កាលពីថ្ងៃទី ២២ ខែមេសា ឆ្នាំ២០២៦ អាជ្ញាធរ​ខណ្ឌកំបូល ដឹកនាំដោយលោក ទ្រី ណារ៉េត អភិបាលរងខណ្ឌទទួលការងារសាធារណៈការ បានដឹកនាំមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ ព្រមទាំងអាជ្ញាធរសង្កាត់ ចុះពិនិត្យជាក់ស្តែងលើគម្រោងជួសជុល និងស្ថាបនាផ្លូវបេតុងឆ្អឹងដែកមួយខ្សែ នៅខាងក្រោយបុរីសែនមនោរម្យ រហូតដល់ភូមិកន្ទោកត្បូង ស្ថិតនៅភូមិកន្ទោកជើង និងភូមិកន្ទោកត្បូង សង្កាត់កន្ទោក ខណ្ឌកំបូល រាជធានីភ្នំពេញ ដែលជាតំបន់មានប្រជាពលរដ្ឋរស់នៅច្រើន និងមានតម្រូវការក្នុងការអភិវឌ្ឍហេដ្ឋារចនាសម្ព័ន្ធយ៉ាងចាំបាច់។

លោក ទ្រី ណារ៉េត បានបញ្ជាក់ថា គម្រោងផ្លូវនេះមានប្រវែងសរុប ៨១៤ ម៉ែត្រ ទទឹង ៥ ម៉ែត្រ និងកម្រាស់ ០,១៥ ម៉ែត្រ ដែលត្រូវបានសាងសង់ឡើងដោយគោលបំណងធ្វើឲ្យប្រសើរឡើងនូវការធ្វើដំណើររបស់ប្រជាពលរដ្ឋ កាត់បន្ថយការលំបាកក្នុងរដូវវស្សា និងជួយសម្រួលដល់ការដឹកជញ្ជូនទំនិញប្រចាំថ្ងៃ។

លោកបានបន្តថា គម្រោងស្ថាបនាផ្លូវបេតុងឆ្អឹងដែកនេះ គឺជាគម្រោងមូលនិធិអភិវឌ្ឍន៍របស់រដ្ឋបាលខណ្ឌកំបូល ដែលបង្ហាញពីការយកចិត្តទុកដាក់របស់អាជ្ញាធរមូលដ្ឋានក្នុងការកែលម្អហេដ្ឋារចនាសម្ព័ន្ធ និងបម្រើប្រជាពលរដ្ឋឲ្យកាន់តែប្រសើរឡើង។

អាជ្ញាធរខណ្ឌបានបញ្ជាក់ថា ការចុះពិនិត្យនេះមានគោលបំណងធានាឲ្យគម្រោងអនុវត្តតាមស្តង់ដារបច្ចេកទេស និងកាលវិភាគដែលបានកំណត់ ដើម្បីឲ្យគម្រោងបញ្ចប់បានដោយគុណភាព និងប្រសិទ្ធភាពខ្ពស់៕ អត្ថបទ៖សំណាង

The post អាជ្ញាធរខណ្ឌកំបូល ស្ថាបនាផ្លូវបេតុងឆ្អឹងដែកប្រវែងជាង៨០០ម៉ែត្រក្នុងសង្កាត់កន្ទោក appeared first on Kampuchea Thmey Daily.

យោង​តាម​សារព័ត៌មាន The Straits Times ផ្សាយ​ថ្ងៃ​ទី​២១ ខែមេសា ឆ្នាំ​២០២៦ នៅ​ក្នុងការវាយតម្លៃការខូចខាតនិងតម្រូវការ​ឆាប់​រហ័ស​ក្នុង​តំបន់​ហ្គា​ហ្សា (RDNA) ចុងក្រោយ មាន​អង្គការសហប្រជាជាតិ និងសហភាពអឺរ៉ុបនិយាយថា៖ « សង្គ្រាមជាង​ពីរ​ឆ្នាំ​នៅ​ក្នុង​ទឹកដីប៉ាឡេស្ទីន បាន​នាំ​ឱ្យ​មាន​ការបាត់បង់ជីវិត​ដែល​មិនធ្លាប់មានពីមុនមក និងមានវិបត្តិមនុស្ស​ធម៌​ដ៏មហន្តរាយបំផុត​​»។

ការវាយតម្លៃនេះ ​សហការ​ជាមួយធនាគារពិភព​លោក(World Bank) ហើយ​លើក​ឡើង​​ថា​៖ « តម្រូវការស្តារនិងការកសាង​តំន់​ហ្គាហ្សា​ឡើងវិញ ​ប៉ាន់ប្រមាណ​ថា​ត្រូវ​ការ​លុយ​ជាង​ ៧១.៤ ប៊ីលាន​ដុល្លារ​អាមេរិក»។

គួរ​បញ្ជាក់​ថា​ នៅ​តំបន់ហ្គាហ្សាភាគច្រើនមាន​ សាលារៀន មន្ទីរពេទ្យ និងហេដ្ឋារចនាសម្ព័ន្ធស៊ីវិលផ្សេងទៀត ត្រូវបានបំផ្លាញចោល​ដោយការវាយលុករបស់​យោធាអ៊ីស្រាអែល បន្ទាប់​ពីការវាយប្រហាររបស់​ហាម៉ាស​​មិនធ្លាប់​មានពីមុន​មក​ នៅថ្ងៃទី៧ ខែតុលា ឆ្នាំ២០២៣ ។

ការវាយតម្លៃចុងក្រោយកំណត់ថា តំបន់​ហ្គាហ្សា​ត្រូវការថវិកាចំនួន ២៦.៣ប៊ីលានដុល្លារអាមេរិកក្នុងរយៈពេល ១៨ខែដំបូង ដើម្បីស្តារ​សេវាកម្ម កសាងហេដ្ឋារចនាសម្ព័ន្ធសំខាន់ៗ និង​ស្តារសេដ្ឋកិច្ចឡើងវិញ​។

សេចក្តីថ្លែងការណ៍រួម​មួយលើក​ឡើងថា៖ « ការខូចខាតហេដ្ឋារចនាសម្ព័ន្ធ មាន​ទឹក​លុយ​ចំនួន ៣៥.២ប៊ីលានដុល្លារអាមេរិក ដោយការខាត​បង់​ផ្នែកសេដ្ឋកិច្ចនិងសង្គម​មានចំនួន ២២.៧ប៊ីលាន​ដុល្លារអាមេរិក»៕

ប្រែសម្រួល៖ ណឺ មិនា

The post ការ​វាយតម្លៃរួម​គ្នា​​ EU-UN ៖ តំបន់​ហ្គាហ្សា​ត្រូវ​ការ​លុយ​ជាង​៧១​ប៊ីលាន ដើម្បី​ស្តារ​ appeared first on Kampuchea Thmey Daily.

កិច្ចប្រជុំនេះបានរៀបចំឡើងនៅក្នុងសាលាស្រុកកោះធំ ក្រោមអធិបតីលោកនាយឧត្តមសេនីយ៍សន្តិបណ្ឌិត យូ ស៊ុនឡុង រដ្ឋមន្រ្តីប្រតិភូអមនាយករដ្ឋមន្រ្តី និងលោក ផែង សុវិជ្ជានោ រដ្ឋលេខាធិការក្រសួងសាធារណៈ ការនិងដឹកជញ្ជូន។

សូមបញ្ជាក់ថា ផ្លូវជាតិលេខ២៣ មានប្រវែង១៩,៨ គីឡូម៉ែត្រ ទទឹង១១ម៉ែត្រ គិតចាប់ពីគល់ស្ពានកោះធំត្រើយខាងកើត ស្ថិតក្នុងឃុំជ្រោយតាកែវ ស្រុកកោះធំ រហូតដល់ផ្លូវជាតិលេខ១៤ ឃុំពាមរាំង ស្រុកលើកដែក ខេត្តកណ្តាល បានស្ថាបនារួចរាល់១០០% កាលពីដើមខែតុលា ឆ្នាំ២០២៥នេះ នឹងត្រៀមដាក់សម្ពោធប្រើប្រាស់ជាផ្លូវការនៅថ្ងៃទី២៧ ខែមេសា ឆ្នាំ២០២៦ខាងមុខនេះ ក្រោមមធិបតីភាពដ៏ខ្ពង់ខ្ពស់ អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ៕

The post អាជ្ញាធរខេត្តកណ្ដាល ចុះពិនិត្យទីតាំងត្រៀមរៀបចំពិធីសម្ពោធដាក់ប្រើប្រាស់ជាផ្លូវការកំណាត់ផ្លូវជាតិលេខ២៣ appeared first on Kampuchea Thmey Daily.

ការពង្រីកផ្លូវលេខ១៧២៩ គឺជាគម្រោងអភិវឌ្ឍហេដ្ឋារចនាសម្ព័ន្ធសំខាន់មួយក្នុងមូលដ្ឋាន ដែលមានគោលបំណងធ្វើឱ្យប្រសើរឡើងនូវស្ថានភាពចរាចរណ៍ កាត់បន្ថយការកកស្ទះ និងបង្កើនសុវត្ថិភាពដល់ប្រជាពលរដ្ឋក្នុងតំបន់។ ផ្លូវនេះជាសរសៃឈាមសេដ្ឋកិច្ចមួយ ដែលភ្ជាប់ការធ្វើដំណើរ និងដឹកជញ្ជូនទំនិញរវាងភូមិ និងសង្កាត់ជាប់ខាង ធ្វើឱ្យសកម្មភាពពាណិជ្ជកម្ម និងសេវាកម្មក្នុងសហគមន៍កាន់តែមានភាពរលូន។

ក្នុងឱកាសនោះ លោកអភិបាលខណ្ឌបានពិនិត្យដោយផ្ទាល់លើដំណើរការសាងសង់ បច្ចេកទេសអនុវត្ត និងគុណភាពការងារ ដើម្បីធានាថាគម្រោងអនុវត្តតាមស្តង់ដារបច្ចេកទេស និងបញ្ចប់តាមផែនការកំណត់។ លោកក៏បានណែនាំដល់ក្រុមហ៊ុនសាងសង់ និងមន្ត្រីជំនាញឱ្យបន្តយកចិត្តទុកដាក់ខ្ពស់លើគុណភាព សុវត្ថិភាពការងារ និងកាលបរិច្ឆេទបញ្ចប់ ដើម្បីឆ្លើយតបនឹងតម្រូវការរបស់ប្រជាពលរដ្ឋ។

ជាមួយគ្នានេះ លោក ជិន ប៊ុនធឿន បានថ្លែងអំណរគុណយ៉ាងជ្រាលជ្រៅដល់ ប្រជាពលរដ្ឋដែលរងផលប៉ះពាល់ពីការពង្រីកផ្លូវ ប៉ុន្តែបានបង្ហាញនូវការយោគយល់ និងសហការល្អជាមួយអាជ្ញាធរ ដើម្បីរួមចំណែកក្នុងការអភិវឌ្ឍមូលដ្ឋានឱ្យកាន់តែប្រសើរ។ លោកបានបញ្ជាក់ថា ការចូលរួម និងការគាំទ្ររបស់ប្រជាពលរដ្ឋ គឺជាកត្តាសំខាន់ក្នុងការជំរុញគម្រោងអភិវឌ្ឍន៍ឱ្យសម្រេចបានជោគជ័យ៕ អត្ថបទ សំណាង

The post អភិបាលខណ្ឌឫស្សីកែវ ចុះពិនិត្យវឌ្ឍនភាពពង្រីកផ្លូវលេខ១៧២៩ ជំរុញការអភិវឌ្ឍហេដ្ឋារចនាសម្ព័ន្ធក្នុងមូលដ្ឋាន appeared first on Kampuchea Thmey Daily.

លោកស្រី ដោ សម្ភស្ស នាយិការងរដ្ឋបាលនិងជាអ្នកនាំពាក្យរដ្ឋបាលរាជធានីភ្នំពេញបានឲ្យដឹងថា បច្ចុប្បន្ន ក្រុមការងារជំនាញបាននឹងកំពុងបន្តការយកចិត្តទុកដាក់ ក្នុងការជួសជុលការ៉ូឡា តាមរយៈការរុះរើចាស់ដាក់ថ្មី និងការស្តារប្រព័ន្ធលូបង្ហូរទឹក ក៏ដូចជាការរៀបចំតុបតែងលម្អរបន្ថែមនូវចំណុចផ្សេងៗទៀត ក្នុងការរៀបចំឲ្យបានស្អាតល្អឡើងវិញ។

លោកស្រីបន្តថា ការរៀបចំនេះ ធ្វើឡើងទៅបាន គឺដោយសារមានការចូលរួមសហការល្អប្រសើរពីសំណាក់ពលរដ្ឋរស់នៅតំបន់ខាងលើ ខណៈអតីតអ្នកលក់ដូរ បាននឹងកំពុងរីករាយក្នុងការលក់ដូរនៅតាមទីតាំងថ្មី ដែលអាជ្ញាធររាជធានីភ្នំពេញ បានរៀបចំជូន ដោយពួកគាត់ពុំមានការវិលត្រឡប់ចូលទៅទីតាំងចាស់វិញនោះឡើយ។

ក្រោយយុទ្ធនាការ នៃការរៀបចំសណ្តាប់ធ្នាប់ទីក្រុង ពិសេសការរៀបចំសណ្តាប់ធ្នាប់នៅតំបន់ជុំវិញផ្សារដើមគរចាស់ តាំងពីកំឡុងថ្ងៃទី១៨ ខែមករា ឆ្នាំ២០២៦ រហូតមកទល់នឹងបច្ចុប្បន្ននេះ មានការចូលរួមសាទរច្រើនពីសំណាក់សាធារណជន និងមជ្ឈដ្ឋានទូទៅ ខណៈតំបន់នេះ ជាតំបន់ដែលកើតមានបញ្ហារុំារៃច្រើនឆ្នាំមកហើយលើការបំពាន់ចិញ្ចើម និងចំណីផ្លូវសាធារណៈធ្វើជាកន្លែងសម្រាប់លក់ដួរ ដើម្បីបំពេញប្រយោជន៍ឯកជនផ្ទាល់ខ្លួន។

គួររំលឹកថា ៖ អាជ្ញាធររាជធានីភ្នំពេញ កាលពីថ្ងៃទី១៨ មករា ឆ្នាំ២០២៦ បានចាប់ផ្តើមការហាមឃាត់ទាំង​ស្រុង ចំពោះការលក់ដូរអាណាធិបតេយ្យរបស់អាជីវករមួយចំនួន ដែលបានយកចិញ្ចើមផ្លូវសាធារណៈ​ជុំវិញតំបន់ផ្សារដើមគរ ដើម្បីប្រកបអាជីវកម្មសម្រាប់តែផ្តល់ផលប្រយោជន៍ឯកជនផ្ទាល់ខ្លួន ។ គិតមកដល់ថ្ងៃទី១៨ ខែកុម្ភៈ ឆ្នាំ២០២៦នេះ មានរយៈពេល០១ខែហើយ នៃយុទ្ធនាការរៀបចំតំបន់នេះ៕ អត្ថបទ ៖សុភា

The post សោភ័ណភាពនៅតំបន់ជុំវិញផ្សារដើមគរចាស់ ត្រូវកែលំអរក្នុងរយៈពេល០២ខែ ខណៈអ្នកលក់ដូរ ពុំមានការវិលត្រឡប់ចូលវិញនោះទេ appeared first on Kampuchea Thmey Daily.

លោក ញ៉ែម រ៉ា នាយកទីចាត់ការហិរញ្ញវត្ថុសាលាខេត្តមណ្ឌលគិរី បានប្រាប់កម្ពុជាថ្មីនៅថ្ងៃទី១៣ ខែកុម្ភៈ ឆ្នាំ២០២៦ ថា ដោយមានការយកចិត្តទុកដាក់ពីថ្នាក់ដឹកនាំខេត្ត ផ្លូវក្រាលកៅស៊ូដែលមានសភាពទ្រុឌទ្រោម បែកបាក់ និងមានជង្ហុកច្រើន ដែលតែងបង្កការលំបាកដល់ប្រជាពលរដ្ឋក្នុងការធ្វើដំណើរ ត្រូវបានស្ថាបនាឡើងវិញ ជាផ្លូវចាក់កៅស៊ូប្រភេទ DBST និងផ្លូវបេតុង ដែលមានគុណភាពល្អ រឹងមាំ ប្រើប្រាស់បានយូរ ព្រមទាំងមានផ្លូវថ្មើរជើងសងខាងផ្លូវផងដែរ។

លោកបានបន្តថា ផ្លូវដែលកំពុងស្ថាបនាជួសជុលនេះ ស្ថិតក្នុងសង្កាត់ចំនួន ២ នៃក្រុងសែនមនោរម្យ មានប្រវែងសរុប ១,៥០០ ម៉ែត្រ។ ខ្សែផ្លូវទី១ ជាប្រភេទបេតុងឆ្អឹងដែក មានប្រវែង ៥៩០ ម៉ែត្រ ទទឹង ១២ ម៉ែត្រ កម្រាស់ ០.១៥ ម៉ែត្រ និងសាងសង់លូជ្រុងបង្ហូរទឹកភ្លៀង ទំហំ ០.៧០ ម៉ែត្រ x ០.៩០ ម៉ែត្រ ប្រវែងសរុប ១,១៨០ ម៉ែត្រ ស្ថិតនៅភូមិដើមស្រល់ សង្កាត់មនោរម្យ។ បច្ចុប្បន្ន ការសាងសង់សម្រេចបានប្រមាណ ៥០% ហើយ។

ចំណែកខ្សែផ្លូវទី២ ចាប់ពីចំណុចសួនសម្ដេចហ៊ុនសែនសែនមនោរម្យ ឆ្ពោះទៅមុខមន្ទីរដែនដីខេត្ត មានប្រវែង ៩១០ ម៉ែត្រ ទទឹង ៧.២ ម៉ែត្រ ដោយចាក់កៅស៊ូប្រភេទ DBST និងចាក់បេតុងសងខាង កម្រាស់ ១៥ សង់ទីម៉ែត្រ ទទឹង ២ ម៉ែត្រ ព្រមទាំងដាក់លូបង្ហូរទឹកភ្លៀង មុខកាត់ ០.៨០ ម៉ែត្រ ប្រវែងសរុប ១,៨២០ ម៉ែត្រ។

បើតាមលោក ញ៉ែ រ៉ា ផ្លូវទាំង២ខ្សែនេះជាគម្រោងសាងសង់របស់រដ្ឋបាលខេត្តមណ្ឌលគិរី ខណៈមន្ត្រីជំនាញនឹងជំរុញក្រុមការងារឲ្យពន្លឿនការសាងសង់ឲ្យបានឆាប់រហ័ស និងគ្រោងបញ្ចប់នៅពេលខាងមុខ ដើម្បីអនុញ្ញាតឲ្យប្រជាពលរដ្ឋអាចធ្វើចរាចរណ៍តាមធម្មតាវិញ៕

អត្ថបទ៖ រៀម សុខហេង

The post រដ្ឋបាលខេត្តមណ្ឌលគិរី កំពុងលើកកម្ពស់គុណភាពហេដ្ឋារចនាសម្ព័ន្ធ និងស្ថាបនាផ្លូវថ្មើរជើង appeared first on Kampuchea Thmey Daily.

យោង​តាម​សារព័ត៌មាន Dhaka Tribune, ​រដ្ឋាភិបាល​ក្រុង​ញូវដែលី (New Delhi ) គ្រោង​នឹង​ចំណាយ​ទឹកប្រាក់​១៣៣​​ប៊ីលាន​ដុល្លារ​ លើ​ហេ​ដ្ឋា​រចនា​សម្ព័ន្ធ​ និង​ទឹកប្រាក់​៨៥ប៊ីលាន​​ដុល្លារ​ លើ​វិស័យ​ការពារ​ជាតិ មាន​ចំនួន​កើន​ឡើង​ប្រហែល ៩ និង ១៥​ភាគរយ បើ​ធៀប​នឹង​ថវិកា​ដែល​បាន​ចំណាយ​កាល​ពី​ឆ្នាំមុន​។​

រដ្ឋ​មន្ត្រី​ក្រសួង​ហិរញ្ញ​វត្ថុ លោក​ស្រី​ Nirmala Sitharaman បាន​ប្រាប់​​​កិច្ច​ប្រជុំ​សភា​ថា​ ​មជ្ឈម​ណ្ឌល​ទិន្នន័យ​ នឹង​ទទួល​បាន​ការ​គាំទ្រ​ពី​រដ្ឋា​ភិបាល​ ដូច​ជា​ បញ្ញាសិប្បនិមិត្ត (AI) ​ការ​ជីក​យក​រ៉ែ និង​ដំណើរ​ការ​នៃ​ប្រភព​រ៉ែ​កម្រ ផង​ដែរ​។

លោក​ស្រី​បាន​បន្ត​ទៀត​ថា៖ «ការ​ចំណាយ​សាធារណៈ​លើ​ហេដ្ឋា​រចនា​សម្ព័ន្ធ​បាន​កើន​ឡើង​យ៉ាង​ខ្លាំង​ជិត​ ២១ប៊ី​លានដុល្លារ ក្នុង​ឆ្នាំ ២០១៤ និង​២០១៥​ ហើយ​ឥឡូវ​នេះ​វា​ស្ថិត​ក្នុង​កម្រិត​ខ្ពស់​​ជាង​ពេលណា​ៗ​ទាំងអស់​»។

ការ​ចំណាយ​លើវិស័យ​ការពារ​ជាតិ​កើត​ឡើង បន្ទាប់​ពី​មាន​ជម្លោះ​រយៈ​ពេល​បួន​ថ្ងៃ​ជា​មួយ​ប្រទេស​ប៉ា​គីស្ថាន​កាល​ពី​ខែឧសភា​ឆ្នាំ​មុន និង​បាន​សម្លាប់​មនុស្ស​យ៉ាង​ហោច​ណាស់ ​៧០​នាក់ ជា​ពិសេស​ភាគីទាំង​ពីរ​បាន​ប្រើ​ប្រាស់​យន្ត​ហោះ​គ្មាន​មនុស្ស​បើក [Drone] ក៏​ដូច​ជា​កាំ​ជ្រួចមីស៊ីល​ និង​កាំ​ភ្លើង​ធំផង​ដែរ​។

មិន​តែ​ប៉ុណ្ណោះ រដ្ឋ​មន្ត្រី​ការពារជាតិ​ឥណ្ឌា​ លោក​ Rajnath Singh បាន​លើក​ឡើង​ថា​៖«ការ​ចំណាយ​នេះ​ មិន​ធ្លាប់​មាន​ពី​មុន​មក​ទេ​។ វា​នឹង​ជួយ​​ដល់​កង​កម្លាំង​ប្រដាប់​អាវុធ​របស់ប្រទេសឥណ្ឌា​ រួម​ទាំង​យន្ត​ហោះ​ចម្បាំង យន្ត​ហោះ​គ្មាន​មនុស្ស​បើក ​[Drone] នាវាខ្នាត​ធំ​ នាវា​​មុជ​ទឹក ​និង​ផ្នែក​រឹង​សំខាន់ៗ​ ផ្សេង​ទៀត»។

លោក​បាន​សង្កត់​ធ្ងន់​ថា​៖«វា​​គឺ​​ជា​​ប្រយោជន៍​​របស់ប្រទេស​​​ជាតិ»។

ទីក្រុង​ញូវ​ដែលី​កំពុង​ស្ថិត​ក្នុង​ការ​ចរចាកិច្ចសន្យាការពារជាតិ​ជាមួយ​​​ក្រុមហ៊ុន​​​​ផលិត​​​សម្ភារការពារ​ជាតិ​​​ក្នុងស្រុក និងអន្តរជាតិ រួមមាន ​ប្រទេស​បារាំង សហ​រដ្ឋ​អា​មេរិក និង​អាល្លឺម៉ង់។

ប្រទេស​ដែល​មាន​ប្រជាជន​ច្រើន​ជាង​គេលើពិភពលោក​នេះ មើល​ឃើញ​ថា​ ការចំណាយ​លើ​ហេដ្ឋារចនាសម្ព័ន្ធ​​ជា​​គន្លឹះ​ក្នុង​ការ​រក្សា​អត្រា​កំណើន​ខ្ពស់​របស់​ខ្លួន​តាមរយៈ​ការ​ជំរុញ​ផលិត​កម្ម​ក្នុង​ស្រុក​ និង​បង្កើត​ការងារ​ថ្មីៗ​​ជា​ច្រើន​ទៀត​។

នាយក​រដ្ឋ​មន្រ្តីឥណ្ឌា លោក​ Narendra Modi បាន​និយាយ​បន្ទាប់បញ្ចេញ​កញ្ចប់​ថវិការ​ថា​៖«ឥណ្ឌា​មិនពេញ​ចិត្ត​នឹង​ការ​ក្លាយ​ជា​ប្រទេស​ដែល​មាន​សេដ្ឋកិច្ច​លូតលាស់​លឿន​បំផុត​នោះ​ទេ។ ប៉ុន្តែ​ ឥណ្ឌា​ចង់​ក្លាយ​ជា​មហា​អំណាច​សេដ្ឋកិច្ច​ទី​បី​របស់​ពិភព​លោក​។ ចំណែក​ថវិកា​នៅ​ឆ្នាំ​នេះ​ បង្ហាញ​ពី​ផែន​ទី​បង្ហាញ​ផ្លូវ​ប្រកប​ដោយ​មហិច្ឆតា ដើម្បី​ផ្តល់​សន្ទុះ​ថ្មី​ដល់​ការ​ផលិត​​ក្នុង​ស្រុក និង​​ពឹង​ផ្អែក​លើ​ខ្លួន​ឯង​វិញ​»​៕

ប្រែសម្រួល៖ ណឺ មិនា

The post ឥណ្ឌា​​បង្កើន​ចំណាយ​ខ្ពស់​មិនធ្លាប់មាន ​​​​​លើវិស័យ​ការពារ​ជាតិ និង​ហេដ្ឋារចនាសម្ព័ន្ធ​​​​ appeared first on Kampuchea Thmey Daily.

លោកស្រី នេត ឆាយ៉ា ចៅសង្កាត់សុខដុម បានថ្លែងប្រាប់ កម្ពុជាថ្មី ថា នារដូវវស្សាមានភ្លៀងធ្លាក់ញឹកញាប់បណ្ដាលឱ្យផ្លូវវមួយខ្សែដែលក្រាលក្រួសក្រហមនេះរងកាខូចខាត បង្កការលំបាកដល់ប្រជាពលរដ្ឋក្នុងមូលដ្ឋានធ្វើដំណើរ។
ដោយឃើញពីបញ្ហាប្រឈមនេះ នៅថ្ងៃទី ២ខែតុលាឆ្នាំ២០២៥ អាជ្ញាធរក្នុងមូលដ្ឋានបានដាក់គ្រឿងចក្រ ដើម្បីធ្វើការជួសជុលផ្លូវមួយខ្សែនេះឡើងវិញដែលបានចាក់កៀកិនក្រាលបង្ហាប់ថ្មមិចដែលមានគុណភាពជាប់ល្អ ជំនួសផ្លូវក្រាលក្រួសក្រហម ដើម្បីសម្រួលដល់ការធ្វើដំណើរគ្រប់មធ្យោបាយជូនប្រជាពលរដ្ឋ ពីចំណុចសាលាបឋមសិក្សាឡៅការ ឆ្ពោះទៅកាត់លំនៅដ្ឋានពលរដ្ឋដែលស្ថិតក្នុង ភូមិឡៅការ សង្កាត់សុខដុម ក្រុងសែនមនោរម្យ។

លោកស្រី នេត ឆាយ៉ា បានបញ្ជាក់ថា ផ្លូវដែលស្ថាបនាជួសជុលនោះមានប្រវែង១ ០០០ម៉ែត្រ ទទឹង៦ម៉ែត្រ ដែលទទួលបានការឧបត្ថម្ភថវិការទាំងស្រុងពីលោក ឌុក ពិសិដ្ឋ ដែលជាម្ចាស់ចំការម្រេច ភីដា ដែលមានទីតាំងស្ថិត ភូមិឡៅការ សង្កាត់សុខដុម។

ក្នុងនាមថ្នាក់ដឹកនាំសង្កាត់សុខដុម លោកស្រីថ្លែងអំណរគុណដល់សប្បុរសជនដែលបានឧបត្ថម្ភក្នុងកាស្ថាបនាផ្លូវខាងលើនេះ និងអំពាវនាវទៅដល់ប្រជាពលរដ្ឋចូលរួមថែរក្សាសមិទ្ធផលដែលសង្កាត់ខំព្យាយាមកៀរគររកថវិកពីសប្បុរស​ជន ដើម្បីមកជួសជុលស្ថាបនាហេដ្ឋារចនាសម្ព័ន្ធនៅក្នុងមូលដ្ឋាន។

គួរជម្រាបថា ការស្ថាបនាផ្លូវនេះ ជាការឆ្លើយតបទៅនឹងការចង់បានរបស់រាជរដ្ឋាភិបាលកម្ពុជា ដែលបានជំរុញការអភិវឌ្ឍផ្លូវលំជនបទដោយប្រែក្លាយពីផ្លូវដី មកជាផ្លូវក្រាលក្រួសក្រហម ពីក្រួសក្រហមមកជាផ្លូវក្រាលថ្មមិច ហើយពីថ្មមិច មកជាផ្លូវក្រាលកៅស៊ូបេតុងជាដើម ​សម្រាប់ការប្រើប្រាស់បានយូរអង្វែង​៕

អត្ថបទ៖ រៀម សុខហេង

The post មណ្ឌលគិរី! ផ្លូវក្រាលក្រួសក្រហមមួយខ្សែរងការខូចខាត ត្រូវបានស្ថាបនាជំនួសដោយផ្លូវក្រាលថ្មមិច appeared first on Kampuchea Thmey Daily.