លោក ហៃ វណ្ណា ប្រាប់ពលរដ្ឋខ្មែរនៅជប៉ុនពីភាពរីកចម្រើនយ៉ាងរហ័សរបស់កម្ពុជា

អតីតប្រធានចលនាយុវជនបក្សប្រឆាំងនៅក្នុងប្រទេស​ជប៉ុន លោក ហៃ វណ្ណា បានប្រាប់ទៅកាន់ពលរដ្ឋខ្មែរដែលកំពុងរស់នៅក្នុងប្រទេសជប៉ុន ពីភាពរីកចម្រើនយ៉ាងរហ័សរបស់កម្ពុជាស្ទើរគ្រប់វិស័យ ដែលផ្ទុយពីការឃោសនារបស់ក្រុមនិន្នាការប្រឆាំង។

ការលើកឡើងរបស់លោក ហៃ វណ្ណា បានធ្វើឡើងនៅក្នុងពិធីពិធីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ដែលរៀបចំឡើងដោយស្ថានទូតកម្ពុជាប្រចាំទីតូក្យូ កាលពីថ្ងៃទី៦ ខែមេសា ឆ្នាំ២០២៥។

លោក ហៃ វណ្ណា ដែលបានមកលេងប្រទេសកម្ពុជា នាចុងឆ្នាំ២០២៤ បានគូសបញ្ជាក់ជូនអ្នកចូលរួមអំពីភាពរីកចម្រើនពិតប្រាកដ និងការអភិវឌ្ឍជាក់ស្តែង និងជាបន្តបន្ទាប់របស់ប្រទេសកម្ពុជា ក្រោមកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ដឹកនាំដោយភាពប៉ិនប្រសព្វរបស់សម្តេចធិបតី ហ៊ុន ម៉ាណែត។

សំដៅចូលរួមចំណែកការអភិវឌ្ឍប្រទេសជាតិ លោក ហៃ វណ្ណា ក៏បានថ្លែងលើកទឹកចិត្តសហគមន៍ខ្មែរ ពិសេសនិស្សិតខ្មែរ ដែលកំពុងរស់នៅ និងសិក្សានៅជប៉ុន ត្រូវខិតខំប្រឹងប្រែងរៀនសូត្រ និងចាប់យកជំនាញឱ្យច្បាស់លាស់ ដើម្បីអាចក្លាយជាធនធានមនុស្សដ៏មានតម្លៃ ហើយយកទៅអភិវឌ្ឍន៍ប្រទេសជាតិជាមួយរដ្ឋាភិបាល។

ស្ថិតក្នុងឱកាសនោះ លោក ទុយ រី ឯកអគ្គរាជទូតកម្ពុជាប្រចាំនៅជប៉ុន បានគូសរំលេចនូវសមិទ្ធិផលលេចធ្លោសំខាន់ៗរបស់រាជរដ្ឋាភិបាល ដែលដឹកនាំដោយសម្តេចធិបតី នាយករដ្ឋមន្ត្រី ដែលតួយ៉ាង កត្តាចម្បងដ៏មានសារសំខាន់ គឺការរក្សាបាននូវសន្តិភាព ដែលមិនអាចកាត់ថ្លៃបាន នាំឱ្យប្រទេសកម្ពុជាមានការអភិវឌ្ឍគ្រប់វិស័យរហូតដល់បច្ចុប្បន្ន។

លោកឯកអគ្គរាជទូត បន្តថា រាជរដ្ឋាភិបាលកម្ពុជា នីតិកាលទី៧ ក៏បន្តធានាបាននូវកំណើនសេដ្ឋកិច្ច និងចក្ខុវិស័យរបស់ខ្លួនក្នុងការប្រែក្លាយកម្ពុជាជាប្រទេសមានប្រាក់ចំណូលខ្ពស់នៅឆ្នាំ២០៥០។ សម្រាប់ទំនាក់ទំនងជាទ្វេភាគីជាមួយជប៉ុន មេដឹកនាំនៃប្រទេសទាំងពីរ បានតម្លើងទំនាក់ទំនងទៅជាដៃគូយុទ្ធសាស្ត្រគ្រប់ជ្រុងជ្រោយចាប់ពីឆ្នាំ២០២៣មក៕