តើអាមេរិកនិងសម្ព័ន្ធមិត្ត ពិតជានៅពីក្រោយ ការបះបោរប្រឆាំងលោក ពូទីន មែនទេ?

លោកប្រធានាធិបតី ចូ បៃដិន កាលពីថ្ងៃចន្ទ ទី២៦ ខែមិថុនាបានប្រកាសថា ការបះបោរដោយទាហានស៊ីឈ្នួលរុស្ស៊ី ប្រឆាំងវិមានក្រឹមឡាំង គឺជាផ្នែកមួយនៃការតស៊ូនៅក្នុងប្រព័ន្ធរុស្ស៊ី ហើយថា សហរដ្ឋអាមេរិកនិងសម្ព័ន្ធមិត្តមិនពាក់ព័ន្ធនឹងរឿងនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បៃដិន បានផ្តល់ការវាយតម្លៃយ៉ាងប្រយ័ត្នប្រយែងជាទីបំផុត ចំពោះព្រឹត្តិការណ៍នៅរុស្ស៊ី ដើម្បីបញ្ចៀសភាពតានតឹងជាមួយរដ្ឋាភិបាលទីក្រុងមូស្គូដែលមានអាវុធនុយក្លេអ៊ែរ ព្រោះលោកបានផ្តល់ការគាំទ្រយ៉ាងម៉ឺងម៉ាត់ ចំពោះអ៊ុយក្រែន ក្នុងការប្រយុទ្ធជាមួយរុស្ស៊ី។

ក្នុងការអត្ថាធិប្បាយលើកដំបូងស្តីពីការបះបោរដោយក្រុមទាហានស៊ីឈ្នួល Wagner កាលពីចុងសប្តាហ៍ លោក បៃដិន បញ្ជាក់ថា “យើងមិនជាប់ពាក់ព័ន្ធនឹងការបះបោរនៅរុស្ស៊ីនោះទេ យើងក៏មិនមានអ្វីដែលត្រូវធ្វើជាមួយរឿងនោះដែរ”។

សាររបស់លោក បៃដិន ដែលបញ្ជាក់អំពីការមិនជាប់ពាក់ព័ន្ធនេះ គឺត្រូវបានផ្ញើដោយផ្ទាល់ទៅកាន់ប្រជាជនរុស្ស៊ី តាមរយៈបណ្តាញការទូតផ្សេងៗ។

កាលពីថ្ងៃសៅរ៍ ទី២៤ ខែមិថុនា ក្រុមទាហានស៊ីឈ្នួល Wagner បានចាប់ផ្តើមការបះបោរដ៏ធំមួយ តាមបញ្ជារបស់ប្រធាន Evgeny Prigozhin។ កងទ័ព​បាន​ដណ្តើម​កាន់កាប់​ទីស្នាក់ការ​កណ្តាល​នៃស្រុកខាងត្បូងរបស់​យោធា​រុស្ស៊ី​ក្នុង​ទីក្រុង Rostov-on-Don ហើយឆ្ពោះដំណើរទៅមូស្គូ។

ក្រោយមក ការបះបោរបានបញ្ឈប់ ខណៈលោក Prigozhin ប្រកាសថាក្រុមទាហានរបស់គាត់ នឹងវិលត្រលប់ទៅជំរំរបស់ពួកគេវិញ បន្ទាប់ពីកិច្ចពិភាក្សាជាមួយប្រធានាធិបតីបេឡារុសលោក Alexander Lukashenko៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក ពូទីន ផ្តល់ជម្រើស២ ឲ្យទាហានស៊ីឈ្នួលដែលចូលរួមក្នុងការបះបោរ