សេតវិមានព្រមានទៅ អ្នកកាសែតទាំងឡាយណា ដែលផ្សាយកុហកពីរដ្ឋបាលលោកត្រាំ  

ក្រោយមានរឿងចម្រូងចម្រាស់ជុំវិញការដែលរដ្ឋបាលលោក ដូណាល់ ត្រាំ មិនអញ្ជើញអ្នកកាសែត AP ឲ្យចូលរួមក្នុងព្រឹត្តិការណ៍របស់ប្រធានាធិបតីចំនួន២កម្មវិធី ដោយសារតែសារព័ត៌មាននេះមិនព្រមប្តូរហៅឈ្មោះឈូងសមុទ្រម៉ិកស៊ិក ទៅជាឈូងសមុទ្រអាមេរិកនោះ, ស្រាប់តែពេលនេះអ្នកនាំពាក្យសេតវិមាន លោកស្រី Karoline Leavitt ចេញការព្រមានខ្លាំងៗថា អ្នកកាសែតណាក៏ដោយ ឲ្យតែផ្សាយកុហកអំពីរដ្ឋបាលនេះ នឹងជួបផលវិបាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Daily Mail កាលពីថ្ងៃពុធទី១២ខែកុម្ភៈឆ្នាំ២០២៥, លោកស្រី Leavitt និយាយថា អ្នកកាសែតមានសិទ្ធផ្សាយព័ត៌មាននៅសេតវិមាន ចំណែកអ្នកនាំពាក្យសេតវិមានក៏មានសិទ្ធិដែរ ប៉ុន្តែគ្មាននរណាម្នាក់មានសិទ្ធិចូលការិយាល័យពងក្រពើ ​ដោយគ្មានការអញ្ជើញនោះទេ។ លោកស្រីបន្តថា «ខ្ញុំបាននៅទីនេះតាំងពីថ្ងៃដំបូង ប៉ុន្តែបើមា​នសារព័ត៌មានណាផ្សាយកុហកចេញពីបន្ទប់នេះ យើងនឹងឲ្យអ្នកទាំងនោះទទួលខុសត្រូវ»។

ពាក់ព័ន្ធបញ្ហានេះដែរ AP បានចេញសេចក្តីប្រកាសរួចហើយថា សេតវិមានបានជូនដំណឹងដល់ខ្លួនថា បើស្ថាប័នព័ត៌មាននេះមិនកែប្រែស្តង់ដានៃការសរសេរឲ្យស្របតាមបញ្ជាប្រតិបត្តិរបស់លោក ដូណាល់ ត្រាំ ក្នុងការកែឈ្មោះ «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក» ទេនោះ, AP នឹងត្រូវហាមឃាត់ពីការចូលរួមព្រឹត្តិការណ៍ក្នុងការិយាល័យពងក្រពើបន្តទៀត ជាក់ជាមិនខានឡើយ។

សូមជម្រាបថា កាលពីថ្ងៃទី៩ខែកុម្ភៈ លោក ត្រាំ បានចុះហត្ថលេខាលើបទបញ្ជាប្រតិបត្តិមួយប្តូរឈ្មោះ «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក» ទាំងដែលឈ្មោះចាស់របស់វាមានអាយុកាលជាង៤០០ឆ្នាំមកហើយ។

ដូច្នេះ ទើបសមាគមអ្នកឆ្លើយឆ្លងព័ត៌មានរបស់សេតវិមាន បានហៅសកម្មភាពរបស់សេតវិមានប្រឆាំងនឹងទីភ្នាក់ងារ AP ថា «ជារឿងមិនអាចទទួលយកបាន»។

យ៉ាងណា នេះមិនមែនទើបលើកដំបូងឡើយ ដែលរដ្ឋបាលលោក ត្រាំ ចាត់វិធានការលើអ្នកសារព័ត៌មាន។ ជាក់ស្តែងនៅក្នុងអាណត្តិទីមួយ លោកក៏បានប្រើធម៌ក្តៅលើអ្នកកាសែតណាដែលផ្សាយព័ត៌មានគាត់មិនចូលចិត្តផងដែរ។

ជាពិសេស លោកបានប៉ះទង្គិចជាមួយអ្នកកាសែត CNN ប្រចាំសេតវិមានឈ្មោះ Jim Acosta ហើយថែមទាំងដកហូតប័ណ្ណសារព័ត៌មានទៀតផង៕

អត្ថបទ៖ សុខ សុវណ្ណ

ចុចអាន៖ សេតវិមាន ចោទរដ្ឋបាលលោក បៃដិន ខ្ជះខ្ជាយទៅចំណាយ ៥០លានដុល្លារ ទិញស្រោមអនាម័យឲ្យពលរដ្ឋហ្គាហ្សា