FIFA World Cup 2022 Archives - Kampuchea Thmey Daily

៣ប្រកួតនេះ មានមើលផ្ទាល់ចាប់ពី៥ម៉ឺននាក់ឡើង សម្រាប់ការប្រកួតបាល់ទាត់ នៅកម្ពុជា

chean virakbot — Fri, 16 May 2025 02:39:37 +0000

រហូតមកដល់ពេលនេះ មានការប្រកួតបាល់ទាត់អន្តរជាតិចំនួន៣នៅក្នុងប្រទេសកម្ពុជាដែលមានអ្នកទស្សនាផ្ទាល់ចាប់ពី៥ម៉ឺននាក់ឡើង ក្នុងនោះការប្រកួតរបស់ក្រុមបាល់ទាត់ជម្រើសជាតិកម្ពុជាពីរ និងការប្រកួតរបស់ក្លិបមួយ។

ទី១ កម្ពុជា និង សិង្ហបុរី

អ្នកទស្សនាផ្ទាល់ពេញពហុកីឡដ្ឋានជាតិអូឡាំពិក (រូបថត gettyimages)

ក្រុមបាល់ទាត់ជម្រើសជាតិកម្ពុជា បានចាញ់ ក្រុមជម្រើសជាតិសិង្ហបុរី ដោយលទ្ធផល ០-៤ នៅវគ្គជម្រុះសន្សំពិន្ទុក្នុងពូល ជុំទី២ ជើងឯកពិភពលោក ឆ្នាំ២០១៨ នៅពហុកីឡដ្ឋានជាតិអូឡាំពិក កាលពីថ្ងៃទី១១ ខែមិថុនា ឆ្នាំ២០១៥ មានអ្នកគាំទ្រចូលទស្សនាផ្ទាល់ច្រើនបំផុតរហូត ៦៣,០០០ នាក់។ នេះជាចំនួនដែលមានអ្នកគាំទ្រទស្សនាផ្ទាល់ច្រើនបំផុតក្នុងប្រវត្តិសាស្ត្របាល់ទាត់កម្ពុជា។

ទី២ កម្ពុជា និង អាហ្វាហ្គានីស្ថាន

បន្ទាប់មក ការប្រកួតជម្រុះសន្សំពិន្ទុក្នុងពូល ជុំទី២ ជើងឯកពិភពលោក ឆ្នាំ២០១៨ ដដែល កម្ពុជា បានចាញ់ អាហ្វហ្គានីស្ថាន ដោយលទ្ធផល ០-១ នៅពហុកីឡដ្ឋានជាតិអូឡាំពិក កាលពីថ្ងៃទី១៦ ខែមិថុនា ឆ្នាំ២០១៥ មានអ្នកទស្សនាផ្ទាល់ចំនួន ៥៥,០០០ នាក់។

ទី៣ ព្រះខ័នរាជស្វាយរៀង និង FK Arkadag

ក្លិបបាល់ទាត់តំណាងកម្ពុជា ព្រះខ័នរាជស្វាយរៀង បានចាញ់ក្រុមរបស់ប្រទេសតួកមេនីស្ថាន FK Arkdag ដោយលទ្ធផល ១-២ ក្នុងវគ្គផ្តាច់ព្រ័ត្រ ពានរង្វាន់ AFC Challenge League កាលពីថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានជាតិ មរតកតេជោ មានអ្នកទស្សនាផ្ទាល់ចំនួន ៥១,៦១០នាក់។ វាជាកំណត់ត្រាដំបូងនៅលើទឹកដីកម្ពុជាដែលមានអ្នកទស្សនាផ្ទាល់ច្រើនបំផុតរហូតដល់ជាង៥ម៉ឺននាក់សម្រាប់ការប្រកួតរបស់ក្លិប។

សូមបញ្ជាក់ថា មានការប្រកួតអន្តរជាតិរបស់ក្រុមបាល់ទាត់ជម្រើសជាតិកម្ពុជាជាច្រើនទៀតដែលធ្វើនៅពហុកីឡដ្ឋានជាតិអូឡាំពិកមានអ្នកទស្សនាផ្ទាល់ច្រើនរាប់ម៉ឺននាក់ ដូចជា ពេលកម្ពុជា ចាញ់ ស៊ីរី ០-៦ ជម្រុះជើងឯកពិភពលោកឆ្នាំ២០១៨ ជុំទី២ កាលពីថ្ងៃទី៨ ខែកញ្ញា ឆ្នាំ២០១៥ មានអ្នកទស្សនាផ្ទាល់ចំនួន ៣៥,០០០នាក់។ កម្ពុជា ចាញ់ ជប៉ុន ០-២ ជម្រុះជើងឯកពិភពលោកឆ្នាំ២០១៨ ជុំទី២ កាលពីថ្ងៃទី២៤ ខែមីនា ឆ្នាំ២០១៦ មានអ្នកទស្សនាផ្ទាល់ចំនួន២៩,០០០នាក់។

កម្ពុជា ស្មើ ហុងកុង ១-១ នៅពហុកីឡដ្ឋានជាតិអូឡាំពិក ជម្រុះជើងឯកពិភពលោក ឆ្នាំ២០២២ កាលពីថ្ងៃទី៥ ខែកញ្ញា ឆ្នាំ២០១៩ មានអ្នកទស្សនាផ្ទាល់ ៤៥,៥០០នាក់។ កម្ពុជា ចាញ់ បារ៉ែន ០-១ នៅពហុកីឡដ្ឋានជាតិអូឡាំពិក ជម្រុះជើងឯកពិភពលោក ឆ្នាំ២០២២ កាលពីថ្ងៃ ទី១០ ខែកញ្ញា ឆ្នាំ២០១៩ មានអ្នកទស្សនាផ្ទាល់ ៤៥,០០០នាក់។ កម្ពុជា ចាញ់ អ៉ីរ៉ង់ ០-៤ នៅពហុកីឡដ្ឋានជាតិអូឡាំពិក ជម្រុះជើងឯកពិភពលោក ឆ្នាំ២០២២ កាលពីថ្ងៃ ទី១៥ ខែតុលា ឆ្នាំ២០១៩ មានអ្នកទស្សនាផ្ទាល់ ៤៨,២៥៨នាក់៕

អត្ថបទ៖ វីរបុត្រ

The post ៣ប្រកួតនេះ មានមើលផ្ទាល់ចាប់ពី៥ម៉ឺននាក់ឡើង សម្រាប់ការប្រកួតបាល់ទាត់ នៅកម្ពុជា appeared first on Kampuchea Thmey Daily.

កាតារបើកការប្រកួត AFC Asian Cup យប់មិញជាប្រទេសធ្វើម្ចាស់ផ្ទះច្រើនជាងគេ

Pha Rothana — Sat, 13 Jan 2024 02:01:48 +0000

ក្រុមបាល់ទាត់ជម្រើសជាតិកាតារបានយកឈ្នះក្រុមជម្រើសជាតិលីបង់ដោយលទ្ធផល ៣-០ សម្រាប់ការប្រកួតបើកឆាកជើងឯកទ្វីបអាស៊ី AFC Asian Cup លើកទី១៨ ឆ្នាំ២០២៣ លើកមកដើមឆ្នាំ២០២៤ ដែលកាតារទទួលធ្វើម្ចាស់ផ្ទះច្រើនជាងគេក្នុងប្រវត្តិសាស្ត្រ។

គិតចាប់តាំងពីឆ្នាំ១៩៥៦ ជើងឯកទ្វីបអាស៊ី AFC Asian Cup ត្រូវបានបង្កើតឡើង ក្នុងនោះប្រទេសកាតារទទួលរៀបចំចំនួន៣ច្រើនលើកដែលច្រើនជាងប្រទេសផ្សេងៗនៅអាស៊ីគឺលើកទី១ឆ្នាំ១៩៨៨ លើកទី២ ឆ្នាំ២០១១ និងលើកទី៣ឆ្នាំ២០២៣ លើកមកដើមឆ្នាំ២០២៤។

ប្រទេសដែលអាចរៀបចំការប្រកួតបានទាល់តែមានហេដ្ឋារចនាសម្ព័ន្ធគ្រប់គ្រាន់ ស្របតាមលក្ខខណ្ឌរបស់សហព័ន្ធកីឡាបាល់ទាត់ពិភពលោក និងសហព័ន្ធបាល់ទាត់ទ្វីបអាស៊ីកំណត់កម្រិតតំបន់និងពិភពលោក។ ជាក់ស្តែងប្រទេសកាតារទើបតែរៀបចំការប្រកួតជើងឯកពិភពលោក World Cup ឆ្នាំ២០២២។

បន្ទាប់ពីប្រទេសកាតារគឺអុីរ៉ងធ្លាប់ទទួលរៀបចំ AFC Asian Cup ២ដងគឺឆ្នាំ១៩៦៨ និងឆ្នាំ១៩៧៦ និងអារ៉ាប់រួម២លើកគឺឆ្នាំ១៩៩៦ និង២០១៩ ក្រៅពីនោះសុទ្ធតែធ្លាប់ធ្វើបានមម្តងដូចគ្នាគឺហុងកុង (១៩៥៦) កូរ៉េខាងត្បូង (១៩៦០) អ៉ីស្រាអែល(១៩៦៤) ថៃ(១៩៧២) គុយវែត(១៩៨០) សិង្ហបុរី(១៩៨៤) ជប៉ុន(១៩៩២) លីបង់(២០០០) ចិន(២០០៤) អូស្ត្រាលី(២០១៥) ខណៈប្រទេសឥណ្ឌូណេស៊ី ថៃ ម៉ាឡេស៊ី និងវៀតណាមធ្វើម្ចាស់ផ្ទះរួមគ្នាក្នុងឆ្នាំ២០០៧។

ក្រុមបាល់ទាត់ជម្រើសជាតិកាតារជាម្ចាស់ជើងឯកពានរង្វាន់ AFC Asian Cup ឆ្នាំ២០១៩ ដោយបានយកឈ្នះក្រុមជម្រើសជាតិជប៉ុន ក្នុងវគ្គផ្ដាច់ព្រ័ត្រ ៣-១ កាលពីថ្ងៃទី១ ខែកុម្ភៈ នៅអារ៉ាប់រួម ធ្វើជាម្ចាស់ផ្ទះ។ ឆ្នាំ២០២៤នេះគឺជាការប្រកួតលើកទី១៨ ដែលប្រទេសកាតារធ្វើម្ចាស់ផ្ទះក្នុងនាមក្រុមការពារដំណែងជើងឯកឆ្នាំចាស់។

ក្រុមជម្រើសជាតិកាតារស្ថិតក្នុងពូល A រួមមានក្រុមជម្រើសជាតិចិន តាជីគីស្ថាន និងលីបង់ ដែលមានសមត្ថភាពប្រហាក់ប្រហែលគ្នា។ ការប្រកួតបើកយប់មិញ ម្ចាស់ផ្ទះកាតាររកបាន៣ពិន្ទុ បន្ទាប់ពីបានយកឈ្នះលីបង់ដោយលទ្ធផល ៣-០៕

អត្ថបទ៖ ផា រតនា

The post កាតារបើកការប្រកួត AFC Asian Cup យប់មិញជាប្រទេសធ្វើម្ចាស់ផ្ទះច្រើនជាងគេ appeared first on Kampuchea Thmey Daily.

លោក Fernando ដាក់ Ronaldo បម្រុងវគ្គ១៦ក្រុម World Cup ជាល្បិចមួយ

Pha Rothana — Fri, 12 Jan 2024 03:58:28 +0000

អតីតគ្រូបង្វឹកក្រុមជម្រើសជាតិព័រទុយហ្គាល់លោក Fernando Santos បានពន្យល់ពីមូលហេតុដែលដាក់តារាបាល់ទាត់ឆ្នើម Cristiano Ronaldo អង្គុយកៅអីបម្រុងក្នុងពេលប្រកួតវគ្គ១៦ក្រុមចុងក្រោយជើងឯកពិភពលោក (World Cup) ២០២២ គឺជាយុទ្ធសាស្ត្រដ៏ត្រឹមត្រូវមួយ។

Ronaldo ស្ថិតនៅកៅអីបម្រុងក្នុងការប្រកួតវគ្គ១៦ក្រុម ចុងក្រោយនៅពេលប៉ះក្រុមជម្រើសជាតិស្វីស។ ពេលនោះអ្នកគាំទ្រមួយចំនួនមិនសប្បាយចិត្ត ចំពោះការសម្រេចរបស់លោក Santos ពីព្រោះជាវគ្គដ៏សំខាន់ដែលចាញ់ធ្លាក់ ឈ្នះឡើង ប៉ុន្តែតែបែរជាមិនដាក់កីឡាករឆ្នើម។ យ៉ាងណា ព័រទុយហ្គាល់បានយកឈ្នះស្វីល ៦-១ ដែលកីឡាករ Goncalo Ramos រកបាន៣គ្រាប់ ខណៈ Ronaldo ត្រូវប្ដូរចូលនៅនាទី៧៣នៅពេលព័រទុយហ្គាល់នាំមុខ ៥-១ ទៅហើយ។

លោក Santos បាននិយាយថា៖ «វាជាការសម្រេចចិត្តខាងយុទ្ធសាស្ត្រ និងបច្ចេកទេស។ វាគ្មានអ្វីផ្សេងទៀតទេ។ ការសម្រេចចិត្តជាយុទ្ធសាស្ត្រ តែងតែជារឿងសំខាន់។ ខ្ញុំត្រូវតែធ្វើការសម្រេចចិត្តបែបនេះ។ ខ្ញុំពិតជាធ្វើបានត្រឹមត្រូវ»។

យោងតាមសម្តីរបស់គ្រូបង្វឹករូបនេះបានបញ្ជាក់ថា ការសម្រេចចិត្តដាក់ Ronaldo នៅកៅអីគឺជាយុទ្ធសាស្រ្តមួយ ដើម្បីឲ្យគូប្រកួតមានការធ្វេសប្រហែស និងមិនសូវមានការប្រុងប្រយ័ត្នខ្ពស់។ នេះហើយទើបធ្វើឲ្យក្រុមព័រទុយហ្គាល់មានលទ្ធភាពរកគ្រាប់បាល់រហូតដល់៦គ្រាប់៕

ប្រែសម្រួល៖ ផា រតនា
ប្រភព៖ Goal

The post លោក Fernando ដាក់ Ronaldo បម្រុងវគ្គ១៦ក្រុម World Cup ជាល្បិចមួយ appeared first on Kampuchea Thmey Daily.

តើអាស៊ានជ្រើសរើសក្រុមបាល់ទាត់ដូចម្តេច បើធ្វើម្ចាស់ផ្ទះ World Cup 2034?

chean virakbot — Tue, 05 Sep 2023 23:30:31 +0000

បណ្តាប្រទេសអាស៊ីអាគ្នេយ៍ (អាស៊ាន) បានពិភាក្សាពីផែនការដេញថ្លៃធ្វើម្ចាស់ផ្ទះរៀបចំការប្រកួតបាល់ទាត់ជើងឯកពិភពលោក ឆ្នាំ២០៣៤ (FIFA World Cup 2034)។ នេះបើតាមការឲ្យដឹងពីលោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា។

លោក វ៉ាត់ ចំរើន បានផ្តល់បទសម្ភាសដល់សារព័ត៌មាន«កម្ពុជាថ្មី»ថា នៅក្នុងកិច្ចប្រជុំថ្នាក់រដ្ឋមន្ត្រីកីឡាអាស៊ាននៅទីក្រុងឈៀងម៉ៃ ប្រទេសថៃកាលពីសប្តាហ៍មុននេះ ថ្នាក់ដឹកនាំអាស៊ានបានឯកភាពគ្នាជំរុញ និងដាក់ចេញផែនការដើម្បីដេញថ្លៃរៀបចំការប្រកួតជើងឯកពិភពលោកឆ្នាំ២០៣៤។

គោលការណ៍របស់អាស៊ាន ចាប់ពីថ្នាក់ដឹកនាំកំពូលរហូតដល់ថ្នាក់ដឹកនាំរដ្ឋមន្ត្រីកីឡា បានជំរុញលើកិច្ចការនេះ។ អាស៊ាននៅក្នុងសវត្ស៍ទី២១បានជំរុញសេដ្ឋកិច្ច និងការលូតលាស់គួរឲ្យកត់សំគាល់ខ្លាំង ដូច្នេះហើយបានជាដាក់ចេញយុទ្ធសាស្ត្រក្នុងការដេញថ្លៃរៀបចំការប្រកួតជើងឯកពិភពលោកឆ្នាំ២០៣៤។ នេះគឺជាយុទ្ធសាស្ត្រមួយក្នុងការស្វែងរកឧត្តមភាព និងសក្តានុពលរបស់អាស៊ាន ក៏ដូចជាភូមិសាស្ត្រនយោបាយក្នុងតំបន់។

លោក វ៉ាត់ ចំរើន បានលើកឡើងថា ៖«ផែនការនេះ យើងមិនគិតពីរឿងឈ្នះ ចាញ់ ឬបានធ្វើជាម្ចាស់ផ្ទះ ឬមិនបានទេ ប៉ុន្តែអ្វីដែលយើងធ្វើគឺត្រូវតែជំរុញ និងត្រូវរៀបចំឲ្យបានល្អដើម្បីដេញថ្លៃ។ ទោះបីជាយ៉ាងណា ក្នុងលក្ខខណ្ឌសេដ្ឋកិច្ច និងនយោបាយរបស់ប្រទេសអាស៊ានទាំង១០មានសេដ្ឋកិច្ចទាប មធ្យម និងខ្ពស់ ដូច្នេះក៏ជាបញ្ហាប្រឈមសម្រាប់បេក្ខភាពអាស៊ានដើម្បីដេញថ្លៃ»។

ជាពិសេសទៀតនោះ បេក្ខភាពដេញថ្លៃមិនមែនមានតែអាស៊ានមួយនោះទេ ប៉ុន្តែមានប្រទេសធំៗដូចជា ចិន អូស្ត្រាលីរួមជាមួយនូវេសេឡុង និងអារ៉ាប៊ីសាអ៊ូឌីត ប្រទេសធំនេះជាឧបសគ្គធំសម្រាប់អាស៊ាន។

ជាងនេះទៀតនោះ គ្រប់ប្រទេសអាស៊ានទាំងអស់ក៏មិនប្រាកដសុទ្ធតែអាចរៀបចំការប្រកួត ឬរៀបចំពិធីបើក-បិទបានដែរ។ ចំណុចនេះគឺជាកិច្ចការផ្ទៃក្នុងរបស់អាស៊ានដើម្បីពិនិត្យមើលលក្ខណៈសម្បត្តិរបស់ប្រទេសសមាជិកនីមួយៗថាតើមានសក្តានុពលអ្វីខ្លះ និងខ្វះខាតអ្វីខ្លះ។ ដើម្បីធ្វើកិច្ចការនេះ អាស៊ានត្រូវបង្កើតក្រុមការងារដែលប្រទេសនីមួយៗមានអ្នកជំនាញមកពីក្រសួងអប់រំ យុវជន និងកីឡា និងតំណាងសហព័ន្ធកីឡាបាល់ទាត់ដើម្បីធ្វើការរួមគ្នា និងបំពេញតាមលក្ខខណ្ឌតម្រូវការ។

លោកអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា ៖«ក្នុងនោះ អាស៊ានបានកត់សំគាល់ឃើញពីសក្តានុពលរបស់កម្ពុជាដែរ ប៉ុន្តែក៏នៅមានចំណុចខ្វះខាត។ ឧទាហរណ៍ យើងមានពហុកីឡដ្ឋានល្អហើយ ប៉ុន្តែពហុកីឡដ្ឋានរបស់យើងមិនអាចរៀបចំពិធីបើក ឬបិទបានទេ បានត្រឹមតែជាកន្លែងសម្រាប់រៀបចំការប្រកួត។ យើងត្រូវពិនិត្យលើហេដ្ឋារចនាសម្ព័ន្ធផ្សេងៗទៀតដូចជា ទីលានប្រកួត ទីលានហ្វឹកហាត់ជាដើមថាតើមានលក្ខណសម្បត្តិស្របតាមស្តង់ដារបស់ FIFA ឬយ៉ាងណា? បើយើងខ្វះខាតអ្វី យើងត្រូវបំពេញឲ្យស្របតាមការណែនាំរបស់អាស៊ាន»។

នៅពេលសួរថា តើជ្រើសរើសក្រុមបាល់ទាត់តំណាងឲ្យអាស៊ានយ៉ាងដូចម្តេច? លោក វ៉ាត់ ចំរើន បានឆ្លើយតបថា ៖«សម្រាប់កិច្ចការនេះ ធម្មតា ប្រព័ន្ធនៃការប្រកួតជម្រុះរបស់ FIFA នៅតែរក្សាដដែល ប៉ុន្តែអាស៊ានជាម្ចាស់ផ្ទះត្រូវយកក្រុមមួយតំណាងឲ្យអាស៊ានទាំងមូល»។

«ការជ្រើសរើសកីឡាករទៅតាមឧត្តមភាព និងបច្ចេកទេសរបស់កីឡាករម្នាក់ៗនៅក្នុងតំបន់អាស៊ាន ដើម្បីជ្រើសរើសក្រុមមួយដ៏ល្អដើម្បីតំណាងឲ្យអាស៊ាន ហើយនេះជាលក្ខខណ្ឌរបស់ FIFA ដែលយើងត្រូវអនុវត្តតាម ក៏ដូចជាប្រទេសជាម្ចាស់ផ្ទះផ្សេងៗទៀតដែលមានសិទ្ធិ និងមានក្រុមតំណាងដូចគ្នា»៕

អត្ថបទ៖ វីរបុត្រ

The post តើអាស៊ានជ្រើសរើសក្រុមបាល់ទាត់ដូចម្តេច បើធ្វើម្ចាស់ផ្ទះ World Cup 2034? appeared first on Kampuchea Thmey Daily.

Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA

Sorn Phanith — Sat, 11 Feb 2023 07:28:14 +0000

មិត្តរួមក្រុម Paris Saint-Germain កីឡាករ Lionel Messi និង Kylian Mbappe ត្រូវបានជ្រើសរើសក្នុងបញ្ជីចុងក្រោយសម្រាប់ពានរង្វាន់កីឡាករល្អបំផុតរបស់ FIFA (The Best FIFA Men’s Player Award) ឆ្នាំ២០២២។ Karim Benzema ខ្សែប្រយុទ្ធជួរមុខរបស់ Real Madrid គឺជាបេក្ខភាពចុងក្រោយផងដែរ។

បញ្ជីសម្រាំងដើមចំនួន ១៤ នាក់ ត្រូវបានកាត់បន្ថយមកត្រឹម ៣ នាក់កាលពីថ្ងៃសុក្រ ដោយមានអ្នកឈ្នះ ២ សម័យកាល Robert Lewandowski ក្នុងចំណោមកីឡាករដែលត្រូវកាត់ចេញពីបញ្ជីនេះ។

អ្នកឈ្នះនឹងត្រូវបានប្រកាសជាផ្លូវការ ហើយពានរង្វាន់របស់គេត្រូវប្រគល់ជូននៅថ្ងៃទី ២៧ ខែកុម្ភៈ នៅឯពិធីប្រគល់ពានរង្វាន់បាល់ទាត់ល្អបំផុតរបស់ FIFA។ ពានរង្វាន់ឆ្នាំ ២០២២ គឺផ្អែកលើការបង្ហាញទម្រង់លេងរបស់កីឡាករនៅចន្លោះថ្ងៃទី ០៨ ខែសីហា ឆ្នាំ ២០២១ ដល់ថ្ងៃទី ១៨ ខែធ្នូ ឆ្នាំ ២០២២ ដែលជាថ្ងៃដែលការប្រកួតវគ្គផ្ដាច់ព្រ័ត្រពានរង្វាន់បាល់ទាត់ពិភពលោក (FIFA World Cup)។ ទាំងប្រធានក្រុមអាហ្សង់ទីន Messi និងតារាឆ្នើមវ័យក្មេងរបស់បារាំង Mbappe បានបញ្ចេញពន្លឺយ៉ាងត្រចះត្រចង់ក្នុងវគ្គផ្តាច់ព្រ័ត្រនោះ។

Mbappe រកបាន ៣ គ្រាប់ដើម្បីឈ្នះស្បែកជើងមាស World Cup ខណៈ Messi រកបាន ២ គ្រាប់នៅវគ្គផ្តាច់ព្រ័ត្រ ខណៈដែលអាហ្សង់ទីនបានយកឈ្នះដោយការស៊ុតបាល់ប៉េណាល់ទីបន្ទាប់ពីស្មើ ៣-៣។

Messi ត្រូវបានគេប្រគល់ពានរង្វាន់ FIFA World Cup Golden Ball ក្រោយចប់វគ្គផ្ដាច់ព្រ័ត្រ ដោយត្រូវបានគេបោះឆ្នោតជាកីឡាករល្អបំផុតប្រចាំការប្រកួត។

Benzema មិនមានវត្តមាននៅកាតា ឆ្នាំ ២០២២ ដោយសាររបួសក្នុងពេលហ្វឹកហាត់ជាមួយបារាំង។ ការដែលគេមានឈ្មោះ គឺផ្អែកលើទម្រង់ជាមួយក្លិបដ៏អស្ចារ្យ នៅក្នុងរដូវកាល ២០២១/២២។ Benzema បានស៊ុតបញ្ចូលទីបាន ៤៤ គ្រាប់ ក្នុង ៤៦ ប្រកួតសម្រាប់ក្រុម Real Madrid ដោយបានជួយក្រុមរបស់គេឱ្យលើកពាន La Liga, UEFA Champions League និង Supercopa de Espana។

ដោយឡែកចំពោះពានរង្វាន់គ្រូបង្វឹកបុរសល្អបំផុតរបស់ FIFA (The Best FIFA Men’s Coach Award) ក៏ជ្រើសរើសបាន ៣ នាក់ ចុងក្រោយដូចគ្នា គឺលោក Pep គ្រូបង្វឹករបស់ក្លិប Manchester City, លោក Carlo Ancelotti គ្រូបង្វឹករបស់ Real Madrid និងលោក Lionel Scaloni គ្រូបង្វឹកជម្រើសជាតិអាហ្សង់ទីន។ អ្វីដែលគួរឱ្យចាប់អារម្មណ៍ ទាំងលោក Ancelotti, Guardiola ឬ Scaloni មិនដែលឈ្នះពានរង្វាន់នេះពីមុនមកទេ។ ជាការពិតណាស់ លោក Guardiola គឺជាមនុស្សតែម្នាក់គត់ក្នុងចំណោមគ្រូទាំងបី ដែលបានឡើងទៅកាន់បញ្ជី ៣ នាក់ចុងក្រោយ ដោយឈរលេខ ៣ កាលពីឆ្នាំមុន និងលេខ ២ ក្នុងឆ្នាំ ២០១៩។

អ្នកចាំទីវិញរួមមាន Yassine Bounou (មារ៉ុក), Thibaut Courtois (បែលហ្ស៊ីក) and Emiliano Martinez (អាហ្សង់ទីន) ស្ថិតក្នុងបញ្ជីអ្នកចាំទីដ៏ល្អបំផុតផងដែរ៕

ប្រភព៖ FIFA.com

អត្ថបទ៖ មន្នីរ័ត្ន

The post Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA appeared first on Kampuchea Thmey Daily.

Messi ទទួលបានការឈរទះដៃស្វាគមន៍ពីមិត្តរួមក្រុម PSG ប៉ុន្តែមិនមានវត្តមាន Mbappe

Kang Tola — Thu, 05 Jan 2023 15:36:20 +0000

Lionel Messi បានទទួលការស្វាគមន៍ពីមិត្តរួមក្រុមនៅពេលរូបគេត្រឡប់មកហ្វឹកហាត់ជាមួយក្លិប Paris Saint-Germain វិញកាលពីថ្ងៃពុធ បន្ទាប់ពីឈ្នះ World Cup ប៉ុន្តែត្រូវបានដឹងថាមិនមានវត្តមាន Kylian Mbappe នោះទេ។

Lionel Messi បានសម្ដែងអរគុណចំពោះមិត្តរួមក្រុម Paris Saint-Germain សម្រាប់ការឈរអមទះដៃជាកិត្តិយសរបស់ពួកគេសម្រាប់ការឈ្នះជើងឯក World Cup ទោះបីជា Kylian Mbappe និង Achraf Hakimi ត្រូវបានអវត្តមានពីក្រុមក៏ដោយ។

Messi គឺជាវីរបុរសក្នុងជ័យជម្នះចុងក្រោយដ៏គួរឲ្យកត់សម្គាល់របស់អាហ្សង់ទីន លើ បារាំង ប៉ុន្តែតារាឆ្នើមរូបនេះត្រូវបានមិត្តរួមក្រុមរបស់គេ Mbappe យកឈ្នះលើការទទួលបានស្បែកជើងមាស ដែលបានស៊ុតបាល់បញ្ចូលទី ៣គ្រាប់យ៉ាងអស្ចារ្យក្នុងព្រឹត្តិការណ៍នៅឯកីឡដ្ឋាន Lusail ដែលអាចត្រូវបានគេចងចាំថាជាការប្រកួតដ៏អស្ចារ្យបំផុតនៃការប្រកួតចុងក្រោយ។

គេត្រូវបានទទួលការស្វាគមន៍ពេលត្រឡប់ទៅហ្វឹកហាត់នៅ PSG កាលពីថ្ងៃពុធ។ Mbappe និងមិត្តរួមក្រុម Hakimi ទាំង ២នាក់ត្រូវបានម្ចាស់ក្លិបលោក Christophe Galtier អនុញ្ញាតឲ្យសម្រាក បន្ទាប់ពីក្រុមកំពូលតារាង Ligue 1 បានបាត់បង់កំណត់ត្រាមិនដែលចាញ់របស់ពួកគេជាមួយនឹងការបរាជ័យទល់នឹង Lens កាលពីសប្ដាហ៍មុន។ ដូច្នេះកីឡាករទាំងពីរមិនមានវត្តមានសម្រាប់ការត្រឡប់មកផ្ទះរបស់ Messi ទេ បើទោះបីជា Ethan ប្អូនប្រុសរបស់ Mbappe បានចូលរួមបន្ទាប់ពីថ្មីៗនេះបានចូលរួមជាមួយក្រុមធំរបស់ PSG ក៏ដោយ។

Messi បានបង្ហោះនៅលើ Instagram កាលពីថ្ងៃពុធដោយសរសេរថា “អរគុណច្រើនចំពោះមិត្តរួមក្រុមរបស់ខ្ញុំ និងមនុស្សទាំងអស់នៃក្លិបសម្រាប់ការស្វាគមន៍ដែលពួកគេបានផ្តល់ឱ្យខ្ញុំ។ យើងត្រលប់មកវិញហើយ ទន្ទឹងរង់ចាំបន្តសម្រេចគោលដៅរបស់យើងសម្រាប់រដូវកាលនេះ ឥឡូវនេះជាមួយ Paris Saint-Germain!”៕

ប្រភព៖ mirror.co.uk

អត្ថបទ៖ មន្នីរ័ត្ន

The post Messi ទទួលបានការឈរទះដៃស្វាគមន៍ពីមិត្តរួមក្រុម PSG ប៉ុន្តែមិនមានវត្តមាន Mbappe appeared first on Kampuchea Thmey Daily.

បន្ទប់ដែល Messi ស្នាក់នៅអំឡុងព្រឹត្តការណ៍ World Cup 2022 នឹងប្រែក្លាយទៅជា សារមន្ទីរ

Sok Sovann — Wed, 28 Dec 2022 07:15:58 +0000

បន្ទប់ដែលកីឡាករ Lionel Messi ស្នាក់នៅ អំឡុងការប្រកួតបាល់ទាត់ពិភពលោកឆ្នាំ២០២២ នៅប្រទេសកាតា គ្រោងប្រែក្លាយទៅជាសារមន្ទីរ បន្ទាប់ពីជោគជ័យរបស់អាហ្សង់ទីនក្នុងព្រឹត្តិការណ៍នេះ។

Messi គឺជាកីឡាករសំខាន់មួយរូប ក្នុងការជួយឲ្យអាហ្សង់ទីន ឈ្នះពាន World Cup ជាលើកដំបូងក្នុងរយៈពេល៣៦ឆ្នាំ ហើយខ្សែប្រយុទ្ធក្លិប PSG រូបនេះ បានជាប់ឈ្មោះជាកីឡាករលេងល្អជាងគេ ប្រចាំ Tournament បន្ទាប់ពីស៊ុតបញ្ចូលទីបាន២គ្រាប់ នៅវគ្គផ្តាច់ព្រ័ត្រ។

ទោះបីជាយ៉ាងណាក៏ដោយ កីឡាករវ័យ៣៥ឆ្នាំរូបនេះ ឈ្នះបានត្រឹមតែស្បែកជើងប្រាក់ប៉ុណ្ណោះ ដោយស៊ុតបាន៧គ្រាប់ ចាញ់ Mbappe មួយគ្រាប់។

ឥឡូវនេះ សមិទ្ធិផលរបស់គាត់ ត្រូវបានគេកំណត់ថាជាអមតៈ ហើយអ្នកសារព័ត៌មាន Achraf Ben Ayad បានសរសេរថា សាកលវិទ្យាល័យកាតា ដែលជាកន្លែង Messi ស្នាក់នៅ នឹងត្រូវប្រែក្លាយទៅជា “សារមន្ទីរខ្នាតតូចមួយ”។

សាកលវិទ្យាល័យកាតា បានចេញផ្សាយរូបថតជាបន្តបន្ទាប់ បង្ហាញពីបន្ទប់ដែលក្រុមជម្រើសជាតិអាហ្សង់ទីនស្នាក់នៅ ហើយនៅក្នុងការបង្ហោះចុងក្រោយ សាកលវិទ្យាល័យនេះបានប្រកាសថា បន្ទប់ B201 ដែលប្រើដោយប្រធានក្រុមជម្រើសជាតិអាហ្សង់ទីន នឹងក្លាយទៅជាសារមន្ទីរ ទោះមិនទាន់មានការបញ្ជាក់ច្បាស់ៗ អំពីពេលវេលាដែលសារមន្ទីរនេះ នឹងបើកចំពោះសាធារណជនក៏ដោយ។

យោងតាមរបាយការណ៍របស់ Daily Mail, ក្រុមដែលដឹកនាំដោយ Messi បានសម្រេចចិត្តស្នាក់នៅក្នុងបរិវេណសាកលវិទ្យាល័យដ៏ធំទូលាយ ជំនួសឲ្យការស្នាក់នៅក្នុងសណ្ឋាគារលំដាប់ផ្កាយ៥ ដូច្នេះពួកគេអាចរៀបចំកម្មវិធីតាមបែបប្រពៃណីរបស់ពួកគេ ដូចជាការសាច់អាំងសាច់គោជាដើម។

គួរបញ្ជាក់ថា អាហ្សង់ទីន បានចាប់ផ្តើមយុទ្ធនាការប្រកួត World Cup ជាមួយបរាជ័យក្រោមថ្វីជើងអារ៉ាប៊ីសាអូឌីត ២-១ យ៉ាងភ្ញាក់ផ្អើលជាទីបំផុត ប៉ុន្តែនៅទីបំផុត ពួកគេបានយកឈ្នះបារាំង ដោយបាល់ប៉េណាល់ទីកាត់សេចក្តី ក្លាយជាម្ចាស់ជើងឯកពិភពលោកឆ្នាំ២០២២៕

ប្រែសម្រួល៖ Vann Vann

ប្រភព៖ Daily Mail, Indian Express

ចុចអាន៖ អាហ្សង់ទីន ចេញវីដេអូបុណ្យណូអែលពិសេសបំផុត អរគុណ Messi

The post បន្ទប់ដែល Messi ស្នាក់នៅអំឡុងព្រឹត្តការណ៍ World Cup 2022 នឹងប្រែក្លាយទៅជា សារមន្ទីរ appeared first on Kampuchea Thmey Daily.

ប្រធានក្រុមព្រុយណេ មិនចង់ទៅផ្ទះដៃទទេ ខណៈប្រធានក្រុមកម្ពុជា ថាចាំបាច់ត្រូវតែឈ្នះ

Sokhom Khon — Wed, 28 Dec 2022 06:43:12 +0000

កម្ពុជា នឹងត្រូវទទួល ព្រុយណេ សម្រាប់ការប្រកួតទី៣ នៃពានរង្វាន់ជើងឯកអាស៊ាន (AFF Mitshubishi Eletric Cup 2022) នៃពហកីឡដ្ឋានជាតិមរតកតេជោ ល្ងាចថ្ងៃទី២៩ ខែធ្នូ ស្អែកនេះ ខណៈមុនការប្រកួតមកដល់ប្រធានក្រុមនៃក្រុមទាំងពីរ បានបង្ហាញពីការតាំងចិត្តរៀងៗខ្លួនដើម្បីរកជ័យជម្នះ។

នៅក្នុងសន្និសីទសារព័ត៌មានមុនការប្រកួតរវាងក្រុមទាំងពីរ ប្រធានក្រុមព្រុយណេ កីឡាករ Mohamad Najib bin Haji Tarif ឡើកឡើងថាមិនចង់ទៅផ្ទះវិញដោយដៃទទេ ខណៈប្រធានក្រុមកម្ពុជា សឿយ វិសាល ថាចាំបាច់ត្រូវតែឈ្នះ។

Najib bin Tarif បាននិយាយដូច្នេះថា៖ «ពិតណាស់ ការប្រកួតថ្ងៃស្អែកនៅតែជាការប្រកួតដ៏សំខាន់សម្រាប់យើង យើងមិនចង់ត្រលប់ទៅផ្ទះដោយដៃទទេនោះទេ យើងនឹងព្យាយាមឱ្យអស់ពីលទ្ធភាពដើម្បីទទួលបានអ្វីខ្លះសម្រាប់ការប្រកួតថ្ងៃស្អែក»។

ដោយឡែក សឿយ វិសាល បានលើកឡើងផងដែរថា៖ «សម្រាប់ការប្រកួតថ្ងៃស្អែកខ្ញុំរីករាយសម្រាប់ការប្រកួតជាមួយនឹងព្រុយណេ ហើយសម្រាប់ការប្រកួតថ្ងៃស្អែកនេះគឺពួកយើងចាំបាច់ខ្លាំងណាស់ក្រុមរបស់ពួកយើងត្រូវការតែជ័យជម្នះ ហើយនៅក្នុងជ័យជម្នះ ក៏ពួកយើងប្រយ័ត្នផងដែរព្រោះថាព្រុយណេគឺជាក្រុមមួយដែលគេលេងដោយឆន្ទៈរបស់ពួកគេ ទោះបីជាគេអស់ឱកាសឡើងទៅវគ្គបន្តក៏ដោយក៏ពួកគេនៅតែប្រឹងប្រែងលេងដោយឆន្ទៈរបស់ពួកគេ ហើយពួកយើងប្រយ័ត្នចំពោះពួកគេខ្លាំងដូចគ្នា ហើយក្រុមរបស់ពួកគេក៏ព្យាយាមរកជ័យជម្នះដើម្បីរកពិន្ទុពីពួកយើងផងដែរ។»

ប្រធានក្រុមរបស់ក្លិបព្រះខ័នរាជស្វាយរៀងរូបនេះក៏បានបន្តទៀតផងដែរថា៖ «ការរកគ្រាប់បាល់ និងការជឿជាក់លើខ្សែបយុទ្ធ គឺយើងជឿជាក់ថានឹងធ្វើបាន ដោយពួកយើងនឹងប្រឹងប្រែងរកនូវចន្លោះខ្វះខាតរបស់ពួកគេ ដើម្បីយើងមានឱកាសទាត់ទីរបស់ពួកគេ។ ចំពោះសម្ពាធ គឺខ្ញុំគិតថាតែងតែមាន ដោយសារក្រុមរបស់គេពេលដែលប្រយុទ្ធច្រើន ពេលខ្លះការវាយបករបស់ពួកគេមួយៗគឺគ្រោះថ្នាក់ អ៊ីចឹងយើងត្រូវតែប្រយ័ត្ននូវចំនុចមួយនេះ។»

សូមបញ្ជាក់ជាថ្មីថា ការប្រកួតរវាង កម្ពុជា ជាមួយ ព្រុយណេ នឹងធ្វើឡើងនាវេលាម៉ោង ៥ល្ងាច ថ្ងៃទី២៩ ខែធ្នូ ឆ្នាំ២០២២ នេះ នៅពហុកីឡដ្ឋានជាតិមរតកតេជោ ខណៈប្រកួតនេះនឹងមានផ្សាយផ្ទាល់តាមរយៈកញ្ចក់ទូរទស្សន៍ BTV News៕

អត្ថបទ៖ មន្នីរ័ត្ន

The post ប្រធានក្រុមព្រុយណេ មិនចង់ទៅផ្ទះដៃទទេ ខណៈប្រធានក្រុមកម្ពុជា ថាចាំបាច់ត្រូវតែឈ្នះ appeared first on Kampuchea Thmey Daily.