លោក ជុំ សុន្ទរី ឯកអគ្គរាជទូតកម្ពុជាប្រចាំប្រទេសជប៉ុន បានចាត់ទុកអត្ថបទខាងលើថាឆ្លុះបញ្ចាំងពីទស្សនៈនយោបាយផ្ទាល់ខ្លួនរបស់អ្នកនិពន្ធតែប៉ុណ្ណោះ ដែលជាអតីតអ្នកនយោបាយប្រឆាំង និងបានធ្វើសកម្មភាពនយោបាយប្រឆាំងនឹងរាជរដ្ឋាភិបាលកម្ពុជាពីក្រៅប្រទេសអស់រយៈពេលជាច្រើនឆ្នាំមកហើយ។

លោក សង្កត់ធ្ងន់ថា អត្ថបទនេះជាការបញ្ចេញមតិនយោបាយមួយ ដែលមិនមែនជាការវាយតម្លៃដោយសត្យានុម័តចំពោះស្ថានភាពជាក់ស្តែងរបស់កម្ពុជានាពេលបច្ចុប្បន្ននោះឡើយ។ ការប្រតិកម្មបែបនេះពីមន្ត្រីទូតកម្ពុជា បានធ្វើឡើងតាមរយៈសេចក្ដីថ្លែងការណ៍ នៅថ្ងៃទី១៤ ខែកក្កដានេះ។

ក្នុងសេចក្ដីថ្លែងការណ៍នោះ បានបន្តថា អត្ថបទបានបង្ហាញតែការបកស្រាយមួយជ្រុងអំពីការអភិវឌ្ឍនយោបាយរបស់កម្ពុជា ហើយបានមើលរំលងអង្គហេតុសំខាន់ៗទាក់ទងនឹងការផ្លាស់ប្តូរសេដ្ឋកិច្ច និងសង្គម ការពង្រឹងស្ថាប័នរដ្ឋ ក៏ដូចជាការចូលរួម ប្រកបដោយស្ថាបនាជាមួយសហគមន៍អន្តរជាតិរបស់កម្ពុជា។

ឆ្លើយតបទៅនឹងអត្ថបទដែលបានអះអាងថាលទ្ធិប្រជាធិបតេយ្យនៅកម្ពុជាលែងមានទៀតហើយនោះ លោកទូត បានលើកឡើងថា ការវាយតម្លៃបែបនេះមិនមានតុល្យភាព និងមិនឆ្លុះបញ្ចាំងការពិតនោះឡើយ។ ផ្ទុយទៅវិញកម្ពុជានៅតែបន្តអនុវត្តប្រព័ន្ធរដ្ឋធម្មនុញ្ញរបស់ខ្លួនដោយមានស្ថាប័នរដ្ឋដំណើរការជាប្រក្រតី ដំណើរការបោះឆ្នោតតាមកាលកំណត់ និងការកែទម្រង់ជាបន្តបន្ទាប់។ ចំពោះបញ្ហាប្រឈមខ្លះ លោក បញ្ជាក់ថា រាជរដ្ឋាភិបាលប្តេជ្ញាចិត្តដោះស្រាយបញ្ហាទាំងនោះស្របតាមរដ្ឋធម្មនុញ្ញ និងច្បាប់ជាធរមាន។

សេចក្ដីថ្លែងការណ៍ដដែលនេះ ក៏បានពន្យល់ផងដែរពាក់ព័ន្ធនីតិវិធីផ្លូវច្បាប់លើអតីតអ្នកនយោបាយមួយចំនួន ដោយបញ្ជាក់ថា កម្ពុជាអនុវត្តច្បាប់ តាមរយៈស្ថាប័នតុលាការ ដែលមានសមត្ថកិច្ច ស្របតាមរដ្ឋធម្មនុញ្ញ និងច្បាប់ ដោយពុំអាចលើកលែងបុគ្គលណាម្នាក់ពីការទទួលខុសត្រូវចំពោះមុខច្បាប់ ក្រោមហេតុផលនិន្នាការនយោបាយបាននោះឡើយ។

កម្ពុជាក៏បានបញ្ជាក់ពីការប្រកាន់ខ្ជាប់នូវនយោបាយការបរទេសឯករាជ្យ ដោយផ្អែកលើគោលការណ៍អធិបតេយ្យភាព ការគោរពគ្នាទៅវិញទៅមក មិនជ្រៀតជ្រែកកិច្ចការផ្ទៃក្នុង និងកិច្ចសហប្រតិបត្តិការអន្តរជាតិ។ នេះជាការពន្យល់បន្ថែមទៅកាន់អត្ថបទដែលចុះផ្សាយដោយ Nikkei Asia ដែលបានបង្ហាញអំពីទំនាក់ទំនងការបរទេសរបស់កម្ពុជា តាមរយៈទស្សនៈភូមិសាស្ត្រនយោបាយដ៏ចង្អៀតមួយ។

មន្ត្រីទូតកម្ពុជា សង្កត់ធ្ងន់ថា មិត្តភាពរបស់កម្ពុជាជាមួយប្រទេសណាមួយ មិនដែលធ្វើឱ្យប៉ះពាល់ដល់ទំនាក់ទំនងជាមួយប្រទេសផ្សេងទៀតឡើយ។ កម្ពុជានៅតែបន្តរក្សាទំនាក់ទំនងមិត្តភាព និងកិច្ចសហប្រតិបត្តិការដ៏ល្អជាមួយបណ្តាប្រទេសទាំងអស់ មិនថានៅអាស៊ី អឺរ៉ុប អាមេរិកខាងជើង មជ្ឈិមបូព៌ា អាហ្វ្រិក និងអាមេរិកឡាទីន៕

ដោយ៖ ធឿន វ៉ាន់សុង

The post ការផ្សាយពាក់ព័ន្ធលទ្ធិប្រជាធិបតេយ្យនៅកម្ពុជា ដោយ Nikkei Asia រងការប្រតិកម្មពីមន្ត្រីទូតកម្ពុជា appeared first on Kampuchea Thmey Daily.

លោកបានលើកទឹកចិត្តកម្មសិក្សាការី និងពលករជំនាញកម្ពុជាឱ្យខិតខំសិក្សារៀនសូត្រ និងអភិវឌ្ឍជំនាញវិជ្ជាជីវៈ ក្នុងអំឡុងពេលស្នាក់នៅប្រទេសជប៉ុន ដើម្បីយកបទពិសោធ និងចំណេះដឹងទៅមកចូលរួមអភិវឌ្ឍប្រទេសជាតិ។ ការលើកឡើងរបស់លោកឯកអគ្គរាជទូតបែបនេះ បានធ្វើឡើងក្នុងពេលជួបសំណេះសំណាលជាមួយកម្មសិក្សាការី និងពលករជំនាញកម្ពុជា នៅខេត្តស៊ីហ្សីអូកា ប្រទេសជប៉ុន កាលពីថ្ងៃទី១២ ខែកក្កដា ឆ្នាំ២០២៦។

យោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំប្រទេសជប៉ុន ក្នុងឱកាសនោះ លោក ជុំ សុន្ទរី បានគូសបញ្ជាក់អំពីការរីកចម្រើនជាបន្តបន្ទាប់នៃទំនាក់ទំនងកម្ពុជា-ជប៉ុន ចាប់តាំងពីប្រទេសទាំងពីរបានដំឡើងកម្រិតទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយ។ លោក បានលើកឡើងថា ប្រទេសជប៉ុននៅតែជាដៃគូដ៏សំខាន់មួយរបស់កម្ពុជា ជាពិសេសក្នុងវិស័យអភិវឌ្ឍធនធានមនុស្ស ការផ្ទេរជំនាញ ការបង្កើតការងារ និងការអភិវឌ្ឍសេដ្ឋកិច្ច និងសង្គម។

លោក ជុំ សុន្ទរី ក៏បានរំលឹកកម្មសិក្សាការី និងពលករជំនាញកម្ពុជាឱ្យគោរពច្បាប់ និងបទប្បញ្ញត្តិរបស់ប្រទេសជប៉ុន ប្រកាន់ខ្ជាប់នូវអាកប្បកិរិយាល្អ ជៀសវាងរាល់សកម្មភាពខុសច្បាប់។ ភ្ជាប់គ្នានេះ ត្រូវយកចិត្តទុកដាក់ការពារខ្លួនពីគ្រោះមហន្តរាយធម្មជាតិ និងហានិភ័យសុខភាពផ្សេងៗ។

លោកឯកអគ្គរាជទូត បានបញ្ជាក់ជាថ្មីនូវការប្តេជ្ញាចិត្តរបស់ស្ថានទូត ក្នុងការការពារសិទ្ធិ សុខុមាលភាព និងផលប្រយោជន៍ស្របច្បាប់របស់ប្រជាពលរដ្ឋកម្ពុជា ដែលកំពុងរស់នៅ និងបម្រើការងារនៅប្រទេសជប៉ុន។ បន្ថែមពីនេះ ស្ថានទូតនឹងបន្តផ្តល់សេវាកុងស៊ុល កិច្ចគាំពារផ្នែកការងារ និងជំនួយចាំបាច់ផ្សេងៗជូនប្រជាពលរដ្ឋកម្ពុជានៅទូទាំងប្រទេសជប៉ុន។ លោកក៏បានលើកទឹកចិត្តឱ្យសហគមន៍ខ្មែរនៅជប៉ុនបន្តរក្សាសាមគ្គីភាព ជួយគាំទ្រគ្នាទៅវិញទៅមក និងចូលរួមយ៉ាងសកម្មក្នុងសកម្មភាពសហគមន៍ និងវប្បធម៌នានា ដើម្បីរួមចំណែកពង្រឹងចំណងមិត្តភាព និងការយល់ដឹងទៅវិញទៅមករវាងប្រជាជននៃប្រទេសទាំងពីរ។

លោកឯកអគ្គរាជទូត បានអរគុណចំពោះរដ្ឋាភិបាល និងប្រជាជនជប៉ុន អាជ្ញាធរមូលដ្ឋាន ក្រុមហ៊ុនដៃគូ និងភាគីពាក់ព័ន្ធទាំងអស់ ដែលបានបន្តផ្តល់ការគាំទ្រ និងរួមចំណែកលើកកម្ពស់សុខុមាលភាពរបស់ប្រជាពលរដ្ឋកម្ពុជានៅប្រទេសជប៉ុន។ លោកថា នឹងបន្តសហការយ៉ាងជិតស្និទ្ធជាមួយភាគីជប៉ុនដើម្បីពង្រឹងពង្រីកបន្ថែមទៀតនូវចំណងមិត្តភាពដ៏រឹងមាំ និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងជប៉ុន៕

The post ទូតកម្ពុជាប្រាប់ពលករនៅជប៉ុនឱ្យប្រកាន់ឥរិយាបទល្អ ហើយធ្វើជាស្ពានមិត្តភាពកម្ពុជា និងជប៉ុន appeared first on Kampuchea Thmey Daily.

តាមខ្លឹមសារក្នុងសេចក្ដីប្រកាសព័ត៌មានរបស់ស្ថានឯកអគ្គរាជទូតកម្ពុជាប្រចាំនៅប្រទេសជប៉ុន ក្នុងជំនួបនោះ លោក ឯកអគ្គរាជទូត ជុំ សុន្ទរី បានបញ្ជាក់ថា ជប៉ុននៅតែជាដៃគូយុទ្ធសាស្ត្រដែលអាចទុកចិត្តបាន និងមានទំនាក់ទំនងយូរអង្វែងជាមួយអាស៊ាន ក្នុងការគាំទ្រមជ្ឈភាពអាស៊ាន ស្ថិរភាពតំបន់ និងការអភិវឌ្ឍប្រកបដោយចីរភាព។

សម្រាប់ទំនាក់ទំនងទ្វេភាគី លោក ឯកអគ្គរាជទូត បានអះអាងពីភាពរឹងមាំ និងការរីកចម្រើនជាបន្តបន្ទាប់នៃទំនាក់ទំនង និងកិច្ចសហប្រតិបត្តិការរវាងកម្ពុជា និងជប៉ុន ក្រោមក្របខណ្ឌដៃគូយុទ្ធសាស្ត្រគ្រប់ជ្រុងជ្រោយ។ នៅចំពោះមុខលោក Toshimitsu MOTEGI រដ្ឋមន្ត្រីការបរទេសជប៉ុន លោក ជុំ សុន្ទរី បានថ្លែងការអរគុណចំពោះការគាំទ្រដ៏យូរអង្វែងរបស់ជប៉ុនចំពោះកម្ពុជា ក្នុងការកសាងសន្តិភាព ស្តារឡើងវិញ និងការអភិវឌ្ឍប្រទេស តាមរយៈការអភិវឌ្ឍហេដ្ឋារចនាសម្ព័ន្ធ ការអភិវឌ្ឍធនធានមនុស្ស និងកិច្ចសហប្រតិបត្តិការសេដ្ឋកិច្ច។

លោក ជុំ សុន្ទរី ក៏បានស្វាគមន៍ចំពោះការពង្រីកបន្ថែមទៀតសម្រាប់កិច្ចសហប្រតិបត្តិការទ្វេភាគី ក្នុងវិស័យពាណិជ្ជកម្ម និងវិនិយោគ ចល័តភាពកម្លាំងពលកម្ម ការបម្លែងឌីជីថល និងការផ្លាស់ប្តូររវាងប្រជាជន និងប្រជាជន។

នៅកម្រិតតំបន់ លោក ក៏បានលើកឡើងពីការស្វាគមន៍របស់កម្ពុជាចំពោះការចូលរួមយ៉ាងសកម្ម និងស្ថាបនារបស់ជប៉ុនជាមួយអាស៊ាន រួមទាំងកិច្ចសហប្រតិបត្តិការក្រោមទស្សនវិស័យឥណ្ឌូ-ប៉ាស៊ីហ្វិកសេរី និងបើកចំហ ដែលបំពេញបន្ថែម ក៏ដូចជាការពង្រឹងទស្សនវិស័យអាស៊ានស្តីពីឥណ្ឌូ-ប៉ាស៊ីហ្វិក។ ក្នុងន័យនេះ លោកឯកអគ្គរាជទូត បានបញ្ជាក់ឡើងវិញនូវការប្តេជ្ញារបស់កម្ពុជា ក្នុងការបន្តធ្វើការយ៉ាងជិតស្និទ្ធជាមួយប្រទេសជប៉ុន និងដៃគូអាស៊ាន ដើម្បីលើកកម្ពស់សន្តិភាព ស្ថិរភាព និងការអភិវឌ្ឍប្រកបដោយចីរភាពនៅក្នុងតំបន់៕

The post លោក ជុំ សុន្ទរី ថា ជប៉ុនជាដៃគូយុទ្ធសាស្ត្រគួរទុកចិត្តសម្រាប់កម្ពុជា ក៏ដូចជាអាស៊ាន appeared first on Kampuchea Thmey Daily.

ព្រឹត្តិការណ៍សប្តាហ៍ហ្វ្រង់កូហ្វូនី ត្រូវបានរៀបចំ កាលពីថ្ងៃទី១៥ ខែមីនា ឆ្នាំ២០២៦ ក្រោមកិច្ចសហការរៀបចំដោយក្រុមប្រឹក្សាលើកតម្កើងហ្វ្រង់កូហ្វូនីនៅជប៉ុន(CPFJ) និងស្ថានទូតនៃប្រទេស/រដ្ឋជាសមាជិកនៃអង្គការអន្តរជាតិហ្វ្រង់កូហ្វូនី។ ក្នុងនោះ ស្ថានទូតកម្ពុជាប្រចាំនៅប្រទេសជប៉ុន ដែលដឹកនាំដោយលោក ជុំ សុន្ទរី ជាឯកអគ្គរាជទូត ក៏បានចូលរួមក្នុងព្រឹត្តិការណ៍នេះ។

ព្រឹត្តិការណ៍ខាងលើ គឺបានផ្តល់ឱ្យអ្នកទស្សនាជប៉ុន និងសហគមន៍អន្តរជាតិនូវឱកាសស្វែងយល់ពីវប្បធម៌កម្ពុជា កន្លែងទាក់ទាញទេសចរណ៍ ផលិតផលខ្មែរ និងការចូលរួមយូរអង្វែងរបស់កម្ពុជានៅក្នុងសហគមន៍ហ្វ្រង់កូហ្វូន។ តាមសេចក្ដីប្រកាសព័ត៌មានរបស់ស្ថានទូតកម្ពុជា នេះក៏ជាវេទិកាដ៏មានតម្លៃសម្រាប់ការផ្លាស់ប្តូរវប្បធម៌ និងការសន្ទនាក្នុងចំណោមបណ្តាប្រទេសហ្វ្រង់កូហ្វូន និងសាធារណជនជប៉ុនផងដែរ។

ស្ថានទូតកម្ពុជា បានតាំងបង្ហាញស្នាដៃសិល្បៈ និងចែកជូននូវសៀវភៅផ្សព្វផ្សាយនានាដែលបង្ហាញពីប្រវត្តិសាស្ត្រ អត្តសញ្ញាណវប្បធម៌ និងគោលដៅទេសចរណ៍សំខាន់ៗរបស់កម្ពុជា ព្រមទាំងការចាក់បញ្ចាំងវីដេអូផ្សព្វផ្សាយ ដែលកម្ពុជាជាប្រទេសម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី ដែលគ្រោងនឹងប្រព្រឹត្តទៅនៅថ្ងៃទី១៥-១៦ ខែវិច្ឆិកា ឆ្នាំ២០២៦។

គួរបញ្ជាក់ឱ្យដឹងដែរ តាមការស្នើរបស់ឯកអគ្គរាជទូតកម្ពុជា មុខម្ហូបខ្មែរ “សាច់គោឡុកឡាក់” ត្រូវបានបង្ហាញនៅក្នុងបញ្ជីមុខម្ហូបរបស់ភោជនីយដ្ឋាន L’Oiseau de France ដែលមានទីតាំងនៅក្នុងវិទ្យាស្ថានភាសាបារាំងនៃទីក្រុងតូក្យូ និងជាទីតាំងនៃការរៀបចំព្រឹត្តិការណ៍។ ការដាក់បញ្ចូលមុខម្ហូបកម្ពុជាដ៏ល្បីនេះ គឺបានផ្តល់ឱ្យអ្នកទស្សនានូវរសជាតិនៃកេរដំណែលស្នាដៃម្ហូបខ្មែរ និងបានបន្ថែមនូវមុខម្ហូបដ៏ពិសេសមួយនៅក្នុងព្រឹត្តិការណ៍នេះ។

ស្ថានទូតកម្ពុជាប្រចាំប្រទេសជប៉ុន តាមរយៈសេចក្ដីប្រកាសព័ត៌មាន​ នៅថ្ងៃនេះ បញ្ជាក់ថា ក្នុងនាមជាប្រទេសសមាជិកដ៏សកម្មនៃអង្គការអន្តរជាតិហ្វ្រង់កូហ្វូនី កម្ពុជាបន្តលើកកម្ពស់កិច្ចសហប្រតិបត្តិការផ្នែកវប្បធម៌ និងភាសាបារាំង ហើយសម្រាប់ការចូលរួមក្នុងព្រឹត្តិការណ៍នានា ដូចជាសប្តាហ៍ហ្វ្រង់កូហ្វូនី នៅទីក្រុងតូក្យូ បានឆ្លុះបញ្ចាំងពីការប្តេជ្ញាចិត្តរបស់កម្ពុជាក្នុងការពង្រឹងការទូតវប្បធម៌ និងលើកកម្ពស់មិត្តភាពរវាងបណ្តាប្រទេសប្រើប្រាស់ភាសាបារាំង និងប្រទេសជប៉ុន៕

The post កម្ពុជាបង្ហាញពីបេតិកភណ្ឌវប្បធម៌របស់ខ្លួនក្នុងព្រឹត្តិការណ៍សប្តាហ៍ហ្វ្រង់កូហ្វូនី នៅឯទីក្រុងតូក្យូ appeared first on Kampuchea Thmey Daily.

ជំនួបដែលធ្វើឡើងនៅស្នាក់ការកណ្តាលអង្គការ OTIT ក្នុងក្រុងតូក្យូ កាលពីថ្ងៃទី១០ ខែកុម្ភៈ ភាគីទាំងពីរបានផ្លាស់ប្តូរយោបល់លើការបន្តពង្រឹងកិច្ចសហប្រតិបត្តិការរវាងស្ថានទូតកម្ពុជានៅទីក្រុងតូក្យូ និងអង្គការ OTIT រួមទាំងការពង្រឹងការប្រាស្រ័យទាក់ទង ការកែលម្អវិធានការបង្ការ និងការពង្រឹងការសម្របសម្រួលជាមួយស្ថាប័នពាក់ព័ន្ធរបស់កម្ពុជា។

លោក ជុំ សុន្ទរី បានលើកឡើងអំពីភាពជាដៃគូល្អរបស់ជប៉ុន ក្នុងការជំរុញការអភិវឌ្ឍធនធានមនុស្ស តាមរយៈកម្មវិធីបណ្តុះបណ្តាលកម្មសិក្សាការីជំនាញបច្ចេកទេស ដោយលោកគូសបញ្ជាក់ថា នេះបានរួមចំណែកដល់ការផ្ទេរជំនាញការងាររបស់យុវជន និងការអភិវឌ្ឍឧស្សាហកម្ម។

លោកឯកអគ្គរាជទូត បានកោតសរសើរចំពោះតួនាទីដ៏សំខាន់របស់ OTIT ក្នុងការធានាការអនុវត្តកម្មវិធីឱ្យបានត្រឹមត្រូវ អនុលោមតាមច្បាប់ និងបទប្បញ្ញត្តិរបស់ប្រទេសជប៉ុន និងការការពារសិទ្ធិ និងសុខុមាលភាពរបស់កម្មសិក្សាការីជំនាញបច្ចេកទេសកម្ពុជា។

តាមរយៈជំនួបខាងលើ បានបញ្ជាក់ជាថ្មីនូវការប្តេជ្ញាចិត្តរួមគ្នា ក្នុងការធានាថាកម្មវិធីបណ្តុះបណ្តាលកម្មសិក្សាការីជំនាញបច្ចេកទេស នៅតែបន្តដំណើរការដោយរលូន យុត្តិធម៌ និងផ្តល់ផលប្រយោជន៍ទៅវិញទៅមក។ ទន្ទឹមនឹងការការពារសិទ្ធិ និងសេចក្តីថ្លៃថ្នូររបស់កម្មសិក្សាការីជំនាញបច្ចេកទេសកម្ពុជានៅប្រទេសជប៉ុន៕

The post ជប៉ុនបញ្ជាក់ជាថ្មីនូវកិច្ចសហការជាមួយកម្ពុជាលើការបណ្ដុះបណ្ដាលកម្មសិក្សាការីជំនាញបច្ចេកទេស appeared first on Kampuchea Thmey Daily.

កិច្ចការពារបេតិកភណ្ឌវប្បធម៌ លោក ជុំ សុន្ទរី ថា គឺជាការទទួលខុសត្រូវរួមគ្នារបស់អន្តរជាតិ។ នេះជាសម្រង់សម្ដីរបស់លោក ជុំ សុន្ទរី បានលើកឡើងក្នុងជំនួបកាលពីថ្ងៃទី២៤ ខែធ្នូ ឆ្នាំ២០២៥ ជាមួយលោកស្រី Yukiko OKANO អគ្គនាយកទទួលបន្ទុកផ្នែកកិច្ចការវប្បធម៌ នៃក្រសួងការបរទេសជប៉ុន ដែលធ្វើឡើង ដើម្បីផ្លាស់ប្តូរទស្សនៈគ្នាលើកិច្ចសហប្រតិបត្តិការផ្នែកវប្បធម៌ និងការចូលរួមក្នុងក្របខ័ណ្ឌពហុភាគី។

តាមខ្លឹមសារក្នុងសេចក្ដីប្រកាសព័ត៌មានរបស់ស្ថានទូតកម្ពុជាប្រចាំប្រទេសជប៉ុន ក្នុងជំនួបនោះ ភាគីទាំងពីរបានបញ្ជាក់ជាថ្មីអំពីការប្តេជ្ញាចិត្តទៅវិញទៅមករបស់កម្ពុជា និងជប៉ុន ក្នុងការពង្រឹងកិច្ចសហប្រតិបត្តិការបន្ថែមទៀតលើផ្នែកកិច្ចការវប្បធម៌ និងពហុភាគី ក៏ដូចជារក្សាកិច្ចសន្ទនាយ៉ាងជិតស្និទ្ធ ដើម្បីគាំទ្រដល់អភិបាលកិច្ចវប្បធម៌អន្តរជាតិ។

លោក ជុំ សុន្ទរី ឯកអគ្គរាជទូតតែងតាំងរបស់កម្ពុជាប្រចាំប្រទេសជប៉ុន បានគូសបញ្ជាក់ពីកិច្ចសហប្រតិបត្តិការយ៉ាងជិតស្និទ្ធ និងយូរអង្វែងរវាងកម្ពុជា និងជប៉ុន នៅក្នុងក្របខ័ណ្ឌអង្គការយូណេស្កូ ជាពិសេសក្រោមអនុសញ្ញាឆ្នាំ២០០៣ស្តីពីការការពារបេតិកភណ្ឌវប្បធម៌អរូបី និងបានបញ្ជាក់ជាថ្មីពីការប្តេជ្ញាចិត្តរួមគ្នារបស់ប្រទេសទាំងពីរក្នុងការលើកតម្កើងភាពចម្រុះនៃវប្បធម៌ ការការពារផ្អែកលើសហគមន៍ និងកិច្ចសហប្រតិបត្តិការពហុភាគីប្រកបដោយប្រសិទ្ធភាព។

លោកឯកអគ្គរាជទូត បានប្រាប់ភាគីជប៉ុនផងដែរអំពីបេក្ខភាពរបស់កម្ពុជាសម្រាប់សមាជិកភាពក្នុងគណៈកម្មាធិការអន្តររដ្ឋាភិបាលនៃអនុសញ្ញាឆ្នាំ២០០៣ សម្រាប់អាណត្តិ២០២៦-២០៣០ ដោយបង្ហាញពីការត្រៀមខ្លួនរបស់កម្ពុជាក្នុងការចូលរួមចំណែកប្រកបដោយន័យស្ថាបនាក្នុងការងាររបស់គណៈកម្មាធិការ និងបន្តធ្វើការយ៉ាងជិតស្និទ្ធជាមួយជប៉ុននៅក្នុងវិស័យនេះ។

លោកក៏ឆ្លៀតរាយការណ៍ឱ្យមន្ត្រីការបរទេសជប៉ុនបានដឹងពីការវិវឌ្ឍថ្មីៗនៃជម្លោះនៅតាមបណ្តោយព្រំដែនកម្ពុជា-ថៃ ដែលកំពុងកើតមានឡើងពេលនេះផងដែរ៕

The post ឯកអគ្គរាជទូតកម្ពុជាលើកពីកង្វល់ពាក់ព័ន្ធកិច្ចការពារសម្បត្តិវប្បធម៌ នៅចំពោះមន្ត្រីការបរទេសជប៉ុន appeared first on Kampuchea Thmey Daily.

ពិធីរៀបចំឡើងក្រោមសហអធិបតីភាពលោក ហាំង តុលា រដ្ឋលេខាធិការ និងជាតំណាងដ៏លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក ទុយ រី ឯកអគ្គរាជទូតកម្ពុជាប្រចាំប្រទេសជប៉ុន ដោយមានការចូលរួមពីលោក Hirosawa Ichiro អភិបាលក្រុងណាហ្គូយ៉ាផងដែរ។

ទោះបីជានៅថ្ងៃអាទិត្យនេះមានភ្លៀងធ្លាក់យ៉ាងណាក៏ដោយ ក៏មិនអាចរារាំងដល់ស្មារតីស្រឡាញ់វប្បធម៌ខ្មែរ ការគាំទ្រ និងការចូលរួមយ៉ាងច្រើនកុះករពីសំណាក់សហគមន៍ខ្មែរ និស្សិត កម្មសិក្សាការី ពលករ សរុបប្រមាណជិត១ម៉ឺននាក់ ក្នុងកម្មវិធីសង្ក្រាន្តខ្មែរនៅជប៉ុន នៅសួន Garden Pier ទីក្រុងណាហ្គូយ៉ា ក្រោមតំណក់ទឹកភ្លៀងផ្ទាល់។

កម្មវិធីនេះ ត្រូវបានរៀបចំឡើងជាមួយនឹងពិធីសាសនាសំខាន់ៗ ដូចជា ការបង្សុកូល រាប់បាត្រ ស្រង់ព្រះ ពូនភ្នំខ្សាច់ ប្រគេនចង្ហាន់ព្រះសង្ឃ ទៅតាមប្រពៃណីទំនៀមទម្លាប់ព្រះពុទ្ធសាសនារបស់ខ្មែរ កម្មវិធីដាក់បង្ហាញស្តង់ម្ហូបអាហារខ្មែរ ផលិតផលខ្មែរ លេងល្បែងប្រជាប្រិយដ៏សម្បូរបែបរបស់ខ្មែរ រួមមាន បោះអង្គញ់ ចោលឈូង ទាញព្រ័ត្រ លាក់កន្សែង និងការបង្ហាញនូវផ្ទាំងទស្សនីយភាពរបាំជូនពរ របាំត្រុដិ និងការសម្តែងរនាថ ព្រមទាំងការប្រគុំតន្ត្រី និងរាំលេងកម្សាន្ត ដែលសម្តែងដោយតារាចម្រៀងនិងតារាសម្តែងល្បីៗជាច្រើនរូបមកពីប្រទេសកម្ពុជា។

លោក ហាំង តុលា រដ្ឋលេខាធិការក្រសួងការងារ បានបង្ហាញនូវសេចក្តីសោមនស្សរីករាយ ដែលបានចូលរួមក្នុងកម្មវិធី “សង្រ្កាន្តខ្មែរនៅជប៉ុន” និងបានពាំនាំនូវសេចក្ដីនឹករលឹកការផ្ដាំផ្ញើសួរសុខទុក្ខ និងពរសព្វសាធុការ ក្នុងឱកាសបុណ្យចូលឆ្នាំប្រពៃណីខ្មែរនេះ ពីសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏ដូចជាលោករដ្ឋមន្ត្រី ចំពោះប្រជាពលរដ្ឋខ្មែរ ដែលកំពុងរស់នៅ ធ្វើការ និងសិក្សានៅក្នុងប្រទេសជប៉ុនទាំងអស់។ លោក បន្តថា នេះជាអនុសាសន៍ដ៏ខ្ពង់ខ្ពស់របស់សម្តេចធិបតី នាយករដ្ឋមន្ត្រី ដែលបានណែនាំឱ្យក្រសួងការងារ រៀបចំកម្មវិធីបុណ្យចូលឆ្នាំប្រពៃណីខ្មែរឱ្យបានច្រើននៅប្រទេសដែលមានពលករខ្មែរធ្វើការ ដើម្បីផ្តល់ការយកចិត្តទុកដាក់ ភាពកក់ក្តៅ និងផ្តល់ឱកាសឱ្យប្រជាពលរដ្ឋខ្មែរដែលកំពុងរស់នៅ សិក្សា និងធ្វើការនៅបរទេស អាចបានជួបជុំគ្នា កម្សាន្តសប្បាយ និងពង្រឹងទំនាក់ទំនងដោយមិនប្រកាន់និន្នាការអ្វីទាំងអស់។

សូមបញ្ជាក់ថា ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ក្រសួងការងារ និងបណ្តុះបណ្តាលវិជ្ជាជីវៈ តែងតែសហការរៀបចំកម្មវិធីសង្ក្រាន្តចូលឆ្នាំប្រពៃណីខ្មែរ នៅតាមបណ្តាប្រទេសដែលមានពលករខ្មែរធ្វើការ។ ដោយឡែក នៅប្រទេសជប៉ុន ឆ្នាំនេះ ដោយមានការសហការជាមួយស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំប្រទេសជប៉ុន ក្រុមការងារ ESEA សមាគមមិត្តយើង និងសមាគមកម្ពុជា-ជប៉ុន គិបូ ក្រសួងបានគ្រោងរៀបចំកម្មវិធីសង្ក្រាន្តចូលឆ្នាំប្រពៃណីខ្មែរចំនួន១០ទីតាំងផ្សេងគ្នានៅទូទាំងប្រទេសជប៉ុន ដើម្បីផ្តល់ភាពសប្បាយរីករាយដល់ពលរដ្ឋខ្មែរទាំងជាង៣ម៉ឺននាក់លើទឹកដីជប៉ុនអាចចូលរួមសប្បាយរីករាយ និងអបអសាទរពិធីបុណ្យចូលឆ្នាំប្រពៃណីជាតិរបស់ខ្លួន ប៉ុន្តែកម្មវិធីសង្ក្រាន្ដខ្មែរនៅជប៉ុន នៅខេត្តណាហ្គូយ៉ានេះ គឺជាកម្មវិធីធំជាងគេ៕

The post សង្ក្រាន្តខ្មែរនៅជប៉ុន អបអរសាទរពិធីបុណ្យចូលឆ្នាំ បានរៀបចំឡើងដោយមានការចូលរួមពីបងប្អូនខ្មែរយ៉ាងច្រើនកុះករ appeared first on Kampuchea Thmey Daily.

ការលើកឡើងរបស់លោក ហៃ វណ្ណា បានធ្វើឡើងនៅក្នុងពិធីពិធីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលរៀបចំឡើងដោយស្ថានទូតកម្ពុជាប្រចាំទីតូក្យូ កាលពីថ្ងៃទី៦ ខែមេសា ឆ្នាំ២០២៥។

លោក ហៃ វណ្ណា ដែលបានមកលេងប្រទេសកម្ពុជា នាចុងឆ្នាំ២០២៤ បានគូសបញ្ជាក់ជូនអ្នកចូលរួមអំពីភាពរីកចម្រើនពិតប្រាកដ និងការអភិវឌ្ឍជាក់ស្តែង និងជាបន្តបន្ទាប់របស់ប្រទេសកម្ពុជា ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយភាពប៉ិនប្រសព្វរបស់សម្តេចធិបតី ហ៊ុន ម៉ាណែត។

សំដៅចូលរួមចំណែកការអភិវឌ្ឍប្រទេសជាតិ លោក ហៃ វណ្ណា ក៏បានថ្លែងលើកទឹកចិត្តសហគមន៍ខ្មែរ ពិសេសនិស្សិតខ្មែរ ដែលកំពុងរស់នៅ និងសិក្សានៅជប៉ុន ត្រូវខិតខំប្រឹងប្រែងរៀនសូត្រ និងចាប់យកជំនាញឱ្យច្បាស់លាស់ ដើម្បីអាចក្លាយជាធនធានមនុស្សដ៏មានតម្លៃ ហើយយកទៅអភិវឌ្ឍន៍ប្រទេសជាតិជាមួយរដ្ឋាភិបាល។

ស្ថិតក្នុងឱកាសនោះ លោក ទុយ រី ឯកអគ្គរាជទូតកម្ពុជាប្រចាំនៅជប៉ុន បានគូសរំលេចនូវសមិទ្ធិផលលេចធ្លោសំខាន់ៗរបស់រាជរដ្ឋាភិបាល ដែលដឹកនាំដោយសម្តេចធិបតី នាយករដ្ឋមន្ត្រី ដែលតួយ៉ាង កត្តាចម្បងដ៏មានសារសំខាន់ គឺការរក្សាបាននូវសន្តិភាព ដែលមិនអាចកាត់ថ្លៃបាន នាំឱ្យប្រទេសកម្ពុជាមានការអភិវឌ្ឍគ្រប់វិស័យរហូតដល់បច្ចុប្បន្ន។

លោកឯកអគ្គរាជទូត បន្តថា រាជរដ្ឋាភិបាលកម្ពុជា នីតិកាលទី៧ ក៏បន្តធានាបាននូវកំណើនសេដ្ឋកិច្ច និងចក្ខុវិស័យរបស់ខ្លួនក្នុងការប្រែក្លាយកម្ពុជាជាប្រទេសមានប្រាក់ចំណូលខ្ពស់នៅឆ្នាំ២០៥០។ សម្រាប់ទំនាក់ទំនងជាទ្វេភាគីជាមួយជប៉ុន មេដឹកនាំនៃប្រទេសទាំងពីរ បានតម្លើងទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយចាប់ពីឆ្នាំ២០២៣មក៕

The post លោក ហៃ វណ្ណា ប្រាប់ពលរដ្ឋខ្មែរនៅជប៉ុនពីភាពរីកចម្រើនយ៉ាងរហ័សរបស់កម្ពុជា appeared first on Kampuchea Thmey Daily.