រដ្ឋបាលខេត្តមណ្ឌលគិរី កំពុងលើកកម្ពស់គុណភាពហេដ្ឋារចនាសម្ព័ន្ធ និងស្ថាបនាផ្លូវថ្មើរជើង

កន្លងមក ស្ថានភាពផ្លូវ ២ ខ្សែក្នុងក្រុងសែនមនោរម្យ ខេត្តមណ្ឌលគិរី មានទំហំតូចចង្អៀត និងរងការខូចខាត បង្កការលំបាកដល់ប្រជាពលរដ្ឋក្នុងការធ្វើចរាចរណ៍ជារៀងរាល់ថ្ងៃ។ ដើម្បីកែប្រែស្ថានភាពផ្លូវលំបាកនេះ ឲ្យក្លាយជាផ្លូវដែលមានគុណភាពរឹងមាំ និងងាយស្រួលធ្វើដំណើរ រដ្ឋបាលខេត្តមណ្ឌលគិរី បានអនុវត្តគម្រោងស្ថាបនា និងជួសជុលសាងសង់ឡើងវិញ ដើម្បីឆ្លើយតបតាមតម្រូវការប្រើប្រាស់ជាក់ស្តែងរបស់ប្រជាពលរដ្ឋ ព្រមទាំងលើកកម្ពស់សោភ័ណ្ឌភាពក្នុងក្រុង បន្ថែមសមិទ្ធផលថ្មីមួយទៀតសម្រាប់មូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ញ៉ែម រ៉ា នាយកទីចាត់ការហិរញ្ញវត្ថុសាលាខេត្តមណ្ឌលគិរី បានប្រាប់កម្ពុជាថ្មីនៅថ្ងៃទី១៣ ខែកុម្ភៈ ឆ្នាំ២០២៦ ថា ដោយមានការយកចិត្តទុកដាក់ពីថ្នាក់ដឹកនាំខេត្ត ផ្លូវក្រាលកៅស៊ូដែលមានសភាពទ្រុឌទ្រោម បែកបាក់ និងមានជង្ហុកច្រើន ដែលតែងបង្កការលំបាកដល់ប្រជាពលរដ្ឋក្នុងការធ្វើដំណើរ ត្រូវបានស្ថាបនាឡើងវិញ ជាផ្លូវចាក់កៅស៊ូប្រភេទ DBST និងផ្លូវបេតុង ដែលមានគុណភាពល្អ រឹងមាំ ប្រើប្រាស់បានយូរ ព្រមទាំងមានផ្លូវថ្មើរជើងសងខាងផ្លូវផងដែរ។

លោកបានបន្តថា ផ្លូវដែលកំពុងស្ថាបនាជួសជុលនេះ ស្ថិតក្នុងសង្កាត់ចំនួន ២ នៃក្រុងសែនមនោរម្យ មានប្រវែងសរុប ១,៥០០ ម៉ែត្រ។ ខ្សែផ្លូវទី១ ជាប្រភេទបេតុងឆ្អឹងដែក មានប្រវែង ៥៩០ ម៉ែត្រ ទទឹង ១២ ម៉ែត្រ កម្រាស់ ០.១៥ ម៉ែត្រ និងសាងសង់លូជ្រុងបង្ហូរទឹកភ្លៀង ទំហំ ០.៧០ ម៉ែត្រ x ០.៩០ ម៉ែត្រ ប្រវែងសរុប ១,១៨០ ម៉ែត្រ ស្ថិតនៅភូមិដើមស្រល់ សង្កាត់មនោរម្យ។ បច្ចុប្បន្ន ការសាងសង់សម្រេចបានប្រមាណ ៥០% ហើយ។

ចំណែកខ្សែផ្លូវទី២ ចាប់ពីចំណុចសួនសម្ដេចហ៊ុនសែនសែនមនោរម្យ ឆ្ពោះទៅមុខមន្ទីរដែនដីខេត្ត មានប្រវែង ៩១០ ម៉ែត្រ ទទឹង ៧.២ ម៉ែត្រ ដោយចាក់កៅស៊ូប្រភេទ DBST និងចាក់បេតុងសងខាង កម្រាស់ ១៥ សង់ទីម៉ែត្រ ទទឹង ២ ម៉ែត្រ ព្រមទាំងដាក់លូបង្ហូរទឹកភ្លៀង មុខកាត់ ០.៨០ ម៉ែត្រ ប្រវែងសរុប ១,៨២០ ម៉ែត្រ។

បើតាមលោក ញ៉ែ រ៉ា ផ្លូវទាំង២ខ្សែនេះជាគម្រោងសាងសង់របស់រដ្ឋបាលខេត្តមណ្ឌលគិរី ខណៈមន្ត្រីជំនាញនឹងជំរុញក្រុមការងារឲ្យពន្លឿនការសាងសង់ឲ្យបានឆាប់រហ័ស និងគ្រោងបញ្ចប់នៅពេលខាងមុខ ដើម្បីអនុញ្ញាតឲ្យប្រជាពលរដ្ឋអាចធ្វើចរាចរណ៍តាមធម្មតាវិញ៕

អត្ថបទ៖ រៀម សុខហេង