អ៊ីស្រាអែល Archives - Kampuchea Thmey Daily

ខួប ១ ០០០ថ្ងៃ នៃអំពើប្រល័យពូជសាសន៍ក្រោមដៃអ៊ីស្រាអែលនៅហ្គាហ្សា ធ្វើឱ្យកុមាររាប់ម៉ឺននាក់ស្លាប់ កំព្រា និងអត់ឃ្លានធ្ងន់ធ្ងរ

Minea Neu — Fri, 03 Jul 2026 11:10:00 +0000

ក្រោយរបបអ៊ីស្រាអែលសម្លាប់មនុស្សមិនញញើតដៃ ចាប់តាំងពីថ្ងៃផ្តើមសង្រ្គាម រហូតដល់បទឈប់បាញ់ បន្តដល់ឥឡូវនាំឱ្យកុមាររាប់ម៉ឺននាក់បាត់បងជីវិត កាលពីម្សិលមិញនេះ ប្រជាជនតំបន់ហ្គាហ្សាបានប្រារព្ធខួបលើកទី ១ ០០០ថ្ងៃ ចាប់តាំងពីអ៊ីស្រាអែលបានចាប់ផ្តើមសង្គ្រាមប្រល័យពូជសាសន៍លើតំបន់នេះ ហើយកុមារប៉ាឡេស្ទីននៅតែបន្តប្រឈមនឹងការសម្លាប់ ភាពអត់ឃ្លាន ភាពកំព្រា និងការផ្លាស់ទីលំនៅក្នុងចំណោមការដួលរលំនៃប្រព័ន្ធការពារ និងថែទាំ។ នេះបើយោងតាមរបាយការណ៍របស់ទីភ្នាក់ងារសារព័ត៌មាន Anadolu ផ្សាយនៅថ្ងៃទី០២ ខែកក្កដា ឆ្នាំ២០២៦ ។

កុមារប៉ាឡេស្ទីន កំពុងកាន់ឆ្នាំងទៅយកបាយហូប។ រូបភាព៖ Reuters

យោងតាមតួលេខផ្លូវការ កងទ័ពអ៊ីស្រាអែលបានសម្លាប់កុមារប៉ាឡេស្ទីន ២១ ០០០នាក់ និងរបួសប្រមាណ ៤៤ ៥០០នាក់ ចាប់ពីថ្ងៃទី៨ ខែតុលា ឆ្នាំ២០២៣ ដល់ដើមខែមេសា ឆ្នាំ២០២៦ បង្កឱ្យកុមារស្ថិតក្នុងចំណោមក្រុមរងផលប៉ះពាល់ខ្លាំងបំផុត ដោយសង្គ្រាមដែលកំពុងបន្តរបស់អ៊ីស្រាអែល។

ការស្លាប់ និងរបួសមិនបានឈប់ទេ សូម្បីតែបន្ទាប់ពីបទឈប់បាញ់ចូលជាធរមាននៅថ្ងៃទី១០ ខែតុលា ឆ្នាំ២០២៥ ក៏ដោយ។ មូលនិធិកុមារអង្គការសហប្រជាជាតិ(UNICEF) លើកឡើងថា កុមារចំនួន ២៦៥នាក់ត្រូវបានសម្លាប់ និងជាង ៤០០នាក់ផ្សេងទៀតរងរបួស ចាប់តាំងពីបទឈប់បាញ់ ជាមធ្យមកុមារប្រហែលម្នាក់ត្រូវបានសម្លាប់ជារៀងរាល់ថ្ងៃ។

បន្ថែមពីលើអ្នកស្លាប់ និងរបួស កុមារជាង ៥៨ ០០០នាក់ បានបាត់បង់ឪពុកម្តាយ ចាប់តាំងពីការចាប់ផ្តើមនៃសង្គ្រាម ខណៈមនុស្សរាប់ពាន់នាក់ត្រូវបានបញ្ជូនទៅកម្មវិធីកង្វះអាហារូបត្ថម្ភ។

គួរបញ្ជាក់ថា សង្គ្រាមអ៊ីស្រាអែលបានបន្សល់ទុកស្លាកស្នាមរាងកាយ និងផ្លូវចិត្តយ៉ាងជ្រៅលើមនុស្សមួយជំនាន់ទាំងមូល ភាគច្រើននៃពួកគេបានស្គាល់តែការទម្លាក់គ្រាប់បែក ការផ្លាស់ទីលំនៅ និងការភ័យខ្លាច ខណៈក៏ប្រឈមមុខនឹងភាពអត់ឃ្លាន និងកុមារកំព្រាផងដែរ។

របាយការណ៍មួយចេញផ្សាយដោយការិយាល័យស្ថិតិកណ្តាលប៉ាឡេស្ទីន(PCBS) នៅថ្ងៃទី៥ ខែមេសា ឆ្នាំ២០២៦ ក្នុងអំឡុងពេលរវាងថ្ងៃទី៨ ខែតុលា ឆ្នាំ២០២៣ ដល់ថ្ងៃទី០១ ខែមេសា ឆ្នាំ២០២៦ បង្ហាញថា កុមារស្ថិតក្នុងចំណោមក្រុមដែលរងផលប៉ះពាល់ខ្លាំងបំផុត ដោយអំពើប្រល័យពូជសាសន៍របស់អ៊ីស្រាអែលក្នុងតំបន់ហ្គាហ្សា។

យោងតាមរបាយការណ៍ កងទ័ពអ៊ីស្រាអែលបានសម្លាប់កុមារចំនួន ២១ ២៨៣នាក់ និងរបួស ៤៤ ៤៨៦នាក់ផ្សេងទៀត តំណាងឱ្យ ២៦% នៃជនរងគ្រោះទាំងអស់។

ក្នុងចំណោមកុមារស្លាប់ មានទារកចំនួន ៤៥០នាក់កើត អំឡុងសង្គ្រាម កុមារចំនួន ១ ០២៩នាក់ មិនទាន់ដល់ថ្ងៃកំណើតដំបូងនៅឡើយ និងកុមារចំនួន ៥ ០៣១នាក់អាយុក្រោម ៥ឆ្នាំ ជាតួលេខដែល PCBS ថា បានឆ្លុះបញ្ចាំងពីការសម្លាប់រង្គាលពិតប្រាកដនៃជំនាន់មួយដែលមិនទាន់ចាប់ផ្តើមជីវិត៕

សម្រួល៖ ណឺ មិនា

The post ខួប ១ ០០០ថ្ងៃ នៃអំពើប្រល័យពូជសាសន៍ក្រោមដៃអ៊ីស្រាអែលនៅហ្គាហ្សា ធ្វើឱ្យកុមាររាប់ម៉ឺននាក់ស្លាប់ កំព្រា និងអត់ឃ្លានធ្ងន់ធ្ងរ appeared first on Kampuchea Thmey Daily.

លោក ណេតាន់យ៉ាហ៊ូ អះអាងថា សមរភូមិជាមួយអ៊ីរ៉ង់អត់ចប់ទេ នឹងបន្តទៀត បើចាំបាច់

Minea Neu — Wed, 01 Jul 2026 03:11:00 +0000

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានសាទរ ចំពោះសមិទ្ធផលយោធារបស់អ៊ីស្រាអែលក្នុងរយៈពេលប៉ុន្មានឆ្នាំចុងក្រោយនេះ ប៉ុន្តែនៅតែប្តេជ្ញាថា សមរភូមិរបស់អ៊ីស្រាអែលមិនចប់នៅឡើយទេ ហើយនៅតែមានការងារដែលត្រូវធ្វើប្រឆាំងនឹងអ៊ីរ៉ង់។ នេះបើយោងតាមបទសម្ភាសន៍ជាមួយកាសែត Channel 14 នៅថ្ងៃទី៣០ ខែមិថុនា ឆ្នាំ២០២៦ ។

ពេលអ្នកកាសែតសួរថាតើ សង្គ្រាមរបស់អ៊ីស្រាអែលប្រឆាំងនឹងអ៊ីរ៉ង់ ក្រុមហាម៉ាស និងហេសបូឡាក្នុងប៉ុន្មានឆ្នាំថ្មីៗនេះ អាចត្រូវបានចាត់ទុកថាចប់ ហើយឈ្នះឬអត់?

នាយករដ្ឋមន្រ្តីអ៊ីស្រាអែល លោក ណេតាន់យ៉ាហ៊ូ។ រូបភាព៖ Reuters

លោក ណេតាន់យ៉ាហ៊ូ សម្តែងការសាទរ ចំពោះភាពជោគជ័យយ៉ាងធំធេងលើសមិទ្ធផលទាំងនោះ ប៉ុន្តែថាមិនដែលចប់ទេ ដោយបញ្ជាក់ថា «ប្រសិនបើអ្នកចង់រស់នៅក្នុងមជ្ឈិមបូព៌ានិងលើពិភពលោកបានសុខ អ្នកត្រូវតែខ្លាំង»។

លោក ណេតាន់យ៉ាហ៊ូ បន្ថែមថា៖ « អ៊ីស្រាអែលខ្លាំងជាងពេលណាៗទាំងអស់ ហើយយើងបានរារាំងការគំរាមកំហែងនានា។ យើងបានធ្វើឱ្យពួកគេចុះខ្សោយយ៉ាងខ្លាំង។ យើងនៅតែមានការងារដែលត្រូវធ្វើ […] យើងត្រូវដោះស្រាយអ្វីដែលនៅសេសសល់ជាមួយអ៊ីរ៉ង់ និងចាប់យកឱកាសសម្រាប់កិច្ចព្រមព្រៀងសន្តិភាព អំឡុងពេលប្រយុទ្ធគ្នាជាបន្តបន្ទាប់ជាមួយក្រុមហេសបូឡាគាំទ្រដោយអ៊ីរ៉ង់ និងក្របខ័ណ្ឌទើបចុះហត្ថលេខាថ្មីៗនេះជាមួយលីបង់ ក្នុងគោលបំណងដកទ័ពអ៊ីស្រាអែលបន្តិចម្តងៗ និងការធ្វើឱ្យចំណងមិត្តភាពមានលក្ខណៈធម្មតាឡើងវិញ។

ពេលសួរបញ្ជាក់ពីប្រទេសណាខ្លះដែលលោករំពឹងថានឹងឈានដល់កិច្ចព្រមព្រៀងសន្តិភាពជាមួយ និងប្រសិនបើពួកគេរួមបញ្ចូលអារ៉ាប៊ីសាអូឌីត?

លោក ណេតាន់យ៉ាហ៊ូ បដិសេធ មិនបញ្ចេញឈ្មោះប្រទេសទាំងនោះ ប៉ុន្តែទទូចថា៖ « ប្រទេសជាច្រើនកំពុងស្ថិតក្នុងជម្លោះ រួមទាំងប្រទេសលីបង់ផងដែរ! ខ្ញុំមិនបញ្ចេញឈ្មោះទេ ព្រោះខ្ញុំចង់ផ្តល់លទ្ធផលជាង។ ប៉ុន្តែមនុស្សគ្រប់គ្នានឹងឃើញពួកគេ […] មានការយោគយល់គ្នាជាមួយប្រទេសលីបង់ដែលគ្មាននរណាម្នាក់មើលឃើញទុកជាមុន ហើយមានទំនាក់ទំនងជាមួយប្រទេសដទៃទៀតដែរ។ ខ្ញុំមិនអាចពន្យល់បានទេ។ នៅពេលអ្នករឹងមាំ មនុស្សនឹងបង្កើតសម្ព័ន្ធភាពជាមួយអ្នក ហើយពួកគេក៏បង្កើតសន្តិភាពជាមួយអ្នកផងដែរ»៕

សម្រួល៖ ណឺ មិនា

The post លោក ណេតាន់យ៉ាហ៊ូ អះអាងថា សមរភូមិជាមួយអ៊ីរ៉ង់អត់ចប់ទេ នឹងបន្តទៀត បើចាំបាច់ appeared first on Kampuchea Thmey Daily.

ប្រធានាធិបតីតួកគី ចង្អុលឲ្យអ៊ីស្រាអែលទទួលខុសត្រូវចំពោះ អំពើប្រល័យពូជសាសន៍នៅហ្គាហ្សា

Minea Neu — Tue, 30 Jun 2026 12:26:00 +0000

ក្រោយការសម្លាប់រង្គាលដោយយោធាអ៊ីស្រាអែលនៅតំបន់ហ្គាហ្សា តាំងពីដើមខែតុលា ឆ្នាំ២០២៣ បន្តរហូតដល់បច្ចុប្បន្ន ប្រធានាធិបតីតួកគី លោក Recep Tayyip Erdoğan បានថ្លែងសុន្ទរកថាដ៏ម៉ឺងម៉ាត់មួយក្នុងកិច្ចប្រជុំពិគ្រោះយោបល់ និងវាយតម្លៃរបស់គណបក្សយុត្តិធម៌និងអភិវឌ្ឍន៍ (AK Party) របស់ខ្លួន នៅទីក្រុង Sakarya ដោយបញ្ជាក់នូវការប្តេជ្ញាចិត្តជាថ្មីរបស់ប្រទេសតួកគី ក្នុងការស្វែងរកយុត្តិធម៌ ចំពោះការប្រព្រឹត្តអំពើប្រល័យពូជសាសន៍របស់អ៊ីស្រាអែលនៅតំបន់ហ្គាហ្សា។ នេះបើយោងតាមសារព័ត៌មាន Roya News ផ្សាយនៅថ្ងៃទី២៩ ខែមិថុនា ឆ្នាំ២០២៦ ។

លោក ណេតាន់យ៉ាហ៊ូ និង លោក Recep Tayyip Erdoğan ។ រូបភាព៖ Reuters

លោក Erdoğan បានលើកឡើងថា តួកគីមានទំនួលខុសត្រូវ ចំពោះប្រជាជនដែលត្រូវបានគាបសង្កត់ ហើយសន្យាថា អ្នកប្រព្រឹត្តអំពើហិង្សាទាំងនោះប្រឈមនឹងការទទួលខុសត្រូវទាំងស្រុង។

មេដឹកនាំតួកគីរូបនេះលើកឡើងពីករណីក្មេងស្រីប៉ាឡេស្ទីនអាយុ ៥ឆ្នាំ ឈ្មោះ Hind Rajab ត្រូវបានសម្លាប់នៅឆ្នាំ២០២៥ ខណៈកំពុងរង់ចាំការជួយសង្គ្រោះ រួមទាំងការសម្លាប់ទារក និងកុមារជាច្រើននាក់ទៀត ក្នុងការវាយប្រហារលើតំបន់ស៊ីវិល។

លោក Erdoğan លើកឡើងថា៖ « អំពើប្រល័យពូជសាសន៍មួយបានកើតឡើងនៅតំបន់ហ្គាហ្សា ហើយពួកគេ[អ៊ីស្រាអែល] នៅតែវាយប្រហារ»។ ដោយបន្ថែមថា រដ្ឋាភិបាលរបស់លោកនឹងធានាថាជនល្មើស ត្រូវតែទទួលខុសត្រូវលើករណីនេះ។

ការកត់សម្គាល់របស់ លោក Erdoğan ស្របគ្នានឹងការសម្រេចចិត្តរបស់គណៈរដ្ឋមន្ត្រីអ៊ីស្រាអែលនៅថ្ងៃដដែល ដើម្បីអនុម័តការទទួលស្គាល់លើការសម្លាប់ជនជាតិអាមេនីក្នុងសង្គ្រាមលោកលើកទី១ ថាជា អំពើប្រល័យពូជសាសន៍ ជាចលនាមួយដែលមើលឃើញយ៉ាងទូលំទូលាយ ស្តីបន្ទោសចំពោះប្រទេសតួកគី។

មន្ត្រីអ៊ីស្រាអែលពិពណ៌នាអំពីការសម្រេចចិត្តនេះ ថាមិនមែនជាការសងសឹកទេ ទោះបីជាមានភាពតានតឹងរវាងប្រទេសទាំងពីរយូរហើយក៏ដោយ។

សេចក្តីថ្លែងការណ៍នេះឆ្លុះបញ្ចាំងពីជំហររបស់តួកគី ចាប់តាំងពីខែតុលា ឆ្នាំ២០២៣ ។

ទីក្រុងអង់ការ៉ាបានចោទប្រកាន់អ៊ីស្រាអែលម្តងហើយម្តងទៀត ពីបទប្រព្រឹត្តអំពើប្រល័យពូជសាសន៍ ហើយគាំទ្រសកម្មភាពផ្លូវច្បាប់អន្តរជាតិ រួមទាំងសំណុំរឿងរបស់អាហ្វ្រិកខាងត្បូង នៅតុលាការយុត្តិធម៌អន្តរជាតិ និងស្វាគមន៍ដីកាចាប់ខ្លួនរបស់តុលាការព្រហ្មទណ្ឌអន្តរជាតិ(ICC) លើមេដឹកនាំអ៊ីស្រាអែល៕

សម្រួល៖ ណឺ មិនា

The post ប្រធានាធិបតីតួកគី ចង្អុលឲ្យអ៊ីស្រាអែលទទួលខុសត្រូវចំពោះ អំពើប្រល័យពូជសាសន៍នៅហ្គាហ្សា appeared first on Kampuchea Thmey Daily.

មេយោធាអាមេរិកតំបន់មជ្ឈិមបូព៌ា ទៅជួបថ្នាក់ដឹកនាំលីបង់ ដើម្បីពិភាក្សាអំពីការអនុវត្តកិច្ចព្រមព្រៀងជាមួយអ៊ីស្រាអែល

Minea Neu — Tue, 30 Jun 2026 11:10:00 +0000

ប្រធានាធិបតីលីបង់ លោក ចូសេហ្វ អាអូន (Joseph Aoun) បានប្រាប់ប្រធានកងកម្លាំងអាមេរិកនៅមជ្ឈិមបូព៌ា ថា រដ្ឋាភិបាលលីបង់ នឹងប្រើប្រាស់សិទ្ធិទាំងអស់ការពារអធិបតេយ្យភាពរបស់ខ្លួនលើប្រទេសទាំងមូល ដោយដាក់ពង្រាយកងទ័ពរហូតដល់ព្រំដែនអ៊ីស្រាអែល។

ភ្នាក់ងារសារព័ត៌មាន AFP បានចុះផ្សាយនៅថ្ងៃទី២៩ ខែមិថុនា ឆ្នាំ២០២៦ ឲ្យដឹងថា លោក អាអូន (Aoun) ជួបជាមួយឧត្តមនាវីឯក Brad Cooper ប្រធានបញ្ជាការកណ្តាលសហរដ្ឋអាមេរិក (Centcom) ដើម្បីពិភាក្សាអំពីកិច្ចព្រមព្រៀងសម្របសម្រួលដោយទីក្រុងវ៉ាស៊ីនតោន ដែលបានចុះហត្ថលេខាកាលពីសប្តាហ៍មុន ដោយមានភាគីអ៊ីស្រាអែលនិងលីបង់ក្នុងគោលបំណងបង្កើតកិច្ចព្រមព្រៀងសន្តិភាព។

លោក Joseph Aoun (ស្តាំ) ជួបជាមួយឧត្តមនាវីឯក Brad Cooper ។ រូបភាព៖ បណ្តាញសង្គម X លោក Aoun

ជាផ្នែកមួយនៃកិច្ចព្រមព្រៀងទីក្រុងវ៉ាស៊ីនតោន ក្រុមហេសបូឡានឹងត្រូវដកហូតអាវុធ ដោយបន្ទុកនានាធ្លាក់លើកងទ័ពជាតិរបស់លីបង់។

យោងតាមសេចក្តីថ្លែងការណ៍មួយ មេទ័ពលីបង់ លោក Rodolphe Haykal និង លោក Cooper បានពិភាក្សាអំពីសារៈសំខាន់នៃការអនុវត្តឧបសម្ព័ន្ធសន្តិសុខនៃកិច្ចព្រមព្រៀងក្របខ័ណ្ឌ ក៏ដូចជាវិធីនៃការពង្រឹងកិច្ចសហប្រតិបត្តិការនាពេលអនាគត។

ការបង្ហោះមួយនៅលើបណ្តាញសង្គម X បញ្ជាការកណ្តាលអាមេរិក បានលើកឡើងថា លោក Cooper, លោក Aoun និង លោក Haykal បានពិភាក្សាអំពីមាគ៌ាឆ្ពោះទៅមុខក្នុងការអនុវត្តកិច្ចព្រមព្រៀងរបស់ទីក្រុងវ៉ាស៊ីនតោន។

យោងតាមក្រសួងការបរទេស កិច្ចព្រមព្រៀងនេះនឹងអនុញ្ញាតិឱ្យប្រទេសលីបង់ស្តារអធិបតេយ្យភាពលើទឹកដីរបស់ខ្លួនឡើងវិញ តាមរយៈការរំសាយអាវុធលើក្រុមមិនមែនរដ្ឋនិងការរុះរើហេដ្ឋារចនាសម្ព័ន្ធពាក់ព័ន្ធ ដែលអនុញ្ញាតឱ្យអ៊ីស្រាអែលដកទ័ពចេញបណ្តើរៗ។

ក្រសួងបន្តទៀតថា៖ « សមាសធាតុនៃដំណើរការនេះនឹងត្រូវបានរៀបរាប់លម្អិតនៅក្នុងឧបសម្ព័ន្ធសន្តិសុខ បង្កើតឡើងដោយគាំទ្រយ៉ាងពេញទំហឹងពីសហរដ្ឋអាមេរិក»។

មិនតែប៉ុណ្ណោះ រដ្ឋមន្ត្រីការបរទេសអាមេរិក លោក Marco Rubio លើកឡើងកាលពីថ្ងៃសុក្រថា ទីក្រុងវ៉ាស៊ីនតោននឹងសងប្រាក់ដល់កងទ័ពលីបង់ចំនួន ៣០លានដុល្លារវិញ ខណៈលីបង់ក៏កំពុងស្វែងរកការកែលម្អសមត្ថភាពយោធាខ្លួនឡើងវិញ៕

សម្រួល៖ ណឺ មិនា

The post មេយោធាអាមេរិកតំបន់មជ្ឈិមបូព៌ា ទៅជួបថ្នាក់ដឹកនាំលីបង់ ដើម្បីពិភាក្សាអំពីការអនុវត្តកិច្ចព្រមព្រៀងជាមួយអ៊ីស្រាអែល appeared first on Kampuchea Thmey Daily.

UN ព្រមានថា បទឈប់បាញ់មិនបានទប់ស្កាត់អ៊ីស្រាអែលវាយប្រហារប៉ាឡេស្ទីនឡើយ

Minea Neu — Tue, 30 Jun 2026 05:44:00 +0000

មន្ត្រីជាន់ខ្ពស់របស់អង្គការសហប្រជាជាតិ (UN) បានព្រមានកាលពីថ្ងៃចន្ទថា ការវាយប្រហារតាមអាកាស និងប្រតិបត្តិការតាមដីគោករបស់យោធាអ៊ីស្រាអែល នៅតែបន្តទូទាំងតំបន់ហ្គាហ្សា បណ្តាលឱ្យមានអ្នកស្លាប់បន្ថែមទៀត ខណៈស្ថានភាពក្នុងដែនដីប៉ាឡេស្ទីនមានភាពមិនស្ថិតស្ថេរ។ នេះបើយោងតាមការចុះផ្សាយរបស់ភ្នាក់ងារសារព័ត៌មានតួកគី Anadolu នៅថ្ងៃទី២៩ ខែមិថុនា ឆ្នាំ២០២៦ ។

លោក Ramiz Alakbarov អនុប្រធានសម្របសម្រួលពិសេសរបស់ UN ។ រូបភាព៖ UN

លោក Ramiz Alakbarov អនុប្រធានសម្របសម្រួលពិសេសរបស់ UN សម្រាប់ដំណើរការសន្តិភាពមជ្ឈិមបូព៌ា បានប្រាប់ក្រុមប្រឹក្សាសន្តិសុខ UN ថា៖ « ចាប់តាំងពីថ្ងៃកំណត់សម្រាប់របាយការណ៍លាយលក្ខណ៍អក្សរ កាលពីថ្ងៃទី១២ ខែមិថុនា ស្ថានភាពនៅទូទាំងអ៊ីស្រាអែល និងដែនដីប៉ាឡេស្ទីនក្នុងតំបន់ហ្គាហ្សា តំបន់ West Bank រួមទាំងទីក្រុងយេរូសាឡឹមខាងកើត នៅតែមានភាពមិនប្រាដកប្រជា»។

ដោយកត់សម្គាល់អំពីការវាយប្រហារតាមអាកាស និងប្រតិបត្តិការយោធារបស់អ៊ីស្រាអែលបានបន្តនៅទូទាំងតំបន់ហ្គាហ្សា បណ្តាលឱ្យមានអ្នកស្លាប់បន្ថែមទៀត លោក Alakbarov លើកឡើងថា ចំនួនអ្នកស្លាប់សរុប ចាប់តាំងពីបទឈប់បាញ់លើសពី ១ ០០០នាក់។ នេះបើយោងតាមក្រសួងសុខាភិបាលហ្គាហ្សា។

គួរបញ្ជាក់ថា បច្ចុប្បន្នអ៊ីស្រាអែលគ្រប់គ្រងតំបន់ហ្គាហ្សាជាង ៧០ភាគរយ និងបន្តពង្រីកវិសាលភាពនៃការគ្រប់គ្រងទឹកដីនៅប្រទេសប៉ាឡេស្ទីន។

ដោយសម្តែងការព្រួយបារម្ភយ៉ាងខ្លាំង ចំពោះរបាយការណ៍ដែលមានការបំភិតបំភ័យ អំឡុងពេលការតវ៉ានៅហ្គាហ្សាកាលពីថ្ងៃទី២៦ ខែមិថុនា លោក Alakbarov និយាយថា៖ « ជនស៊ីវិលត្រូវតែអាចអនុវត្តសិទ្ធិរបស់ពួកគេដោយសន្តិវិធី ដោយគ្មានការភ័យខ្លាច ហើយត្រូវតែទទួលបានការពារគ្រប់ពេលវេលា»។

លោក Alakbarov បន្ថែមថា៖ « ទោះបីជាមានបទឈប់បាញ់ដែលបានប្រកាសកាលពី ៨ខែមុនក៏ដោយ តំបន់ហ្គាហ្សានៅតែប្រឈមនឹងភាពមិនប្រាកដប្រជាយ៉ាងខ្លាំង ហើយប្រជាជនជាច្រើននៅតែរងទុក្ខវេទនា។ យើងថ្កោលទោសលើការសម្លាប់ និងរបួសជាបន្តបន្ទាប់របស់ជនស៊ីវិលនៅហ្គាហ្សា រួមទាំងស្ត្រី និងកុមារ»។

តំណាងឱ្យ UN លោក បានថ្កោលទោសលើអំពើហិង្សាទាំងអស់ប្រឆាំងនឹងជនស៊ីវិល រួមទាំងអំពើភេរវកម្ម ចំពោះការវាយប្រហាររបស់អ៊ីស្រាអែល កំពុងបន្តនិងកាន់តែខ្លាំងឡើង៕

សម្រួល៖ ណឺ មិនា

The post UN ព្រមានថា បទឈប់បាញ់មិនបានទប់ស្កាត់អ៊ីស្រាអែលវាយប្រហារប៉ាឡេស្ទីនឡើយ appeared first on Kampuchea Thmey Daily.

យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ

Rann Reuy — Tue, 30 Jun 2026 03:10:09 +0000

យោធាអ៊ីស្រាអែល យ៉ាងហោចណាស់ជិត១០០០នាក់ បានបាត់បង់ជីវិតក្នុងសង្គ្រាមរយៈពេល១០០០ថ្ងៃ ដែលអ៊ីស្រាអែលបានប្រកាសចាប់តាំងពីថ្ងៃទី៧ខែតុលាឆ្នាំ២០២៣ ពេលដែលក្រុមហាម៉ាស បានបើកការវាយឆ្មក់ចូលទៅក្នុងទឹកដីអ៊ីស្រាអែល ដោយសម្លាប់មនុស្សជាង១២០០នាក់ និងចាប់ពង្រត់មនុស្សជាង២៤០នាក់។

ក្រុមឧត្តមសេនីយ៍អ៊ីស្រាអែលបានជួបប្រជុំនៅថ្ងៃចន្ទប្រារព្ធពេលវេលាសង្គ្រាម១០០០ថ្ងៃ។ Israel Today

បណ្តាញសង្គមរបស់អ៊ីស្រាអែល ដែលមានឈ្មោះថា «Israel Today» បានបង្ហោះរូបភាពនៃការស្មិងស្មាធិ៍ របស់ក្រុមនៃឧត្តមសេនីយ៍ជាន់ខ្ពស់របស់អ៊ីស្រាអែល ក្នុងការជួបប្រជុំនៅថ្ងៃចន្ទ ដើម្បីរៀបចំសន្និសីទរយៈពេល១០០០ថ្ងៃនៃសង្គ្រាមចាប់តាំងពីការចាប់ផ្តើមវាយលុកចូលតំបន់ហ្គាហ្សាដើម្បីកម្ចាត់ក្រុមហាម៉ាស។

នៅក្នុងសារដែលត្រូវបានបង្ហោះតាមបណ្តាញសង្គមហ្វេសប៊ុកនោះ បានលើកឡើងថា កិច្ចប្រជុំបានបើកជាមួយការស្មិងស្មាធិ៍ (moment of silence) សម្រាប់ទាហាន៩៦៤នាក់ស្លាប់ ចាប់តាំងពីព្រឹកថ្ងៃទី៧ខែតុលាឆ្នាំ២០២៣។

នាយសេនាធិការចម្រុះនៃកងកម្លាំងការពារជាតិអ៊ីស្រាអែល Eyal Zamir ត្រូវបានស្រង់សម្តីប្រាប់ឧត្តមសេនីយ៍របស់ខ្លួន ដូចបាននិយាយថា៖« យើងបច្ចុប្បន្ននេះស្ថិតនៅចំណុចរបត់យុទ្ធសាស្រ្តដ៏សំខាន់ក្នុងយុទ្ធនាការ[យោធា] នេះ។ រយៈពេល១០០០ថ្ងៃនិង១០០០យប់ ដែលយើងបានប្រយុទ្ធនៅក្នុងយុទ្ធនាការដដ៏វែងបំផុត ស្មុគ្រស្មាញបំផុត និង ទាមទារបំផុត ដែលយើងមិនធ្លាប់ជួប»។

យោងបណ្តាញសង្គម Iran International English ក្នុងការអះអាងដាច់ដោយឡែក១ទៀត រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយនៅថ្ងៃចន្ទថា លោកបានបញ្ជាឱ្យយោធាអ៊ីស្រាអែលរៀបចំផែនការវាយប្រហារដោយឯករាជ្យប្រឆាំងនឹងអ៊ីរ៉ង់ ដោយព្រមានថា អ៊ីស្រាអែលអាចធ្វើសង្គ្រាមជាមួយទីក្រុងតេហេរ៉ង់ «ថ្ងៃស្អែក» ប្រសិនបើអ៊ីរ៉ង់បាញ់មីស៊ីលទៅលើទឹកដីអ៊ីស្រាអែល។

ការប្រកាសរបស់រដ្ឋមន្ត្រីការពារជាតិអ៊ីស្រាអែលនេះ កើតមានក្រោយសហរដ្ឋអាមេរិក និងអ៊ីរ៉ង់បានធ្លាក់ចូលទៅក្នុងការប្រយុទ្ធគ្នាជាថ្មី ស្របពេលនៃការចរចារកដំណោះស្រាយសន្តិភាពត្រូវជាប់គាំង ដោយសារតែអ៊ីរ៉ង់បដិសេធ ព្រោះតែវាយប្រហាររបស់អាមេរិកលើទីតាំងបាញ់មីស៊ីល ដ្រូន កាលពីចុងសប្តាហ៍៕

រ៉ាន់ រើយ

The post យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ appeared first on Kampuchea Thmey Daily.

ប្រធានាធិបតីតួកគី៖ ការតស៊ូប្រឆាំងនឹងអំពើប្រល័យពូជសាសន៍ និងការពង្រីកទឹកដីរបស់អ៊ីស្រាអែល គឺជាការតស៊ូ ដើម្បីរស់

Minea Neu — Sun, 28 Jun 2026 04:45:44 +0000

ប្រធានាធិបតីតួកគី លោក Recep Tayyip Erdogan បានចោទប្រកាន់លទ្ធិស៊ីយ៉ូននិយម(Zionism) ដែលសំដៅលើរបបអ៊ីស្រាអែលបច្ចុប្បន្ន កាលពីថ្ងៃសៅរ៍ ថាបានគំរាមកំហែងដល់ការរស់រានមានជីវិតរបស់ប្រទេសតួកគី។ ការលើកឡើងនេះជាការវាយប្រហារពាក្យសម្តីចុងក្រោយបង្អស់របស់មេដឹកនាំតួកគីលើរបបអ៊ីស្រាអែល ចាប់តាំងពីការចាប់ផ្តើមសង្គ្រាមនៅហ្គាហ្សាកាលពីថ្ងៃទី៧ ខែតុលា ឆ្នាំ២០២៣ ។

ប្រធានាធិបតីតួកគី លោក Recep Tayyip Erdogan ។ រូបភាព៖ Reuters

យោងតាមសារព័ត៌មាន I24News ផ្សាយនៅថ្ងៃទី២៧ ខែមិថុនា ឆ្នាំ២០២៦ លោក Erdogan មានប្រសាសន៍ថា៖ « មនោគមវិជ្ជាប្រល័យពូជសាសន៍ ការកាន់កាប់ និងការពង្រីកខ្លួន ហៅថា លទ្ធិស៊ីយ៉ូននិយម មិនត្រឹមតែគំរាមកំហែងដល់ខ្ញុំ គណបក្ស សម្ព័ន្ធភាពរបស់យើងប៉ុណ្ណោះទេ តែវាគំរាមកំហែងដល់មនុស្សគ្រប់គ្នា។ ពេលយើងតស៊ូប្រឆាំងនឹងលទ្ធិស៊ីយ៉ូននិយម យើងមិនបានធ្វើការតស៊ូនេះសម្រាប់ខ្លួនយើង ឬសម្រាប់ហេតុផលផ្ទាល់ខ្លួននោះទេ តែយើងកំពុងធ្វើវាសម្រាប់ការរស់រានមានជីវិតនិងប្រជាជាតិយើង»។

ភាសាបែបនេះ សម្រាប់លោក Erdogan គឺជាការរិះគន់អ៊ីស្រាអែល និងនាយករដ្ឋមន្ត្រី លោក បេនចាមីន ណេតាន់យ៉ាហ៊ូ ម្តងហើយម្តងទៀតយ៉ាងចាស់ដៃ ចាប់តាំងពីការសម្លាប់រង្គាលដឹកនាំដោយក្រុមហាម៉ាស នៅថ្ងៃទី៧ ខែតុលា និងសង្គ្រាមនៅហ្គាហ្សា។

ប្រធានាធិបតីតួកគីបានហៅអ៊ីស្រាអែលថា៖ « ជារដ្ឋភេរវករនិងអ្នកកាន់កាប់ ដោយប្រៀបធៀប លោក ណេតាន់យ៉ាហ៊ូ ទៅនឹងរបបហ៊ីត្លែរ និងស្តាលីន ហើយបានចោទប្រកាន់រដ្ឋាភិបាលអ៊ីស្រាអែលថា រកគ្រប់មធ្យោបាយក្នុងការប្រើយុទ្ធសាស្រ្តប្រល័យពូជសាសន៍»។

ទីក្រុងអង់ការ៉ាបានរក្សាទំនាក់ទំនងជាមួយក្រុមហាម៉ាស តែកាត់ផ្តាច់ទំនាក់ទំនងពាណិជ្ជកម្ម និងសេដ្ឋកិច្ចជាមួយអ៊ីស្រាអែល តែមិនទាន់កាត់ផ្តាច់ទំនាក់ទំនងការទូតរវាងប្រទេសទាំងពីរទាំងស្រុងនៅឡើយទេ៕

សម្រួល៖ ណឺ មិនា

The post ប្រធានាធិបតីតួកគី៖ ការតស៊ូប្រឆាំងនឹងអំពើប្រល័យពូជសាសន៍ និងការពង្រីកទឹកដីរបស់អ៊ីស្រាអែល គឺជាការតស៊ូ ដើម្បីរស់ appeared first on Kampuchea Thmey Daily.

អ៊ីស្រាអែលប្រកាសដកទ័ព ចេញពីតំបន់សាកល្បងចំនួន២ តែបន្តកាន់កាប់តំបន់យុទ្ធសាស្ត្រ ភាគខាងត្បូងលីបង់ដដែល

Minea Neu — Sun, 28 Jun 2026 02:28:36 +0000

អ៊ីស្រាអែលនិងលីបង់ បានចុះហត្ថលេខាលើកិច្ចព្រមព្រៀងឈប់បាញ់ក្របខ័ណ្ឌដែលសម្របសម្រួលដោយសហរដ្ឋអាមេរិក នៅថ្ងៃទី២៦ ខែមិថុនា ឆ្នាំ២០២៦ ប៉ុន្តែនៅតែមានភាពផុយស្រួយនៅឡើយ។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ លើកឡើងកាលពីថ្ងៃសៅរ៍ថា កងកម្លាំងអ៊ីស្រាអែលនឹងចាប់ផ្តើមដកខ្លួនចេញពីតំបន់សាកល្បងដំបូងចំនួនពីរ នៅភាគខាងត្បូងប្រទេសលីបង់ ប៉ុន្តែបន្តរក្សាវត្តមានយោធាក្នុងតំបន់យុទ្ធសាស្ត្រ Shqif (ប្រាសាទ Beaufort) ដដែល។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានតួកគី Anadolu នៅថ្ងៃទី២៨ ខែមិថុនា ឆ្នាំ២០២៦ ។

នាយករដ្ឋមន្រីអ៊ីស្រាអែល លោក បេនចាមីន ណេតាន់យ៉ាហ៊ូ។ រូបភាព៖ AA

លោក ណេតាន់យ៉ាហ៊ូ និយាយថា៖ « កងទ័ពអ៊ីស្រាអែលបានគ្រប់គ្រងតំបន់ Shqif ហើយនឹងបន្តនៅទីនោះ។ យើងបានណែនាំកងកម្លាំងអ៊ីស្រាអែលឱ្យរក្សាសេរីភាពនៃការធ្វើដំណើរក្នុងតំបន់នោះ ដើម្បីប្រឈមមុខនឹងការគំរាមកំហែងណាមួយពីប្រទេសលីបង់»។

លោកបន្ថែមថា៖ « អ៊ីស្រាអែលនឹងចាប់ផ្តើមដកខ្លួនចេញពីតំបន់សាកល្បងដំបូងចំនួនពីរនៅភាគខាងត្បូងលីបង់ ក្រោមកិច្ចព្រមព្រៀងដែលបានចុះហត្ថលេខាជាមួយប្រទេសលីបង់ ក្រោមការសម្របសម្រួលរបស់សហរដ្ឋអាមេរិក»។

លោក ណេតាន់យ៉ាហ៊ូ អះអាងថា សហរដ្ឋអាមេរិកនិងលីបង់បានយល់ព្រមបន្តវត្តមានយោធាអ៊ីស្រាអែលក្នុងតំបន់សន្តិសុខ នៅភាគខាងត្បូងប្រទេសលីបង់។

លោក បន្តថា លោកប្រឆាំងនឹងការប៉ុនប៉ងណាមួយ ដើម្បីបង្ខំឱ្យអ៊ីស្រាអែលដកថយ។ កិច្ចព្រមព្រៀងនេះបានកើតឡើង បន្ទាប់ពីការវាយប្រហារយ៉ាងខ្លាំងដែលធ្វើឡើងដោយអ៊ីស្រាអែលប្រឆាំងនឹងក្រុម Hezbollah។

នាយករដ្ឋមន្រ្តីអ៊ីស្រាអែលបន្ថែមទៀតថា៖ « កងទ័ពអ៊ីស្រាអែលបានបំផ្លាញឃ្លាំងមីស៊ីលរបស់ក្រុម Hezbollah ជាង ៩០% ។ បេសកកម្មរបស់អ៊ីស្រាអែលមិនទាន់ចប់នៅឡើយទេ! ដ្រូនផ្ទុះ នៅតែជាបញ្ហាប្រឈមសន្តិសុខចម្បង»៕

សម្រួល៖ ណឺ មិនា

The post អ៊ីស្រាអែលប្រកាសដកទ័ព ចេញពីតំបន់សាកល្បងចំនួន២ តែបន្តកាន់កាប់តំបន់យុទ្ធសាស្ត្រ ភាគខាងត្បូងលីបង់ដដែល appeared first on Kampuchea Thmey Daily.

អ៊ីស្រាអែល Archives - Kampuchea Thmey Daily

លោក ណេតាន់​យ៉ាហ៊ូ អះ​អាង​ថា សមរភូមិ​​ជាមួយអ៊ីរ៉ង់​អត់​ចប់​ទេ នឹង​បន្តទៀត ​បើ​ចាំ​បាច់​

ប្រធានាធិបតី​តួក​គី ​ចង្អុល​​ឲ្យ​អ៊ីស្រាអែល​ទទួល​ខុសត្រូវ​ចំពោះ​ អំពើ​ប្រល័យ​ពូជ​សាសន៍​នៅ​ហ្គាហ្សា​

UN ព្រមានថា ​បទ​ឈប់​បាញ់​​មិនបាន​ទប់ស្កាត់អ៊ីស្រាអែល​​វាយ​ប្រហារ​​ប៉ាឡេស្ទីន​ឡើយ​​

​យោធាអ៊ីស្រាអែល ​ជិត១០០០នាក់​បាត់​បង់ជីវិត ក្នុងសង្ក្រាម​​១០០០ថ្ងៃ​

លោក ណេតាន់យ៉ាហ៊ូ អះអាងថា សមរភូមិជាមួយអ៊ីរ៉ង់អត់ចប់ទេ នឹងបន្តទៀត បើចាំបាច់

ប្រធានាធិបតីតួកគី ចង្អុលឲ្យអ៊ីស្រាអែលទទួលខុសត្រូវចំពោះ អំពើប្រល័យពូជសាសន៍នៅហ្គាហ្សា

UN ព្រមានថា បទឈប់បាញ់មិនបានទប់ស្កាត់អ៊ីស្រាអែលវាយប្រហារប៉ាឡេស្ទីនឡើយ

យោធាអ៊ីស្រាអែល ជិត១០០០នាក់បាត់បង់ជីវិត ក្នុងសង្ក្រាម១០០០ថ្ងៃ