សម្តីនេះគឺចេញពីមាត់លោក Hossein Kanani Moghaddam ជាអតីតមេបញ្ជាការជាន់ខ្ពស់ម្នាក់ នៃកងឆ្មាំបដិវត្តន៍ឥស្លាមអ៊ីរ៉ង់ ដែលថ្លែងប្រាប់សារព័ត៌មានអ៊ីរ៉ង់ Fararu និងផ្សាយបន្តដោយទូរទស្សន៍ Sky News នៅថ្ងៃអង្គារ ទី១៤ ខែកក្កដា ឆ្នាំ២០២៦ ថា៖ ប្រសិនបើគោលដៅ គឺត្រូវធ្វើឃាតលោក ត្រាំ មែន! សាធារណរដ្ឋឥស្លាម អាចធ្វើបានងាយៗ នៅក្នុងសេតវិមាន។ ឲ្យតែពេលណាចាំបាច់ យើងអាចធ្វើបានជានិច្ច»។

ការអះអាងបែបនេះ កើតឡើងបន្ទាប់ពី ប្រភពចារកម្មអ៊ីស្រាអែល បានប្រាប់ទៅសហរដ្ឋអាមេរិករួចហើយថា អ៊ីរ៉ង់ កំពុងរៀបផែនការថ្មី ធ្វើឃាតលោក ត្រាំ។

យោងតាមប្រភពពីសារព័ត៌មានអន្តរជាតិធំៗ ដូចជា CNN, The Wall Street Journal, The New York Times និង The Express សុទ្ធតែផ្សាយដូចៗគ្នា កាលពីថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ថា ​ផែនការនេះ ត្រូវបានអ៊ីស្រាអែលប្រាប់ទៅទីក្រុងវ៉ាស៊ីនតោន រួចហើយ ប៉ុន្តែមិនមានការទម្លាយជាសាធារណៈ នោះទេ។

យ៉ាងណា លោកត្រាំ ក៏គំរាមខ្លាំងៗដែរថា លោកទុកបណ្តាំឲ្យកងទ័ពអាមេរិក រួចជាស្រេច! បើរូបលោកពិតជាត្រូវអ៊ីរ៉ង់ធ្វើឃាតមែន មីស៊ីលអាមេរិក ១ ០០០គ្រាប់នឹងហោះទៅអ៊ីរ៉ង់ ហើយរាប់ពាន់គ្រាប់ទៀត នឹងហោះទៅតាមក្រោយជាបន្តបន្ទាប់ ដើម្បីកម្ទេចប្រទេសនេះឲ្យហ្មត់ឈឹងតែម្តង។

តាមរយៈសារបង្ហោះលើបណ្តាញសង្គម Truth Social កាលពីថ្ងៃអាទិត្យ ទី១២ ខែកក្កដា ឆ្នាំ២០២៦ ​ប្រមុខសេតវិមាន បញ្ជាក់ច្បាស់ថា លោកផ្តាំទៅកងទ័ពអាមេរិក រួចអស់ហើយ ឲ្យបើកការវាយប្រហារទ្រង់ទ្រាយធំ ក្នុងរយៈពេលមួយឆ្នាំពេញ ឬអាចលើសនឹងទៀតក៏ថាបាន ប្រសិនបើខ្លួន រងគ្រោះថ្នាក់មែន។

អ៊ីរ៉ង់បានប៉ុនប៉ង និងរៀបចំផែនការធ្វើឃាតលោក ត្រាំ យ៉ាងហោចណាស់ ២លើកធំៗមកហើយ ដោយលើកទី១ គឺក្នុងខែកក្កដា ឆ្នាំ២០២៤ ដែលបុរសជនជាតិប៉ាគីស្ថានម្នាក់ឈ្មោះ Asif Merchant មានទំនាក់ទំនងជាមួយកងកម្លាំងឆ្មាំបដិវត្តន៍អ៊ីរ៉ង់ (IRGC) ត្រូវបានចាប់ខ្លួននៅសហរដ្ឋអាមេរិក ពីបទជួលខ្មាន់កាំភ្លើងដើម្បីធ្វើឃាតលោក ត្រាំ។

លើកទី២ ក្នុងខែវិច្ឆិកា ឆ្នាំ២០២៤ ដែលក្រសួងយុត្តិធម៌អាមេរិក បានលាតត្រដាង និងចោទប្រកាន់បណ្តាញសម្ងាត់មួយផ្សេងទៀត បញ្ជាដោយរដ្ឋាភិបាលអ៊ីរ៉ង់ ឲ្យរៀបចំផែនការធ្វើឃាតលោក ត្រាំ មុន ការបោះឆ្នោតប្រធានាធិបតីអាមេរិក។

យ៉ាងណា ការប៉ុនប៉ងធ្វើឃាតដោយបាញ់ប្រហារ នៅរដ្ឋ Pennsylvania ក្នុងខែកក្កដា ២០២៤ និងនៅទីលានវាយកូនហ្គោល ក្នុងកញ្ញា ២០២៤ គឺធ្វើឡើងដោយខ្មាន់កាំភ្លើងឯកជនម្នាក់ៗ ហើយមិនមានព័ស្តុតាងណាមួយ បញ្ជាក់ថា មានការជាប់ពាក់ព័ន្ធជាមួយប្រទេសអ៊ីរ៉ង់នោះទេ៕

អត្ថបទ៖ សុវណ្ណ

The post អតីតមេទ័ពអ៊ីរ៉ង់ អួតក្តែងៗថា អ៊ីរ៉ង់ មានសមត្ថភាព ចង់ចូលធ្វើឃាតលោក ត្រាំ ដល់ក្នុងសេតវិមាន ក៏បានដែរ appeared first on Kampuchea Thmey Daily.

ថ្លែងក្នុងសេតវិមាន ប្រមុខរដ្ឋាភិបាលទីក្រុងវ៉ាស៊ីនតោន បានបញ្ជាក់យ៉ាងច្បាស់ថា ប្រធានាធិបតីលីបង់ Joseph Aoun និងនាយករដ្ឋមន្ត្រីអ៊ីស្រាអែល Benjamin Netanyahu នឹងបំពេញទស្សនកិច្ច ខណៈសហរដ្ឋអាមេរិក មានក្តីសង្ឃឹមថា កិច្ចព្រមព្រៀងសន្តិភាពជានិរន្តរ៍ នឹងលេចចេញជារូបរាង។

រឿងនេះកើតឡើង បន្ទាប់ពីលោក ត្រាំ  ប្រកាសបន្តបទឈប់បាញ់រយៈពេល៣សប្តាហ៍ទៀត រវាងអ៊ីស្រាអែលនិងក្រុមហេសបូឡា នៃប្រទេសលីបង់។

ក្រោយពេលមន្ត្រីអ៊ីស្រាអែលនិងលីបង់ ជួបចរចាគ្នានៅការិយាល័យពងក្រពើ, លោកត្រាំក៏បង្ហោះសារលើបណ្តាញសង្គម Truth Social កាលពីថ្ងៃព្រហស្បតិ៍ទី២៣ខែមេសាឆ្នាំ២០២៦ ថា៖ «កិច្ចប្រជុំបានប្រព្រឹត្តទៅយ៉ាងល្អប្រសើរ! សហរដ្ឋអាមេរិកនឹងធ្វើការជាមួយលីបង់ ដើម្បីជួយប្រទេសនេះការពារខ្លួនពីក្រុមហេសបូឡា។ បទឈប់បាញ់រវាងអ៊ីស្រាអែល និងលីបង់ នឹងត្រូវពន្យារពេល បីសប្តាហ៍បន្ថែមទៀត»។

ទោះបីជាយ៉ាងណាក៏ដោយ អ៊ីស្រាអែលព្រមានថា ខ្លួនរក្សាសិទ្ធិក្នុងការវាយប្រហារវិញភ្លាមៗ ប្រសិនបើក្រុមហេសបូឡា រំលោភបទឈប់បាញ់ ឬព្យាយាមដឹកជញ្ជូនសព្វាវុធ៕

អត្ថបទ៖ សុខ សុវណ្ណ

The post ត្រាំ ប្រកាសថា មេដឹកនាំអ៊ីស្រាអែលនិងលីបង់ នឹងបំពេញទស្សនកិច្ចនៅសេតវិមាន  appeared first on Kampuchea Thmey Daily.

តាមការផ្សាយរបស់ South China Morning Post នៅថ្ងៃព្រហស្បតិ៍ទី៨ខែមករាឆ្នាំ២០២៦ លោកត្រាំ បានអញ្ជើញលោក ហ្គុស្តាវ៉ូ ផេត្រូ ឲ្យមកកាន់សេតវិមាន ក្រោយពេលមេដឹកនាំទាំងពីរ សន្ទនាគ្នាតាមទូរស័ព្ទប្រកបដោយលទ្ធផលផ្លែផ្កា។

លោកត្រាំបានបង្ហោះសារលើបណ្តាញសង្គម Truth Social ថា៖ «វាគឺជាកិត្តិយសដ៏ខ្ពង់ខ្ពស់មួយ ដែលបានជជែកជាមួយប្រធានាធិបតីនៃប្រទេសកូឡុំប៊ី លោក ហ្គុស្តាវ៉ូ ផេត្រូ។ គាត់បានទូរស័ព្ទមកពន្យល់អំពីស្ថានភាពគ្រឿងញៀន និងការខ្វែងគំនិតគ្នាផ្សេងៗ ដែលយើងធ្លាប់មានកន្លងមក។ ខ្ញុំសូមវាយតម្លៃខ្ពស់ចំពោះការហៅទូរស័ព្ទនេះនិងសម្ដីរបស់គាត់ ហើយខ្ញុំទន្ទឹងរង់ចាំជួបគាត់ក្នុងពេលឆាប់ៗខាងមុខនេះ»។

រឿងនេះកើតឡើងបន្ទាប់ពី លោកត្រាំបង្ហើបពីលទ្ធភាពវាយប្រហារប្រទេសផ្សេងទៀតបន្ទាប់ពីវ៉េណេស៊ុយអេឡា ដែលក្នុងនោះក៏មានទាំងកូឡុំប៊ីនេះផងដែរ។ 

ប្រតិកម្មទៅនឹងការគំរាមនេះ លោកផេត្រូប្រកាសរួចហើយថា លោកផ្ទាល់នឹងចាប់កាន់អាវុធប្រយុទ្ធតតាំង ប្រសិនបើអាមេរិក វាយប្រហារប្រទេសរបស់លោកមែន។

បុរសដែលធ្លាប់ជាសមាជិកនៃក្រុមឧទ្ទាមកុម្មុយនីស្ត M-19 រូបនេះ បានបង្ហោះសារលើបណ្តាញសង្គម X កាលពីថ្ងៃចន្ទទី៥ខែមករាឆ្នាំ២០២៦ ថា៖ «ដ្បិតខ្ញុំមិនមែនជាទាហានអាជីព ប៉ុន្តែខ្ញុំស្គាល់ច្បាស់ណាស់អំពីសង្គ្រាម និងការរស់នៅក្នុងព្រៃ។ ខ្ញុំធ្លាប់ស្បថថានឹងមិនប៉ះពាល់អាវុធទៀតទេ ចាប់តាំងពីកិច្ចព្រមព្រៀងសន្តិភាពឆ្នាំ១៩៨៩ ប៉ុន្តែដើម្បីមាតុភូមិ ខ្ញុំនឹងកាន់អាវុធជាថ្មី ទោះចិត្តមិនចង់ក៏ដោយ»។

មុននេះទៀត លោកផេត្រូវក៏ប្រកាសដែរថា៖ «សហរដ្ឋអាមេរិកគឺជាប្រទេសដំបូងគេក្នុងពិភពលោក ដែលបានទម្លាក់គ្រាប់បែកលើរដ្ឋធានីរបស់ប្រទេសអាមេរិកខាងត្បូង ក្នុងប្រវត្តិសាស្ត្រមនុស្សជាតិ»។ លោកជំរុញឲ្យអាមេរិកឡាទីន រួបរួមគ្នានិងក្លាយជាតំបន់មួយដែលមានសមត្ថភាពយល់ដឹង ធ្វើពាណិជ្ជកម្ម ហើយរួមរស់ជាមួយពិភពលោកទាំងមូល៕

អត្ថបទ៖ សុខ សុវណ្ណ

The post ត្រាំ អញ្ជើញប្រធានាធិបតីកូឡុំប៊ីមកសេតវិមាន ក្រោយគំរាមចាត់វិធានការយោធា appeared first on Kampuchea Thmey Daily.

ក្នុងនាមជាអ្នកនិយមកីឡាគុនចម្រុះក៏ដូចជាកីឡាកាស លោក ត្រាំ បានបង្ហាញគម្រោងនេះក្នុងសុន្ទរកថាមួយនៅឯរដ្ឋ Iowa គ្រាន់តែមិនទាន់ប្រាប់ច្បាស់ប៉ុណ្ណោះថានឹងរៀបចំនៅផ្នែកខាងណានៃសេតវិមាន ប៉ុន្តែព័ត៌មាននេះក៏មានការបញ្ជាក់ពីអ្នកនាំពាក្យ UFC ប្រាប់ទៅសារព័ត៌មាន CBS News កាលពីថ្ងៃព្រហស្បតិ៍ទី៣ខែកក្កដា ផងដែរ។

លោកត្រាំនិយាយថា «យើងនឹងមានព្រឹត្តិការណ៍អស្ចារ្យមួយចំនួន។ ព្រឹត្តិការណ៍អាជីពខ្លះ និងព្រឹត្តិការណ៍ស្ម័គ្រចិត្តខ្លះ ប៉ុន្តែការប្រកួត UFC នឹងក្លាយជាព្រឹត្តិការណ៍ដ៏ធំផងដែរ។ វានឹងជាការប្រកួតដណ្តើមជើងឯក ការប្រយុទ្ធដ៏ធំជាមួយអ្នកទស្សនា ២០ ០០០ឬ ២៥ ០០០នាក់»។ 

សូមជម្រាបថា សហរដ្ឋអាមេរិកបានប្រកាសឯករាជ្យរបស់ខ្លួនពីចក្រភពអង់គ្លេសនៅឆ្នាំ១៧៧៦។ ជារៀងរាល់ឆ្នាំ សហរដ្ឋអាមេរិក បានអបអរទិវានេះដោយការបាញ់កាំជ្រួចនៅទូទាំងទីក្រុង និងទីប្រជុំជននានា។

លើសពីនេះ ក៏មានការដង្ហែក្បួនធំៗ ដែលចូលរួមដោយក្រុមតន្ត្រីផងដែរ ហើយមនុស្សម្នាក់មកពីសហគមន៍ផ្សេងៗបាននាំគ្នាអបអរ និងបង្ហាញពីនិមិត្តសញ្ញាជាតិ។

តាមផ្ទះនិងអាជីវកម្មជាច្រើន ត្រូវបានតុបតែងដោយទង់ជាតិអាមេរិក និងរបស់របរដែលមានពណ៌ក្រហម ស និងខៀវ ចំណែកកន្លែងខ្លះ អ្នកនយោបាយ និងមន្ត្រីសាធារណៈបានថ្លែងសុន្ទរកថាដើម្បីរំលឹកពីប្រវត្តិសាស្ត្រ និងឧត្តមគតិរបស់ជាតិ៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រាប់ថា ជំនួប​តាម​ទូរសព្ទ​ជាមួយ ពូទីន «គ្មាន​បាន​សាច់ការ​អី​ទេ»

The post ត្រាំ នឹងរៀបចំការប្រកួត UFC នៅសេតវិមាន  appeared first on Kampuchea Thmey Daily.

​​ក្នុងជំនួបនៅ​សេតវិមាន ជាទីដែលលោក​ ដូណាល់ ត្រាំ ប្រធានាធិបតី​សហរដ្ឋអាមេរិក​ទទួល​ស្វាគមន៍​​ អគ្គលេខាធិការ​អង្គការណាតូ លោក ​Mark Rutte ​កាល​ថ្ងៃទី​​១៣ខែ​​មីនា ការិយាល័យ​​សេតវិមាន បានបង្ហាញ​រូប​ភាព​សើច​ក្អាកក្អាយ​​​ក្នុង​​ចំណោម​អ្នកចូលរួមជាពិសេស​គឺ​លោក ដូណាល់ ត្រាំ និង លោក​ Mark Rutte​។​

ភ្ជាប់​ជាមួយ​​រូប​ថត​នោះ សេតវិមាន បានស្រង់សម្តី​លោក ដូណាល់ ត្រាំ ដែល​និយាយ​ក្នុង​​​ខ្លឹមសារដើម​ថា៖«នៅពេលខ្ញុំទៅអង្គការណាតូដំបូង… ខ្ញុំសង្កេតឃើញថាមាន​មនុស្ស [ប្រទេស] តិចតួចណាស់ដែលបានបង់ប្រាក់ ហើយប្រសិនបើ ​ជាពួកគេ ពួក​គេ​​មិនបានបង់ចំណែក​យុត្តិធម៌​របស់ពួកគេទេ​… ខ្ញុំអាចកៀរគ​បានប្រាក់​រាប់រយពាន់លានដុល្លារ … លុយបានចាប់ផ្តើមហូរចូលមក​ ហើយណាតូកាន់តែរឹងមាំដោយសារតែសកម្មភាពរបស់ខ្ញុំ»​។​

ចាប់តាំងពី​ចូលកាន់​​តំណែង​ជា​ប្រធាធិបតី​សហរដ្ឋអាមេរិកជាលើក​ទី២ លោក ដូណាល់ ត្រាំ បាន​បង្ខំ​ឲ្យសមាជិក​អង្គការ​ណាតូ​នៅតំបន់​អឺរ៉ុប​បង្កើន​ការ​​បង់​ប្រាក់​​​ បង្កើន​ប្រាក់​​​ក្នុងវិស័យការពារជាតិ ព្រម​ទាំង​​គម្រាម​​ដកអាមេរិក​ចេញ​ពីអង្គការ​ណាតូ ដែល​មិន​ធ្វើតាម​សំណើរ​របស់​លោក​ផង។

​ក្រោយ​ពី​ការគម្រាម​របស់​លោក ដូណាល់ ត្រាំ ប្រទេស​សមាជិក​​អង្គការ​ណាតូ​នៅតំបន់​បាល់​កង់ មានអេស្តនី និង រូម៉ានី​ ឡេតូនី ប៊ុលឡាវី​ ជាដើម បាន​បង្ហាញ​ឆន្ទៈ​បង្កើន​ការ​ចំណាយ​​ក្នុងវិស័យការពារជាតិស្របតាម​សំណើរ​របស់​ប្រធានាធិបតីសហរដ្ឋអាមេរិក។ ក្រៅ​ពី​នេះ ចក្រភព​អង់គ្លេស​​ដែលជាមហាអំណាច​​ផងដែរនោះ ក៏បាន​បង្កើន​ការ​ចំណាយលើវិស័យ​ការពារជាតិ​យ៉ាងសន្ធឹកសន្ធាប់​ដែរ៕

ដោយ រ៉ាន់ រើយ​

The post លោក ត្រាំ​ថា ណាតូ​ទទួល​​បាន​លុយ​រាប់រយពាន់​លាន​​​ដោយសារ​តែ​លោក appeared first on Kampuchea Thmey Daily.

តាមការចុះផ្សាយរបស់ Daily Mail កាលពីថ្ងៃពុធទី១២ខែកុម្ភៈឆ្នាំ២០២៥, លោកស្រី Leavitt និយាយថា អ្នកកាសែតមានសិទ្ធផ្សាយព័ត៌មាននៅសេតវិមាន ចំណែកអ្នកនាំពាក្យសេតវិមានក៏មានសិទ្ធិដែរ ប៉ុន្តែគ្មាននរណាម្នាក់មានសិទ្ធិចូលការិយាល័យពងក្រពើ ​ដោយគ្មានការអញ្ជើញនោះទេ។ លោកស្រីបន្តថា «ខ្ញុំបាននៅទីនេះតាំងពីថ្ងៃដំបូង ប៉ុន្តែបើមា​នសារព័ត៌មានណាផ្សាយកុហកចេញពីបន្ទប់នេះ យើងនឹងឲ្យអ្នកទាំងនោះទទួលខុសត្រូវ»។

ពាក់ព័ន្ធបញ្ហានេះដែរ AP បានចេញសេចក្តីប្រកាសរួចហើយថា សេតវិមានបានជូនដំណឹងដល់ខ្លួនថា បើស្ថាប័នព័ត៌មាននេះមិនកែប្រែស្តង់ដានៃការសរសេរឲ្យស្របតាមបញ្ជាប្រតិបត្តិរបស់លោក ដូណាល់ ត្រាំ ក្នុងការកែឈ្មោះ «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក» ទេនោះ, AP នឹងត្រូវហាមឃាត់ពីការចូលរួមព្រឹត្តិការណ៍ក្នុងការិយាល័យពងក្រពើបន្តទៀត ជាក់ជាមិនខានឡើយ។

សូមជម្រាបថា កាលពីថ្ងៃទី៩ខែកុម្ភៈ លោក ត្រាំ បានចុះហត្ថលេខាលើបទបញ្ជាប្រតិបត្តិមួយប្តូរឈ្មោះ «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក» ទាំងដែលឈ្មោះចាស់របស់វាមានអាយុកាលជាង៤០០ឆ្នាំមកហើយ។

ដូច្នេះ ទើបសមាគមអ្នកឆ្លើយឆ្លងព័ត៌មានរបស់សេតវិមាន បានហៅសកម្មភាពរបស់សេតវិមានប្រឆាំងនឹងទីភ្នាក់ងារ AP ថា «ជារឿងមិនអាចទទួលយកបាន»។

យ៉ាងណា នេះមិនមែនទើបលើកដំបូងឡើយ ដែលរដ្ឋបាលលោក ត្រាំ ចាត់វិធានការលើអ្នកសារព័ត៌មាន។ ជាក់ស្តែងនៅក្នុងអាណត្តិទីមួយ លោកក៏បានប្រើធម៌ក្តៅលើអ្នកកាសែតណាដែលផ្សាយព័ត៌មានគាត់មិនចូលចិត្តផងដែរ។

ជាពិសេស លោកបានប៉ះទង្គិចជាមួយអ្នកកាសែត CNN ប្រចាំសេតវិមានឈ្មោះ Jim Acosta ហើយថែមទាំងដកហូតប័ណ្ណសារព័ត៌មានទៀតផង៕

អត្ថបទ៖ សុខ សុវណ្ណ

ចុចអាន៖ សេតវិមាន ចោទរដ្ឋបាលលោក បៃដិន ខ្ជះខ្ជាយទៅចំណាយ ៥០លានដុល្លារ ទិញស្រោមអនាម័យឲ្យពលរដ្ឋហ្គាហ្សា

The post សេតវិមានព្រមានទៅ អ្នកកាសែតទាំងឡាយណា ដែលផ្សាយកុហកពីរដ្ឋបាលលោកត្រាំ   appeared first on Kampuchea Thmey Daily.

ព័ត៌មាននេះ ត្រូវបានទម្លាយដោយអ្នកនាំពាក្យសេតវិមានលោកស្រី Karoline Leavitt ដោយលោកស្រី បានចោទប្រកាន់ខ្លាំងៗទៅរដ្ឋបាលរបស់អតីតប្រធានាធិបតី ចូ បៃដិន ថាចាយវាយខ្ជះខ្ជាយ។

មិនត្រឹមប៉ុណ្ណឹង លោកស្រី Leavitt បន្ថែមថា ទឹកប្រាក់៣៧លានដុល្លារទៀត ក៏ត្រូវចំណាយឲ្យអង្គការសុខភាពពិភពលោក ដែលលោក ត្រាំ ចេញបញ្ជាឲ្យអាមេរិក ដកខ្លួនចេញរួចហើយផងដែរ។

យ៉ាងណាក្តី អតីតឧបការីរងរដ្ឋមន្ត្រីការបរទេស ទទួលបន្ទុកកិច្ចការអ៊ីស្រាអែល-ប៉ាឡេស្ទីន លោក Andrew Miller បានសម្តែងការហួសចិត្តយ៉ាងខ្លាំង ដោយលោកប្រាប់ទៅកាសែត Times of Israel ថា ការអះអាងរបស់លោកស្រី Leavitt គឺ «ហួសហេតុពេកហើយ»។ លោកថា វាអាចទៅរួចមែនដែលថា លុយ៥០លានដុល្លារគឺជាជំនួយសម្រាប់សុខភាពផ្លូវភេទ ឬអ្វីដែលស្រដៀងនោះ ដូចជារោគស្ត្រីនិងសេវាជាច្រើនទៀត មិនមែនតែស្រោមអនាម័យមួយមុខទេ។

យ៉ាងណា ក្នុងអំឡុងភាពតានតឹងឆ្នាំ២០១៨ជាមួយក្រុមហាម៉ាសនៅតំបន់ហ្គាហ្សា, យោធាអ៊ីស្រាអែលបានចោទប្រកាន់ពួកសកម្មប្រយុទ្ធប៉ាឡេស្ទីនថា បានប្រើប្រាស់ប៉េងប៉ោងដែលធ្វើពីស្រោមអនាម័យដើម្បីបញ្ជូនឧបករណ៍ឆាបឆេះនិងគ្រឿងផ្ទុះឆ្លងដែន ខណៈពេលនោះក៏មានសេចក្តីរាយការណ៍អំពីភ្លើងឆេះព្រៃរាប់រយកន្លែងផងដែរ។ 

ពាក់ព័ន្ធរឿងជំនួយនេះដែរ គ្រាន់តែឡើងកាន់តំណែងមិនបានប៉ុន្មានផង លោក ត្រាំ បានចេញបញ្ជាបង្កកជំនួយបរទេសស្ទើរតែទាំងអស់ ដោយលើកលែងសម្រាប់តែ​ជំនួយ​អាហារសង្គ្រោះបន្ទាន់ និងការផ្តល់មូលនិធិយោធាសម្រាប់​ប្រទេស​អ៊ីស្រាអែល និង​អេហ្ស៊ីបប៉ុណ្ណោះ។

បទ​បញ្ជាទិញដ៏ធំនេះ ហាក់ដូចជាប៉ះពាល់ដល់អ្វីៗគ្រប់យ៉ាងចាប់ពីជំនួយអភិវឌ្ឍន៍ រហូតដល់ជំនួយយោធា រួមទាំងអ៊ុយក្រែន ដែលបានទទួលអាវុធរាប់ពាន់លានដុល្លារ ក្រោមការដឹកនាំ​ពី​មុន​របស់​អតីត​​ប្រធានាធិបតី លោក ចូ បៃដិន នៅពេលដែល​ព្យាយាមទប់ទល់នឹងការឈ្លានពានរបស់រុស្ស៊ី៕

អត្ថបទ៖ សុខ សុវណ្ណ

ចុចអាន៖ វិបត្តិស្បៀងអាហារនៅអាហ្វហ្គានីស្ថានកាន់តែធ្ងន់ធ្ងរ ក្រោយ​ត្រាំផ្អាកជំនួយ​​ទៅបរទេស​

The post សេតវិមាន ចោទរដ្ឋបាលលោក បៃដិន ខ្ជះខ្ជាយទៅចំណាយ ៥០លានដុល្លារ ទិញស្រោមអនាម័យឲ្យពលរដ្ឋហ្គាហ្សា appeared first on Kampuchea Thmey Daily.

ក្នុងសេចក្ដីថ្លែងការណ៍​នោះ​ លោក បៃដិន​ បាន​គូស​ថា​ ការវិនិយោគ​ក្នុងរដ្ឋបាល​របស់​លោក​ ត្រូវ​បាន​ជំរុញ​ដោយច្បាប់សំខាន់ៗ​​ចំនួន​ ៣ រួម​មាន​ច្បាប់ហេដ្ឋារចនាសម្ព័ន្ធទ្វេបក្ស​ ​ច្បាប់ស្ដីពី​បន្ទះឈីប​ និង​វិទ្យាសាស្រ្ត និងច្បាប់កាត់បន្ថយអតិផរណា​។ លោក​អះអាងថា​ ច្បាប់ទាំង​នេះ​ បាន​ជួយជំរុញរបៀបវារៈនៃ​ហេដ្ឋារចនាសម្ព័ន្ធ​អាមេរិក​គ្រប់​ជ្រុង​ជ្រោយ​ និង​បាន​​បង្កើតការងារបន្ថែមទៀតនៅទូទាំងប្រទេស។​

ប្រធានាធិបតីជិត​ផុត​អាណត្តិរូប​នេះ​ បាន​ថ្លែង​ថា៖ ​«​យើងបានអនុម័តច្បាប់ដើម្បីកសាងឡើងវិញនូវហេដ្ឋារចនាសម្ព័ន្ធរបស់យើង កសាងសេដ្ឋកិច្ចថាមពលស្អាត និងនាំយក​ផលិតកម្ម​ចូលស្រុក​អាមេរិក​វិញ​ក្រោយ​ផ្លាស់ទីទៅបរទេស​អស់រាប់សតវត្សរ៍»។ លោកបន្តថា​៖ «​ការវិនិយោគ​​ក្នុងឧស្សាហកម្មនៃអនាគតទាំង​នេះ​ គឺធានាថា អនាគត​​ត្រូវ​បាន​បង្កើត​​ឡើង​នៅ​អាមេរិក ដោយកម្មករអាមេរិក។ ហើយ​វា​កំពុងបង្កើតឱកាសក្នុងសហគមន៍ ដែល​ជា​រឿយៗ​ត្រូវ​គេ​ទុក​ចោល​»។ ​

លោក បៃដិន​ បាន​ថ្លែង​ទៀត​ថា៖ «សព្វថ្ងៃ​ ដោយសារតែ​របៀបវារៈនៃការវិនិយោគនៅអាមេរិករបស់ខ្ញុំ អាជីវកម្មជុំវិញពិភព​លោកកំពុងវិនិយោគនៅអាមេរិក»។

គួរ​គូស​បញ្ជាក់ថា​ ការឧបត្ថម្ភធនដែលផ្តល់នៅក្រោមច្បាប់ទាំងនេះ បានទាក់ទាញក្រុមហ៊ុនផលិតបន្ទះឈីប និងក្រុមហ៊ុនផ្សេងទៀតជាច្រើនដើម្បីបង្កើត ឬពង្រីកកន្លែងផលិតនៅ​លើទឹក​ដី​សហរដ្ឋអាមេរិក។ ទោះ​យ៉ាងណា​ក៏ដោយ​ ការ​វិនិយោគទាំង​នោះ​ មិន​បាន​ជួយ​គ្រប់គ្រាន់​ឱ្យ​រដ្ឋបាល​ បៃដិន ​អាច​បន្ត​អំណាច​ ឬ​គណបក្ស​ប្រជាធិបតេយ្យ​គ្រប់គ្រង​សភា​ណា​មួយ​នោះ​ទេ​ ក្រោយ​ចាញ់​ការបោះឆ្នោត​ទៅ​លោក ដូណាល់ ត្រាំ​ នៃ​គណបក្ស​សាធារណរដ្ឋ​។

បើតាម​រ៉យទ័រ​ អ្នក​​ប្រជាធិបតេយ្យមួយចំនួនបានស្តីបន្ទោសការ​ចាញ់​ឆ្នោត​ទៅលើការព្រួយបារម្ភផ្នែកសេដ្ឋកិច្ច និងការផ្តាច់ទំនាក់ទំនងពីអ្នកបោះឆ្នោត បើទោះបីជាគោលនយោបាយរបស់​ បៃដិន​ ត្រូវបាន​ដាក់ចេញ​ដើម្បីជំរុញ​កម្មករ​ និងវណ្ណៈកណ្តាល ដូចជាកិច្ចខិតខំប្រឹងប្រែងដើម្បីដោះស្រាយការឡើងថ្លៃ និងការគាំទ្រដល់សហជីពជាដើម ក៏ដោយ​។ ​

ការ​ស្ទង់មតិ​ផ្សេ​ងៗបាន​បង្ហាញ​ថា​​ បញ្ហា​សេដ្ឋកិច្ច​ដ៏ធំ​​ដែល​អ្នកបោះឆ្នោត​អាមេរិក​ភាគច្រើន​មើលឃើញ គឺ​អតិផរណា ហើយ​ពួកគេ​ជឿថា​ លោក ត្រាំ​ អាច​ដោះ​ស្រាយ​បញ្ហា​នេះ​បាន​លឿន​ បើ​ទោះ​បីជា​គោលនយោបាយ​ជាច្រើន​របស់​អតីតប្រធានាធិបតីរូប​នេះ​ រង​ការ​ព្រមានពី​សេដ្ឋវិទូ​ថានឹង​បង្កើន​អតិផរណា​ធ្ងន់ធ្ងរ​ក៏ដោយ​៕

The post សេតវិមាន៖ គោលនយោបាយរបស់​បៃដិន ​ទាក់ទាញការវិនិយោគ ១ ទ្រីលានដុល្លារ appeared first on Kampuchea Thmey Daily.