ត្រាំ នឹងរៀបចំការប្រកួត UFC នៅសេតវិមាន 

ប្រមុខរដ្ឋាភិបាលទីក្រុងវ៉ាស៊ីនតោន ដូណាល់ ត្រាំ នឹងរៀបចំឲ្យមានការប្រកួតកីឡាគុនចម្រុះ UFC នៅសេតវិមាននាឆ្នាំក្រោយនេះ ដើម្បីចូលរួមអបអរទិវាបុណ្យឯករាជ្យជាតិខួបលើកទី២៥០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនាមជាអ្នកនិយមកីឡាគុនចម្រុះក៏ដូចជាកីឡាកាស លោក ត្រាំ បានបង្ហាញគម្រោងនេះក្នុងសុន្ទរកថាមួយនៅឯរដ្ឋ Iowa គ្រាន់តែមិនទាន់ប្រាប់ច្បាស់ប៉ុណ្ណោះថានឹងរៀបចំនៅផ្នែកខាងណានៃសេតវិមាន ប៉ុន្តែព័ត៌មាននេះក៏មានការបញ្ជាក់ពីអ្នកនាំពាក្យ UFC ប្រាប់ទៅសារព័ត៌មាន CBS News កាលពីថ្ងៃព្រហស្បតិ៍ទី៣ខែកក្កដា ផងដែរ។

លោកត្រាំនិយាយថា «យើងនឹងមានព្រឹត្តិការណ៍អស្ចារ្យមួយចំនួន។ ព្រឹត្តិការណ៍អាជីពខ្លះ និងព្រឹត្តិការណ៍ស្ម័គ្រចិត្តខ្លះ ប៉ុន្តែការប្រកួត UFC នឹងក្លាយជាព្រឹត្តិការណ៍ដ៏ធំផងដែរ។ វានឹងជាការប្រកួតដណ្តើមជើងឯក ការប្រយុទ្ធដ៏ធំជាមួយអ្នកទស្សនា ២០ ០០០ឬ ២៥ ០០០នាក់»។ 

សូមជម្រាបថា សហរដ្ឋអាមេរិកបានប្រកាសឯករាជ្យរបស់ខ្លួនពីចក្រភពអង់គ្លេសនៅឆ្នាំ១៧៧៦។ ជារៀងរាល់ឆ្នាំ សហរដ្ឋអាមេរិក បានអបអរទិវានេះដោយការបាញ់កាំជ្រួចនៅទូទាំងទីក្រុង និងទីប្រជុំជននានា។

លើសពីនេះ ក៏មានការដង្ហែក្បួនធំៗ ដែលចូលរួមដោយក្រុមតន្ត្រីផងដែរ ហើយមនុស្សម្នាក់មកពីសហគមន៍ផ្សេងៗបាននាំគ្នាអបអរ និងបង្ហាញពីនិមិត្តសញ្ញាជាតិ។

តាមផ្ទះនិងអាជីវកម្មជាច្រើន ត្រូវបានតុបតែងដោយទង់ជាតិអាមេរិក និងរបស់របរដែលមានពណ៌ក្រហម ស និងខៀវ ចំណែកកន្លែងខ្លះ អ្នកនយោបាយ និងមន្ត្រីសាធារណៈបានថ្លែងសុន្ទរកថាដើម្បីរំលឹកពីប្រវត្តិសាស្ត្រ និងឧត្តមគតិរបស់ជាតិ៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រាប់ថា ជំនួប​តាម​ទូរសព្ទ​ជាមួយ ពូទីន «គ្មាន​បាន​សាច់ការ​អី​ទេ»