វឿន វាសនា Archives - Kampuchea Thmey Daily

វឿន វាសនា ទម្លាយអារម្មណ៍ពិត ថា សឹងមិនជឿ ដែលកម្ពុជា អាចបំបាក់ម្ចាស់ជើងឯកអាស៊ី AVC Cup បាន

Kosal Sem — Mon, 20 Jul 2026 04:39:50 +0000

ស្មាត់ស្តាំរបស់ក្រុមបាល់ទះ ជម្រើសជាតិ កម្ពុជា វឿន វាសនា បានបង្ហាញអារម្មណ៍រំភើប និងមិនគួរឱ្យជឿ ដែល កម្ពុជា អាចយកឈ្នះក្រុមម្ចាស់ជើងឯកពាន AVC Cup 2026 ជម្រើសជាតិ ឥណ្ឌូណេស៊ី ដើម្បីគ្រងជើងឯកពាន SEA V. Cup 2026 បាន។

ក្រុមបាល់ទះ កម្ពុជា បានសាងភាពភ្ញាក់ផ្អើលជាខ្លាំង នៅក្នុងពាន SEA V. Cup 2026 នេះ បន្ទាប់ពីកែប្រែប្រវត្តិសាស្ត្រ ពីការលេងមិនឈ្នះសូម្បី ១ ប្រកួតកាលពីឆ្នាំ ២០២៥ រហូតដណ្តើមបានតំណែងជើងឯកនៅឆ្នាំ ២០២៦។

ក្រោយបញ្ចប់ការប្រកួត វឿន វាសនា បានថ្លែងប្រាប់អ្នកសារព័ត៌មាន ហ្វីលីពីន ដូច្នេះ ថា៖ «ខ្ញុំមានអារម្មណ៍អស្ចារ្យណាស់ ព្រោះយើងអាចយកឈ្នះក្រុមដែលជាម្ចាស់ជើងឯក AVC Cup បាន។ ពិតជាអស្ចារ្យមែនទែន។ ពួកយើងស្ទើរតែមិនជឿថា វាបានកើតឡើង ប៉ុន្តែពួកយើងពិតជាធ្វើបាន»។

ម្ចាស់ពាន MVP និងស្មាត់ស្តាំល្អបំផុតរូបនេះ បានរួមចំណែកយ៉ាងធំធេង ជាមួយនឹងមិត្តរួមក្រុមផ្សេងទៀត ដើម្បីជួយក្រុម កម្ពុជា យកឈ្នះក្រុម ឥណ្ឌូណេស៊ី ជាលើកដំបូងនៅក្នុងវគ្គផ្តាច់ព្រ័ត្រពាន SEA V. Cup 2026។ កម្ពុជា បានឈ្នះ ឥណ្ឌូណេស៊ី យ៉ាងតឹងតែង ក្នុងលទ្ធផល ៣ សិតទល់ ២ ។

សិតទី ១ កម្ពុជា ឈ្នះក្នុងពិន្ទុ ២៥-២៣, សិតទី២ បន្តឈ្នះដោយពិន្ទុ ២៦-២៤។ ឈានចូលសិតទី៣ និងទី៤ ឥណ្ឌូណេស៊ី បានឈ្នះវិញដោយពិន្ទុ ២៣-២៥ និង ២២-២៥។ លុះសិតទី ៥ កម្ពុជា បានយកឈ្នះដោយពិន្ទុ ១៥-១១។

ការយកឈ្នះលើក្រុម ឥណ្ឌូណេស៊ី មួយប្រកួតនេះ ពិតជារឿងអស្ចារ្យណាស់សម្រាប់ប្រវត្តិសាស្ត្របាល់ទះ កម្ពុជា ទាំងមូល ព្រោះក្រុមយក្សប្រចាំតំបន់អាស៊ានមួយនេះ ទើបតែបានឈ្នះពាន AVC Cup ថ្មីថ្មោង មុនមកលេងពាន SEA V. Cup 2026 នេះ។ នៅវគ្គផ្តាច់ព្រ័ត្រ ឥណ្ឌូណេស៊ី បានឈ្នះក្រុម កូរ៉េខាងត្បូង រក្នុងលទ្ធផល ៣ សិត ០៕

អត្ថបទ៖ សេម កុសល

The post វឿន វាសនា ទម្លាយអារម្មណ៍ពិត ថា សឹងមិនជឿ ដែលកម្ពុជា អាចបំបាក់ម្ចាស់ជើងឯកអាស៊ី AVC Cup បាន appeared first on Kampuchea Thmey Daily.

ស័ក្តិសមបំផុត! វឿន វាសនា ឈ្នះ ពានឯកត្តជន ២ ម្នាក់ឯង ក្រោយជួយកម្ពុជា គ្រងជើងឯក SEA V. Cup 2026

chean virakbot — Sun, 19 Jul 2026 13:05:08 +0000

ក្រុមបាល់ទះជម្រើសជាតិកម្ពុជា បានបង្កើតប្រវត្តិសាស្ត្រជាលើកដំបូងក្នុងការឈ្នះជើងឯកពានរង្វាន់បាល់ទះអាស៊ានកម្រិតទី១ SEA V. League ឆ្នាំ ២០២៦ បន្ទាប់ពីបានយកឈ្នះក្រុមបាល់ទះជម្រើសជាតិឥណ្ឌូណេស៊ី ដោយលទ្ធផល ៣-២ ។

ការប្រកួតវគ្គផ្តាច់ព្រ័ត្រ នៅរសៀលថ្ងៃអាទិត្យ ទី១៩ ខែកក្កដា ឆ្នាំ ២០២៦ ក្រុមបាល់ទះជម្រើសជាតិកម្ពុជា ធ្វើបានល្អហួសពីការរំពឹងទុកតាមរយៈជ័យជម្នះដោយលទ្ធផល ៣-២ នៅវគ្គផ្តាច់ព្រ័ត្រ។

ការប្រកួតពិតជាអស្ចារ្យខ្លាំងមែនទែនដែលក្រុមបាល់ទះកម្ពុជា ស្ថិតនៅបាតតារាងកាលពីឆ្នាំ ២០២៥ ដែលមិនស្គាល់បរាជ័យសោះសម្រាប់ ៨ ប្រកួត និងឆ្នាំ ២០២៦ នេះស្ថិតនៅក្នុងពូលដែលគិតថា មិនអាចឆ្លងផុតវគ្គក្នុងពូលទេ ប៉ុន្តែបែរជាការបង្កើតការភ្ញាក់ផ្អើលតាមរយៈជ័យជម្នះ ៣-១ លើក្រុមជម្រើសជាតិថៃនៅវគ្គពាក់កណ្តាលផ្តាច់ព្រ័ត្រ។

នៅវគ្គផ្តាច់ព្រ័ត្រ កម្ពុជា បានបង្កើតការភ្ញាក់ផ្អើលទៀតតាមរយៈជ័យជម្នះលើ ឥណ្ឌូណេស៊ី ដែលមិនធ្លាប់ឈ្នះសោះកាលពីមុន។ នេះជាលើកដំបូងដែលកម្ពុជា បានឈ្នះ ឥណ្ឌូណេស៊ី ។

សម្រាប់ពានរង្វាន់ឯកត្តជន កីឡាករកម្ពុជា ២ នាក់បានឈ្នះគឺកីឡាករ វឿន វាសនា បានឈ្នះពានកីឡាករល្អបំផុតប្រចាំព្រឹត្តិការណ៍ (MVP) និងឈ្នះពានកីឡាករវាយផ្តាច់ស្តាំល្អបំផុត។ ជាមួយគ្នានេះ កីឡាករ សួន ចាន់ណារ៉ូ បានឈ្នះពានអ្នកលើកបាល់ល្អបំផុត។

ចំណាត់ថ្នាក់

ជើងឯក (មេដាយមាស) កម្ពុជា
លេខ២ (មេដាយប្រាក់) ឥណ្ឌូណេស៊ី
លេខ ៣ (មេដាយសំរិទ្ធ) ថៃ

ពានឯក្តជន ដែលក្រុមក្តីស្រមៃ

ពានកីឡាករល្អប្រចាំការប្រកួត ៖ កីឡាករ វឿន វាសនា (កម្ពុជា)
ពានស្មាត់ស្តាំឆ្នើម៖ កីឡាករ វឿន វាសនា (កម្ពុជា)
អ្នកប៉ះសឆ្នើម៖ សួន ចាន់ណារ៉ូ (កម្ពុជា)
ស្មាត់ស្តាំឆ្នើម៖ Fahan (ឥណ្ឌូណេស៊ី)
ស្មាត់ឆ្វេងឆ្នើម៖ Napadet (ថៃ)
អ្នកការពារកណ្តាល៖ Troung Kai (វៀតណាម)
អ្នកការពារកណ្តាល៖ Hendra (ឥណ្ឌូណេស៊ី)
លីប្រូឆ្នើម៖ Josh Ybanes (ហ្វីលីពីន)

អត្ថបទ៖ វិរបុត្រ

The post ស័ក្តិសមបំផុត! វឿន វាសនា ឈ្នះ ពានឯកត្តជន ២ ម្នាក់ឯង ក្រោយជួយកម្ពុជា គ្រងជើងឯក SEA V. Cup 2026 appeared first on Kampuchea Thmey Daily.

ប្រកួតដំបូងនៅ SEA V. Cup 2026 វឿន វាសនា សាងភាពភ្ញាក់ផ្អើល ដោយរកបានពិន្ទុច្រើនដាច់គេ

Kosal Sem — Thu, 16 Jul 2026 03:28:06 +0000

ស្មាត់ស្តាំរបស់ក្រុមជម្រើសជាតិ កម្ពុជា កីឡាករ វឿន វាសនា បានបង្ហាញនូវសក្តានុពលយ៉ាងអស្ចារ្យ តាមរយៈការរកបានពិន្ទុយ៉ាងច្រើន រហូតជួយឱ្យ កម្ពុជា យកឈ្នះក្រុមម្ចាស់ផ្ទះ ហ្វីលីពីន នៅក្នុងការប្រកួតដំបូងនៃពាន SEA V Cup 2026។

ក្រុមបាល់ទះជម្រើសជាតិ កម្ពុជា បានសហការគ្នាយ៉ាងល្អ រហូតយកឈ្នះក្រុម ហ្វីលីពីន ក្នុងពាន SEA V Cup 2026 ក្នុងលទ្ធផល ៣ សិតទល់ ២។ សិតទី១ កម្ពុជា បានឈ្នះដោយពិន្ទុ ២៥-២៣, សិតទី២ ហ្វីលីពីន ឈ្នះវិញដោយពិន្ទុ ២៨-៣០, សិតទី៣ កម្ពុជា បានឈ្នះដោយពិន្ទុ ២៥-២០, សិតទី៤ ហ្វីលីពីន បានឈ្នះវិញដោយពិន្ទុ ២២-២៥ និងចុងក្រោយសិតទី ៥ កម្ពុជា បានឈ្នះដោយពិន្ទុ ១៥-៨។

ចំពោះជ័យជម្នះលើកដំបូងរបស់ កម្ពុជា នៅក្នុងប្រវត្តិសាស្ត្រពាន SEA V Cup គឺ វឿន វាសនា បានដើរតួជាកម្លាំងស្នូលដ៏សំខាន់ ដោយរកបានពិន្ទុច្រើនជាងគេ ពោលគឺរហូតដល់ទៅ ៣៣ ពិន្ទុ។ ស្មាត់ស្តាំវ័យ ២៥ ឆ្នាំ កម្ពស់ ១.៩៦ ម៉ែត្រ រកបាន ២៨ ពិន្ទុពីការវាយផ្តាច់, ៣ ពិន្ទុពីការបាំងបាល់ជោគជ័យ និង ២ ពិន្ទុពីការវាយសេវា។

ការរកបានពិន្ទុរហូតដល់ទៅ ៣៣ ពិន្ទុនេះ បានធ្វើឱ្យ វឿន វាសនា ឈរនៅលើគេបណ្តោះអាសន្ន ក្នុងនាមជាកីឡាកររកបានពិន្ទុច្រើនបំផុតក្នុងពាន SEA V Cup 2026។ ដោយឡែកកីឡាករឈរលេខ ២ គឺ កីឡាករ ថៃ Chaiwat Thungkham ដែលរកបាន ២១ ពិន្ទុ ពីជ័យជម្នះលើ វៀតណាម ៣ សិតទល់ ១ កាលពីថ្ងៃទី ១៥ ខែ កក្កដា ម្សិលមិញ។

ភាពលេចធ្លោរបស់ វឿន វាសនា ក្នុងការប្រកួតទល់នឹង ហ្វីលីពីន ម្សិលមិញ ដោយសារក្រុមទាំងមូលសហការគ្នាបានល្អ។ ជាពិសេសអ្នកលើកបាល់សួន ចាន់ណារ៉ូ បានដើរតួជាអ្នកលើកយ៉ាងយល់ចិត្តឱ្យកូនខ្មែរអ្នកខេត្តបាត់ដំបងរូបនេះ រហូតធ្វើឱ្យគេរកបានពិន្ទុយ៉ាងច្រើន៕

អត្ថបទ៖ សេម កុសល

The post ប្រកួតដំបូងនៅ SEA V. Cup 2026 វឿន វាសនា សាងភាពភ្ញាក់ផ្អើល ដោយរកបានពិន្ទុច្រើនដាច់គេ appeared first on Kampuchea Thmey Daily.

មុនល្បីឈ្មោះដូចពេលនេះ វឿន វាសនា ចូលអាជីពបាល់ទះដំបូងដោយសារលោក ស សុខា ជាអ្នកជ្រើសរើសផ្ទាល់ភ្នែក

Sina Noun — Mon, 29 Jun 2026 04:05:27 +0000

កីឡាករឆ្នើមរបស់កម្ពុជា វឿន វាសនា មុនមានសមត្ថភាពខ្លាំង និងល្បីឈ្មោះដូចពេលនេះឱកាសចូលអាជីពបាល់ទះដំបូងបានការជ្រើសរើសដោយផ្ទាល់ភ្នែកលោក ស សុខា តែម្ដងអំឡុងឆ្នាំ២០១៨ នៅឯការប្រកួតមួយក្នុងងខេត្តបាត់ដំបង។

លោក ស សុខា ប្រធាសហព័ន្ធកីឡាបាល់ទះ

លោក សាន សុក្រិត បានរំលឹកទៅអតីតកាលថា លោក សុខា ជាអ្នកជ្រើសរើសយកកីឡាករ វឿន វាសនា ឲ្យមកចូលជំរុំហ្វឹកហាត់នៅរាជធានីភ្នំពេញអំឡុងឆ្នាំ២០១៨ ។ ដោយអំឡុងកាលនោះគឺមានការប្រកួតបាល់ទះមិត្តភាពមួយនៅផ្សារភូពុយ ឯខត្តបាត់ដំបង ខណៈដែលលោក ស សុខា បានចូលរួម និងមើលឃើញ វឿន វាសនា មានកាយសម្បទាល្អអំណោយផលខាងកីឡាមួយនេះក៏ឲ្យទំនាក់ទៅក្រុមគ្រួសារតែម្ដង។

កីឡាករ វឿន វាសនា និងមិត្តរួមក្រុមពីមុន

អតីតគ្រូបង្វឹករបស់វិសាខាខាងលើបន្ថែមទៀតថា បន្ទាប់ពីទទួលបញ្ជាពីថ្នាក់លើរួចមកលោកក៏បានទាក់ទៅក្រុមគ្រួសារ និងប្រាប់ពីគោលបំណងនាំយក វឿន វាសនា មកហ្វឹកហាត់ជាមួយយុវជនរបស់ក្លឹបអំឡុងឆ្នាំ២០១៨ នោះរហូតមក។ យ៉ាងណា វឿន វាសនា ជាយុវជនដែលព្យាយាមហ្វឹកហាត់ អំណត់ តស៊ូ និងមានទេពកោល្យជាមួយកីឡាបាល់ទះនេះតាំងតែពីដើមមកម្ល៉េះ។

កីឡាករ វឿន វាសនា

បញ្ជាក់ដែរថា វឿន វាសនា ជាកីឡាករជម្រើសជាតិបាល់ទះកម្ពុជាដ៏ល្បីឈ្មោះមួយរូប។ រូបគេមានសមត្ថភាពកាន់តែខ្លាំងបន្ទាប់ពីលេងឲ្យក្រុមតៃវ៉ាន់ Win Streak រយៈពេល ២រដូវកាល និងកំពុងបន្តកុងត្រានៅឆ្នាំទី៣ រដូវកាលថ្មីនេះបន្តទៀតផងដែរ។ វាសនា មិនត្រឹមតែជាកីឡាករល្បីឈ្មោះនៅកម្ពុជាមានគេស្គាល់ច្រើននោះទេ ពោលនៅឯតៃវ៉ាន់ក៏ល្បី និងមានគេគាំទ្រច្រើនផងដែរ។ កីឡាកររូបគេមានតួនាទីជាស្មាត់ស្ដាំ និងមានសមត្ថភាពខ្លាំងទាំងការម៉ាត់ផ្ដាច់ ធ្វើរនាំង និងការវាយសេវា៕

លោក សាន សុក្រិត

អត្ថបទដោយ៖ នួន ស៊ីណា

The post មុនល្បីឈ្មោះដូចពេលនេះ វឿន វាសនា ចូលអាជីពបាល់ទះដំបូងដោយសារលោក ស សុខា ជាអ្នកជ្រើសរើសផ្ទាល់ភ្នែក appeared first on Kampuchea Thmey Daily.

កីឡាករ គួន ម៉ុម និង សួន ចាន់ណារ៉ូ សុទ្ធតែសរសើរពីសមត្ថភាព វឿន វាសនា ក្រោយជួបគ្នាជាថ្មីនេះ

Sina Noun — Fri, 26 Jun 2026 04:19:12 +0000

កីឡាករ គួន ម៉ុម និង សួន ចាន់ណារ៉ូ សុទ្ធតែសរសើរពីសមត្ថភាពល្អរបស់ វឿន វាសនា និងភាពរីកចម្រើនរបស់គេក្រោយជួបគ្នាជាថ្មីនៅតេជោលីគ ជុំទី២ រដូវកាលទី៣ ឆ្នាំ២០២៦ កន្លងទៅនេះ។

កីឡាករ វឿន វាសនា

កីឡាករ គួន ម៉ុម បានលើកឡើងថា វឿន វាសនា គឺលេងល្អមែន និងជួយក្រុមបានច្រើនក្នុងការប្រកួតកន្លងទៅនេះ។ ជើងខ្លាំងមកពីតៃវ៉ាន់រូបនេះគឺតាមចាប់បាំងដៃគូច្បាស់ណាស់ឥលូវនេះ ដូច្នេះកីឡាករល្មមៗមិនងាយវាយចេញនោះឡើយ។

ចំណែកកីឡាករ សួន ចាន់ណារ៉ូ បានលើកឡើងស្រដៀង គួន ម៉ុម ដែរថា វឿន វាសនា មកវិញលើកនេះសមត្ថភាពកើនឡើងកាន់តែខ្លាំងជាងមុនទៅទៀត។ ទម្រង់លេងដូចអ្នកគាំទ្របានឃើញអីចឹងដែរ ពោលលេងល្អប្លែកខុសពីមុនៗទៅទៀតសម្រាប់ស្មាត់របស់ Win Streak រូបនេះ។

កីឡាករ វឿន វាសនា

បញ្ជាក់ដែរថា កីឡាករ វឿន វាសនា បន្ទាប់ពីបញ្ចប់ភារកិច្ចនៅតៃវ៉ាន់រួចមករូបគេក៏បានមកជួយក្លឹបដើមគឺសមាគមវិសាខា នៅក្នុងជុំទី២ ដែលកំពុងដំណើរការប្រកួតវិលជុំសន្សំពិន្ទុនៅពេលនេះ។ រូបគេជួយវិសាខាបាន ៣ប្រកួតមកហើយគឺឈ្នះទាំង ៣ប្រកួតមាន ៨ពិន្ទុក្នុងដៃ និងត្រៀមជួយ ២ប្រកួតចុងក្រោយបញ្ចប់ជុំទី២ នេះតទៅទៀត។ វឿន វាសនា ជាកីឡាករល្បីឈ្មោះទាំងនៅកម្ពុជា និងតៃវ៉ាន់។ រូបគេទើបតែបន្តកុងត្រាជាមួយក្លឹប Win Streak ជាលើកទី៣ ផងដែរ៕

សួន ចាន់ណារ៉ូ

អត្ថបទដោយ៖ នួន ស៊ីណា

The post កីឡាករ គួន ម៉ុម និង សួន ចាន់ណារ៉ូ សុទ្ធតែសរសើរពីសមត្ថភាព វឿន វាសនា ក្រោយជួបគ្នាជាថ្មីនេះ appeared first on Kampuchea Thmey Daily.

តម្លៃពលកម្មរបស់ វឿន វាសនា បន្តកុងត្រាថ្មីនៅតៃវ៉ាន់ ជាង ១០ម៉ឺនដុល្លារក្នុងមួយរដូវកាល

Kosal Sem — Tue, 23 Jun 2026 08:14:36 +0000

កីឡាករបាល់ទះជម្រើសជាតិ កម្ពុជា វឿន វាសនា ត្រូវបានទម្លាយអំពីប្រាក់ពលកម្មជាផ្លូវការ ចំពោះការបន្តកុងត្រាថ្មី សម្រាប់ការលេងនៅក្លិប Win Streak រដូវកាលក្រោយ ២០២៦-២០២៧ ដោយទទួលបានរហូតដល់រាប់ម៉ឺនដុល្លារអាមេរិក។

កាលពីថ្ងៃទី ២០ ខែ មិថុនា ឆ្នាំ ២០២៦ ក្លិបបាល់ទះ Win Streak បានប្រកាសជាផ្លូវការអំពីការបន្តកិច្ចសន្យាថ្មីជាមួយស្មាត់ស្តាំ វឿន វាសនា នៅរដូវកាល ២០២៦-២០២៧ ខាងមុខមួយរដូវកាលទៀត បន្ទាប់ពីស្មាត់ស្តាំវ័យ ២៥ ឆ្នាំ កម្ពុជា ១.៩៦ ម៉ែត្ររូបនេះ បានលេងនៅទីនោះ ៣ រដូវកាលរួចមកហើយ។

នៅថ្ងៃទី ២៣ ខែ មិថុនា នេះ លោក អាំង សេរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានទម្លាយច្បាស់ៗ ថា ការបន្តកិច្ចសន្យាថ្មីនេះ វឿន វាសនា នឹងទទួលបានថ្លៃពលកម្មជាង ១០ ម៉ឺនដុល្លារអាមេរិកក្នុងមួយឆ្នាំ។

គួរបញ្ជាក់ ថា វឿន វាសនា បានលេងនៅក្លិប Win Streak ៣ រដូវកាលហើយ ពោលគឺនៅរដូវកាល ២០២៣-២០២៤, ២០២៤-២០២៥ និង ២០២៥-២០២៦ ខណៈនៅរដូវកាល ២០២៦-២០២៧ ខាងមុខមួយទៀត គឺជារដូវកាលទី ៤។

អំឡុងពេលលេងនៅ តៃវ៉ាន់ ៣ រដូវកាលកន្លងមក ស្មាត់វ័យ ២៥ ឆ្នាំកម្ពស់ ១.៩៦ ម៉ែត្រ បានបង្ហាញគុណផលយ៉ាងអស្ចារ្យ ដោយបានជួយឱ្យក្លិប Win Streak ឈ្នះពានលីគ ២ រដូវកាលជាប់គ្នា នៅរដូវកាល ២០២៣-២០២៤ និង ២០២៤-២០២៥។

រដូវកាលមុន ២០២៥-២០២៦ រូបគេបានជួយឱ្យក្រុមឈ្នះពានលីគវគ្គរដូវកាលដំបូង ប៉ុន្តែឈានចូលការប្រកួតជុំផ្តាច់ព្រ័ត្រដណ្តើមជើងឯក កីឡាករមិនបានលេងនោះទេ ដោយសារបទបញ្ញត្តិរបស់ FIVB បានកំណត់មិនឱ្យកីឡាករជាប់ជម្រើសជាតិលេង។

ទោះបីជាយ៉ាងណា នៅរដូវកាល ២០២៥-២០២៦ វឿន វាសនា បានធ្វើឱ្យអ្នកគាំទ្រមានការភ្ញាក់ផ្អើលជាខ្លាំង បន្ទាប់ពីរូបគេបំបែកកំណត់ត្រាក្លាយជាកីឡាករក្នុងលីគបាល់ទះតៃវ៉ាន់ដំបូងគេ ដែលអាចរកបានលើស ១ ពាន់ពិន្ទុក្នុងមួយរដូវកាល ពោលគឺចំនួន ១,០២៨ ពិន្ទុ។ ជាមួយគ្នានេះ កីឡាករបានឈ្នះពានឯត្តជន ២ គឺពានកីឡាកររកបានពិន្ទុច្រើនបំផុត និងអ្នកលេងស្មាត់ស្តាំល្អបំផុត៕

អត្ថបទ៖ សេម កុសល

The post តម្លៃពលកម្មរបស់ វឿន វាសនា បន្តកុងត្រាថ្មីនៅតៃវ៉ាន់ ជាង ១០ម៉ឺនដុល្លារក្នុងមួយរដូវកាល appeared first on Kampuchea Thmey Daily.

ស្មាត់ឆ្នើម វឿន វាសនា បន្តកុងត្រាថ្មីជាមួយក្លិប Win Streak ត្រូវអ្នកគាំទ្រ តៃវ៉ាន់ សាទរខ្លាំង

Kosal Sem — Sat, 20 Jun 2026 06:12:14 +0000

អ្នកគាំទ្របាល់ទះនៅតៃវ៉ាន់ បានបង្ហាញការសារទរជាខ្លាំង បន្ទាប់ពីទទួលដំណឹងអំពីការបន្តកិច្ចសន្យាថ្មី ១ រដូវកាលទៀតរវាងកីឡាករជម្រើសជាតិ កម្ពុជា វឿន វាសនា និងក្លិបបាល់ទះ Win Streak។

នៅថ្ងៃទី ២០ ខែ មិថុនា ឆ្នាំ ២០២៦ នេះ ក្លិបបាល់ទះ Win Streak បានប្រកាសជាផ្លូវការអំពីការបន្តកិច្ចសន្យាថ្មីជាមួយស្មាត់ស្តាំ វឿន វាសនា នៅរដូវកាល ២០២៦-២០២៧ ខាងមុខមួយរដូវកាលទៀត ដើម្បីចូលរួមការប្រកួតលីគបាល់ទះអាជីពតៃវ៉ាន់ (TPVL)។

ក្រោយការបន្តកិច្ចសន្យានេះ កីឡាករវឿន វាសនា បាននិយាយដូច្នេះ ថា៖ « ខ្ញុំមិនអាចរង់ចាំបានទៀតទេ ក្នុងការវិលត្រឡប់មកប្រកួតនៅចំពោះមុខអ្នកទាំងអស់គ្នាម្តងទៀត…។ […] គោលដៅរបស់ខ្ញុំសម្រាប់រដូវកាលក្រោយគឺនឹងប្រឹងប្រែងឱ្យអស់ពីសមត្ថភាព ដើម្បីជួយក្រុមឈ្នះជើងឯក និងបន្តអភិវឌ្ឍជាមួយមិត្តរួមក្រុមគ្រប់ការប្រកួតនៅលើទីលាន»។

ដោយឡែក អ្នកគាំទ្រ តៃវ៉ាន់ វិញ ក៏បានបង្ហាញការអបអរសាទរ និងបង្ហាញក្តីរំភើបផងដែរនៅលើបណ្តាញសង្គម IG របស់ក្លិប បន្ទាប់ពីក្លិប Win Streak ដែលជាក្លិបពួកគេគាំទ្រ បានប្រកាសបន្តកិច្ចសន្យាថ្មីជាមួយកីឡាករឆ្នើមរបស់ កម្ពុជា វឿន វាសនា។

ដោយឡែក រដូវកាលមុន ២០២៥-២០២៦ រូបគេបានជួយឱ្យក្រុមឈ្នះពានលីគវគ្គរដូវកាលដំបូង ប៉ុន្តែឈានចូលការប្រកួតជុំផ្តាច់ព្រ័ត្រដណ្តើមជើងឯក កីឡាករមិនបានលេងនោះទេ ដោយសារបទបញ្ញត្តិរបស់ FIVB បានកំណត់មិនឱ្យកីឡាករជាប់ជម្រើសជាតិលេង។

ទោះបីជាយ៉ាងណា នៅរដូវកាល ២០២៥-២០២៦ នោះ វឿន វាសនា បានធ្វើឱ្យអ្នកគាំទ្រមានការភ្ញាក់ផ្អើលមែនទែន បន្ទាប់ពីរូបគេបំបែកកំណត់ត្រាក្លាយជាកីឡាករក្នុងលីគបាល់ទះតៃវ៉ាន់ដំបូងគេ ដែលអាចរកបានលើស ១ ពាន់ពិន្ទុក្នុងមួយរដូវកាល ពោលគឺចំនួន ១,០២៨ ពិន្ទុ។ ជាមួយគ្នានេះ កីឡាករបានឈ្នះពានឯត្តជន ២ គឺពានកីឡាកររកបានពិន្ទុច្រើនបំផុត និងអ្នកលេងស្មាត់ស្តាំល្អបំផុត៕

អត្ថបទ៖ សេម កុសល

The post ស្មាត់ឆ្នើម វឿន វាសនា បន្តកុងត្រាថ្មីជាមួយក្លិប Win Streak ត្រូវអ្នកគាំទ្រ តៃវ៉ាន់ សាទរខ្លាំង appeared first on Kampuchea Thmey Daily.

អ្នកចង់ទស្សនាការប្រកួតរបស់ វឿន វាសនា ដោយផ្ទាល់ភ្នែកកុំភ្លេចល្ងាចនេះនៅវិមានពហុកីឡដ្ឋានជាតិ

Sina Noun — Fri, 19 Jun 2026 02:10:03 +0000

ការប្រកួតវិលជុំសន្សំពិន្ទុជុំទី២ តេជោលីគ លើកទី៣ ឆ្នាំ២០២៦ នេះនឹងចាប់ផ្ដើមនៅវេលាម៉ោង ២រសៀលនេះហើយ ស្របពេលសមាគមបាល់ទះវិសាខា របស់ វឿន វាសនា ប្រកួតនៅគូចុងក្រោយនេះដោយត្រូវប៉ះក្រុមស្នងការ ន.គ ខេត្តស្វាយរៀង។

កីឡាករ វឿន វាសនា

សម្រាប់អ្នកគាំទ្រវិស័យកីឡាបាល់ទះ និងជាអ្នកគាំទ្រកីឡាករ វឿន វាសនា អាចចូលរួមទស្សនាដោយសេរីបាននៅល្ងាចនេះ ព្រោះសហព័ន្ធមិនមានលក់សំបុត្រអ្វីនោះទេ។ អាចនិយាយបានថាអ្នកគាំទ្រកម្ពុជាមិនបានឃើញការលេងដោយផ្ទាល់របស់ជើងខ្លាំង វឿន វាសនា ជាច្រើនឆ្នាំមកហើយពិសេសនោះនៅក្នុងវិមាននៃពហុកីឡដ្ឋានជាតិនេះតែម្ដង។

ជុំទី២ ដែលប្រជុំដោយកីឡាករចម្រុះជាតិសាសន៍ និងសំបូរកីឡាករខ្ពស់ៗ មានសមត្ថភាពខ្លាំងនោះបានធ្វើឲ្យអ្នកតាមដានវិស័យកីឡាបាល់ទះ ឬអ្នកតាមដានតេជោលីគ រដូវកាលទី៣ នេះនៅមិនសុខនោះឡើយ។ ជឿជាក់ថាបើកឆាកថ្ងៃទី១ ជុំទី២ នេះនឹងមានអ្នកមកគាំទ្រផ្ទាល់ក្នុងទីលានច្រើន ព្រោះចង់ឃើញពីសមត្ថភាពលេងរបស់ វឿន វាសនា ផង និងចង់ទស្សនាកីឡាករបរទេសដែលក្លឹបធំៗទាំង ៣បាននាំយកមកជួយក្រុមផងក្នុងការប្រជែងគ្នាឡើងទៅវគ្គ ៤ក្រុមចុងក្រោយ។

បញ្ជាក់ដែរថា ការប្រកួតថ្ងៃទី១ នៃជុំទី២ វគ្គវិលជុំសន្សំពិន្ទុនៅរសៀលនេះរួមមាន៖

គូទី១ ក្រុមបញ្ជាការដ្ឋានអង្គរក្ស ប៉ះ ស្នងការ ន.ប ខេត្តកោះកុង វេលាម៉ោង ២ រសៀល

គូទី២ សមាគមបាល់ទះក្រសួងមហាផ្ទៃ ប៉ះ ស្នងការ ន.ប រាជធានីភ្នំពេញ វេលាម៉ោង ៤ ល្ងាច

ទី៣ សមាគមបាល់ទះវិសាខា ប៉ះ ក្រុមបាល់ទះស្នងការ ន.ប ខេត្តស្វាយរៀង វេលាម៉ោង ៦ល្ងាច

អត្ថបទដោយ៖ នួន ស៊ីណា

The post អ្នកចង់ទស្សនាការប្រកួតរបស់ វឿន វាសនា ដោយផ្ទាល់ភ្នែកកុំភ្លេចល្ងាចនេះនៅវិមានពហុកីឡដ្ឋានជាតិ appeared first on Kampuchea Thmey Daily.

វឿន វាសនា Archives - Kampuchea Thmey Daily

វឿន វាសនា ទម្លាយអារម្មណ៍ពិត ថា សឹងមិនជឿ ដែលកម្ពុជា អាចបំបាក់ម្ចាស់ជើង​ឯកអាស៊ី AVC Cup បាន

ស័ក្តិសម​បំផុត​! វឿន វាសនា ឈ្នះ ពាន​ឯកត្តជន ២ ម្នាក់​​ឯង ក្រោយ​​​ជួយ​កម្ពុជា គ្រង​ជើងឯក SEA V. Cup 2026

ប្រកួតដំបូងនៅ SEA V. Cup 2026 វឿន វាសនា សាងភាពភ្ញាក់ផ្អើល ដោយរកបានពិន្ទុច្រើនដាច់គេ

តម្លៃ​ពលកម្ម​របស់ វឿន វាសនា បន្ត​កុងត្រា​ថ្មី​នៅ​តៃវ៉ាន់ ជាង ១០​ម៉ឺន​ដុល្លារ​ក្នុង​មួយ​រដូវ​កាល

ស្មាត់ឆ្នើម វឿន វាសនា បន្តកុងត្រាថ្មីជាមួយក្លិប Win Streak ត្រូវអ្នកគាំទ្រ តៃវ៉ាន់ សាទរខ្លាំង

វឿន វាសនា ទម្លាយអារម្មណ៍ពិត ថា សឹងមិនជឿ ដែលកម្ពុជា អាចបំបាក់ម្ចាស់ជើងឯកអាស៊ី AVC Cup បាន

ស័ក្តិសមបំផុត! វឿន វាសនា ឈ្នះ ពានឯកត្តជន ២ ម្នាក់ឯង ក្រោយជួយកម្ពុជា គ្រងជើងឯក SEA V. Cup 2026

តម្លៃពលកម្មរបស់ វឿន វាសនា បន្តកុងត្រាថ្មីនៅតៃវ៉ាន់ ជាង ១០ម៉ឺនដុល្លារក្នុងមួយរដូវកាល