AFC Challenge League Archives - Kampuchea Thmey Daily

លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន

chean virakbot — Fri, 22 May 2026 03:20:41 +0000

ក្លិបបាល់ទាត់ ព្រះខ័នរាជស្វាយរៀង និង ភ្នំពេញក្រោន មានភារកិច្ចចូលរួមប្រកួតក្នុងពានរង្វាន់ក្លិបអាស៊ីលំដាប់ទី២ AFC Champions League Two នៅរដូវកាលថ្មី ២០២៦-២៧ ប៉ុន្តែគ្រូបង្វឹកត្រូវតែមានសញ្ញាបត្រអាស៊ីខ្ពស់បំផុតគឺ AFC Professional Diploma ទើបអាចដឹកចូលរួមប្រកួតបាន។

រហូតដល់ពេលនេះ លោក Mattew McConkey គ្រូបង្វឹក ព្រះខ័នរាជស្វាយរៀង និង Oleg Starynskyi គ្រូបង្វឹករបស់ ភ្នំពេញក្រោន មិនទាន់មានសញ្ញាបត្រ AFC Pro Lecense ទេ ដូច្នេះលោកមិនអាចដឹកនាំចូលរួមការប្រកួតក្នុងពានរង្វាន់អាស៊ីកម្រិតទី២បានឡើយ។

ទោះបីជាយ៉ាងណា កាលពីពេលថ្មីៗនេះ សហព័ន្ធកីឡាបាល់ទាត់កម្ពុជា បានប្រកាសបើកវគ្គបណ្តុះបណ្តាលជំនាញគ្រូបង្វឹកកម្រិតអាស៊ីខ្ពស់បំផុតនៅកម្ពុជា ហើយនេះជាការបើកវគ្គបណ្តុះបណ្តាលជំនាញគ្រូបង្វឹកខ្ពស់បំផុតលើកដំបូងនៅកម្ពុជា។

កញ្ញា ជា ស្រីលីស ប្រធានអាជ្ញាប័ណ្ណក្លិបបាល់ទាត់កម្ពុជា បានប្រាប់ថា មានលក្ខខណ្ឌមួយដែលគ្រូបង្វឹកភ្នំពេញក្រោន និង ព្រះខ័នរាជស្វាយរៀង អាចដឹកនាំការប្រកួតក្នុងពានរង្វាន់អាស៊ីកម្រិតទី២បានគឺ ពួកគាត់ត្រូវតែចុះឈ្មោះចូលរួមរៀនវគ្គ AFC Pro Lecense ហើយទទួលបានការអនុម័តពីគណៈកម្មការជំនាញបណ្តុះបណ្តាល។

កញ្ញា ជា ស្រីលីស បានបញ្ជាក់ថា ៖«ពាក់ព័ន្ធនឹងចំណុចនេះ មានន័យថា មិនចាំបាច់ពួកគាត់រៀនចប់ហើយបានដឹកនាំបានទេ គឺ ឲ្យតែពួកគេបានចុះឈ្មោះ ហើយពួកគាត់ជាប់ចូលរៀនត្រឹមត្រូវគឺ ពួកគាត់អាចដឹកនាំការប្រកួតបានហើយ ប៉ុន្តែទាល់តែពួកគាត់ជាប់ឈ្មោះចូលរៀនជាមុនសិន។ ប្រសិនបើពួកគាត់បានចុះឈ្មោះហើយ តែអត់ជាប់ឈ្មោះចូលរៀន ក៏មិនអាចដឹកនាំបានដែរ»។

ការអនុម័តឲ្យបេក្ខជនចូលរួមរៀនដោយគណៈកម្មការរៀបចំវគ្គបណ្តុះបណ្តាលរបស់សហព័ន្ធកីឡាបាល់ទាត់កម្ពុជាតែម្តង មិនមែនខាងសហព័ន្ធកីឡាបាល់ទាត់ទ្វីបអាស៊ីទេ។ តាមសេចក្តីប្រកាសរបស់សហព័ន្ធកីឡាបាល់ទាត់កម្ពុជា បង្ហាញឲ្យឃើញពីតម្រូវការជាច្រើនសម្រាប់គ្រូបង្វឹកមុនពេលទទួលបានការអនុម័តឲ្យចូលរៀនត្រឹមត្រូវ។ ក្នុងនោះ បេក្ខជនត្រូចចុះឈ្មោះ ត្រូវឆ្លងកាត់ការសម្ភាស និងបំពេញឯកសារផ្សេងៗជាច្រើនទើបអាចទទួលបានការអនុម័តឲ្យចូលរៀន។

ការរៀបចំបើកវគ្គបណ្តុះបណ្តាលជំនាញគ្រូបង្វឹកអាស៊ីកម្រិតខ្ពស់បំផុតរបស់សហព័ន្ធកកីឡាបាល់ទាត់កម្ពុជាពេលនេះ ពិតជាមានសារសំខាន់ណាស់សម្រាប់គ្រូបង្វឹកកម្ពុជា និងជនបរទេស ពីព្រោះការចេញទៅរៀននៅក្រៅប្រទេសចំណាយប្រាក់ច្រើន។ ជាពិសេសស្របពេលដែលក្លិបបាល់ទាត់កម្ពុជាត្រូវចូលរួមប្រកួតពានរង្វាន់អាស៊ីកម្រិតទី២ផង៕

អត្ថបទ៖ វិរបុត្រ

The post លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន appeared first on Kampuchea Thmey Daily.

៣ ចំណុចត្រូវដឹងពី ព្រះខ័នរាជស្វាយរៀង ក្នុងពាន ACGL ទោះមិនឈ្នះជើងឯក

Kosal Sem — Sat, 16 May 2026 02:10:00 +0000

មានរឿងរ៉ាវគួរឱ្យចាប់អារម្មណ៍ ៣ ចំណុច ពីក្រុមបាល់ទាត់ ព្រះខ័នរាជស្វាយរៀង ក្នុងពាន AFC Challenge League បើទោះពួកគេមិនបានឈ្នះជើងឯកក៏ដោយ។

ប្រវត្តិសាស្ត្រច្រំដែល បានកើតឡើងសម្រាប់ក្រុមតំណាងឲ្យកម្ពុជា ដែលនៅតែមិនអាចដណ្តើមបានតំណែងជើងឯកពាន ACGL បន្ទាប់ពីឡើងដល់វគ្គផ្តាច់ព្រ័ត្រ ២ រដូវកាលជាប់គ្នា។ ព្រះខ័នរាជស្វាយរៀង បានតស៊ូដល់ ១២០ នាទី ប៉ុន្តែចុងក្រោយបានចាញ់ក្រុមម្ចាស់ផ្ទះ Kuwait SC នៅកីឡដ្ឋាន Jaber Al-Ahmad ក្នុងលទ្ធផល ៣-៤។

ទោះបីជាបរាជ័យក៏ដោយ ប៉ុន្តែមានរឿងសំខាន់ ៣ ចំណុច ដែលអ្នកគាំទ្របាល់ទាត់ កម្ពុជា ត្រូវដឹងអំពីក្រុម ព្រះខ័នរាជស្វាយរៀង នៅក្នុងពាន ACGL រដូវកាលនេះ។

ទី ១. ការប្រកួតវគ្គផ្តាច់ព្រ័ត្រពាន ACGL រដូវកាល ២០២៥-២០២៦ ត្រូវបានគេចាត់ទុកជាការប្រកួតដ៏អស្ចារ្យបំផុត ដោយសារប្រកួតនេះលេងដល់ ១២០ នាទី ហើយមានគ្រាប់បាល់កើតឡើងច្រើនបំផុតមិនធ្លាប់មាននៅក្នុងវគ្គផ្តាច់ព្រ័ត្រ រហូតដល់ទៅ ៧ គ្រាប់។ ដោយឡែកការប្រកួតមានគ្រាប់បាល់ច្រើនបំផុតស្ថិតនៅលំដាប់លេខ ២ គឺការប្រកួតរវាងក្រុម Taiwan Power Company ទល់នឹងក្រុម ភ្នំពេញក្រោន កាលពីឆ្នាំ ២០១១ មានគ្រាប់បាល់សរុប ៥ គ្រាប់។

ទី ២. ព្រះខ័នរាជស្វាយរៀង ជាក្រុម កម្ពុជា ដំបូងគេបានឡើងវគ្គផ្តាច់ព្រ័ត្រពាន ACGL ២ រដូវកាលជាប់គ្នា។ បើនិយាយពីតំបន់ អាស៊ី ទាំងមូល គឺធ្លាប់មានក្រុមឡើងដល់វគ្គផ្តាច់ព្រ័ត្រ ២ រដូវកាលជាប់គ្នា ដូចជាក្រុម Dordoi-Dynamo និង Regar-TadAZ ប៉ុន្តែបើនិយាយអំពី កម្ពុជា គឺមិនធ្លាប់មាននោះទេ។ ដូច្នេះ ក្រុមម្ចាស់ជើងឯកលីគកំពូល កម្ពុជា គឺជាក្រុមដំបូងគេ ដែលត្រូវបានចារក្នុងកំណត់ត្រានេះ។

ទី ៣. ខ្សែប្រយុទ្ធសញ្ជាតិ ហ្គាណា Kwame Peprah បានក្លាយជាកីឡាករមកពីលីគកំពូល កម្ពុជា ដំបូងគេ ឈ្នះស្បែកជើងមាសក្នុងពាន AFC Challenge League បន្ទាប់ពីរកបាន ៨ គ្រាប់។ នេះជាលើកដំបូងហើយនៅក្នុងប្រវត្តិសាស្ត្រពាន ACGL ដែលមានកីឡាករមកពីលីគ កម្ពុជា បានឈ្នះស្បែកជើងមាស។

ដោយឡែកកន្លងមក កាលពីឆ្នាំ ២០០៥ ធ្លាប់មានលោក ហុក សុចិត្រា ម្នាក់ដែរ ដែលពេលនោះលេងនៅក្រុម Hello United បច្ចុប្បន្នជាក្រុម ភ្នំពេញក្រោន បានស្ថិតជាបេក្ខភាពប្រជែងស្បែកជើងមាស បន្ទាប់ពីរកបាន ៤ គ្រាប់ ប៉ុន្តែចុងក្រោយ លោកមិនបានជាប់នៅក្នុងការប្រជែងនោះទេ ដោយសារស្ថិតនៅលំដាប់លេខ ២៕

អត្ថបទ៖ សេម កុសល

The post ៣ ចំណុចត្រូវដឹងពី ព្រះខ័នរាជស្វាយរៀង ក្នុងពាន ACGL ទោះមិនឈ្នះជើងឯក appeared first on Kampuchea Thmey Daily.

កម្ពុជា នៅរក្សាកំណត់ត្រាអ្នកទស្សនាផ្ទាល់ច្រើនបំផុត វគ្គផ្តាច់ព្រ័ត្រ ពាន ACGL

chean virakbot — Fri, 15 May 2026 08:15:43 +0000

ការប្រកួតវគ្គផ្តាច់ព្រ័ត្រ AFC Challenge League រដូវកាល ២០២៥-២៦ នាកីឡដ្ឋាន Jaber Al-Ahmad ប្រទេសគុយវ៉ែត នៅមិនអាចបំបែកកំណត់ត្រាអ្នកចូលទស្សនាផ្ទាល់ច្រើនបំផុតរបស់ពហុកីឡដ្ឋានជាតិមរតកតេជោ ក្នុងប្រទេសកម្ពុជា បានឡើយ។

ការប្រកួតវគ្គផ្តាច់ព្រ័ត្រ រវាង Kuwait SC និង ព្រះខ័នរាជស្វាយរៀង

ជំនួបវគ្គផ្តាច់ព្រ័ត្រ រវាង ក្រុម Kuwait SC និង ព្រះខ័នរាជស្វាយរៀង នៅកីឡដ្ឋាន Jaber Al-Ahmad កាលពីថ្ងៃទី១៣ ខែឧសភា ឆ្នាំ ២០២៦ ដែលបញ្ចប់ទៅដោយម្ចាស់ផ្ទះទទួលបានជ័យជម្នះក្នុង ៤-៣ ដោយមានមានអ្នកទស្សនាផ្ទាល់ចំនួន ៤៣,៣៦៦ នាក់។

ចំនួននេះស្ថិតនៅចំណាត់ថ្នាក់លេខ ២ ក្នុងប្រវត្តិសាស្ត្រវគ្គផ្តាច់ព្រ័ត្រពានរង្វាន់អាស៊ីកម្រិតទី៣ ដែលស្ថិតនៅក្រោមចំនួនអ្នកទស្សនាផ្ទាល់ កាលពីថ្ងៃទី១០ ខែឧសភា ឆ្នាំ ២០២៥ នៅពហុកីឡដ្ឋានជាតិមរតកតេជោ ដែលមានចំនួន ៥១,៦១០ នាក់ ស្ថិតនៅចំណាត់ថ្នាក់លេខ ១។

ចំណាត់ថ្នាក់លេខ ៣ កាលពីឆ្នាំ ២០១០ នាកីឡដ្ឋាន Thuwunna មានអ្នកទស្សនា ២៣,៧២០នាក់ ប្រទេសមីយ៉ាន់ម៉ា, លេខ ៤ នៅកីឡដ្ឋាន Central Republican ប្រទេសតាហ្ស៊ីគីស្ថាន ឆ្នាំ ២០១២ មានចំនួន ១៩,៣២៣ នាក់, លេខ ៥ នៅកីឡដ្ឋាន Metallurg ប្រទេសតាហ្ស៊ីគីស្ថាន ឆ្នាំ ២០០៨ មានចំនួន ១០,០០០ នាក់, លេខ ៦ នៅកីឡដ្ឋាន Metallurg ប្រទេសតាហ្ស៊ីគីស្ថាន ឆ្នាំ ២០០៩ ក៏មានចំនួន ១០,០០០ នាក់ និង លេខ ៧ នៅកីឡដ្ឋាន Dashrath ប្រទេសនេប៉ាល់ ឆ្នាំ ២០០៥ មានចំនួន ៨,០០០នាក់។

នេះជាការប្រកួតវគ្គផ្តាច់ព្រ័ត្រ ៧ លើកក្នុងពានរង្វាន់ President’s Cup ឬ AFC Challenge League ដែលមានចំនួនអ្នកទស្សនាផ្ទាល់ច្រើន។ ចំណែកការប្រកួតវគ្គផ្តាច់ព្រ័ត្រ ចំនួន ៥ លើកផ្សេងទៀតមានតិចៗមិនដល់ ៤ ពាន់នាក់ផង។

សូមបញ្ជាក់ថា នៅរដូវកាលក្រោយ ២០២៦-២៧ ការប្រកួតវគ្គផ្តាច់ព្រ័ត្រ ពានរង្វាន់ AFC Challenge League នឹងធ្វើប្រទេសក្នុងតំបន់អាស៊ីខាងកើតវិញម្តង៕

ខាងក្រោមជាស្ថិតអ្នកគាំទ្រផ្ទាល់ក្នុងវគ្គផ្តាច់ព្រ័ត្រច្រើនបំផុត

ចំនួន ៥១,៦១០ នាក់ នៅប្រទេសកម្ពុជា រដូវកាល ២០២៤-២៥
ចំនួន ៤៣,៣៦៦ នាក់ នៅប្រទេសគុយវ៉ែត រដូវកាល ២០២៥-២៦
ចំនួន ២៣,៧២០ នាក់ នៅប្រទេសមីយ៉ាន់ម៉ា ឆ្នាំ ២០១០
ចំនួន ១៩,៣២៣ នាក់ នៅប្រទេសតាហ្ស៊ីគីស្ថាន ឆ្នាំ ២០១២
ចំនួន ១០,០០០ នាក់ នៅប្រទេសតាហ្ស៊ីគីស្ថាន ឆ្នាំ ២០០៨
ចំនួន ១០,០០០ នាក់ នៅប្រទេសតាហ្ស៊ីគីស្ថាន ឆ្នាំ ២០០៩
ចំនួន ៨,០០០ នាក់ នៅប្រទេសនេប៉ាល់ ឆ្នាំ ២០០៥

អត្ថបទ៖ វិរបុត្រ

The post កម្ពុជា នៅរក្សាកំណត់ត្រាអ្នកទស្សនាផ្ទាល់ច្រើនបំផុត វគ្គផ្តាច់ព្រ័ត្រ ពាន ACGL appeared first on Kampuchea Thmey Daily.

Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL

chean virakbot — Thu, 14 May 2026 02:30:43 +0000

ខ្សែប្រយុទ្ធសញ្ជាតិប្រេស៊ីល Cristian Roque បានសូមទោសដល់ប្រជាជនកម្ពុជាទាំងអស់សម្រាប់ការមិនជោគជ័យក្នុងវគ្គផ្តាច់ព្រ័ត្រ ពានរង្វាន់ AFC Challenge League ជាលើកទី២។

កីឡាករបាននិយាយថា ៖«វាពិបាកនិយាយណាស់ បន្ទាប់ពីចាញ់វគ្គផ្តាច់ព្រ័ត្រ ខ្ញុំគ្មានអ្វីក្រៅពី សូមគុណដល់អ្នករាល់គ្នាសម្រាប់ការគាំទ្រ និងសូមអភ័យទោសចំពោះប្រជាជនកម្ពុជាទាំងអស់ដែលបានគាំទ្រលើកទឹកចិត្តពួកយើង។ ខ្ញុំពិតជាសូមទោសមែន»។

ក្រុមបាល់ទាត់ ព្រះខ័នរាជស្វាយរៀង ទទួលបានចំណាត់ថ្នាក់លេខ ២ ជាលើកទី២ ក្នុងពានរង្វាន់ក្លិបទ្វីប អាស៊ី AFC Challenge League បន្ទាប់ពីបានចាញ់ក្រុមម្ចាស់ផ្ទះ Kuwait SC នៅវគ្គផ្តាច់ព្រ័ត្រក្នុងលទ្ធផល ៣-៤ កាលពីយប់មិញ។

ការប្រកួត ដែលប្រព្រឹត្តឡើងនៅកីឡដ្ឋាន Jaber Al-Ahmad ក្នុងប្រទេស គុយវ៉ែត នារាត្រីថ្ងៃទី ១៣ ខែ ឧសភា ឆ្នាំ ២០២៦ ប្រើពេលរហូតដល់ ១២០នាទី ទើបបានបញ្ចប់។ ព្រះខ័នរាជស្វាយរៀង បានបើកការនាំមុខ ២-០ ដើមវគ្គទី ១ ដែលរក្សារហូតចប់ការប្រកូត។ នៅដើមវគ្គទី២ ក្រុមម្ចាស់ផ្ទះរកបានគ្រាប់បាល់ ២ គ្រាប់យ៉ាងលឿនដើម្បីតាមស្មើ ២-២ រហូតចប់ ៩០នាទី។

ការបន្ថែមម៉ោង ១៥នាទី ពីរដង Cristian Roque បានស៊ុតចូលដើម្បីឲ្យ ព្រះខ័នរាជស្វាយរៀង នាំមុខជាថ្មី ៣-២ ប៉ុន្តែត្រូវបានម្ចាស់ផ្ទះរកបាន ២ គ្រាប់ដើម្បីទទួលបានជ័យជម្នះដោយលទ្ធផល ៣-៤។

នេះជាលើកទី២ ដែល ព្រះខ័នរាជស្វាយរៀង ទទួលបានចំណាត់ថ្នាក់លេខ ២ ក្នុងពានរង្វាន់ AFC Challenge League បន្ទាប់ពីលើកទី១ បានប្រើពេលរហួតដល់ ១២០នាទីដូចគ្នាដោយបានចាញ់ក្រុម FK Arkadag ដោយលទ្ធផល១-២ នៅទឹកដី កម្ពុជា។

ការទទួលបានចំណាត់ថ្នាក់លេខ ២ នេះ ព្រះខ័នរាជស្វាយរៀង ទទួលបានប្រាក់រង្វាន់សរុបប្រមាណជាង ៨០ ម៉ឺនដុល្លារអាមេរិក ក្នុងនោះប្រាក់រង្វាន់រងជើងឯក ៥០ ម៉ឺនដុល្លារ និងប្រាក់ទទួលបានពីវគ្គសន្សំពិន្ទុក្នុងពូលដល់វគ្គពាក់កណ្តាលផ្តាច់ប្រមាណ ៣០ ម៉ឺនដុល្លារអាមេរិក៕

អត្ថបទ៖ វិរបុត្រ

The post Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL appeared first on Kampuchea Thmey Daily.

ព្រះខ័នរាជស្វាយរៀង ជាជើងឯករង ACGL ទទួលបានប្រាក់ប្រមាណ ៨០ ម៉ឺនដុល្លារ

Kosal Sem — Thu, 14 May 2026 01:01:31 +0000

អត្ថបទ៖ សេម កុសល

The post ព្រះខ័នរាជស្វាយរៀង ជាជើងឯករង ACGL ទទួលបានប្រាក់ប្រមាណ ៨០ ម៉ឺនដុល្លារ appeared first on Kampuchea Thmey Daily.

គ្រូ Kuwait SC ថា ទោះជួប ព្រះខ័នរាជស្វាយរៀង ឬក្រុមអាស៊ីផ្សេង ក៏ក្រុមលោកនឹងឈ្នះពានយប់នេះ

Kosal Sem — Wed, 13 May 2026 05:20:00 +0000

គ្រូបង្វឹករបស់ក្រុម Kuwait SC លោក Nebojsa Jovovic បានលើកឡើងគួរឲ្យចាប់អារម្មណ៍ មុនការប្រកួតវគ្គផ្តាច់ព្រ័ត្រពានរង្វាន់ AFC Challenge League ទល់នឹងក្រុម ព្រះខ័នរាជស្វាយរៀង ដោយលោកជឿជាក់លើក្រុមរបស់លោកនឹងយកពាននេះបាន ទោះជួបក្រុមមកពី អាស៊ី ណាក៏ដោយ។

លោក Nebojsa Jovovic បានជឿជាក់យ៉ាងមុតមាំលើក្រុមរបស់លោក នឹងអាចយកឈ្នះក្រុម ព្រះខ័នរាជស្វាយរៀង ដើម្បីគ្រងជើងឯកពានរង្វាន់ AFC Challenge League រាត្រីនេះ។ លោកជឿជាក់បែបនេះ ដោយសារក្រុមលោកជាម្ចាស់ផ្ទះ និងមានអ្នកគាំទ្រ ជាកីឡាករទី ២។ បន្ថែមពីនេះ លោកបានសង្កត់ធ្ងន់ ថា ទោះបីជួបក្រុមមកពីអាស៊ីណាក៏ដោយ ក៏ក្រុមលោកនឹងអាចឈ្នះ ដើម្បីយកពាន ACGL ឲ្យបាន។

ថ្លែងនៅក្នុងសន្និសីទសារព័ត៌មាន លោក Nebojsa Jovovic បានមានប្រសាសន៍ ថា៖ «ពួកយើងបានត្រៀមខ្លួនរួចរាល់ហើយ។ ខ្ញុំនឹងប្រាប់អ្នករឿងមួយ ទោះបីជាយើងត្រូវប្រកួតជាមួយក្រុមណាមកពីអាស៊ីក៏ដោយ ក៏ពួកយើងនឹងនាំយកពានមកកាន់ប្រទេសគុយវ៉ែតវិញដែរ។ គ្រប់ការប្រកួតវគ្គផ្តាច់ព្រ័ត្រសុទ្ធតែខុសគ្នា ហើយសុទ្ធតែពិបាក ប៉ុន្តែពួកយើងមានទំនុកចិត្តពេញលេញ និងបានត្រៀមខ្លួនរួចហើយ។ ថ្ងៃស្អែក ពួកយើងនឹងផ្តល់ចម្លើយសម្រាប់អ្វីៗទាំងអស់»។

បុរសសញ្ជាតិ ម៉ុងតេណេក្រូ វ័យ ៥១ ឆ្នាំរូបនេះ បានបន្តទៀត ថា៖ «ខ្ញុំដឹង ថា ពួកយើងនឹងជួបក្រុមដ៏ខ្លាំងមួយ ហើយពួកយើងគោរពពួកគេ។ ពួកគេបានឡើងមកដល់វគ្គផ្តាច់ព្រ័ត្រ ហើយយើងក៏បានស្គាល់ពីគូប្រកួតរបស់ពួកយើងដែរ។ ប៉ុន្តែមានហេតុផលមួយ ដែលគ្រប់គ្នាមានគំនិតសុទិដ្ឋិនិយម ថា Kuwait SC នឹងឈ្នះ ដោយសារយើងនឹងលេងនៅក្នុងដីរបស់ខ្លួនឯង ហើយមានអ្នកគាំទ្រ ដែលជាកីឡាករទី ១២»។

អត្ថបទ៖ សេម កុសល

The post គ្រូ Kuwait SC ថា ទោះជួប ព្រះខ័នរាជស្វាយរៀង ឬក្រុមអាស៊ីផ្សេង ក៏ក្រុមលោកនឹងឈ្នះពានយប់នេះ appeared first on Kampuchea Thmey Daily.

លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន

Kosal Sem — Wed, 13 May 2026 02:46:21 +0000

លោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង បានព្រមានក្រុមម្ចាស់ផ្ទះ Kuwait SC នឹងធ្វើឱ្យពួកគេជួបបញ្ហា ដែលមិនធ្លាប់ជួបពីមុនមក ក្នុងវគ្គផ្តាច់ព្រ័ត្រពានរង្វាន់ AFC Challenge League រាត្រីនេះ។

មុនការប្រកួតវគ្គផ្តាច់ព្រ័ត្រពាន ACGL នារាត្រីម៉ោង ១១:៤៥ នាទី (ម៉ោងនៅ កម្ពុជា) ថ្ងៃទី ១៣ ខែ ឧសភា ឆ្នាំ ២០២៦ លោក McConkey បានលើកឡើង ថា ក្រុមរបស់លោកបានត្រៀមរួចរាល់ហើយ។ ក្រុមរបស់លោកនឹងយកបទពិសោធបរាជ័យកាលពីឆ្នាំមុន ដើម្បីប្រើនៅក្នុងការប្រកួតយប់នេះ។

ជាមួយគ្នានេះ គ្រូបង្វឹកសញ្ជាតិ អៀរឡង់ វ័យ ៣៣ ឆ្នាំបានបន្ថែម ថា ក្រុមលោកនឹងផ្តល់ជាបញ្ហាដល់ក្រុមម្ចាស់ផ្ទះ Kuwait SC ដែលពួកគេមិនដែលបានជួបពីមុនមក។ ថ្លែងនៅក្នុងសន្និសីទសារព័ត៌មាន លោក McConkey បានមានប្រសាសន៍ ថា៖ «ផ្នែកផ្លូវចិត្ត ពួកយើងបានត្រៀមខ្លួនរួចរាល់ហើយ។ ពួកយើងនឹងយកបទពិសោធពីឆ្នាំមុនមកប្រើ ដែលពេលនោះយើងមិនអាចសម្រេចគោលដៅបាន»។

លោក McConkey បានបន្ត ថា៖ «ពួកយើងបានសិក្សាពីការប្រកួតរបស់ក្លិប Kuwait SC រួចហើយ។ ខ្ញុំជឿថា ពួកយើងនឹងបង្កបញ្ហាដល់ពួកគេក្នុងរបៀប ដែលពួកគេមិនធ្លាប់ជួបពីមុនមក។ ពួកយើងមានកាលវិភាគមមាញឹកខ្លាំងក្នុងរយៈពេលប៉ុន្មានខែកន្លងមកនេះ ដូច្នេះបន្ទាប់ពីការប្រកួតចុងក្រោយបានបញ្ចប់ ពួកយើងសម្រេចចិត្តមកទីនេះមុន។ នេះជាសប្ដាហ៍ដំបូងក្នុងរយៈពេលយូរដែលពួកយើងមានពេលហ្វឹកហាត់ពេញលេញ ហើយវាពិតជាល្អណាស់។ គ្រប់គ្នាបានត្រៀមខ្លួនរួចរាល់ហើយ»។

គួរឱ្យដឹង ថា នេះជាលើកទី ២ ហើយ ដែល ព្រះខ័នរាជស្វាយរៀង បានឡើងដល់វគ្គផ្តាច់ព្រ័ត្រពានរង្វាន់ AFC Challenge League ខណៈកាលពីរដូវកាលមុនបានបរាជ័យក្រោមថ្វីជើងក្រុម FK Arkadag នៅវគ្គផ្តាច់ព្រ័ត្រក្នុងទឹកដី កម្ពុជា ដោយលទ្ធផល ២-១៕

អត្ថបទ៖ សេម កុសល

The post លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន appeared first on Kampuchea Thmey Daily.

លោក Pep Muñoz ថា ពិតជាពិបាកស្រមៃដែល ព្រះខ័នរាជស្វាយរៀង ឡើងវគ្គផ្តាច់ព្រ័ត្រពីរលើកជាប់គ្នា

chean virakbot — Wed, 13 May 2026 01:45:34 +0000

លោក Pep Muñoz ចាត់ទុកជារឿងកម្រដែល ព្រះខ័នរាជស្វាយរៀង បានដល់វគ្គផ្តាច់ព្រ័ត្រ ពានរង្វាន់អន្តរជាតិ ២ លើកជាប់គ្នា។ ប្រការនេះគឺជារឿងអស្ចារ្យគួរជាទីមោទនភាពសម្រាប់ប្រជាជនកម្ពុជា។

អតីតគ្រូបង្វឹក ព្រះខ័នរាជស្វាយរៀង បានរៀបរាប់ថា ៖«វាជាការប្រកួតវគ្គផ្តាច់ព្រ័ត្រ ដែលអ្នករាល់គ្នានៅកម្ពុជាគួរជាទីរីករាយ និងមានមោទនភាពចំពោះសមិទ្ធផលដ៏ធំនេះសាជាថ្មី។ វាមិនមែនជារឿងងាយស្រួលទេដែលក្រុមមួយបានឈានដល់វគ្គផ្តាច់ព្រ័ត្រ ពានអន្តរជាតិ ហើយសាកស្រមៃមើលទៅបានលេង ២ លើកជាប់គ្នា តើវាអស្ចារ្យយ៉ាងណា»។

លោកបានសង្កត់ធ្ងន់ថា ៖«ខ្ញុំមានការជឿជាក់យ៉ាងមុតមាំ និងសង្ឃឹមថា ព្រះខ័នរាជស្វាយរៀង នឹងនាំពានមកកាន់កម្ពុជា។ យើងខ្ញុំនឹងតាមដានមើលពីប្រទេសឥណ្ឌា»។

ជុំវិញការប្រកួតវិញ លោក Pep Muñoz បានលើកឡើងថា វាជាការប្រកួតវគ្គផ្តាច់ព្រ័ត្រ ហើយក្រុមទាំងពីរសុទ្ធតែធ្លាប់មានអារម្មណ៍បែបណាហើយក្នយងវគ្គផ្តាច់ព្រ័ត្រ។ ក្រុម Kuwait ជាម្ចាស់ផ្ទះ គឺពួកគេមានទំនុកចិត្តជាង តែ ព្រះខ័នរាជស្វាយរៀងមានស្ទីលលេងប្រចាំត្រកូលដែលជាអាវុធដ៏ល្អបំផុត។

លោកបានបន្តថា ការគ្រប់គ្រងបាល់ជារឿងសំខាន់ ប៉ុន្តែការមិនធ្វេសប្រហែស និងគ្មានកំហុស គឺរឹតតែចាំបាច់។ ក្រុម Kuwait មានកីឡាករបរទេសល្អៗ តែ ព្រះខ័នរាជស្វាយរៀង មានស្ទីលលេងពិសេស ដែលអាចគ្រប់គ្រងការប្រកួត និងបង្កើតឱកាសបាន តែរឿងសំខាន់មិនត្រូវឲ្យ Kuwait មានឱកាសវាយបកដាច់ខាន។

ការប្រកួតវគ្គផ្តាច់ព្រ័ត្រ រវាង Kuwait SC និង ព្រះខ័នរាជស្វាយរៀង វេលាម៉ោង ១១:៤៥នាទី យប់នេះ នៅកីឡដ្ឋាន Jaber Al Ahmad ប្រទេសគុយវ៉ែត។ នេះជាលើកទី២ សម្រាប់ ព្រះខ័នរាជស្វាយរៀង បានឡើងវគ្គផ្តាច់ព្រ័ត្រ ពានរង្វាន់អាស៊ី ខណៈនេះជាលើកទី ៥ សម្រាប់ Kuwait SC បានឡើងវគ្គផ្តាច់ព្រ័ត្រ ពានរង្វាន់អាស៊ី៕

អត្ថបទ៖ វិរបុត្រ

The post លោក Pep Muñoz ថា ពិតជាពិបាកស្រមៃដែល ព្រះខ័នរាជស្វាយរៀង ឡើងវគ្គផ្តាច់ព្រ័ត្រពីរលើកជាប់គ្នា appeared first on Kampuchea Thmey Daily.

AFC Challenge League Archives - Kampuchea Thmey Daily

លក្ខខណ្ឌ​មួយ​នេះ គ្រូ​ព្រះ​ខ័ន​រាជ​ស្វាយរៀង និង ភ្នំពេញ​ក្រោន អាច​ដឹក​នាំ​ការ​ប្រកួត​ក្នុងពាន AFC2 បាន

៣ ចំណុចត្រូវដឹងពី ព្រះខ័នរាជស្វាយរៀង ក្នុងពាន ACGL ទោះមិនឈ្នះ​ជើងឯក

កម្ពុជា ​នៅ​រក្សាកំណត់​ត្រា​អ្នក​ទស្សនា​ផ្ទាល់​ច្រើន​បំផុត វគ្គ​ផ្តាច់​ព្រ័ត្រ​ ពាន ACGL

Cristian Roque សូម​ទោស​ប្រជា​ជន​កម្ពុជា​ សម្រាប់​ការមិន​ឈ្នះ​​ជើង​ឯកពាន​អាស៊ី ACGL

ព្រះខ័នរាជស្វាយរៀង ជា​ជើង​ឯក​រង ACGL ទទួល​បាន​ប្រាក់​ប្រមាណ ៨០ ម៉ឺន​ដុល្លារ

គ្រូ Kuwait SC ថា ទោះជួប ព្រះខ័នរាជស្វាយរៀង ឬក្រុមអាស៊ីផ្សេង ក៏ក្រុមលោកនឹងឈ្នះពានយប់នេះ

លោក McConkey ​ថា យប់់​នេះ ក្រុម​​ម្ចាស់ផ្ទះ Kuwait SC នឹង​ជួបបញ្ហា ដែល​មិនធ្លាប់ជួបពីមុន

លោក Pep Muñoz ថា ពិត​ជា​ពិបាក​ស្រមៃ​​ដែល ព្រះ​ខ័ន​រាជ​ស្វាយរៀង ឡើង​វគ្គ​ផ្តាច់​ព្រ័ត្រពីរលើក​ជាប់​គ្នា

លក្ខខណ្ឌមួយនេះ គ្រូព្រះខ័នរាជស្វាយរៀង និង ភ្នំពេញក្រោន អាចដឹកនាំការប្រកួតក្នុងពាន AFC2 បាន

៣ ចំណុចត្រូវដឹងពី ព្រះខ័នរាជស្វាយរៀង ក្នុងពាន ACGL ទោះមិនឈ្នះជើងឯក

កម្ពុជា នៅរក្សាកំណត់ត្រាអ្នកទស្សនាផ្ទាល់ច្រើនបំផុត វគ្គផ្តាច់ព្រ័ត្រ ពាន ACGL

Cristian Roque សូមទោសប្រជាជនកម្ពុជា សម្រាប់ការមិនឈ្នះជើងឯកពានអាស៊ី ACGL

ព្រះខ័នរាជស្វាយរៀង ជាជើងឯករង ACGL ទទួលបានប្រាក់ប្រមាណ ៨០ ម៉ឺនដុល្លារ

លោក McConkey ថា យប់់នេះ ក្រុមម្ចាស់ផ្ទះ Kuwait SC នឹងជួបបញ្ហា ដែលមិនធ្លាប់ជួបពីមុន

លោក Pep Muñoz ថា ពិតជាពិបាកស្រមៃដែល ព្រះខ័នរាជស្វាយរៀង ឡើងវគ្គផ្តាច់ព្រ័ត្រពីរលើកជាប់គ្នា