សហរដ្ឋអាមេរិក យល់ព្រមផ្តល់យន្តហោះចម្បាំង F-16 ទៅឲ្យ អ៊ុយក្រែន

សហរដ្ឋអាមេរិក បានយល់ព្រមផ្តល់យន្តហោះចម្បាំង F-16 ទៅឲ្យអ៊ុយក្រែនហើយ ប៉ុន្តែត្រូវបញ្ជូនចេញពីប្រទេសដាណឺម៉ាកនិងហូឡង់ នៅពេលការបណ្តុះបណ្តាលភីឡុតត្រូវបានបញ្ចប់។ នេះបើតាមការបញ្ជាក់ពីមន្ត្រីអាមេរិក នៅថ្ងៃព្រហស្បតិ៍ទី១៧ខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសអ៊ុយក្រែន បានប្រឹងប្រែងយ៉ាងសស្រាក់សស្រាំ ដើម្បីទទួលឲ្យបាននូវយន្តហោះចម្បាំង F-16 ដែលផលិតដោយអាមេរិក យកទៅទប់ទល់នឹងការវាយលុករបស់រុស្ស៊ី។

ហើយឥឡូវនេះ ទីក្រុងវ៉ាស៊ីនតោន បានធានាជាផ្លូវការដល់ប្រទេសដាណឺម៉ាកនិងហូឡង់ថា សហរដ្ឋអាមេរិក នឹងពន្លឿនការរៀបចំសំណើផ្ទេរយន្តហោះ F-16 របស់ភាគីទីបីចាំបាច់ទាំងអស់ទៅឲ្យអ៊ុយក្រែន ដូច្នេះទីក្រុងកៀវ នឹងទទួលបានយន្តហោះប្រភេទនេះ នៅពេលដែលអាកាសយានិកត្រូវបានបណ្តុះបណ្តាលរួចរាល់។

មន្ត្រីខាងលើនិយាយថា រដ្ឋមន្ត្រីការបរទេសអាមេរិកលោក Antony Blinken បានផ្ញើលិខិតទៅកាន់សមភាគីដាណឺម៉ាក និងហូឡង់រួចហើយ ជាពិសេសថែមទាំងធានាដល់ពួកគេផងដែរថា សំណើនឹងត្រូវបានអនុម័ត។

លោក Blinken និយាយថា “វានៅតែជារឿងសំខាន់ ដែលអ៊ុយក្រែនអាចការពារខ្លួន ប្រឆាំងនឹងការវាយលុកជាបន្តរបស់រុស្ស៊ី និងការរំលោភលើអធិបតេយ្យរបស់ខ្លួន”។

ប្រធានាធិបតីអាមេរិកលោក Joe Biden បានគាំទ្រកម្មវិធីបណ្តុះបណ្តាលភីឡុតអ៊ុយក្រែន ដើម្បីបើកយន្តហោះ F-16 កាលពីខែឧសភា ប៉ុន្តែរហូតមកដល់ពេលនេះ មិនទាន់មានពេលវេលាជាក់លាក់សម្រាប់ការផ្គត់ផ្គង់យន្តហោះចម្បាំងដែលផលិតដោយក្រុមហ៊ុន Lockheed Martin នេះនៅឡើយទេ ៕

ប្រែសម្រួល៖ Vann Vann

ប្រភព៖ CNA

ចុចអាន៖ រុស្ស៊ី ចាត់ទុក វត្តមានយន្តហោះចម្បាំង F-16 នៅអ៊ុយក្រែន ជាការគំរាមកំហែង នុយក្លេអ៊ែរ