អ្នកឧកញ៉ា ម៉ុង ឫទ្ធី Archives - Kampuchea Thmey Daily

ប្រឡូកវិស័យកសិកម្មជាង ៣០ ឆ្នាំ ឧកញ៉ា ម៉ុង ឫទ្ធី ប្រាប់បំណងប្រាថ្នាមួយ មិនទាន់សម្រេចបាន

Dy Bunnara — Mon, 15 Jun 2026 07:33:09 +0000

ផ្តល់បទសម្ភាសដល់ក្រុមអ្នកសារព័ត៌មានក្នុងដំណើរទស្សនកិច្ចនៅតំបន់អភិវឌ្ឍកសិទេសចរណ៍ ម៉ុង ឫទ្ធី សែនជ័យ នៅស្រុកសំរោងទង ខេត្តកំពង់ស្ពឺ សេដ្ឋីកសិកម្មអ្នកឧកញ៉ា ម៉ុង ឫទ្ធី បានរៀបរាប់ពីការប្រឡូកក្នុងវិស័យកសិកម្ម ហើយលោកក៏បានបង្ហើបពីបំណងប្រាថ្នាមួយដែលលោកចង់បង្កើតរោងចក្រផលិតប្រេងឆាពីដូងប្រេង ប៉ុន្តែមិនទាន់អាចសម្រេចបាន ហើយលោកគិតថាតទៅមុខទៀតក៏ពិបាកនឹងឈានទៅសម្រេចគោលដៅនេះដែរ។

ស្ថិតក្នុងវ័យ ៧២ ឆ្នាំ និងឈានចូលដល់វ័យ ៧៣ នៅពេលខាងមុខនេះ អ្នកឧកញ៉ា ម៉ុង ឫទ្ធី បានប្រាប់ថា ការប្រឡូកក្នុងជំនួញកសិកម្មជាង ៣១ ឆ្នាំ មកនេះ អ្វីដែលលោកមិនទាន់សម្រេចបានរហូតមកដល់ពេលនេះគឺការបង្កើតរោងចក្រផលិតប្រេងឆាកែច្នៃពីផលដូងប្រេង។

លោករៀបរាប់ថា «ការងារនេះប្រហែលជាកូនចៅជំនាន់ក្រោយ ក៏មិនអាចធ្វើបានដែរ ព្រោះបើទោះជាអាចដាំដុះបាននៅលើផ្ទៃដី ២ ម៉ឺនហិកតាក៏ដោយ ក៏មិនចំណេញដែរ»។

លោកថា បើចង់ផលិតប្រេងឆាពីដូងប្រេង ហើយចង់ធ្វើរោងចក្រធំ លុះត្រាតែនាំចូលប្រេងដូងឆៅពីគេ។ ដូច្នេះលោកគិតថា រហូតដល់លោកស្លាប់ទៅ ក៏ប្រហែលជាមិនអាចបង្កើតរោងចក្រប្រេងឆានេះបានដែរ។

នៅពេលគេសួរថា តើមានកសិផលផ្សេងទៀតដែលអាចកែច្នៃធ្វើជាប្រេងឆាក្រៅពីដូងប្រេង? ឧកញ៉ាម៉ុង ឫទ្ធី បានបញ្ជាក់ថា មានដែរដូចជា ផ្កាឈូករ័ត្ន សណ្តែកសៀង និងប្រភេទដំណាំផ្សេងៗជាច្រើនទៀត។ ទោះជាយ៉ាងណា លោកបានប្រៀបធៀបថា ដំណាំទាំងនោះមិនដូចដូងប្រេងទេ ព្រោះដូងប្រេងគឺដាំម្តង ប្រមូលផលបានរហូតវិលជុំ។

លោកបានពន្យល់ពីលក្ខខណ្ឌអាកាសធាតុនិងដីសម្រាប់ដាំដូងប្រេង គឺត្រូវការកម្រិតទឹកភ្លៀងលើសពី ២ ០០០ មីលីម៉ែត្រក្នុងមួយឆ្នាំ ដូចនៅចម្ការដូងប្រេងរបស់លោកនៅស្រុកព្រៃនប់ គឺមានកម្រិតទឹកភ្លៀងរហូតដល់ ៤,០០០ មីលីម៉ែត្រ។

លោកបន្តថា គ្រប់ដំណាំទាំងអស់គឺសុទ្ធតែត្រូវការដីល្អដូចគ្នា ប៉ុន្តែខុសគ្នាត្រង់តម្រូវការទឹកភ្លៀងតិចឬច្រើនតែប៉ុណ្ណោះ។

ពាក់ព័ន្ធគោលជំហរដើម្បីឈានទៅសម្រេចបំណងប្រាថ្នា តាមរយៈការពង្រីកផ្ទៃដីដាំដុះដូងប្រេងបន្ថែម ឧកញ៉ា ម៉ុង ឫទ្ធី បានសង្កត់ធ្ងន់ក៏ដូចជាផ្តល់ដំបូន្មានថា កុំធ្វើឱ្យសោះ។ ចំពោះការឈូសឆាយព្រៃឈើដើម្បីយកដីមកដាំដូងប្រេងមិនអាចទៅរួចទេ ហើយអន្តរជាតិក៏មិនគាំទ្រដែរ ខណៈលោកក៏មានជំនឿចិត្តដែរថា រាជរដ្ឋាភិបាលកម្ពុជាក៏នឹងមិនអនុញ្ញាតឱ្យមានការឈូសឆាយព្រៃដើម្បីដាំដូងប្រេងនោះឡើយ៕

បន្តចុចអាន៖ រោងចក្រផលិតជីក្រុមហ៊ុន ម៉ុង ឫទ្ធី ចាយទុនប្រមាណ ១០ លាន នឹងចាប់ផ្តើមផលិតចែកចាយលក់ក្នុងតម្លៃទាប ជួយកសិករដាំដុះដំណាំកសិកម្ម

The post ប្រឡូកវិស័យកសិកម្មជាង ៣០ ឆ្នាំ ឧកញ៉ា ម៉ុង ឫទ្ធី ប្រាប់បំណងប្រាថ្នាមួយ មិនទាន់សម្រេចបាន appeared first on Kampuchea Thmey Daily.

សេដ្ឋីកសិកម្មឧកញ៉ា ម៉ុង ឫទ្ធី មើលឃើញរបត់ផ្លាស់ប្តូរដ៏ធំ ខណៈធនាគារចាប់ផ្តើមបោះដៃជួយគាំទ្រដល់វិស័យកសិកម្ម

Dy Bunnara — Mon, 15 Jun 2026 04:16:27 +0000

ខណៈកន្លងមក គេមើលឃើញការវិនិយោគលើវិស័យកសិកម្មជួបបញ្ហាប្រឈមច្រើន ដែលក្រៅពីទីផ្សារលក់ផលិតផល ជាពិសេសការស្វែងរកប្រភពទុន ដើម្បីពង្រីកការវិនិយោគការធ្វើកសិកម្ម។

យ៉ាងណាមិញ របត់ថ្មីកំពុងមាននិន្នាការប្រែប្រួលជាវិជ្ជមាន។ នេះបើតាមអ្នកឧកញ៉ា ម៉ុង ឫទ្ធី ខណៈដែលធនាគារបានផ្លាស់ប្តូរគំនិតងាកមកគាំទ្រវិស័យកសិកម្មវិញ។

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឬទ្ធី គ្រុបបានប្រាប់ថា ពីដើមឡើយធនាគារភាគច្រើនមិនព្រមផ្តល់កម្ចីដល់អ្នកធ្វើការលើវិស័យកសិកម្មនោះទេ។

សេដ្ឋីកសិកម្មរូបនេះអះអាងថា «សូម្បីតែមានសម្ភារធានាដូចជា អាជីវកម្ម ដីធ្លី ឬផលដំណាំ ក៏ធនាគារមិនទទួលយកដែរ ដែលនេះបញ្ជាក់បានថា ធនាគារហាក់ដូចជាមានបំណងមិនផ្តល់កម្ចីតែម្តង»។

យ៉ាងណាមិញ អ្នកឧកញ៉ាមើលឃើញរបត់ថ្មីបានផ្លាស់ប្តូរ ដោយបច្ចុប្បន្នមានការបន្ធូរបន្ថយការរឹតត្បិត ដែលធ្វើឲ្យកសិករអាចមានលទ្ធភាពទទួលបានកម្ចី សម្រាប់វិនិយោគពង្រីកការធ្វើកសិកម្មបន្ថែមទៀត។

នៅក្នុងជំនួបជាមួយកសិករចិញ្ចឹមសត្វ និងដាំដំណាំកម្ពុជានៅតំបន់កសិទេសចរណ៍ក្រុមហ៊ុន ម៉ុង ឫទ្ធី នៅខេត្តកំពង់ស្ពឺ អ្នកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង បានគូសបញ្ជាក់ថា ធនាគារ ជីប ម៉ុង បានរៀបចំទុនប្រមាណ ៥០០ លានដុល្លារ សម្រាប់ជួយកសិករជំរុញការធ្វើកសិកម្មឲ្យ កាន់តែមានសន្ទុះខ្លាំងក្លាថែមទៀត។

លោកថា គោលដៅមិនមែនបញ្ចប់ត្រឹមការផ្តល់កម្ចី ៥០០ លានដុល្លារនោះទេ ពោលនឹងខិតខំធ្វើឱ្យបានបន្ថែមលើសពីនេះទៅទៀត។

ឆ្លើយតបការសាកសួររបស់អ្នកសារព័ត៌មាន ហេតុអ្វីបានជាធនាគារ ជីប ម៉ុង ហ៊ានវិនិយោគលើវិស័យកសិកម្មដែលមាន ហានិភ័យខ្ពស់? អ្នកឧកញ៉ាបញ្ជាក់ថា ដោយសារលោកយល់ពីតម្រូវការរបស់កសិករដែលជួបបញ្ហាប្រភពទុនក្នុងការពង្រីកការដាំដុះ ខណះធនាគារភាគច្រើនតែងតែចៀសវាងការផ្តល់កម្ចីលើវិស័យដែលមានហានិភ័យខ្ពស់នេះ។

«កសិករខ្លះជួបការលំបាក រហូតត្រូវខ្ចីលុយពីឯកជនក្រៅប្រព័ន្ធ ដែលមានអត្រាការប្រាក់ខ្ពស់ ខណៈគោលការណ៍គាំទ្ររបស់ធនាគារជីប ម៉ុង គឺផ្តល់អត្រាការប្រាក់ទាបនិងមិនមានតម្រូវការទ្រព្យធានា ឬបញ្ចាំឡើយ»។

លោកបន្តថា តាមរយៈការជួបកសិករដែលដាំដំណាំពោត កសិករប្រាប់ថា ដំណាំពោតចំណាយពេលប្រហែល ៦ ខែក្នុងការប្រមូលផល ដូច្នេះ ធនាគារ ជីប ម៉ុង គ្រោងបង្កើតផលិតផលឥណទានដែលមានរយៈពេល ៨ ទៅ ៩ ខែ ដែលចំគោលដៅ និងស្របតាមរដូវកាលប្រមូលផលរបស់កសិករ។

នៅពេលកសិករប្រមូលផល និងលក់រួចរាល់ ពួកគេអាចយកប្រាក់មកទូទាត់សងធនាគារវិញដោយមិនបាច់ទុកលុយចោល ឬខាតបង់ការប្រាក់ក្នុងរដូវកាលដែលគ្មានទិន្នផលឡើយ។

ជាមួយគ្នានេះ ដើម្បីកសាងគ្រឹះការអភិវឌ្ឍវិស័យកសិកម្មក្នុងប្រទេសកម្ពុជាឲ្យរឹងមាំ អ្នកឧកញ៉ាបានលើកពីទស្សនវិស័យរួមមួយគឺត្រូវតែរួមដៃគ្នា រវាងអ្នកដាំដុះ អ្នកចិញ្ចឹម អ្នកប្រមូលទិញ និងធនាគារ ដោយមិនចង់ឱ្យមានការនាំវត្ថុធាតុដើមចេញទៅក្រៅប្រទេសទាំងមិនទាន់កែច្នៃ ព្រោះវាធ្វើឱ្យបាត់បង់តម្លៃបន្ថែមនៃផលិតផលជាតិ៕

The post សេដ្ឋីកសិកម្មឧកញ៉ា ម៉ុង ឫទ្ធី មើលឃើញរបត់ផ្លាស់ប្តូរដ៏ធំ ខណៈធនាគារចាប់ផ្តើមបោះដៃជួយគាំទ្រដល់វិស័យកសិកម្ម appeared first on Kampuchea Thmey Daily.

រោងចក្រផលិតជីក្រុមហ៊ុន ម៉ុង ឫទ្ធី ចាយទុនប្រមាណ ១០ លាន នឹងចាប់ផ្តើមផលិតចែកចាយលក់ក្នុងតម្លៃទាប ជួយកសិករដាំដុះដំណាំកសិកម្ម

Dy Bunnara — Sat, 13 Jun 2026 04:16:19 +0000

រោងចក្រផលិតជីកសិកម្មរបស់ក្រុមហ៊ុន ម៉ុង ឫទ្ធី នឹងចាប់ផ្តើមខ្សែចង្វាក់ផលិតកម្មផលិតជីសរីរាង្គចែកចាយលក់លើទីផ្សារដែលមានតម្លៃប្រកួតប្រជែង ជួយកសិករទទួលបានផលចំណេញពីការធ្វើកសិកម្ម។

ឧកញ៉ា ម៉ុង ឫទ្ធី បានឲ្យដឹងថា ការធ្វើកសិកម្មទាំងការដាំដុះ និងការចិញ្ចឹមសត្វ ត្រូវតែមានការកែច្នៃកាកសំណល់ឡើងវិញ ដើម្បីធ្វើឱ្យថ្លៃដើមផលិតធ្លាក់ចុះទាប។

លោកលើកឡើងរោងចក្រផលិតជីកសិកម្មដែលក្រុមហ៊ុន ម៉ុង ឫទ្ធី កំពុងសាងសង់ក្នុងខេត្តកំពង់ស្ពឺ បានប្រើប្រាស់វត្ថុធាតុដើមកែច្នៃពីកាកសំណល់ដែលមានលាមកគោ មាន់ ទា ជ្រូក កាកសំណល់ពីរោងចក្រដូងប្រេង រោងចក្រស្ករអំពៅ និងស្រាបៀរជាដើម។

លោកឧកញ៉ាអះអាងថា កាលណាថ្លៃដើមទាប តម្លៃលក់នៅលើទីផ្សារក៏ទាប ដែលធ្វើឱ្យអ្នកប្រើប្រាស់ និងអ្នកបរិភោគកាន់តែមានលទ្ធភាពទិញ ជាពិសេសក៏ជួយកសិករទប់ទល់ការចំណាយលើថ្លៃដើមផលិតកម្មបានមួយចំណែកធំ។

កន្លងមក កម្ពុជាតែងតែនាំចូលជីពីបរទេសជាច្រើន ដូច្នេះការយកកាកសំណល់ដែលបោះបង់ចោលមកកែច្នៃជាជីធម្មជាតិ ដើម្បីដាក់ស្រែចម្ការឡើងវិញ គឺមានសារៈសំខាន់ណាស់។

ពាក់ព័ន្ធគម្រោងដំណើរការរោងចក្រទាំងមូលរបស់ក្រុមហ៊ុន ម៉ុង ឫទ្ធី រាប់បញ្ចូលទាំងដីធ្លី រោងចក្រ និងទុនបង្វិល ចំណាយទុនវិនិយោគអស់ប្រមាណ ១០ លានដុល្លារ ហើយដែលគ្រោងនឹងដំណើរការសាកល្បងឱ្យបានជាផលិតផលនៅឆ្នាំ២០២៦ នេះ ខណៈសមត្ថភាពផលិតបានជាមធ្យម ១០០ តោន ក្នុងមួយថ្ងៃ។ នេះបើតាម អ្នកឧកញ៉ា ម៉ុង ឫទ្ធី។

អ្នកឧកញ៉ា បញ្ជាក់ថា រោងចក្រផលិតជីក្រុមហ៊ុន ម៉ុង ឫទ្ធី សាងសង់ឡើងដោយផ្អែកលើការប្រើប្រាស់បច្ចេកវិទ្យារបស់ចិន។ ទោះជាយ៉ាងណាក៏ដោយ ការដំណើរការមិនមានភាគហ៊ុនរួមគ្នាជាមួយចិនឡើយ ពោលគឺក្រុមហ៊ុនឧកញ៉ា ម៉ុង ឫទ្ធី ជាអ្នកទិញបច្ចេកវិទ្យា ហើយភាគីចិនមកជួយសាងសង់ និងដំឡើងឧបករណ៍តែប៉ុណ្ណោះ។

«ក្រុមហ៊ុនចិនដែលលក់បច្ចេកវិទ្យានេះ មានបទពិសោធន៍រហូតដល់ទៅ ១០០ ឆ្នាំ ក្នុងការផលិតជី ដូច្នេះការប្រើប្រាស់បច្ចេកវិទ្យានេះ នឹងចំណេញជាងការធ្វើតាមការស្មាន ហើយធានាបាននូវគុណភាពខ្ពស់»។ អ្នកឧកញ៉ា ម៉ុង ឫទ្ធី បញ្ចាក់។

ឧកញ៉ា ម៉ុង ឫទ្ធី ទទួលស្កាល់ថា បើទោះបីជារោងចក្រដំណើរការទៅបានរលូន ក៏នៅតែផ្គត់ផ្គង់បានចំនួនតិចតួចណាស់ បើធៀបនឹងតម្រូវការទីផ្សារក្នុងស្រុក។

អ្នកឧកញ៉ាអះអាងដូច្នេះថា “ទោះបីមានរោងចក្របែបនេះចំនួន ១០ ទៀត ក៏នៅតែមិនទាន់គ្រាន់ដែរ។ ប៉ុន្តែខ្ញុំចង់ធ្វើការសាកល្បងជាជំហានតូចៗសិន ដើម្បីកុំឱ្យមានការប្រថុយប្រថានធំពេក»។

គោលដៅអនាគត ឧកញ៉ាម៉ុង ឫទ្ធី មិនទាន់សង្ឃឹមលើការនាំចេញជីធម្មជាតិទៅក្រៅប្រទេសឡើយ។ អ្វីដែលសំខាន់បំផុតគឺត្រូវផ្គត់ផ្គង់តម្រូវការនៅក្នុងស្រុកឱ្យបានគ្រប់គ្រាន់ជាមុនសិន។

លើកឡើងពីគុណសម្បត្តិនៃជីកែច្នៃ ធៀបនឹងជីធម្មជាតិស្រស់ ខណះដែលកសិករខ្លះយកអាចម៍មាន់ ឬអាចម៍គោស្រស់ទៅដាក់ដំណាំផ្ទាល់អាចធ្វើឱ្យងាប់ដំណាំ។ នេះបើតាមឧកញ៉ា ម៉ុង ឫទ្ធី។

“សត្វគោស៊ីស្មៅនាំឱ្យមានគ្រាប់ស្មៅនៅក្នុងពោះវៀន ពេលវាបន្ទោបង់មក គ្រាប់ស្មៅទាំងនោះមិនងាប់ទេ ដូច្នេះបើដកអាចម៍គោស្រស់ទៅដាក់ គឺដូចជាទៅដាំស្មៅបន្ថែមនៅក្នុងចម្ការ”។

ដំណោះស្រាយ អ្នកឧកញ៉ាបញ្ជាក់ថា គឺយកកាកសំណល់ទាំងនោះមកកែច្នៃ និងរំងាប់មេរោគតាមបច្ចេកវិទ្យាគឺវាមិនដុះស្មៅឡើយ ហើយថែមទាំងសម្លាប់មេរោគអស់ទៀតផង។

ទាក់ទងដំណើរការខ្សែសង្វាក់ផលិតកម្ម អ្នកឧកញ៉ាបញ្ជាក់ថា ក្រុមហ៊ុនមានកសិដ្ឋានចិញ្ចឹមជ្រូក ដែលជាប្រភពវត្ថុធាតុដើមផ្ទាល់ខ្លួន ប៉ុន្តែនៅមិនទាន់គ្រប់គ្រាន់ឡើយ។ ដូចេ្នះ រោងចក្រត្រូវប្រមូលទិញបន្ថែមពីកសិករ ដូចជាអាចម៍គោជាដើម ដើម្បីធានាឱ្យមានវត្ថុធាតុដើមគ្រប់គ្រាន់សម្រាប់ដំណើរការរោងចក្រ៕

The post រោងចក្រផលិតជីក្រុមហ៊ុន ម៉ុង ឫទ្ធី ចាយទុនប្រមាណ ១០ លាន នឹងចាប់ផ្តើមផលិតចែកចាយលក់ក្នុងតម្លៃទាប ជួយកសិករដាំដុះដំណាំកសិកម្ម appeared first on Kampuchea Thmey Daily.

អ្នកជំនាញក្រុមហ៊ុន ម៉ុង ឫទ្ធី បង្ហើបបច្ចេកទេសដាំដុះដូងប្រេង ៣ ឆ្នាំ បានផល

Dy Bunnara — Wed, 20 May 2026 01:27:56 +0000

អ្នកគ្រប់គ្រងក្រុមហ៊ុន ម៉ុង ឫទ្ធី បានបង្ហាញពីបច្ចេកទេសនៃការដាំដុះដំណាំដូងប្រេង ដែលជាដំណាំកសិឧស្សាហកម្មដ៏សំខាន់ ដែលក្រៅពីអាចកែច្នៃលក់ក្នុងស្រុក ក៏មានទីផ្សារទូលំទូលាយនាំចេញទៅក្រៅប្រទេស។

លោក អ៊ិត ណុប នាយកគ្រប់គ្រងក្រុមហ៊ុន ម៉ុង ឫទ្ធី វិនិយោគដាំដុះដំណាំដូងប្រេងបានអះអាងថា ដំណាំដូងប្រេងបើការដាំដុះមានការថែទាំបានល្អ ក្នុងរយៈពេល ៣ ឆ្នាំអាចប្រមូលផលបាន។

អ្នកជំនាញដែលបម្រើការងារជិត ២០ ឆ្នាំនៅក្រុមហ៊ុន ម៉ុង ឫទ្ធី បានបង្ហាញពីដំណើរការនៃការដាំដុះដំណាំដូងប្រេង តាំងពីដំណាក់កាលបណ្តុះកូននិងការដកយកទៅដាំនៅក្នុងចម្ការ។

នៅក្នុងដំណាក់កាលទី ១ ក្នុងរយៈពេល ៣ ខែ គឺជាដំណាក់កាលដែលកូនដូងប្រេងដុះលូតលាស់បានក្នុងកម្ពស់ល្មម ខណៈដំណាក់កាលទី ២ បន្ទាប់ពីរយៈពេល ៣ ខែ កូនដូងត្រូវបានផ្ទេរទៅដាំក្នុងថង់ធំបន្តរយៈពេលប្រមាណជា ៩ ខែ ទៀត។

សរុបរយៈពេលបណ្តុះ និងដកដាំគឺចន្លោះពី ១០ ទៅ ១២ ខែ ទើបកូនដូងប្រេងមានកម្ពស់គ្រប់គ្រាន់ និងអាចយកទៅដាំនៅលើដីចម្ការបាន។ លោក អ៊ិត ណុប បញ្ជាក់។

ពាក់ព័ន្ធពូជដូងប្រេងដែលដាំនៅចម្ការក្រុមហ៊ុន ម៉ុង ឫទ្ធី នៅក្នុងស្រុកព្រៃនប់ ខេត្តព្រះសីហនុ លោក អ៊ិត ណុប បានបញ្ជាក់ថា គឺទិញពូជមកពីប្រទេសម៉ាឡេស៊ី ប្រទេសឥណ្ឌូណេស៊ី និង ប្រទេសកូស្តារីកា។

សម្រាប់បច្ចេកទេសដាំដុះនិងការថែទាំ ក្រុមហ៊ុនប្រើប្រាស់គ្រឿងចក្រ (Excavator) ឈូសឆាយ ច្រូតដី និងកាត់ចិញ្ច្រាំដើមចាស់ៗឱ្យទៅជាកម្ទេចតូចៗ ដោយទុកឱ្យរលួយធ្វើជាជីកំប៉ុស្ត។ បន្ថែមពីនេះ ការដាំទៀតសោត ត្រូវប្រើប្រាស់ត្រាក់ទ័រដើម្បីខួងរណ្តៅ រួចដាក់ជីទ្រាប់បាតមុននឹងដាំកូនដូងចូល។ លោក អ៊ិត ណុប បញ្ជាក់បន្ថែម។

ដោយសារមានសត្វកណ្តុរច្រើនបំផ្លាញកូនដូង និងដើម្បីការពារសត្វល្អិតនិងសត្វកកេរ លោក អ៊ិត ណុប បានប្រាប់បច្ចេកទេសបន្តទៀតថា ក្រុមហ៊ុនក៏ត្រូវប្រើប្រាស់សំណាញ់ការពារសត្វកណ្តុររុំព័ទ្ធជុំវិញកូនដូង និងប្រើប្រាស់កាកសំណល់ដើម្បីជួយដីបន្ថែម។

ដូងប្រេងដាំនៅចម្ការក្រុមហ៊ុន ម៉ុង ឫទ្ធី ខ្លះមានអាយុកាលប្រមាណ ៣០ ឆ្នាំ ដែលដើមចាស់ៗធ្វើឲ្យទិន្នផលធ្លាក់ចុះ ទើបក្រុមហ៊ុនមានផែនការកាត់សម្អាតដើមចាស់ៗចោល និងដាំថ្មីឡើងវិញ។

សម្រាប់ឆ្នាំ ២០២៦ ក្រុមហ៊ុនគ្រោងដាំដុះថ្មីលើផ្ទៃដីប្រមាណ ៥៧៩ ហិកតា ខណៈដើម្បីដាំដុះឱ្យអស់ផ្ទៃដីប្រមាណជាងពីរម៉ឺនហិកតា ក្រុមហ៊ុនត្រូវចំណាយពេលយ៉ាងតិច ១១ ឆ្នាំ។

លោក អ៊ិត ណុប បានគូសបញ្ជាក់ថា ការចាប់ផ្តើមដាំជុំទីពីរ ក្រុមហ៊ុនបានបង្កើនចំនួនដើមដូងប្រេងដោយដាំក្នុងបរិមាណ ១៦០ ដើម ក្នុង ១ ហិកតា ខុសពីពេលមុនដែលដាំត្រឹមតែ ១៣៦ ទៅ ១៤២ ដើម ក្នុង ១ ហិកតា។

គួរបញ្ជាក់ថា កាលពីឆ្នាំ ១៩៩៦ ក្រុមហ៊ុន ម៉ុង ឫទ្ធី បានវិនិយោគដាំដុះដំណាំដូងប្រេងលើផ្ទៃដីទំហំប្រមាណ ២ ម៉ឺនហិកតា ស្ថិតនៅ ភូមិតាពៅ ឃុំតានៃ ស្រុកព្រៃនប់ ខេត្តព្រះសីហនុ នៅតាមបណ្តោយផ្លូវជាតិលេខ ៤ ត្រង់ម្តុំគីឡូម៉ែត្រលេខ ១៧០។

បច្ចុប្បន្នក្រុមហ៊ុនមានរោងចក្រផលិតប្រេងឆៅ Crude Palm Oil Mill ចំនួន ២ កន្លែង ដែលមាន សមត្ថភាពផលិតផ្លែដូងស្រស់ FFB សរុបបានចំនួន ៩៥តោន/ម៉ោង ស្មើនឹង ២.០៩០តោន/ថ្ងៃ និងអាចផលិតប្រេងឆៅ CPO បាន ៩.១៩៦ តោន/ខែ។

នៅក្នុងឆ្នាំ២០២៤ ក្រុមហ៊ុនក៏បានពង្រីក រោងចក្រថ្មីមួយទៀតជារោងចក្រផលិតប្រេងដូងសាច់ក្នុង Kernel Crashing Plant ដែលមានសមត្ថភាពកៀបគ្រាប់ដូងប្រេងបាន ៦០តោន/ថ្ងៃ និងអាចផលិតប្រេង Kernel Oil បាន ២៧ ទៅ ៣០តោន/ថ្ងៃ៕

បើតាមប្រភពក្រុមហ៊ុន ម៉ុង ឫទ្ធី ទិន្នផលប្រេងដូងដែលចម្រាញ់បានត្រូវលក់នៅក្នុងស្រុកប្រមាណ ២០% និងនាំចេញទៅទីផ្សារអន្តរជាតិប្រមាណជា ៨០% ដែលភាគច្រើនលក់ទៅប្រទេសឥណ្ឌា៕

The post អ្នកជំនាញក្រុមហ៊ុន ម៉ុង ឫទ្ធី បង្ហើបបច្ចេកទេសដាំដុះដូងប្រេង ៣ ឆ្នាំ បានផល appeared first on Kampuchea Thmey Daily.

៣០ ឆ្នាំមុន ឧកញ៉ា ម៉ុង ឫទ្ធី ជម្នះដាំដូងប្រេងទោះរងការគំរាមកំហែងពីខ្មែរក្រហម

Dy Bunnara — Mon, 18 May 2026 03:02:34 +0000

អ្នកឧកញ៉ា ម៉ុង ឫទ្ធី បានរំលឹកពេលវេលាកាលពីជាង ៣០ ឆ្នាំមុន ដែលអ្នកឧកញ៉ាបានចាប់ផ្ដើមដាំដុះដំណាំដូងប្រេងតាមផ្លូវជាតិលេខ ៤ ក្នុងខេត្តព្រះសីហនុ បើទោះបីរងការគំរាមកំហែងពីខ្មែរក្រហមក៏ដោយ។

ផ្តល់បទសម្ភាសន៍ដល់ក្រុមអ្នកសារព័ត៌មានក្នុងពិធីដាំដុះដំណាំដូងប្រេងជុំទី ២ នៅស្រុកព្រៃនប់ខេត្តព្រះសីហនុកាលពីចុងសប្តាហ៍មុននេះ អ្នកឧកញ៉ាបានប្រាប់ពីឧបសគ្គធំៗពីការដាំដុះដំណាំដូងប្រេងតាំងពីការចាប់ផ្តើមដំបូងៗ ជាពិសេសគឺវត្តមានរបស់កងទ័ពខ្មែរក្រហមនៅសងខាងផ្លូវជាតិលេខ ៤។

អ្នកឧកញ៉ាបានរំលឹកថា ដើម្បីអាចដាំដុះបានត្រូវបង់លុយឱ្យខ្មែរក្រហម ព្រោះបើមិនបង់លុយទេ ខ្មែរក្រហមនឹងបាញ់ប្រហារនៅពេលដែលចុះទៅឈូសឆាយដីដែលនៅចម្ងាយត្រឹមតែ ៥០០ ម៉ែត្រប៉ុណ្ណោះ។

«ការងារមានការលំបាកខ្លាំងណាស់តាំងពីការចាប់ផ្តើម ព្រោះត្រូវធ្វើការរៀបចំដី រាវមីនផង និងត្រូវរក្សាទំនាក់ទំនងល្អជាមួយខ្មែរក្រហមផង»។ អ្នកឧកញ៉ា ម៉ុង ឫទ្ធី បញ្ជាក់។

បន្ថែមពីនេះ ឧបសគ្គដ៏ធំមួយទៀត គឺការពឹងផ្អែកលើបច្ចេកទេសបរទេសនៅគ្រាចាប់ផ្តើមដាំដុះដំបូងៗ។

អ្នកឧកញ៉ាប្រាប់ថា នៅពេលចាប់ផ្តើមដាំដុះដូងប្រេងលើកទី១ ដោយសារតែខ្វះចំណេះដឹងនិងបច្ចេកទេស ត្រូវពឹងផ្អែកលើអ្នកបច្ចេកទេសបរទេសទាំងស្រុង ដើម្បីជួយដាំនិងថែទាំ ព្រោះការដាំដូងប្រេងមិនមែនចេះតែដាំបាននោះទេដែលលោកត្រូវជួលអ្នកបច្ចេកទេសមកប្រចាំការរហូត។

បើតាមអ្នកឧកញ៉ា ម៉ុង ឫទ្ធី មកដល់បច្ចុប្បន្ននេះប្រជាជនខ្មែរមានសមត្ថភាពអាចធ្វើការងារនេះបានទាំងអស់ ដោយមិនចាំបាច់ត្រូវការអ្នកបច្ចេកទេសបរទេសទៀតឡើយ។

លោកក៏លើកឡើងបញ្ហាប្រឈមថែមទៀត ក្រោយពេលហាងឆេងដីធ្លីឡើងថ្លៃមានអ្នកមកឈូសឆាយរំលោភ ដែលរឿងនេះកើតឡើងទើបតែនៅពេលក្រោយៗនេះប៉ុណ្ណោះ។

ពាក់ព័ន្ធការប្រើប្រាស់ពូជដូងប្រេងមកដាំដុះ អ្នកឧកញ៉ា ម៉ុង ឫទ្ធី បានបញ្ជាក់ថា គឺនាំពូជពីប្រទេសកូស្តារីកា ប្រទេសឥណ្ឌូណេស៊ី និងម៉ាឡេស៊ី។

លោកថា ប្រទេសផ្សេងទៀតដែលគេដាំដុះ គេមានវិទ្យាស្ថានរបស់គេរួចទៅហើយ ដូច្នេះបើលោកបង្កើតកន្លែងបណ្តុះកូនដូងប្រេងខ្លួនឯង គឺបានត្រឹមតែយកមកដាំខ្លួនឯងប៉ុណ្ណោះ គ្មានទីផ្សារលក់ចេញទេ។ ហេតុនេះ ទើបជម្រើសដែលល្អគឺមានតែការទិញកូនដូងប្រេងពីគេមកដាំ។

ក្នុងពិធីដាំដូងប្រេងជុំទី ២ នៅខេត្តព្រះសីហនុ លោក អ៊ិត ណុប នាយកគ្រប់គ្រងក្រុមហ៊ុន ម៉ុង ឫទ្ធី វិនិយោគទុនដំណាំដូងប្រេងកម្ពុជាបានឲ្យដឹងថា ក្រុមហ៊ុន ម៉ុង ឫទ្ធី វិនិយោគទុនដំណាំដូងប្រេងកម្ពុជា បានចាប់ផ្តើមដំណើរការនៅថ្ងៃទី ២៣ ខែមីនា ឆ្នាំ១៩៩៦ ខណៈពិធីសម្ពោធដាំដូងប្រេងជំនាន់ទី១ ជានិមិត្តរូបផ្លូវការធ្វើឡើងក្រោមវត្តមានសម្តេចតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី២៩ ខែមេសា ឆ្នាំ ១៩៩៧។

លោក អ៊ិត ណុប បានបន្តថា ទីតាំងក្រុមហ៊ុនវិនិយោគដាំដុះដំណាំដូងប្រេងគឺស្ថិតនៅ ភូមិតាពៅ ឃុំតានៃ ស្រុកព្រៃនប់ ខេត្តព្រះសីហនុ នៅតាមបណ្តោយផ្លូវជាតិលេខ ៤ ត្រង់ម្តុំគីឡូម៉ែត្រលេខ ១៧០ នៅលើផ្ទៃដីសរុប ២០.២៦៤ ហិកតា ក្នុងនោះមានដីសម្បទានសេដ្ឋកិច្ចរបស់រដ្ឋចំនួន ៦.២៨០ ហិកតា រួមទាំងដីឯកជនដែលក្រុមហ៊ុនបានប្រមូលទិញពីប្រជាជន។

បើតាមលោក អ៊ិត ណុប យោងតាមស្ថានភាពបច្ចុប្បន្ន ដំណាំដូងប្រេងមួយចំនួនដែលបានដាំដុះមុនគេបង្អស់ចាប់តាំងពីឆ្នាំ១៩៩៧ មានអាយុ ៣០ ឆ្នាំ និងដូងប្រេងមួយចំនួនទៀតមានការលូតលាស់ខ្ពស់ៗពេកធ្វើឱ្យទិន្នផលធ្លាក់ចុះ ទើបក្រុមហ៊ុនបានសម្រេច និងរៀបចំផែនការសម្អាតចោល ព្រមទាំងធ្វើការដាំថ្មីឡើងវិញប្រមាណ ៦.២៨០ ហិកតា ហើយតាមផែនការត្រូវចំណាយពេលវេលារហូតដល់ ១១ ឆ្នាំ។

ជាក់ស្តែងនៅឆ្នាំ ២០២៦ ក្រុមហ៊ុននឹងធ្វើការដាំដុះលើផ្ទៃដី ៥៧៩ ហិកតា ស្មើនឹង ៩២.៦៤០ កូនដូងប្រេង គិតជាមធ្យម ១៦០ ដើម/ហិកតា។

លោក អ៊ិត ណុប បានបញ្ជាក់ថា គ្រាប់ពូជដូងប្រេងក្រុមហ៊ុននាំចូលពីប្រទេសម៉ាឡេស៊ី ឥណ្ឌូនេស៊ី និងប្រទេសកូស្តារីកា ដោយសារប្រទេសទាំងបីនេះជាប្រទេសដែលឈានមុខគេក្នុងការផលិតគ្រាប់ពូជ មានសមត្ថភាពគ្រប់គ្រាន់ និងជឿទុកចិត្តបានអំពីគុណភាពបង្កាត់ពូជ ធន់នឹងអាកាសធាតុ ធន់នឹងជំងឺ និងទទួលបានទិន្នផលល្អ។

បើតាមអ្នកបច្ចេកទេសរូបនេះ គ្រាប់ដូងប្រេងត្រូវការបណ្តុះរយៈពេល ១០ ទៅ ១២ ខែ ទើបអាចយកទៅដាំនៅចម្ការបាន៕

The post ៣០ ឆ្នាំមុន ឧកញ៉ា ម៉ុង ឫទ្ធី ជម្នះដាំដូងប្រេងទោះរងការគំរាមកំហែងពីខ្មែរក្រហម appeared first on Kampuchea Thmey Daily.

ឧកញ៉ា ម៉ុង ឫទ្ធី បង្ហើបជំនួបសន្ទនាជាមួយនាយរដ្ឋមន្រ្តីកម្ពុជា គឺជំរុញរោងចក្រផលិតជីដំណើរការឲ្យបានឆាប់

Dy Bunnara — Sun, 17 May 2026 02:54:27 +0000

អ្នកឧកញ៉ា ម៉ុង ឫទ្ធី បានបង្ហើបអំពីការសន្ទនាជាមួយសម្តេចធិបតី ហ៊ុន ម៉ាណែត ក្នុងកម្មវិធីមួយកាលពីពេលថ្មីៗនេះ ដែលនាយករដ្ឋមន្រ្តីកម្ពុជាបានជំរុញឲ្យលោកដំណើរការរោងចក្រផលិតជីឲ្យបានកាន់តែលឿន ឲ្យបានកាន់តែច្រើននិងជួយគាំទ្រដល់ការអភិវឌ្ឍវិស័យកសិកម្ម ដើម្បីអាចឈានទៅប្រកួតប្រជែងជាមួយប្រទេសជិតខាង។

ក្នុងកម្មវិធីដាំដូងប្រេងនៅស្រុកព្រៃនប់កាលពីម្សិលមិញនេះ សេដ្ឋីកសិកម្មរូបនេះបានបញ្ជាក់ថា មានអ្នកឆ្ងល់ មានអ្នកសួរច្រើនតើលោកនិងសម្តេចខ្សឹបគ្នារឿងអ្វី? ការពិតគឺនាយករដ្ឋមន្ត្រីបានប្រាប់ឲ្យលោកជួយការងារកសិកម្ម ទាំងការដាំដុះ និងការចិញ្ចឹមសត្វ រួមទាំងការដំណើរការរោងចក្រផលិតជីឲ្យបានកាន់តែលឿន គោលដៅជំរុញការផលិតក្នុងស្រុកឲ្យមានតម្លៃកាន់តែទាប និងអាចប្រកួតប្រជែងជាមួយបរទេស។

អ្នកឧកញ៉ា ម៉ុង ឫទ្ធី មើលឃើញពីបេះដូងរបស់នាយករដ្ឋមន្រ្តីវ័យក្មេងរបស់កម្ពុជា ដែលតែងតែយកចិត្តទុកដាក់គិតគូរពីផលប្រយោជន៍ជាតិ និងប្រជាជនជានិច្ច។

ដោយសារមើលឃើញបទពិសោធន៍របស់លោកលើកិច្ចការងារកសិកម្ម អ្នកឧកញ៉ាបានអះអាងថា នាយករដ្ឋមន្ត្រីកម្ពុជាបានប្រាប់ថានឹងរកពេលជួបពិភាក្សាគ្នាបន្តទៀតនៅពេលក្រោយ៕

The post ឧកញ៉ា ម៉ុង ឫទ្ធី បង្ហើបជំនួបសន្ទនាជាមួយនាយរដ្ឋមន្រ្តីកម្ពុជា គឺជំរុញរោងចក្រផលិតជីដំណើរការឲ្យបានឆាប់ appeared first on Kampuchea Thmey Daily.

រោងចក្រផលិតជីធំៗក្នុងស្រុក រួមចំណែកកាត់បន្ថយជីនាំចូល ជួយសេដ្ឋកិច្ចជាតិរាប់លានដុល្លារក្នុងមួយឆ្នាំៗ

Dy Bunnara — Fri, 15 May 2026 03:34:13 +0000

ក្រៅពីជីនាំចូល កម្ពុជាក៏មានសមត្ថភាពផលិតជីក្នុងស្រុកសម្រាប់បម្រើលើវិស័យកសិកម្ម ដែលបានរួមចំណែកកាត់បន្ថយការខាតបង់សេដ្ឋកិច្ចជាតិរាប់លានដុល្លារក្នុងមួយឆ្នាំៗពីការនាំចូលជីពីបរទេស។

ខាងក្រោមនេះជារោងចក្រផលិតជីធំៗកំពុងដំណើរការខ្សែសង្វាក់ផលិតកម្មក្នុងប្រទេសកម្ពុជា ហើយមួយចំនួនទៀតកំពុងសាងសង់ជាបន្តបន្ទាប់។

ក្រុមហ៊ុន ហ៊ុយ យន់ អេហ្គ្រីខលឈ័រ

រោងចក្រផលិតជីក្នុងស្រុកមួយនេះ មានសមត្ថភាពផលិតជីធម្មជាតិបានប្រមាណ ១០០ តោន ក្នុងមួយថ្ងៃ ហើយថែមទាំងបានជួយសម្អាតបរិស្ថានសង្គម តាមរយៈការប្រមូលកាកសំណល់មកកែច្នៃឡើងវិញ។

រោងចក្រផលិតជីរបស់ក្រុមហ៊ុន ហ៊ុយ យន់ បានចាប់ផ្ដើមដំណើរការតាំងពីឆ្នាំ ២០១៣ មានទីតាំងស្ថិតនៅឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ។

ជីធម្មជាតិដែលក្រុមហ៊ុនផលិតមាន ៣ មុខសំខាន់ៗ ក្នុងនោះមាន ជីគ្រាប់ សម្រាប់ការងារស្រែចម្ការ ជីទឹកធម្មជាតិ និងជីកំបោរកសិកម្ម ដែលភាគច្រើនជីទាំងនេះផលិតចេញពីកាកសំណល់និងលាមកសត្វ ដែលក្រុមហ៊ុនប្រមូលចូលរោងចក្រ។

ក្រុមហ៊ុនជីធម្មជាតិជប៉ុនសញ្ញាផែនដី

អ្នកវិនិយោគកម្ពុជានិងជប៉ុន បានសហការគ្នាបង្កើតរោងចក្រផលិតជីធម្មជាតិ ដើម្បីផ្គត់ផ្គង់តម្រូវការក្នុងស្រុក និងនាំចេញទៅបរទេស។

ទស្សនៈវិស័យក្នុងដំណើរការរោងចក្រផលិតជីក្នុងស្រុកនេះ គឺដើម្បីចង់ជួយកែប្រែនិងស្ដារគុណភាពដីរបស់កសិករដែលបានខូចខាតដោយសារការប្រើប្រាស់ជីគីមី និងថ្នាំពុលខុសបច្ចេកទេស។ បន្ថែមពីនេះ ក្រុមហ៊ុនចង់ជំរុញឲ្យកសិករកាត់បន្ថយការប្រើប្រាស់ជីគីមីដែលចំណាយលុយច្រើន ហើយងាកមកប្រើជីធម្មជាតិវិញ។

ក្រុមហ៊ុនផលិតជី ផេនដា មែន

ក្រុមហ៊ុន ធាន ម៉ុង បានសម្ពោធដំណើរការអាជីវកម្ម ព្រមជាមួយនឹងរោងចក្រផលិតជីកសិកម្មក្នុងស្រុកម៉ាក ផេនដា មេន (Panda Man) កាលពីឆ្នាំ ២០២៤ ដែលមានទីតាំងរោងចក្រនៅក្នុងស្រុកឆ្លូង ខេត្តក្រចេះ។

រោងចក្រផលិតជីកសិកម្ម ផេនដា មេន មានសមត្ថភាពផលិតជី អិនប៉េកា រហូតដល់ទៅ ១៥ ម៉ឺនតោនក្នុងមួយឆ្នាំ និងជីទឹកចំនួន ៣ ម៉ឺនតោនក្នុងមួយឆ្នាំ។

ក្រុមហ៊ុន ធានម៉ុង ជាក្រុមហ៊ុនបច្ចេកវិទ្យាកសិកម្ម ដែលផ្ដួចផ្ដើមឡើងដោយស្ថាបនិកជាជនជាតិខ្មែរ និងចិនរួមគ្នា ដោយផ្ដោតលើការស្រាវជ្រាវ ការអភិវឌ្ឍ និងការផ្គត់ផ្គង់ជីគីមី និងជីទឹក សម្រាប់ផលិតកម្មកសិកម្មនៅកម្ពុជា។

ផលិតផលជី ផេនដា មេន របស់ក្រុមហ៊ុនមានដូចជា ជីអ៊ុយរ៉េ ដេអាប៉េ កាលី និងអិនប៉េកា (NPK) ជាដើម។

ក្រុមហ៊ុនផលិតជីកសិកម្មវីរៈ ប៊ុនថាំ

រោងចក្រផលិតជីរបស់ក្រុមហ៊ុន វីរៈ ប៊ុនថាំ សាងសង់នៅលើផ្ទៃដីទំហំប្រមាណ ១០ ហិកតា ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

ដោយសាងកេរ្តិ៍ឈ្មោះដំបូងតាមរយៈអាជីវកម្មក្រុមហ៊ុនដឹកជញ្ជូនអ្នកដំណើរ ក្រុមហ៊ុនវីរៈ ប៊ុនថាំ បានវិវឌ្ឍចូលរួមអភិវឌ្ឍន៍លើវិស័យកសិកម្ម ដោយឈានទៅបើកដំណើរការរោងចក្រផលិតជីបន្ថែម។

រោងចក្រដែលមានស្ថាបនិកជាជនជាតិខ្មែរនេះ មានសមត្ថភាពផលិតជីបានប្រមាណ ២០០ តោនក្នុងមួយថ្ងៃ ដូចជាជីសរីរាង្គ ជីលាមកជន្លេន និងជីទឹក។

បើតាមប្រភពពីក្រុមហ៊ុន មុនបញ្ចេញលក់ចែកចាយជាផ្លូវការ ជីរបស់ក្រុមហ៊ុនខ្មែរនេះបានយកទៅសាកល្បងប្រើប្រាស់នៅលើដំណាំជាច្រើនប្រភេទដូចជាស្រូវ ស្វាយ ទុរេន ដោយទទួលបានលទ្ធផលល្អ មិនបង្កប៉ះពាល់ដល់គុណភាពដីនោះឡើយ។

ក្រៅពីរោងចក្រផលិតជីសរីរាង្គ ក្រុមហ៊ុនក៏គ្រោងសាងសង់រោងចក្រផលិតជីគីមីបន្ថែមទៀតនាពេលខាងមុខ។

ក្រុមហ៊ុន husk venture

ក្រុមហ៊ុន Husk Ventures ជាក្រុមហ៊ុនវិនិយោគពីបរទេសមានមូលដ្ឋានផលិតកម្មនៅខេត្តកំពង់ធំ។ ក្រៅពីផលិតជីកសិកម្មដើម្បីផ្គត់ផ្គង់តម្រូវការក្នុងស្រុក ក្រុមហ៊ុនក៏បាននាំចេញទៅប្រទេសមួយចំនួន ខណៈនៅឆ្នាំ ២០២៤ ក្រុមហ៊ុនបាននាំចេញជោគជ័យផលិតផលជីសរីរាង្គចំនួន ៣០០ តោន ទៅកាន់ប្រទេសវៀតណាម។

ក្រុមហ៊ុនបានដាក់ផែនការពង្រីកទីផ្សារក្នុងស្រុក និងក្រៅស្រុកបន្ថែមទៀត ហើយក្នុងឆ្នាំ២០២៥ ក្រុមហ៊ុនបានទិញឧបករណ៍ថ្មីក្នុងផែនការជំរុញការផលិតជីសរីរាង្គឱ្យបាន ១០ ០០០ តោន។

ក្រុមហ៊ុនបានប្រើប្រាស់បច្ចេកវិទ្យាជួយក្រុមហ៊ុនអាចលក់កាបោន ដែលកើតចេញពីការផលិតជីសរីរាង្គនៅលើទីផ្សារអន្តរជាតិបានទៀតផង។

ក្រុមហ៊ុនសុជាតិយ៉ាខ្មែរកសិកម្ម

នៅខេត្តកំពង់ស្ពឺ ក្រុមហ៊ុនសុជាតិយ៉ាខ្មែរកសិកម្ម បានបង្កើតខ្សែច្រវាក់ផលិតកម្មរោងចក្រផលិតជីសរីរាង្គដែលមានទីតាំងនៅភូមិព្រិចខ្ពស់ ឃុំយាអង្គ ស្រុកថ្ពង ខេត្តកំពង់ស្ពឺ នៅឆ្នាំ២០២៤។ បច្ចុប្បន្នក្រុមហ៊ុនផលិតជីធម្មជាតិពីរប្រភេទ គឺទី១ ប្រភេទជីម្សៅ និងទី២ ជាប្រភេទជីគ្រាប់។

ឆ្នាំ ២០២៥ ក្រុមហ៊ុនបានបំពាក់ខ្សែច្រវាក់ផលិតកម្មបន្ថែម ដើម្បីផលិតជីធម្មជាតិឱ្យកើនដល់ ២០០ ទៅ ៣០០ តោនក្នុងមួយថ្ងៃ សម្រាប់ចូលរួមអភិវឌ្ឍវិស័យកសិកម្ម និងចូលរួមលើកកម្ពស់ជីវភាពកសិករនៅតាមតំបន់ជនបទ។

ក្រុមហ៊ុនផលិតជីកសិកម្មឧកញ៉ា ម៉ុង ឫទ្ធី

ក្រៅពីរោងចក្រផលិតចំណីសត្វ អ្នកឧកញ៉ា ម៉ុង ឫទ្ធី បានចាប់ផ្តើមសាងសង់រោងចក្រផលិតជីធម្មជាតិទាញប្រភពពីលាមកជ្រូក មាន់ ទា ដែលមានទីតាំងនៅតំបន់អភិវឌ្ឍសែនជ័យ មានចម្ងាយផ្លូវធ្វើដំណើរប្រហែលមួយម៉ោងពីរាជធានីភ្នំពេញ។

ផ្តល់បទសម្ភាសន៍ដល់ក្រុមអ្នកសារព័ត៌មានក្នុងដំណើរទស្សនកិច្ចតំបន់អភិវឌ្ឍកសិឧស្សាហកម្មនៅស្រុកព្រៃនប់ ខេត្តព្រះសីហនុ អ្នកឧកញ៉ា ម៉ុង ឫទ្ធី បានបង្ហើបពីផែនការក្នុងការសាងសង់រោងចក្រផលិតជីធម្មជាតិ ខណៈដែលគ្រឿងចក្រនិងឧបករណ៍សម្រាប់ដំឡើងបានមកដល់អស់ហើយ។

បើតាមអ្នកឧកញ៉ា គម្រោងសាងសង់រោងចក្រផលិតជីធម្មជាតិបន្ថែមនេះ មានគោលបំណងទាញយកសំណល់ចេញពីការចិញ្ចឹមសត្វ និងផលិតផលផ្សេងៗទៅកែច្នៃផលិតជាជីធម្មជាតិសម្រាប់ប្រើប្រាស់ក្នុងកសិដ្ឋាន និងចែកចាយដល់កសិករប្រើប្រាស់លើផលដំណាំ។

បើតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ គិតត្រឹមបំណាច់ឆ្នាំ ២០២៥ រោងចក្រផលិតជីកសិកម្មក្នុងប្រទេសកម្ពុជាមានចំនួន ២៥ ក្រុមហ៊ុន ជាមួយសមត្ថភាពអាចផលិតបានចំនួន ១៨ ម៉ឺនតោនក្នុងមួយឆ្នាំ៕

The post រោងចក្រផលិតជីធំៗក្នុងស្រុក រួមចំណែកកាត់បន្ថយជីនាំចូល ជួយសេដ្ឋកិច្ចជាតិរាប់លានដុល្លារក្នុងមួយឆ្នាំៗ appeared first on Kampuchea Thmey Daily.

ក្រុមហ៊ុនឧកញ៉ា ម៉ុង ឫទ្ធី សម្រុកសាងសង់រោងចក្រផលិតជី គ្រោងបញ្ចប់ដាក់ឲ្យដំណើរការនៅចុងឆ្នាំនេះ

Dy Bunnara — Thu, 30 Apr 2026 03:35:19 +0000

ក្រុមហ៊ុនអ្នកឧកញ៉ា ម៉ុង ឫទ្ធី កំពុងសម្រុកសាងសង់រោងចក្រផលិតជីសរីរាង្គ ក្រៅពីការវិនិយោគដាំដុះដំណាំកសិឧស្សាហកម្មលើផ្ទៃដីរាប់ម៉ឺនហិកតានៅក្នុងស្រុកព្រៃនប់ ខេត្តព្រះសីហនុ។

លោក លី ឡាវីល នាយកចាត់ការទូទៅផ្នែកចិញ្ចឹមសត្វរបស់ក្រុមហ៊ុន ម៉ុង ឫទ្ធី បានឲ្យដឹងថា គម្រោងសាងសង់រោងចក្រផលិតជីរបស់ក្រុមហ៊ុន គិតមកដល់ពេលនេះវឌ្ឍនភាពការសាងសង់បានប្រមាណ ៣០%។ លោកថា រោងចក្រអាចចាប់ផ្តើមដំណើរការបាននៅត្រីមាសទី ៤ ក្នុងឆ្នាំ ២០២៦ ខាងមុខនេះ។

យ៉ាងណាមិញ លោក លី ឡាវីល មិនបានបញ្ជាក់អំពីសមត្ថភាពផលិតរបស់រោងចក្រ ដែលគ្រោងដាក់ឲ្យដំណើរការនៅចុងឆ្នាំនេះ ដោយលោកគ្រាន់តែបង្ហើបថាជីដែលរោងចក្រផលិតជាប្រភេទជីកំប៉ុស្ត ដែលទាញប្រភពពីលាមកជ្រូក មាន់ ទា និងកាកសំណល់ផ្សេងៗ។

ក្រុមហ៊ុនម៉ុង ឫទ្ធី គ្រុប បានកំពុងវិនិយោគដាំដុះដំណាំដូងប្រេងលើផ្ទៃដីប្រមាណ ប្រមាណ ១៦ ០០០ ហិកតានៅស្រុកព្រៃនប់ ខេត្តព្រះសីហនុ។

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានបញ្ជាក់ថា ជាង ៣០ ឆ្នាំមកនេះក្រុមហ៊ុនបានចំណាយទុនអស់ប្រមាណ ១២០ លានដុល្លារ លើការវិនិយោគដាំដុះដំណាំដូងប្រេង។

ថ្លែងប្រាប់ក្រុមអ្នកសារព័ត៌មានក្នុងដំណើរទស្សនកិច្ចនៅតំបន់វិនិយោគ និងអភិវឌ្ឍន៍របស់ក្រុមហ៊ុន ម៉ុង ឫទ្ធី គ្រុប នៅស្រុកព្រៃនប់ ខេត្តព្រះសីហនុកាលពីពេលកន្លងទៅនេះ សេដ្ឋីកសិកម្មដ៏លេចធ្លោរូបនេះបានឲ្យដឹងថា ការវិនិយោគលើដំណាំដូងប្រេងរហូតមកដល់ពេលនេះ ក្រុមហ៊ុននៅមិនទាន់រកបានផលចំណេញបានវិញនៅឡើយទេ។

អ្នកឧកញ៉ាប្រាប់ថា ការធ្វើជំនួញកសិកម្មសេដ្ឋីៗក្នុងស្រុកមិនហ៊ានប្រថុយដាក់ទុនវិនិយោគនោះទេ ប៉ុន្តែអ្នកឧកញ៉ាមិនរុញរានៅតែបន្តមុខជំនួញដែលអ្នកឧកញ៉ាបានចាប់កវែកកឆ្នាំងពេញមួយជីវិតនេះ។

បើតាមសេដ្ឋីកសិកម្មរូបនេះ ក្រៅពីវិនិយោគដាំដុះដំណាំដូងប្រេង លោកបានធ្វើពិពិធកម្មការវិនិយោគវិស័យកសិឧស្សាហកម្មក្នុងនោះមានការចិញ្ចឹមជ្រូកនាំពូជពីបរទេស ការបង្កើតរោងចក្រផលិតចំណីសត្វ ដែលជួយទិញផលកសិកម្មពីកសិករប្រមាណ ៤០ លានដុល្លារក្នុងមួយឆ្នាំ និងកំពុងវិនិយោគសាងសង់រោងចក្រផលិតជីធម្មជាតិ ដែលមានទីតាំងនៅតំបន់អភិវឌ្ឍសែនជ័យក្នុងខេត្តកំពង់ស្ពឺ។

អ្នកឧកញ៉ាបញ្ជាក់ថា ការវិនិយោគសាងសង់រោងចក្រផលិតជីបន្ថែមនេះ មានគោលបំណងទាញយកសំណល់ចេញពីការចិញ្ចឹមសត្វ និងផលិតផលផ្សេងៗទៅកែច្នៃផលិតជាជីធម្មជាតិសម្រាប់ប្រើប្រាស់ក្នុងកសិដ្ឋាន និងចែកចាយដល់កសិករប្រើប្រាស់លើផលដំណាំផ្សេងៗ៕

The post ក្រុមហ៊ុនឧកញ៉ា ម៉ុង ឫទ្ធី សម្រុកសាងសង់រោងចក្រផលិតជី គ្រោងបញ្ចប់ដាក់ឲ្យដំណើរការនៅចុងឆ្នាំនេះ appeared first on Kampuchea Thmey Daily.

អ្នកឧកញ៉ា ម៉ុង ឫទ្ធី Archives - Kampuchea Thmey Daily

ប្រឡូក​វិស័យ​កសិកម្ម​ជាង ៣០ ឆ្នាំ ឧកញ៉ា ម៉ុង ឫទ្ធី ប្រាប់​បំណង​ប្រាថ្នា​មួយ​ ​មិន​ទាន់​សម្រេច​បាន

អ្នក​ជំនាញ​ក្រុមហ៊ុន ម៉ុង ឫទ្ធី បង្ហើប​បច្ចេកទេស​ដាំ​ដុះ​ដូង​ប្រេង ៣ ឆ្នាំ បាន​ផល

៣០ ឆ្នាំ​មុន ឧកញ៉ា ​ម៉ុង ឫទ្ធី ជម្នះ​ដាំ​ដូងប្រេង​ទោះ​រង​ការ​គំរាមកំហែងពី​ខ្មែរក្រហម​

ក្រុមហ៊ុន​ឧកញ៉ា ម៉ុង ឫទ្ធី ​សម្រុកសាងសង់​រោងចក្រ​ផលិតជី គ្រោង​បញ្ចប់​ដាក់​ឲ្យ​ដំណើរការ​នៅ​ចុង​ឆ្នាំនេះ

ប្រឡូកវិស័យកសិកម្មជាង ៣០ ឆ្នាំ ឧកញ៉ា ម៉ុង ឫទ្ធី ប្រាប់បំណងប្រាថ្នាមួយ មិនទាន់សម្រេចបាន

អ្នកជំនាញក្រុមហ៊ុន ម៉ុង ឫទ្ធី បង្ហើបបច្ចេកទេសដាំដុះដូងប្រេង ៣ ឆ្នាំ បានផល

៣០ ឆ្នាំមុន ឧកញ៉ា ម៉ុង ឫទ្ធី ជម្នះដាំដូងប្រេងទោះរងការគំរាមកំហែងពីខ្មែរក្រហម

ក្រុមហ៊ុនឧកញ៉ា ម៉ុង ឫទ្ធី សម្រុកសាងសង់រោងចក្រផលិតជី គ្រោងបញ្ចប់ដាក់ឲ្យដំណើរការនៅចុងឆ្នាំនេះ