អ្នកបើកយន្តហោះ Archives - Kampuchea Thmey Daily

យន្តហោះ Air Canada បុកជាមួយរថយន្តនៅញូវយ៉ក សម្លាប់អ្នកបើកនិងជំនួយការម្នាក់

Minea Neu — Mon, 23 Mar 2026 10:05:44 +0000

អាជ្ញាធរទីក្រុងញូវយ៉កឱ្យដឹងថា អ្នកបើកយន្តហោះនិងជំនួយការម្នាក់របស់យន្តហោះ Air Canada Express បានស្លាប់ បន្ទាប់ពីយន្តហោះបើកបុកជាមួយរថយន្តពន្លត់អគ្គិភ័យមួយគ្រឿង ខណៈកំពុងចុះចតនៅអាកាសយានដ្ឋាន LaGuardia ទីក្រុងញូវយ៉ក កាលពីយប់ថ្ងៃអាទិត្យ។

យោងតាម AFP និង Reuters ផ្សាយថ្ងៃទី២៣ ខែមីនា ឆ្នាំ២០២៦ លើកឡើងថា យន្តហោះ Air Canada Express CRJ-៩០០ កំពុងដឹកអ្នកដំណើរចំនួន ៧២នាក់ និងសមាជិកនាវិកចំនួន៤នាក់ មកពីទីក្រុង Montreal ។ នេះបើផ្អែកលើបញ្ជីអ្នកដំណើរបឋម។

យន្តហោះ Air Canada Express CRJ-៩០០ ។ រូបភាព៖ Reuters

បន្ទាប់ពីកើតហេតុនេះ រដ្ឋបាលអាកាសចរណ៍សហព័ន្ធសហរដ្ឋអាមេរិក (FAA) ចេញបញ្ជាឱ្យយន្តហោះទាំងអស់ ផ្អាកចុះចតនៅអាកាសយានដ្ឋាន LaGuardia មួយរយៈសិន។

នាយកដ្ឋានប៉ូលិសញូវយ៉កបញ្ជាក់កាលពីថ្ងៃអាទិត្យថា៖ « យន្តហោះបានបុករថយន្តមួយគ្រឿងក្នុងកំពង់ផែរបស់អាជ្ញាធរ បន្ទាប់ពីចុះចត។ យើងមិនទាន់ទទួលព័ត៌មានលម្អិតបន្ថែមក្នុងពេលភ្លាមៗនៃឧប្បត្តិហេតុនោះទេ»។

អ្នកនាំពាក្យអាជ្ញាធរកំពង់ផែនិយាយថា៖ « យន្តហោះបានបុកជាមួយរថយន្តសង្គ្រោះនិងពន្លត់អគ្គិភ័យ»។

អ្នកនាំពាក្យបន្តថា៖ « អាកាសយានដ្ឋានបច្ចុប្បន្នត្រូវបានបិទ ដើម្បីសម្រួលដល់ការឆ្លើយតបនិងអនុញ្ញាតឱ្យមានការស៊ើបអង្កេតយ៉ាងហ្មត់ចត់»៕

យន្តហោះ Air Canada Express CRJ-៩០០ ។ រូបភាព៖ World report US

ប្រែសម្រួល៖ ណឺ មិនា

The post យន្តហោះ Air Canada បុកជាមួយរថយន្តនៅញូវយ៉ក សម្លាប់អ្នកបើកនិងជំនួយការម្នាក់ appeared first on Kampuchea Thmey Daily.

ពីឡុតឆ្នើមបំផុតរបស់អ៊ុយក្រែន បើកយន្តហោះបុកគ្នាឯង ស្លាប់

Sok Sovann — Sun, 27 Aug 2023 03:09:54 +0000

អ្នកបើកយន្តហោះចម្បាំងឆ្នើមបំផុតរបស់អ៊ុយក្រែនម្នាក់ និងអាកាសយានិកពីរនាក់ផ្សេងទៀត បានស្លាប់ក្នុងហេតុការណ៍យន្តហោះបុកគ្នាឯងលើអាកាសនៅតំបន់ Zhytomyr Oblast កាលពីថ្ងៃសៅរ៍ទី២៦ខែសីហា។

លោក Andrii Pilshchykov (រូបថត៖ ក្រសួងការពារជាតិអ៊ុយក្រែន)

លោក Andrii Pilshchykov បានសាងកេរ្តិ៍ឈ្មោះល្បីរន្ទឺ ដោយសារតែចូលរួមក្នុងការប្រយុទ្ធនៅទីក្រុង កៀវ ពេលដែលរុស្ស៊ី បើកប្រតិបត្តិការលុកលុយដំបូង។

យោធាអ៊ុយក្រែន បានហៅការស្លាប់របស់គាត់ថាជា “ការបាត់បង់ដ៏ឈឺចាប់ និងមិនអាចជួសជុលបាន” ហើយបានថ្លែងអំណរគុណដល់លោក Pilshchykov ក្នុងនាមជាអ្នកបើកយន្តហោះដែលមានចំណេះដឹង និងពោពេញដោយទេពកោសល្យដ៏អស្ចារ្យ។

យន្តហោះហ្វឹកហ្វឺន L-39 (រូបថត៖ Amazon)

គួរបញ្ជាក់ថា ការបុកគ្នានេះ គឺរវាងយន្តហោះហ្វឹកហ្វឺន L-39 ចំនួន២គ្រឿង ដែលហោះហើរនៅភាគខាងជើងអ៊ុយក្រែន។

ស្របពេលជាមួយគ្នានោះ លោកប្រធានាធិបតី Volodymyr Zelensky បានបញ្ជាក់ពីការស្លាប់នេះ នៅក្នុងសុន្ទរកថាវីដេអូពេលយប់របស់គាត់ ដោយនិយាយថា ប្រទេសរបស់គាត់ នឹងមិនបំភ្លេចនរណាម្នាក់ ដែលការពារផ្ទៃមេឃសេរីរបស់អ៊ុយក្រែនបានឡើយ៕

ប្រែសម្រួល៖ Vann Vann

ប្រភព៖ BBC

ចុចអាន៖ សហរដ្ឋអាមេរិក យល់ព្រមផ្តល់យន្តហោះចម្បាំង F-16 ទៅឲ្យ អ៊ុយក្រែន

The post ពីឡុតឆ្នើមបំផុតរបស់អ៊ុយក្រែន បើកយន្តហោះបុកគ្នាឯង ស្លាប់ appeared first on Kampuchea Thmey Daily.

លោក ពូទីន ទទួលស្គាល់ថា អ្នកបើកយន្តហោះរុស្ស៊ីស្លាប់ ក្នុងការបះបោររបស់ក្រុមទាហានស៊ីឈ្នួល

Sok Sovann — Tue, 27 Jun 2023 02:09:36 +0000

ប្រធានាធិបតីរុស្ស៊ីលោក វ្ល៉ាឌីមៀរ ពូទីន កាលពីថ្ងៃចន្ទទី២៦ខែមិថុនា បានគោរពវិញ្ញាណក្ខន្ធអ្នកបើកយន្តហោះដែលត្រូវបានសម្លាប់ ក្នុងអំឡុងការបះបោរកាលពីចុងសប្តាហ៍។

លោក ពូទីន (រូបថត៖ AFP)

កាលពីថ្ងៃសៅរ៍ទី២៤ខែមិថុនា ក្រុមហ៊ុនទាហានស៊ីឈ្មួល Wagner បានកាន់កាប់ទីក្រុង Rostov-on-Don ភាគខាងត្បូង និងមជ្ឈមណ្ឌលបញ្ជាការយោធាដែលដឹកនាំយុទ្ធនាការអ៊ុយក្រែន មុនពេលបញ្ឈប់ការបះបោរវិញ។

លោកពូទីន បាននិយាយក្នុងសុន្ទរកថាជាសាធារណៈលើកដំបូង អំពីការបះបោរនោះថា “ភាពក្លាហាន និងការលះបង់ជីវិត របស់វីរបុរសបើកយន្តហោះ បានជួយសង្គ្រោះប្រទេសរុស្ស៊ី ពីផលវិបាកដ៏គួរឲ្យសោកសៅ”។

(រូបថត៖ E2W)

ទោះបីជាយ៉ាងណាក៏ដោយ មិនទាន់មានព័ត៌មានផ្លូវការថា អ្នកបើកយន្តហោះប៉ុន្មាននាក់ស្លាប់ ឬយន្តហោះប៉ុន្មានគ្រឿង ត្រូវបានបាញ់ទម្លាក់នោះទេ។

ឆានែល Telegram របស់រុស្ស៊ីមួយចំនួនដែលតាមដានសកម្មភាពយោធារបស់រុស្ស៊ី បានរាយការណ៍កាលពីថ្ងៃសៅរ៍ថា ភីឡុតរុស្ស៊ីចំនួន១៣នាក់ ត្រូវបានសម្លាប់ក្នុងអំឡុងការបះបោរនោះ។ ក្នុងចំណោមយន្តហោះដែលធ្លាក់ មានឧទ្ធម្ភាគចក្រចម្បាំងអេឡិចត្រូនិក Mi-8 MTPR ចំនួន៣គ្រឿង និងយន្តហោះ Il-18 មួយគ្រឿង៕

ប្រែសម្រួល៖ Vann Vann

ប្រភព៖ CNA

ចុចអាន៖ តើអាមេរិកនិងសម្ព័ន្ធមិត្ត ពិតជានៅពីក្រោយ ការបះបោរប្រឆាំងលោក ពូទីន មែនទេ?

The post លោក ពូទីន ទទួលស្គាល់ថា អ្នកបើកយន្តហោះរុស្ស៊ីស្លាប់ ក្នុងការបះបោររបស់ក្រុមទាហានស៊ីឈ្នួល appeared first on Kampuchea Thmey Daily.

អាថ៌កំបាំងទាំង ៨ នៅលើយន្តហោះ មានតែអ្នកបើកបរទើបដឹងនិងមានសិទ្ធប្រើបាន

សាង ស្រីល័ក្ខ — Thu, 17 Jun 2021 03:56:47 +0000

ទោះបីជាយើងដឹងពីអ្វីដែលអ្នកបើកយន្តហោះធ្វើក៏ដោយ តែយើងអាចនឹងមិនដឹងរឿងគ្រប់យ៉ាងនៅលើយន្តហោះទាំងអស់បានឡើយ។

១ បន្ទប់គេងមួយដែលអាចសម្រាកបាន

ការហោះហើរអាចមានរយៈពេលវែង ហើយបុគ្គលិកហោះហើរក៏ត្រូវការសម្រាកដូចជាអ្នកបម្រើលើយន្តហោះដែរ។ ជាទូទៅវាមានបន្ទប់គេង ២ ដែលគេលាក់ ហើយនាវិកអាចគេងលក់ពេលពួកគេអស់កម្លាំង។ កន្លែងគេងនោះមានទីតាំងនៅផ្នែកខាងមុខនៃយន្តហោះ ហើយមួយផ្សេងទៀតស្ថិតនៅខាងក្រោយ។

២ បន្ទប់ងូតទឹកផ្កាឈូកនិងបន្ទប់ទឹកដែលអាចប្រើពេលសម្រាក

នៅលើយន្តហោះពាណិជ្ជកម្មធំៗ ប្រាកដជាមានទឹកផ្កាឈូកដែលមានទីតាំងនៅរួមគ្នាជាមួយបន្ទប់គេង ដែលនាវិកអាចងូតបាន ក្រោយពេលក្រោកឡើង។ ភ្ញៀវទេសចរក៏អាចរកឧបករណ៍នៅទីនោះបាន ក្នុងករណីមានភាពអាសន្នតែប៉ុណ្ណោះ។

៣ ខ្នោះមួយគូការពារអ្នកដំណើរដែលពិបាកនិយាយគ្នា

អាកាសយានិកទទួលបន្ទុកយន្តហោះ និងមានសិទ្ធអំណាចគ្រប់យ៉ាង ហើយពួកគេក៏អាចឃាត់អ្នកដំណើរណាដែលពិបាកនិយាយគ្នា ប្រសិនបើយល់ថាចាំបាច់។

បើមាននរណាម្នាក់ជាអ្នកបង្កបញ្ហាក្នុងអំឡុងពេលហោះហើរ ហើយទទួលការព្រមានម្ដងហើយម្ដងទៀតនៅតែបន្តធ្វើសកម្មភាពយ៉ាងគឃ្លើន ប្រធានក្រុមមានសិទ្ធិហៅប៉ូលិសនៅលើដី ហើយក៏ស្នើសុំឲ្យនាវិកបញ្ឈប់ពួកគេដោយការដាក់ខ្នោះ។

៤ ម៉ាសអុកស៊ីសែនសម្រាប់សង្គ្រោះបន្ទាន់

ក្នុងករណីបន្ទាន់មួយចំនួននៅពេលដែលយន្តហោះមិនមានសម្ពាធល្អ មនុស្សគ្រប់គ្នាត្រូវការអុកស៊ីសែនពីកន្លែងណាមួយ។ នៅក្នុងកាប៊ីនយន្តហោះនៃទីតាំងខាងឆ្វេងដៃរបស់អ្នកបើកនីមួយៗ គឺតែងមានគន្លឹះមួយសម្រាប់ចុចម៉ាសទម្លាក់ចុះក្រោមឲ្យភ្ញៀវ ។

៥ ពូថៅប្រើដើម្បីសង្គ្រោះបន្ទាន់

ទោះបីជាវាត្រូវបានលាក់ពីអ្នកដំណើរក៏ដោយ ក៏អាកាសយានិកមានពូថៅមួយដែលពួកគេអាចប្រើបាន សម្រាប់បើកបន្ទះរារាំងភ្លើង ឬបំបែកបង្អួចប្រសិនបើចាំបាច់។

៦ ម៉ាស៊ីនថតវីដេអូ

អាកាសយានិកត្រូវធ្វើការទំនាក់ទំនងគ្រប់ពេលជាមួយឧបករណ៍បញ្ជា ដើម្បីផ្ទៀងផ្ទាត់រាល់ព័ត៌មានលម្អិតនៃការហោះហើរ ប៉ុន្តែកាប៊ីនយន្តហោះខ្លះក៏មានកាមេរ៉ាវីដេអូ ដែលអាចថតយន្តហោះពេលកំពុងហោះហើរ។ អ្នកបើកយន្តហោះដឹងអំពីរឿងនេះ ហើយកត់ត្រារាល់ទិន្នន័យហោះហើរ ដើម្បីងាយស្រួលនៅពេលយន្តហោះមានបញ្ហាវាអាចជួយដោយហេតុផលផ្សេងៗ។

៧ ខ្សែពួរដើម្បីជម្លៀសយន្តហោះ

នៅក្នុងកាប៊ីនយន្តហោះនីមួយៗមាន ខ្សែពួរ ២ ទុកសម្រាប់ប្រើដើម្បីជម្លៀសមនុស្សទៅតាមបង្អួច។ វាប្រវែងពីរឬបីម៉ែត្រ ហើយអាចជួយអាកាសយានិករុញចុះក្រោមកាន់តែងាយស្រួល។

៨ រុញបង្អួចដើម្បីជម្លៀសចេញ

ខ្សែពួរក៏មិនប្រាកដថាអាចជាមធ្យោបាយល្អ តែពួកគេក៏មានអាចជម្លៀសចេញតាមផ្លូវផ្សេងទៀត ប្រសិនបើទ្វារមិនមែនជាជម្រើស។ ជម្រើសមួយទៀតគឺបង្អួចរអិលចំនួន ២ នៅលើផ្នែកខាងមុខដែលបើកចូលមក ពួកវាត្រូវបានប្រើជាមធ្យោបាយនៃការជម្លៀសក្នុងករណីមានអាសន្ន៕

ប្រែសម្រួល៖ សាង ស្រីល័ក្ខ

ប្រភព៖brightside

ចុចអាន៖ស្ទីលតុបតែងខ្លួនដ៏ពេញនិយមក្នុងរដូវភ្លៀងនេះ

ចុចអាន៖គន្លឹះ៥ យ៉ាង ថែរក្សារថយន្តក្នុងរដូវវស្សានេះបានយ៉ាងល្អ

The post អាថ៌កំបាំងទាំង ៨ នៅលើយន្តហោះ មានតែអ្នកបើកបរទើបដឹងនិងមានសិទ្ធប្រើបាន appeared first on Kampuchea Thmey Daily.

អ្នកបើកយន្តហោះត្រូវដេញចោលនិងពិន័យជាង១ម៉ឺនដុល្លារដោយសារធ្វើឲ្យផ្ទុះការឆ្លងកូវីដក្នុងសហគមន៍

Sok Sovann — Thu, 24 Dec 2020 02:08:20 +0000

អ្នកបើកយន្តហោះម្នាក់ដែលគេស្តីបន្ទោសចំពោះការចម្លងជំងឺកូវីដ១៩ដល់មិត្តរួមការងារពីរនាក់និងបណ្តាលឲ្យផ្ទុះការឆ្លងក្នុងសហគមន៍ជាលើកដំបូងរបស់កោះតៃវ៉ាន់ចាប់តាំងពីខែមេសាមក ត្រូវបានបណ្តេញចេញពីការងារកាលពីថ្ងៃពុធទី២៣ខែធ្នូម្សិលមិញនេះ។

កំណត់ត្រាគ្មានការឆ្លងក្នុងសហគមន៍សោះរយៈពេល២៥៣ថ្ងៃរបស់កោះនេះត្រូវបានបញ្ចប់កាលពីថ្ងៃពុធបន្ទាប់ពីស្រ្តីក្នុងស្រុកម្នាក់ដែលមានទំនាក់ទំនងជាមួយអ្នកបើកយន្តហោះដែលជាជនជាតិណូវែលហ្សេឡង់ បានធ្វើតេស្តវិជ្ជមាន។

បុរសដែលធ្វើការឲ្យក្រុមហ៊ុន EVA Airways របស់កោះតៃវ៉ាន់ត្រូវបានពិន័យជាប្រាក់ចំនួន៣០០,០០០ដុល្លារតៃវ៉ាន់ (១០,៦០០ដុល្លារអាមេរិក) ពីបទខកខានមិនបានប្រកាសអំពីទំនាក់ទំនងនិងសកម្មភាពរបស់គាត់ទៅអាជ្ញាធរសុខាភិបាលនៅពេលដែលគាត់ដឹងថាខ្លួនឯងឆ្លងជំងឺនេះ។

ក្រុមហ៊ុនអាកាសចរណ៍បាននិយាយនៅក្នុងសេចក្តីថ្លែងការណ៍មួយថា គាត់បានរំលោភបទបញ្ជាបង្ការជំងឺរាតត្បាតនិងបណ្តាលឲ្យមានការខូចខាតយ៉ាងធ្ងន់ធ្ងរដល់កេរ្តិ៍ឈ្មោះនិងរូបភាពរបស់ក្រុមហ៊ុន។

យោងតាម EVA Airways បានឲ្យដឹងថា ជនជាតិណូវែលហ្សេឡង់រូបនេះមិនបានពាក់ម៉ាស់ទេពេលកំពុងបំពេញភារកិច្ចកាលពីដើមខែនេះបើទោះបីជាត្រូវបានរំលឹកដោយអ្នកបើកយន្តហោះតៃវ៉ាន់ម្នាក់និងមិត្តរួមការងារជនជាតិជប៉ុនម្នាក់ទៀតដែលបានធ្វើតេស្តវិជ្ជមានជំងឺកូវីដក៏ដោយ។

គាត់ត្រូវបានគេរាយការណ៍ថា ក្អកក្នុងអំឡុងពេលហោះហើរទៅកាន់សហរដ្ឋអាមេរិកកាលពីថ្ងៃទី១២ខែធ្នូ។

លោក Chen Shih-chung រដ្ឋមន្រ្តីក្រសួងសុខាភិបាលបាននិយាយកាលពីថ្ងៃពុធថា មនុស្សចំនួន១៧០នាក់ក្នុងចំណោម១៧៣នាក់ដែលបានទាក់ទងជាមួយស្ត្រីក្នុងតំបន់បានធ្វើតេស្តអវិជ្ជមានចំពោះវីរុសនេះខណៈលទ្ធផល៣នាក់ទៀតមិនទាន់បញ្ចេញ៕

ប្រែសម្រួលដោយ៖ Vann Vann

ប្រភព៖ AFP

ចុចអាន៖ ថៃ បិទខេត្តចំនួន៤ខណៈស្ថានភាពកូវីដកាន់តែធ្ងន់ធ្ងរ

ចុចអាន៖ ជាសះស្បើយថែម ០២ ទៀតនៅព្រឹកនេះ ក៏មានភរិយាមន្រ្តីនៅក្រសួងមហាផ្ទៃ ០១ នាក់