ASEAN U23 Championship Archives - Kampuchea Thmey Daily

ក្រុមបាល់ទាត់ U23 ថៃ បានចាញ់ ឥណ្ឌូណេស៊ី ៤ លើកជាប់គ្នា

chean virakbot — Sat, 26 Jul 2025 02:46:06 +0000

គិតចាប់តាំងពីឆ្នាំ ២០១៩ មក ក្រុមបាល់ទាត់ថៃអាយុក្រោម ២៣ ឆ្នាំ (U23) តែងតែចាញ់ ក្រុមបាល់ទាត់ឥណ្ឌូណេស៊ី អាយុក្រោម ២៣ ឆ្នាំ សម្រាប់ការប្រកួតវគ្គសំខាន់ៗពោលគឺវគ្គចាញ់ធ្លាក់ ឈ្នះឡើងវគ្គបន្ត។

រូបភាពការប្រកួត ថៃ និង ឥណ្ឌូណេស៊ី

កាលពីឆ្នាំ ២០១៩ ដែលកម្ពុជាធ្វើម្ចាស់ផ្ទះពានរង្វាន់យុវជនអាស៊ាន ASEAN U23 Championship ក្រុម U23 ថៃ បានចាញ់ ឥណ្ឌូណេស៊ី ដោយលទ្ធផល ១-២ នៅវគ្គផ្តាច់ព្រ័ត្រ ដូច្នេះឥណ្ឌូណេស៊ី បានឈ្នះ ជើងឯក ហើយថៃ បានលេខ២។

នៅពានរង្វាន់ ASEAN U23 Championship ដែលនេះដែលថៃទទួលធ្វើម្ចាស់ផ្ទះ នៅឆ្នាំ ២០២៣ ពួកគេបានចាញ់ ឥណ្ឌូណេស៊ី ដោយលទ្ធផល ១-៣ នៅក្នុងវគ្គពាក់កណ្តាលផ្តាច់ព្រ័ត្រ ដូច្នេះ ឥណ្ឌូណេស៊ី បានឡើងទៅវគ្គផ្តាច់ព្រ័ត្រ ហើយថៃបានទៅប្រកួតដណ្តើមចំណាត់ថ្នាក់លេខ៣។

រូបភាពការប្រកួត ថៃ និង ឥណ្ឌូណេស៊ី

ក្នុងព្រឹត្តិការណ៍កីឡាស៊ីហ្គេម ឆ្នាំ ២០២៣ ដែលកម្ពុជាធ្វើម្ចាស់ផ្ទះ ថៃ បានចាញ់ ឥណ្ឌូណេស៊ី ដោយលទ្ធផល ៥-៣ ក្នុងវគ្គផ្តាច់ព្រ័ត្រ ដែលប្រើពេលរហូតដល់ ១២០នាទី ហើយក៏មានការប៉ះទង្គិចគ្នា រហូតកីឡាករថៃជាច្រើននាក់ត្រូវបានសហព័ន្ធកីឡាបាល់ទាត់អាស៊ីពិន័យ។ កីឡាករឥណ្ឌូណេស៊ីមួយចំនួនក៏រងពិន័យ។ ដូច្នេះ ឥណ្ឌូណេស៊ី ទទួលបានមេដាយមាស ខណៈ ថៃ ទទួលបានមេដាយប្រាក់។

រូបភាពការប្រកួត ថៃ និង ឥណ្ឌូណេស៊ី ប៉ះទង្គិចគ្នា

ចុងក្រោយបំផុតគឺ នៅថ្ងៃទី២៥ ខែកក្កដា ឆ្នាំ ២០២៥ ថៃ បានចាញ់ ឥណ្ឌូណេស៊ី ដោយប៉េណាល់ទីកាត់សេចក្តី ៧-៦ បន្ទាប់ពីស្មើគ្នា ១-១ ក្នុងវគ្គពាក់កណ្តាលផ្តាច់ព្រ័ត្រ ពាន ASEAN U23 Championship ឆ្នាំ ២០២៥ នៅឥណ្ឌូណេស៊ី។ ឥណ្ឌូណេស៊ី បានឡើងទៅកាន់វគ្គផ្តាច់ព្រ័ត្រ ហើយ ថៃ ត្រូវប្រកួតដណ្តើមយកចំណាត់ថ្នាក់លេខ៣។

សរុបទៅ ជួបគ្នា ៤ លើកក្នុងវគ្គចាញ់ ធ្លាក់ និងឈ្នះឡើង គិតចាប់តាំងពីឆ្នាំ ២០១៩ មក ថៃ មិនធ្លាប់ឈ្នះ ឥណ្ឌូណេស៊ីឡើយ៕

អត្ថបទ៖ វីរបុត្រ

The post ក្រុមបាល់ទាត់ U23 ថៃ បានចាញ់ ឥណ្ឌូណេស៊ី ៤ លើកជាប់គ្នា appeared first on Kampuchea Thmey Daily.

ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ

Kosal Sem — Wed, 23 Jul 2025 07:00:10 +0000

គ្រូបង្គោលរបស់ក្រុមជម្រើសជាតិកម្ពុជា អាយុក្រោម ២៣ ឆ្នាំ លោក Koji Gyotoku ហាក់មិនមានភាពភ្ញាក់ផ្អើលឡើយ ចំពោះលទ្ធផល ដែល កម្ពុជា បរាជ័យក្រោមថ្វីជើងក្រុមវៀតណាម អាយុក្រោម ២៣ ឆ្នាំ ២-១ ក្នុងពានរង្វាន់ ASEAN U-23 Championship កាលពីយប់មិញថ្ងៃទី ២២ ខែ កក្កដា ឆ្នាំ ២០២៥ ដោយលោកបានដឹងរួចទៅហើយ អំពីកម្រិតរបស់ក្រុម វៀតណាម ល្អជាង កម្ពុជា ឆ្ងាយ។

ទិដ្ឋភាពប្រកួត

ថ្លែងនៅក្នុងសន្និសីទសារព័ត៌មាន ក្រោយបញ្ចប់ការប្រកួត បុរសសញ្ជាតិ ជប៉ុន វ័យ ៦០ ឆ្នាំបានលើកឡើងថា ៖«មុនពេលកែបាល់ ខ្ញុំបានដឹងហើយ ថា វានឹងពិបាកខ្លាំង ពីព្រោះក្រុម U23 វៀតណាមគឺជាក្រុមដ៏ខ្លាំងមួយ។ គ្រប់កីឡាករគឺល្អខ្លាំង ហើយក្រុមទាំងមូលក៏ល្អផងដែរ។ U23 វៀតណាម និង កម្ពុជា គឺមានកម្រិតខុសគ្នាខ្លាំង»។

លោក Koji បានបន្តថា ៖«វៀតណាម គឺល្អខ្លាំងជាងយើង។ ពួកគេល្អឥតខ្ចោះទាំងជំនាញជាបុគ្គល។ បច្ចេកទេសល្អខ្លាំង។… ពួកយើងមិនអាចឆ្លងផុតវគ្គក្នុងពូលទេ ប៉ុន្តែពួកយើងនៅមានព្រឹត្តិការណ៍សំខាន់ៗនាពេលខាងមុខទៀត។ ពួកយើងត្រូវរត់ឱ្យខ្លាំង ព្យាយាមឱ្យខ្លាំងជាងនេះ និងប្រឹងធ្វើការឱ្យខ្លាំងបន្ថែមទៀត»។

ទិដ្ឋភាពប្រកួត

តាមការលើកឡើងរបស់លោក Koji គឺលោកហាក់បានដឹងមុនទៅហើយអំពីលទ្ធផល ដោយលោកទទួលស្គាល់ថា វៀតណាម គឺជាក្រុមខ្លាំង ហើយមានកម្រិតល្អជាង កម្ពុជា ឆ្ងាយ។ យ៉ាងណា កម្ពុជា នៅមានការប្រកួតពានរង្វាន់ផ្សេងៗទៀតនៅពេលអនាគត ហើយលោកបានទទូចឱ្យកីឡាករកម្ពុជា ត្រូវបន្តទៅមុខ និងប្រឹងប្រែងឱ្យកាន់តែខ្លាំងថែមទៀត។

គួរបញ្ជាក់ថា បន្ទាប់ពីបរាជ័យក្រោមថ្វីជើង វៀតណាម ២-១ យប់មិញ ក្រុម កម្ពុជា អាយុក្រោម ២៣ ឆ្នាំ បានធ្លាក់ចេញពីពានរង្វាន់ ASEAN U23 Championship ត្រឹមវគ្គក្នុងពូល៕

ក្រុម U23 កម្ពុជា

ប្រែសម្រួល៖ សេម កុសល
ប្រភព៖ Vietnam. VN

The post ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ appeared first on Kampuchea Thmey Daily.

កម្ពុជា និង វៀតណាម អាចនឹងឡើងវគ្គបន្តទាំងពីរ បើ កម្ពុជា ឈ្នះ ហើយ មីយ៉ាន់ម៉ា ចាញ់ ថៃ

chean virakbot — Tue, 22 Jul 2025 01:17:50 +0000

ក្រុមបាល់ទាត់ជម្រើសជាតិ កម្ពុជាអាយុក្រោម ២៣ ឆ្នាំ ត្រូវប្រកួតកាត់សេចក្តីជាមួយ ក្រុម U23 វៀតណាម វេលាម៉ោង៨យប់នេះ ក្នុងពានរង្វាន់ ASEAN U23 Championsip ឆ្នាំ ២០២៥ នៅប្រទេសឥណ្ឌូណេស៊ី។

ក្រុមកម្ពុជា

ឆ្លងកាត់១ប្រកួតដូចគ្នា ក្រុមកម្ពុជានៅមានឱកាសស្តួចស្តើងណាស់ក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីស្មើជាមួយក្រុមឡាវ ១-១។ ចំណែកក្រុម វៀតណាម មានភាគរយខ្ពស់ជាងគេក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីឈ្នះ ឡាវ ៣-០។

ពូល A

ក្រុមកម្ពុជា ត្រូវការឈ្នះ វៀតណាម ដាច់ខាតទើបបានឡើងទៅកាន់វគ្គបន្ត។ ទាំង កម្ពុជា និង វៀតណាម អាចឡើងទាំងពីរក្រុមតែម្តង ប្រសិនបើ ថៃ ឈ្នះ មីយ៉ាន់ម៉ា។ ផ្ទុយទៅវិញ ប្រសិនបើលទ្ធផលត្រឹមស្មើជាមួយ វៀតណាម កម្ពុជាអស់ឱកាសហើយ។

ពូល B

ពេលនេះពូល A ឥណ្ឌូណេស៊ី បានកក់កៅអីឡើងវគ្គពាក់កណ្តាលផ្តាច់ព្រ័ត្រហើយ ខណៈពូល B និង C មិនទាន់មានក្រុមឡើងវគ្គបន្តទេ ប៉ុន្តែ វៀតណាម និង ថៃ មានភាគរយខ្ពស់ជាងគេ។

ពូល C

ចំណែកក្រុមលេ២ល្អបំផុត ពេលនេះ ហ្វីលីពីន មាន ៣ ពិន្ទុ ច្រើនជាង មីយ៉ាន់ម៉ា និង កម្ពុជា ដែលមាន ១ពិន្ទដូចគ្នា។

រហូតដល់ពេលនេះ ម៉ាឡេស៊ី ទីម័រខាងកើត ព្រុយណេ និង ឡាវ បានធ្លាក់ហើយ។

អត្ថបទ៖ វីរបុត្រ

The post កម្ពុជា និង វៀតណាម អាចនឹងឡើងវគ្គបន្តទាំងពីរ បើ កម្ពុជា ឈ្នះ ហើយ មីយ៉ាន់ម៉ា ចាញ់ ថៃ appeared first on Kampuchea Thmey Daily.

អ្នកគាំទ្រកំពុងពេញចិត្ត ខ្សែបម្រើ ៣ នាក់នៅក្រុម U23 កម្ពុជា តែត្រូវបង្កើនខ្សែប្រយុទ្ធ

chean virakbot — Mon, 21 Jul 2025 03:14:26 +0000

អ្នកគាំទ្រកីឡាបាល់ទាត់កម្ពុជា បានពេញចិត្តចំពោះសមត្ថភាពរបស់ខ្សែបម្រើកណ្តាល ៣ នាក់នៅក្នុងក្រុមបាល់ទាត់ជម្រើសជាតិកម្ពុជាអាយុក្រោម ២៣ ឆ្នាំ (U23) ដែលកំពុងក្លាយជាកម្លាំងសំខាន់សម្រាប់ព្រឹត្តិការណ៍អន្តរជាតិ ៣ ក្នុងឆ្នាំ ២០២៥។

ក្រុម U23 កម្ពុជា

ជូ ស៊ីនទិ អាយុ ២២ ឆ្នាំ កម្ពស់ ១.៦០ម៉ែត្រ មកពីក្លិប ព្រះខ័នរាជស្វាយរៀង ជាខ្សែបម្រើកណ្តាលដ៏ល្អតាមរយៈបច្ចេកទេស និងស្មារតី បានធ្វើឲ្យរូបគេតែងតែគ្រប់គ្រងបាល់ និងចែកបាល់ឲ្យមិត្តរួមក្រុម។ រូបគេមានបទពិសោធច្រើនទាំងក្នុងកីឡាស៊ីហ្គេម កីឡាបាល់ទាត់អាស៊ាន កីឡាបាល់ទាត់អាស៊ី និងជម្រុះបាល់ទាត់ពិភពលោក។

កីឡាករ ជូ ស៊ីនទិ និងកីឡាករឡាវ (ក្រហម)

ស៊ីន សុវណ្ណមករា អាយុ ២០ ឆ្នាំ កម្ពស់ ១.៧៥ម៉ែត្រ មកពីក្លិបបាល់ទាត់ វិសាខា ជាកម្លាំងបម្រើកណ្តាលដ៏សំខាន់ទាំងនៅក្រុមបាល់ទាត់យុវជនកម្ពុជា និងក្រុមជម្រើសទី១។ រូបគេបានជាប់ជម្រើសជាតិកម្ពុជាក្នុងក្រុមធំតាំងពីឆ្នាំ ២០២១ និងមានបទពិសោធច្រើនសម្រាប់ការបង្ហាញខ្លួនលើឆាកអន្តរជាតិ។

កីឡាករ ស៊ីន សុវណ្ណមករា និងកីឡាករឡាវ

លឹម លោកា អាយុទើប ១៨ ឆ្នាំមកពីក្លិប Auckland United របស់ប្រទេសនូវែលហ្សេឡង់ ពិតជាទទួលបានការកោតសរសើរពីអ្នកគាំទ្រខ្លាំងមែនទែនសម្រាប់ទម្រង់លេងយ៉ាងសកម្មភាពនៅតំបន់បម្រើការពារ លើកបាល់ពីជ្រុង និងចែកបាល់នៅតំបន់កណ្តាល។ រូបគេមិនទាន់ធ្លាប់បានចូលរួមជាមួយក្រុមធំជម្រើសជាតិកម្ពុជាទេ ប៉ុន្តែធ្លាប់បានចូលរួមជាមួយក្រុម U22 និង ក្រុម U18 សម្រាប់ការប្រកួតជម្រុះពានរង្វាន់យុវជនអាស៊ាន និងអាស៊ី។

កីឡាករ លឹម លោកា

កីឡាករទាំង ៣ នាក់នេះ កំពុងជួយក្រុម U23 កម្ពុជា ក្នុងពានយុវជនអាស៊ាន ASEAN U23 Championship នៅប្រទេសឥណ្ឌូណេស៊ី។ ពួកគេក៏នឹងក្លាយជាកម្លាំងមិនអាចខ្វះបានសម្រាប់ការប្រកួតជម្រុះពានយុវជនអាស៊ី 2026 AFC U23 Asian Cup ដែលកម្ពុជាធ្វើម្ចាស់ផ្ទះពូល G ដែលមានអ៉ីរ៉ាក់ អូម៉ង់ និង ប៉ាគីស្ថាន ចាប់ពីថ្ងៃទី ៣ ដល់ទី ៩ ខែកញ្ញា ឆ្នាំ ២០២៥ និងកីឡាស៊ីហ្គេម លើកទី៣៣ នាខែធ្នូ នៅប្រទេសថៃ។

កីឡាករ ហាវ សុខនេត្រ និងកីឡាករឡាវ

ទោះបីជាយ៉ាងណា ការមានខ្សែបម្រើល្អមិនគ្រប់គ្រាន់ទេក្នុងការស្វែងរកជ័យជម្នះលើដៃគូ។ រហូតដល់ពេលនេះ អ្នកគាំទ្រសង្កេតឃើញពីកង្វះខាតនៅតំបន់ប្រយុទ្ធ។ កម្ពុជាមានកីឡាករនៅតំបន់ប្រយុទ្ធច្រើន ប៉ុន្តែមិនទាន់មានកីឡាករណាម្នាក់លេចធ្លោខ្លាំងឡើយ ហើយនៅតំបន់ការពារក៏មិនសូវរឹងមាំដែរ។ កម្ពុជាត្រូវស្វែងរកកីឡាករប្រយុទ្ធតែមានទេពកោសល្យ បច្ចេកទេស និងកាយសម្បទាដើម្បីបង្កើនភាពមុតស្រួចនៅតំបន់ប្រយុទ្ធឲ្យគ្រោះថ្នាក់៕

កីឡាករកម្ពុជាអបអរគ្រាប់បាល់ពេលស៊ុតចូលឡាវ

អត្ថបទ៖ វីរបុត្រ
រូបថត៖ សហព័ន្ធកីឡាបាល់ទាត់កម្ពុជា

The post អ្នកគាំទ្រកំពុងពេញចិត្ត ខ្សែបម្រើ ៣ នាក់នៅក្រុម U23 កម្ពុជា តែត្រូវបង្កើនខ្សែប្រយុទ្ធ appeared first on Kampuchea Thmey Daily.

U23 កម្ពុជា កាន់តែពិបាកឡើងវគ្គ ៤ ក្រុមចុងក្រោយ បន្ទាប់ពីស្មើ ឡាវ យប់មិញ

chean virakbot — Thu, 17 Jul 2025 02:55:09 +0000

ក្រុមបាល់ទាត់ជម្រើសជាតិកម្ពុជា អាយុក្រោម២៣ឆ្នាំ (U23) កាន់តែពិបាកក្នុងការឡើងទៅកាន់វគ្គ ៤ ក្រុមចុងក្រោយ បន្ទាប់ពីបានស្មើ ១-១ ជាមួយ ក្រុម U23 ឡាវ សម្រាប់ការប្រកួតបើកឆាកពូល B ពានរង្វាន់យុវជនអាស៊ាន ASEAN U23 Championship ឆ្នាំ ២០២៥ នៅប្រទេសឥណ្ឌូណេស៊ី។

ការប្រកួតបង្ហាញឲ្យឃើញថា ក្រុមយុវជនកម្ពុជា មានទម្រង់លេងល្អជាង ក្រុមយុវជនឡាវ តាមរយៈការគ្រប់គ្រងបាល់ និងដាក់សម្ពាធឆ្ពោះទៅតំបន់ប្រយុទ្ធបានច្រើនទាំងវគ្គទី១ និងវគ្គទី២។ ខ្សែបម្រើការពារកណ្តាល កីឡាករ ជូ ស៊ីនទិ មកពីក្លិប ព្រះខ័នរាជស្វាយរៀង និងកីឡាករ លឹម លោកា ពិតជាបំពេញតួនាទីបានល្អ រហូតទទួលបានការកោតសរសើរពីអ្នកគាំទ្រយ៉ាងខ្លាំង។

ទោះបីជាយ៉ាងណា នៅតំបន់ការពារធ្វើមិនសូវបានល្អទេដោយខ្វះការប្រយ័ត្នពីការវាយបករបស់ក្រុមយុវជនឡាវ។ អ្វីដែលគួរកែប្រែបំផុតនោះ គឺ នៅតំបន់ប្រយុទ្ធពិតជាខ្វះខាត។ កីឡាករភាគច្រើនព្យាយាមអូសបាល់ម្នាក់ឯង និងស៊ុតពីចម្ងាយតែម្តង។ ពេលមានឱកាសល្អ ដោយមានមិត្តរួមក្រុមនៅស្លាបឆ្វេង ឬ ស្តាំហើយ ប៉ុន្តែកីឡាករនៅតែមិនបោះបាល់ឲ្យថែមទៀត។ ជារួមនៅពេលមើលឃើញដៃគូមានកម្រិតទាបជាង ធ្វើឲ្យយុវជនកម្ពុជាហាក់ដូចជាព្យាយាមលេងបាល់ម្នាក់ឯង និងស៊ុតខ្លួនឯងច្រើនជាងការបញ្ជូនទៅមិត្តរួមក្រុម។

ឡាវ បានបើកការនាំមុខ ១-០ នៅនាទី ១៨ ដោយកីឡាករ Phousomboun Panyavong ប៉ុន្តែដើមវគ្គទី២ នៅនាទី ៥៧ កីឡាករ ផាត់ សុខា បានស៊ុតចូលតាមស្មើ ១-១ ដែលរក្សារហូតចប់ការប្រកួត។ កីឡាករ ផាត់ សុខា ត្រូវបានជ្រើសរើសជាកីឡាករល្អប្រចាំការប្រកួត។

ជាមួយគ្នានេះ ខ្សែបម្រើ លឹម លោកា ត្រូវបានជ្រើសរើសជាកីឡាករសកកម្មជាងគេប្រចាំការប្រកួត។

តាមរយៈលទ្ធផលនេះ ក្រុម កម្ពុជា និង ឡាវ កាន់តែពិបាកក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រ ពីព្រោះការប្រកួតបន្ទាប់ ឡាវ ប៉ះ វៀតណាម នៅថ្ងៃទី១៩ ខែកក្កដា ហើយកម្ពុជា ប៉ះ វៀតណាម នៅថ្ងៃទី ២២ ខែកក្កដា។ ទាំង កម្ពុជា និង ឡាវ សុទ្ធតែជាក្រុមដែលពិបាកយកឈ្នះ វៀតណាម ដូច្នេះឱកាសប្រជែងយកចំណាត់ថ្នាក់លេខ ១ ក្នុងពូល B ពិតជាពិបាកខ្លាំង។

ក្រុមទាំងពីរដាច់ខាត ត្រូវឈ្នះ វៀតណាម ទើបអាចឡើងទៅវគ្គបន្ត ប៉ុន្តែប្រសិនបើស្មើជាមួយ វៀតណាម គឺស្ទើរអស់ឱកាស ពីព្រោះក្រុមលេខ ១ នៃពូលទាំង ៣ ចំនួន ៣ ក្រុម និងក្រុមលេខ ២ ល្អបំផុត ក្នុងចំណោមពូលទាំង ៣ ចំនួន ១ ក្រុម បានឡើងទៅវគ្គ ៤ ក្រុមចុងក្រោយ។ ដូច្នេះតំណែង ក្រុមលេខ ២ ល្អបំផុត គឺពិតជាពិបាកសម្រាប់ កម្ពុជា និង ឡាវ បើប្រៀបធៀបនឹងពីរពូលផ្សេងទៀត។

ពូល A

ឥណ្ឌូណេស៊ី មាន ៣ ពិន្ទុ
ហ្វីលីពិន មាន ៣ ពិន្ទុ
ម៉ាឡេស៊ី មាន ០ ពិន្ទុ
ព្រុយណេ មាន ០ ពិន្ទុ

ពូល C

ឡាវ មាន ១ ពិន្ទុ
កម្ពុជា មាន ១ ពិន្ទុ
វៀតណាម (មិនទាន់ប្រកួត)

ពូល C

មីយ៉ាន់ម៉ា មាន ១ ពិន្ទុ
ទីម័រខាងកើត មាន ១ ពិន្ទុ
ថៃ (មិនទាន់ប្រកួត)

អត្ថបទ៖ វីរបុត្រ

The post U23 កម្ពុជា កាន់តែពិបាកឡើងវគ្គ ៤ ក្រុមចុងក្រោយ បន្ទាប់ពីស្មើ ឡាវ យប់មិញ appeared first on Kampuchea Thmey Daily.

ល្ងាចនេះ កម្ពុជា ប៉ះ ឡាវ ជាក្រុមល្អមានកីឡាករ ៣ នាក់លេងនៅក្រៅប្រទេស

chean virakbot — Wed, 16 Jul 2025 00:05:00 +0000

ក្រុមបាល់ទាត់ជម្រើសជាតិ កម្ពុជា អាយុក្រោម ២៣ ឆ្នាំ (U23) បើកឆាកពានរង្វាន់យុវជនអាស៊ាន ASEAN U23 Championship វេលាម៉ោង ៥ ល្ងាចនេះ ប៉ះ ក្រុមជម្រើសជាតិ ឡាវ នៅប្រទេសឥណ្ឌូណេស៊ី។

សម្រាប់ការចូលរួមប្រកួតពានរង្វាន់យុវជនអាស៊ាន ឆ្នាំ ២០២៥ កម្ពុជា អវត្តមានកីឡាករសំខាន់ៗជាច្រើនពីក្លិប ភ្នំពេញក្រោន និង ព្រះខ័នរាជស្វាយរៀង ដោយសារក្រុមទាំងពីរកំពុងត្រៀមខ្លួនបើករដូវកាលថ្មី ដែលត្រូវប្រកួតពានខេមបូឌានស៊ុបភើខាប់ នៅដើមខែសីហា។

ទោះបីជាយ៉ាងណា កម្ពុជា ក៏មានកីឡាកល្អដែលមានបទពិសោធច្រើនចូលរូមដែរដូចជា អ្នកចាំទី រ៉េត លីហេង មកពីក្លិប ណាហ្គាវើលដ៍។ នៅតំបន់ការពារមាន ឡេង ណូរ៉ា មកពីក្លិប វិសាខា និង សំអុល ទីណា មកពីក្លិប អាយអេសអាយ ដង្កោសែនជ័យ និង ផាត់ សុខា មកពីក្លិបណាហ្គាវើលដ៍។

នៅតំបន់បម្រើ កម្ពុជាមាន ជូ ស៊ីនទិ មកពីក្លិប ព្រះខ័នរាជស្វាយរៀង, ស៊ិន សុវណ្ណមករា មកពីក្លិប វិសាខា និង លឹម លោកាថុង មកពីក្លិប Auckland United ប្រទេសនូវែលហ្សេឡង់។ ចំពោះតំបន់ប្រយុទ្ធមានកីឡាករ ហាវ សុខនេត្រ មកពីក្លិប អាយអេសអាយ ដង្កោសែនជ័យ។ កីឡាករទាំងនេះភាគសុទ្ធតែបានលេងច្រើននៅក្នុងលីគកំពូលកម្ពុជា។

បើនិយាយពី ឡាវ វិញពិតជាមិនធម្មតាដោយពួកគេភាគច្រើនជាកីឡាករជម្រើសជាតិឡាវ បើទោះបីជាអាយុទើប ២៣ ឆ្នាំ។ អ្វីដែលគួរឲ្យចាប់អារម្មណ៍នោះ ពួកគេមានកីឡាករ ៣ នាក់លេងនៅក្រៅប្រទេស។ កីឡាករ Sayfon Keohanan មកពីក្លិប Suphanburi ប្រទេសថៃ លេងក្នុងតំណែងបម្រើប្រយុទ្ធ។ កីឡាករ Damoth Thongkhamsavath ជាខ្សែបម្រើ មកពីក្លិប DA Thanh Hao ប្រទេសវៀតណាម និងកីឡាករ Khonesavanh Keonuchanh ជាខ្សែបម្រើ មកពីក្លិប Rome City Institute ប្រទេសអ៉ីតាលី។ ខ្សែបម្រើទាំង ៣ នាក់នេះជាកម្លាំងសម្រាប់ U23 ឡាវ ដែលជួយដល់កម្លាំងប្រយុទ្ធដ៏គ្រោះថ្នាក់ Peter Phanthavong អាយុ ១៩ ឆ្នាំ ដែលកំពុងល្អនៅជម្រើសជាតិឡាវ។

កីឡាករ Damoth Thongkhamsavath

ក្រឡេកមើលប្រវត្តិប៉ះគ្នា ក្រុម U23 កម្ពុជា និង ឡាវ ធ្លាប់ជួបគ្នា ៤ លើក ក្នុងនោះ កម្ពុជា ឈ្នះ ២ លើក ខណៈ ឡាវ ឈ្នះ ២ លើក។

ឈ្នះ ២-០ ក្នុងស៊ីហ្គេម ឆ្នាំ១៩៧១
ចាញ់ ឡាវ ០-២ ក្នុងស៊ីហ្គេម ឆ្នាំ២០០១
ឈ្នះ ឡាវ ៤-១ ក្នុងស៊ីហ្គេម ឆ្នាំ ២០២១
ចាញ់ឡាវ ០-៣ ក្នុងពាន AFF U23 Championship ឆ្នាំ ២០០៥

សូមបញ្ជាក់ថា កម្ពុជា ស្ថិតនៅពូល ពូល B ជាមួយ វៀតណាម និង ឡាវ ខណៈពូល A មានម្ចាស់ផ្ទះ ឥណ្ឌូណេស៊ី ម៉ាឡេស៊ី ហ្វីលីពីន និងព្រុយណេ ហើយពូល C មាន ថៃ មីយ៉ាន់ម៉ា និង ទីម័រខាងកើត។

ក្រុមលេខ ១ នៃពូលទាំង ៣ និងក្រុមលេខ ២ ល្អបំផុត ១ ត្រូវឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីចប់វគ្គសន្សំពិន្ទុក្នុងពូល៕

អត្ថបទ៖ វីរបុត្រ

The post ល្ងាចនេះ កម្ពុជា ប៉ះ ឡាវ ជាក្រុមល្អមានកីឡាករ ៣ នាក់លេងនៅក្រៅប្រទេស appeared first on Kampuchea Thmey Daily.

ក្រុម U22 កម្ពុជា មានព្រឹត្តិការណ៍ប្រកួតអន្តរជាតិសំខាន់ ៣ ចាប់ពីសប្តាហ៍ក្រោយទៅ

chean virakbot — Mon, 07 Jul 2025 09:00:22 +0000

ក្រុមបាល់ទាត់ជម្រើសជាតិកម្ពុជាអាយុក្រោម ២២ ឆ្នាំ មានព្រឹត្តិការណ៍ប្រកួតអន្តរជាតិចំនួន ៣ ផ្សេងគ្នា ពីថ្ងៃទី១៦ ខែកក្កដា ឆ្នាំ២០២៥ ទៅដែលលោក Koji Gyotoku ក្នុងនាមជាគ្រូបង្គោល បានយកចិត្តទុកដាក់ខ្លាំងជាងក្រុមជម្រើសជាតិដៃទី១។

លោក Koji Gyotoku

ទី១ ពួកគេនឹងធ្វើដំណើរទៅប្រទេសវៀតណាម ដើម្បីប្រកួតពានរង្វាន់យុវជនអាស៊ានអាយុក្រោម ២៣ ឆ្នាំ (ASEAN U23 Championship) ដោយប្រកួតទី១ ប៉ះក្រុម U23 ឡាវ នៅថ្ងៃទី១៦ ខែកក្កដា និងប្រកួតទី២ ជួប U23 វៀតណាម នៅថ្ងៃទី២២ ខែកក្កដា សម្រាប់ការប្រកួតសន្សំពិន្ទុពូល B។

ទី២ ក្រុមម្ចាស់ផ្ទះ U23 កម្ពុជាទទួលធ្វើម្ចាស់រៀបចំការប្រកួតជម្រុះជើងឯកយុវជនអាស៊ី អាយុក្រោម ២៣ ឆ្នាំ (2026 AFC U-23 Asian Cup) នៅខែកញ្ញាសម្រាប់ពូល G។ ការប្រកួតទី១ ក្រុមកម្ពុជា ប៉ះ អូម៉ង់ ថ្ងៃទី៣ កញ្ញា, ប្រកួតទី២ ប៉ះប៉ាគីស្ថាន ថ្ងៃទី៦ កញ្ញា និងប្រកួតទី៣ ប៉ះ អ៉ីរ៉ាក់ ថ្ងៃទី៩ កញ្ញា។

ក្រុម U22 កម្ពុជា កាលពីឆ្នាំ២០២៤

ទី៣ ក្រុម U22 កម្ពុជា នឹងធ្វើដំណើរទៅប្រទេសថៃ ដើម្បីប្រកួតក្នុងព្រឹត្តិការណ៍កីឡាស៊ីហ្គេម លើកទី៣៣ ឆ្នាំ២០២៥ ដែលប្រទេសថៃធ្វើជាម្ចាស់ផ្ទះ។

ពានយុវជនអាស៊ានអាយុ២៣ឆ្នាំ (ASEAN U23 Championship) ឆ្នាំ២០២៥ នៅប្រទេសវៀតណាម

កម្ពុជា vs ឡាវ (ថ្ងៃទី១៦ កក្កដា ២០២៥)
កម្ពុជា vs វៀតណាម (ថ្ងៃទី២២ កក្កដា ២០២៥)

ព្រឹត្តិការណ៍ជម្រុះពានយុវជនអាស៊ី 2026 AFC U-23 Asian Cup នៅប្រទេស កម្ពុជា

កម្ពុជា vs អូម៉ង់ (ទី៣ កញ្ញា ២០២៥)
កម្ពុជា vs ប៉ាគីស្ថាន (ទី៦ កញ្ញា ២០២៥)
កម្ពុជា vs អ៉ីរ៉ាក់ (ទី៩ កញ្ញា ២០២៥)

ព្រឹត្តិការណ៍កីឡាស៊ីហ្គេម វិញ្ញាសាបាល់ទាត់អាយុ ២២ ឆ្នាំ

ព្រឹត្តិការណ៍កីឡាស៊ីហ្គេម លើកទី ៣៣ ខែធ្នូ ឆ្នាំ២០២៥ នៅប្រទេសថៃ ក្រុមបាល់ទាត់អាយុក្រោម ២២ ឆ្នាំទាំង ១១ប្រទេសចូលរួមប្រកួតគឺម្ចាស់ផ្ទះ ថៃ ឥណ្ឌូណេស៊ី វៀតណាម ទីម័រខាងកើត ហ្វីលីពីន ឡាវ សិង្ហបុរី ព្រុយណេ មីយ៉ាន់ម៉ា ម៉ាឡេស៊ី និង កម្ពុជា ប៉ុន្តែមិនទាន់ចាប់ឆ្នោតជ្រើសរើសពូលទេ៕

បញ្ជីឈ្មោះក្រុម U23 កម្ពុជា

អត្ថបទ៖ វីរបុត្រ

The post ក្រុម U22 កម្ពុជា មានព្រឹត្តិការណ៍ប្រកួតអន្តរជាតិសំខាន់ ៣ ចាប់ពីសប្តាហ៍ក្រោយទៅ appeared first on Kampuchea Thmey Daily.

លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship

chean virakbot — Fri, 30 May 2025 02:48:53 +0000

ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ស្ថិតនៅក្នុងពូល B សម្រាប់ការប្រកួតជើងឯកយុវជនអាស៊ានអាយុក្រោម២៣ឆ្នាំ ASEAN U23 Championship ឆ្នាំ២០២៥ នៅប្រទេសឥណ្ឌូណេស៊ី។

ក្រុម U23 កម្ពុជា ស្ថិតនៅពូល B ជាមួយ ក្រុមខ្លាំង វៀតណាម និង ឡាវ ខណៈពូល A មានម្ចាស់ផ្ទះឥណ្ឌូណេស៊ី ម៉ាឡេស៊ី ហ្វីលីពីន និង ព្រុយណេ ហើយពូល C មានក្រុមខ្លាំង ថៃ មីយ៉ាន់ម៉ា និង ទីម័រខាងកើត។

រូបមន្តនៃការប្រកួតគឺ ក្រោយចប់វគ្គសន្សំពិន្ទុក្នុងពូល ក្រុមលេខ១នៃពូលទាំង៣ និងក្រុមលេខ២ល្អបំផុត១ក្រុម នឹងឡើងទៅកាន់វគ្គពាក់កណ្តាលផ្តាច់ព្រ័ត្រ។ រូបមន្តនេះក្រុមយុវជនកម្ពុជាបានខកចិត្តច្រើនលើកមកហើយ។

ការប្រកួត ASEAN U23 Championship ចាប់ពីថ្ងៃទី១៥ ដល់ទី៣១ ខែកក្កដា ឆ្នាំ២០២៥ នៅប្រទេសឥណ្ឌូណេស៊ី។ កាលពីឆ្នាំ២០២៣ ក្រុមវៀតណាមជាម្ចាស់ជើងឯក។

ពានរង្វាន់នេះ ក្រុមកម្ពុជាធ្លាប់ទទួលបានចំណាត់ថ្នាក់លេខ៤ម្តងកាលពីឆ្នាំ២០២១ជាពេលដែលកម្ពុជាទទួលធ្វើម្ចាស់ផ្ទះលើកទី២៕

អត្ថបទ៖ វីរបុត្រ

The post លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship appeared first on Kampuchea Thmey Daily.

ASEAN U23 Championship Archives - Kampuchea Thmey Daily

ក្រុមបាល់ទាត់ U23 ថៃ បានចាញ់ ឥណ្ឌូណេស៊ី ៤ លើក​ជាប់​គ្នា

ការ​ចាញ់យប់មិញ គ្រូ Koji មិនភ្ញាក់ផ្អើល​ ដោយចាត់ទុក វៀតណាម ល្អជាង កម្ពុជា ឆ្ងាយ

កម្ពុជា និង វៀតណាម អាច​នឹង​ឡើង​វគ្គ​បន្ត​ទាំង​ពីរ បើ កម្ពុជា ឈ្នះ ហើយ មីយ៉ាន់ម៉ា ចាញ់ ថៃ

អ្នក​គាំទ្រ​កំពុង​ពេញ​ចិត្ត ខ្សែ​បម្រើ ៣ នាក់​នៅ​ក្រុម​ U23 កម្ពុជា តែ​ត្រូវ​បង្កើន​ខ្សែ​ប្រយុទ្ធ​

U23 កម្ពុជា កាន់​តែ​ពិបាក​ឡើង​វគ្គ​ ៤ ក្រុមចុង​​ក្រោយ បន្ទាប់​ពី​ស្មើ ឡាវ យប់​មិញ

ល្ងាច​នេះ កម្ពុជា ប៉ះ ឡាវ ជា​ក្រុមល្អ​មាន​កីឡាករ​​ ៣ នាក់​​លេង​នៅ​ក្រៅ​​ប្រទេស

ក្រុម U22 កម្ពុជា ​មាន​ព្រឹត្តិការណ៍​ប្រកួត​អន្តរជាតិ​សំខាន់ ៣ ចាប់​ពីសប្តាហ៍​ក្រោយទៅ

លទ្ធផល​ចាប់​ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship

ក្រុមបាល់ទាត់ U23 ថៃ បានចាញ់ ឥណ្ឌូណេស៊ី ៤ លើកជាប់គ្នា

ការចាញ់យប់មិញ គ្រូ Koji មិនភ្ញាក់ផ្អើល ដោយចាត់ទុក វៀតណាម ល្អជាង កម្ពុជា ឆ្ងាយ

កម្ពុជា និង វៀតណាម អាចនឹងឡើងវគ្គបន្តទាំងពីរ បើ កម្ពុជា ឈ្នះ ហើយ មីយ៉ាន់ម៉ា ចាញ់ ថៃ

អ្នកគាំទ្រកំពុងពេញចិត្ត ខ្សែបម្រើ ៣ នាក់នៅក្រុម U23 កម្ពុជា តែត្រូវបង្កើនខ្សែប្រយុទ្ធ

U23 កម្ពុជា កាន់តែពិបាកឡើងវគ្គ ៤ ក្រុមចុងក្រោយ បន្ទាប់ពីស្មើ ឡាវ យប់មិញ

ល្ងាចនេះ កម្ពុជា ប៉ះ ឡាវ ជាក្រុមល្អមានកីឡាករ ៣ នាក់លេងនៅក្រៅប្រទេស

ក្រុម U22 កម្ពុជា មានព្រឹត្តិការណ៍ប្រកួតអន្តរជាតិសំខាន់ ៣ ចាប់ពីសប្តាហ៍ក្រោយទៅ

លទ្ធផលចាប់ឆ្នោត ក្រុម U23 កម្ពុជា ប៉ះ វៀតណាម និង ឡាវ ពាន ASEAN U23 Championship