្នុងសង្គមថៃ។

អស់រយៈពេលជិតបីទសវត្សរ៍មកហើយ លោក ថាក់ស៊ីន ស៊ីណាវ៉ាត្រ និងរាជវង្សនយោបាយរបស់លោក បានគ្របដណ្ដប់លើនយោបាយប្រទេសថៃ។ នេះបើតាមការចុះផ្សាយរបស់ BBC ដែលកំពុងតាមផ្តិតយកព័ត៌មានយ៉ាងដិតដល់អំពីការបោះឆ្នោតនៅប្រទេសថៃក្នុងថ្ងៃនេះ។

លោក ថាក់ស៊ីន ដែលបានក្លាយជាមហាសេដ្ឋី និងជានាយករដ្ឋមន្ត្រី ឥឡូវនេះកំពុងជាប់ពន្ធនាគារ ប៉ុន្តែអ្នកជំនាញនយោបាយខ្លះជឿថា លោកនៅតែជាប់ពាក់ព័ន្ធយ៉ាងខ្លាំងនៅក្នុងយុទ្ធសាស្ត្រយុទ្ធនាការរបស់គណបក្សភឿថៃរបស់លោក។ ក្មួយប្រុសរបស់លោក ថាក់ស៊ីន គឺលោក យុតឆាណាន់ វង្សសាវ៉ាត (Yodchanan Wongsawat) គឺជា បេក្ខភាពនាយករដ្ឋមន្ត្រីអ្នកតំណាងរបស់គណបក្សភឿថៃដែលគេដឹងថា មានគ្រឹះរឹងមាំក្នុងបណ្តាខេត្តភាគខាងជើង និងខេត្តភាគឦសាន្តប្រទេស។

តាមការស្រង់សម្តីរបស់ BBC លោកស្រី ពេត្រា អាល់ឌើរមែន (Petra Alderman) នៃសាលាសេដ្ឋកិច្ចទីក្រុងឡុងដ៍ បាននិយាយថា៖«ខ្ញុំគិតថាអ្វីដែលយើងកំពុងឃើញគឺជាការរៀបចំបណ្តោះអាសន្ន ប្រហែលជានៅក្នុងការគិតទុករបស់លោក ថាក់ស៊ីន។ ហើយបន្ទាប់មកសំណួរគឺថា តើផែនការរបស់លោកជាអ្វី នៅពេលដែលលោកចេញពីពន្ធនាគារ»។

ជាមួយការសុខចិត្តជ្រើសរើសការជាប់ពន្ធនាគារជាជាងការគេចខ្លួច នៅមុនតុលាការប្រទេសថៃសម្រេចសាលក្រមដោយតម្រូវឲ្យលោកវិលទៅអនុវត្តទោសដែលលោកយកលេសថាមានជម្ងឺ ដើម្បីគេចពីការទទួលខុសត្រូវនោះ គឺជាយុទ្ធសាស្រ្តនយោបាយរបស់លោកថាក់ស៊ីន ទៅវិញទេ។

លោកស្រី អាល់ឌើរមែន និយាយថា ការពិតដែលថាលោក ថាក់ស៊ីន កំពុងជាប់ពន្ធនាគារជាជាងការរត់គេចខ្លួននោះគឺជាចលនាដែលបានគណនា ដើម្បីត្រៀមខ្លួនសម្រាប់សកម្មភាពនយោបាយទីពីរ – ដើម្បីសរសេររឿងរ៉ាវផ្ទាល់ខ្លួនរបស់លោកអំពី «សត្វបក្សីហ្វូនិច (phoenix) ដែលងើបហើរចេញពីគំនរផេះ»៕

រ៉ាន់ រើយ

The post ឥទ្ធិពលថាក់ស៊ីននៅតែខ្លាំងក្នុងនយោបាយថៃ ដែលត្រៀមធ្វើនយោបាយលើកទី២ក្រោយបោះឆ្នោត appeared first on Kampuchea Thmey Daily.

មុនបោះឆ្នោតប៉ុន្មានម៉ោង អានុទីន ច្រានចោលរូបថតដែលស្និទ្ធស្នាលជាមួយឧក្រិដ្ឋជនឆបោក

Rann Reuy — Sun, 08 Feb 2026 02:52:44 +0000

នៅមុនប៉ុន្មានម៉ោងនៃការបោះឆ្នោតជាតិរបស់ប្រទេសថៃដែលនឹងអាចកំណត់ជោគវាសនានយោបាយថៃថ្មី លោក អានុទីន ឆានវីរៈគុល ដែលជាអ្នកនយោបាយជ្រើសរើសយកជម្លោះជាមួយកម្ពុជាដើម្បីបង្កើនប្រជាប្រិយភាព និងជាតិនិយមនោះ បានច្រានចោលព័ត៌មានដែលបង្ហាញថា លោកជាប់ពាក់ព័ន្ធនឹងបណ្តាញឧក្រិដ្ឋជនឆ្លងដែន។

រូបភាពបង្ហាញលោក អានុទីន អង្គុយពិសាអាហារជាមួយលោក Ben Smith ប៉ុន្តែលោកច្រានចោលនិងចោទថា ជារូប AI។

តាមការចុះផ្សាយរបស់ The Thai Enquirer លោក អានុទីន ឆានវីរៈគុល បានបដិសេធរូបភាពមួយដែលបង្ហាញលោក មានទំនាក់ទំនងអាជីវកម្មជាមួយក្រុមឧក្រិដ្ឋជន ដោយលោកចោទថា រូបភាពនោះត្រូវវបានបង្កើតឡើងដោយបច្ចេកវិទ្យាបញ្ញាសិប្បនិម្មិត (AI) ។

រូបភាពនោះ បានបង្ហាញយ៉ាងច្បាស់ពីការអង្គុយរួមតុបរិភោគអាហារជាមួយគ្នា ដែលជាការបង្ហាញឲ្យឃើញពីទំនាក់អំនងដ៏ស្និទ្ធស្នាលរវាង លោក អានុទីន ឆានវីរៈគុល នឹងលោក Benjamin Mauerberger ដែលត្រូវបានគេស្គាល់ថាជា Ben Smith ជាឧក្រិដ្ឋជនឆ្លងដែនដ៏ល្បីល្បាញ។

តាមការចេញផ្សាយនានាបង្ហាញថា លោក Benjamin Mauerberger ដែលតែងតែប្រើឈ្មោះ Ben Smith ហើយពេលខ្លះទៀតក៏ប្រើឈ្មោះ Ben Berger គឺជាអ្នកជំនួញ និងជាអ្នកភ្ជាប់ទំនាក់ទំនងរកស៊ីជនជាតិអាហ្វ្រិកខាងត្បូង ដែលបានក្លាយជាឥស្សរជនសំខាន់ក្នុងការស៊ើបអង្កេតសំខាន់ៗលើការលាងលុយកខ្វក់ និងបណ្តាញឆបោកនៅអាស៊ីអាគ្នេយ៍ ជាពិសេសដែលពាក់ព័ន្ធនឹងប្រទេសថៃ។

កាសែតថៃ បានផ្សាយថា លោក អានុទីន នាយករដ្ឋមន្ត្រីចាំផ្ទះ និងជាមេដឹកនាំគណបក្ស Bhumjaithai នៅថ្ងៃសៅរ៍ បានច្រានចោលរូបភាពដែលត្រូវបានចែកចាយយ៉ាងទូលំទូលាយ ដោយនិយាយថារូបភាពនេះត្រូវបានបង្កើតឡើងដោយបញ្ញាសិប្បនិម្មិត និងសួរអំពីហេតុផលនៅពីក្រោយការចេញផ្សាយរបស់វា។

ថ្លែងនៅទីស្នាក់ការកណ្តាលរបស់គណបក្ស លោក អានុទីន បាននិយាយថា រូបភាពនេះត្រូវបានបង្ហាញមានតាំងពីឆ្នាំ ២០០៥ នៅពេលដែលលោកនៅជាអនុរដ្ឋមន្ត្រីពាណិជ្ជកម្ម ប៉ុន្តែបានទទូចថាវាមិនមែនជារូបភាពពិតប្រាកដនោះទេ។

លោក អានុទីន ជាអ្នកនយោបាយជើងចាស់ និងជាកូនរបស់អតីតរដ្ឋមន្ត្រីក្រសួងមហាផ្ទៃ ដែលប្រវត្តិគ្រួសាររបស់លោក កាន់តំណែងជាថ្នាក់ដឹកនាំកំពូលរដ្ឋក្រសួងមហាផ្ទៃថៃជាយូរមកហើយ។ លោក អានុទីន ចុងក្រោយនេះបានប្រើប្រាស់ជម្លោះជាមួយកម្ពុជាដើម្បីបង្កើនប្រជាប្រិយភាពផ្ទាល់ខ្លួនសម្រាប់ការបោះឆ្នោត ដែលលោកសង្ឃឹមបន្តកាន់អំណាចបន្តទៀត។

ទោះបីជាបែបនេះក្តី ការស្ទង់មតិកន្លងមក លោក អានុទីន គ្មានប្រជាប្រិយភាពឈ្នះការបោះឆ្នោតនៅថ្ងៃអាទិត្យទី៨ខែកុម្ភៈនេះទេ៕

រ៉ាន រើយ

The post មុនបោះឆ្នោតប៉ុន្មានម៉ោង អានុទីន ច្រានចោលរូបថតដែលស្និទ្ធស្នាលជាមួយឧក្រិដ្ឋជនឆបោក appeared first on Kampuchea Thmey Daily.

វិបត្តិនយោបាយថៃ Archives - Kampuchea Thmey Daily

​​របាយការណ៍អង្កេត​៖ ថៃ​បំពាន​ច្បាប់អន្តរជាតិ​ក្នុងការ​បង្ក​សង្គ្រាម​​​ប្រឆាំង​កម្ពុជា​

​​ប្រធានបក្ស​ប្រជាជន ប្រកាស​ធ្វើជាបក្សប្រឆាំង​មិនគាំទ្រ​​​​លោក​អានុទីន​ធ្វើជានាយករដ្ឋមន្ត្រី​ទេ​​

​​​កា​រវាយប្រហារ​កើតឡើង​​នៅជិត​ផុតម៉ោងបោះឆ្នោតនៅយ៉ាឡា​ មន្ត្រីល្បាតម្នាក់របួស​​​

​​​លទ្ធភាព​ជាប់គាំងនយោបាយ​នៅថៃ​នៅតែខ្ពស់​ ខណៈ​​ក្រុម​​កែទម្រង់​​​អាច​ត្រូវរារាំង​

ឥទ្ធិពលថាក់ស៊ីន​នៅតែ​ខ្លាំង​ក្នុង​​នយោបាយថៃ ដែលត្រៀម​ធ្វើ​នយោបាយលើក​ទី២​ក្រោយ​បោះឆ្នោត​​​​

​​​មុន​បោះឆ្នោតប៉ុន្មានម៉ោង អានុទីន​ ​ច្រាន​ចោល​​រូប​ថត​​​ដែលស្និទ្ធស្នាល​ជាមួយ​ឧក្រិដ្ឋ​ជន​ឆបោក​​

របាយការណ៍អង្កេត៖ ថៃបំពានច្បាប់អន្តរជាតិក្នុងការបង្កសង្គ្រាមប្រឆាំងកម្ពុជា

ប្រធានបក្សប្រជាជន ប្រកាសធ្វើជាបក្សប្រឆាំងមិនគាំទ្រលោកអានុទីនធ្វើជានាយករដ្ឋមន្ត្រីទេ

ការវាយប្រហារកើតឡើងនៅជិតផុតម៉ោងបោះឆ្នោតនៅយ៉ាឡា មន្ត្រីល្បាតម្នាក់របួស

លទ្ធភាពជាប់គាំងនយោបាយនៅថៃនៅតែខ្ពស់ ខណៈក្រុមកែទម្រង់អាចត្រូវរារាំង

ឥទ្ធិពលថាក់ស៊ីននៅតែខ្លាំងក្នុងនយោបាយថៃ ដែលត្រៀមធ្វើនយោបាយលើកទី២ក្រោយបោះឆ្នោត

មុនបោះឆ្នោតប៉ុន្មានម៉ោង អានុទីន ច្រានចោលរូបថតដែលស្និទ្ធស្នាលជាមួយឧក្រិដ្ឋជនឆបោក