ក្លិបបាល់ទាត់មន្ទីរឣប់រំខេត្តកំពង់ចាម

លោក កុក ស៊ីជឿន អនុប្រធានក្លិប និងជាអនុប្រធានមន្ទីរអប់រំ យុវជន និងកីឡា ខេត្តកំពង់ចាម​ និងលោក សាន សុគន្ធ ម្ចាស់សិប្បកម្មកិនថ្មHSK​ នា​ព្រឹក​ថ្ងៃ​ទី១៦​ ខែ​មិថុនា​ ឆ្នាំ​២០២៦​ នេះ​បាន​ចុះ​អនុស្សរណៈ​ នៃ​ការ​យោគយល់​គ្នា​ (MOU)​ លើ​ការ​ឧបត្ថម្ភ​គាំទ្រ​រាល់​សកម្មភាព​ និង​ការ​អភិវឌ្ឍន៍​វិស័យ​បាល់ទាត់​របស់​ក្លឹប​មួយ​នេះ។​

ទិដ្ឋភាពចុះ MOU

ឆ្លៀតឱកាស​ក្នុងនោះដែរ​អនុប្រធានក្លិប​បាល់ទាត់​ខេត្ត​កំពង់ចាម​ នៅ​រដូវកាលថ្មីនេះ​​ស្វាគមន៍​អ្នកជួយគាំទ្រឧបត្ថម្ភជានិច្ច​ និង​ថ្លែង​អំណរគុណ​ដល់​ម្ចាស់​ឧបត្ថម្ភ​ទាំង​អស់​ដែល​ជួយ​ទ្រទ្រង់​សកម្មភាព​ក្លិប​ចាប់​តាំង​ពី​ដើម​​រហូតមក​ដល់​បច្ចប្បន្ន។​ ជាពិសេស​គឺមានការជួយគាំទ្រឧបត្ថម្ភពី​លោក​ អ៊ុន​ ចាន់ដា​ អភិបាល​ខេត្ត​កំពង់ចាម​ ជាប្រចាំ​រហូត​មក។ ក្លិប​ទាំង​មូល​ពិត​ជា​មាន​ភាព​សប្បាយរីករាយ​ខ្លាំង​មែន​ទែន​ចំពោះ​ម្ចាស់​សិប្បកម្មកិនថ្ម HSK​ ដែល​បាន​ចូលរួម​ឧបត្ថម្ភ​គាំទ្រ​ជា​ផ្នែក​ធំ​មួយ​ចំពោះក្លឹប​នៅរដូវកាលថ្មីនេះ។

ក្លិបបាល់ទាត់មន្ទីរឣប់រំខេត្តកំពង់ចាម

ចំណែក​លោក នួន បូរី គ្រូបង្គោលក្រុមខេត្តកំពង់ចាម​ បាន​លើក​ឡើង​ថា​ ដូចជាការរំពឹងទុកឆ្នាំនេះ​ ក្លិប​នឹង​បន្ត​គ្រង​ជើងឯក​ម្ដង​ទៀត​ និងមានទំនុកចិត្ត​កាន់​តែ​ខ្ពស់។ នា​ពេល​កន្លង​ទៅ​កីឡាករ​មាន​បទពិសោធន៍ និងបច្ចេកទេស​ច្រើន​ក្នុង​ការ​លេង​ហើយ​ ដូច្នោះការប្តេជ្ញាចិត្ត​របស់ក្លិបនឹងធ្វើ​ឲ្យ​អស់​ពី​សមត្ថភាព​ដើម្បី​យក​ជ័យជម្នះ​ឲ្យបាននៅរដូវកាលថ្មីនេះ។

បញ្ជាក់​ដែរ​ថា​ ក្លិបបាល់ទាត់មន្ទីរឣប់រំ យុវជន និងកីឡាខេត្តកំពង់ចាម​នឹង​ចូលរួមការ​ប្រកួត​ពាន់​រង្វាន់​ សម្តេចអគ្គមហាសេនាបតី​តេជោ ហ៊ុន​ សែន​ លើក​ទី២០​ ឆ្នាំ​២០២៦​ នេះ​៕​

ក្លិបបាល់ទាត់មន្ទីរឣប់រំខេត្តកំពង់ចាម

អត្ថបទដោយ៖ នួន ស៊ីណា​

The post ក្លិបបាល់ទាត់មន្ទីរឣប់រំខេត្តកំពង់ចាម​ ទទួល​បាន​ការ​សហការ​ឧបត្ថម្ភ​ពី​ HSK​ ជំរុញ​លើ​ការ​អភិវឌ្ឍន៍​បន្ថែម appeared first on Kampuchea Thmey Daily.

បន្ទាប់ពីឈ្នះក្រុម វិសាខា នៅវគ្គបាល់កាត់សេចក្តី ១១ ម៉ែត្រ ៥-៣ ក្រោយលេង ១២០ នាទីស្មើគ្នា ៤-៤ កាលពីថ្ងៃ អាទិត្យ ទី ២៤ បានធ្វើឱ្យក្រុម ព្រះខ័នរាជស្វាយរៀង ក្លាយជាម្ចាស់ជើងឯកពានសម្តេចតេជោនៅរដូវកាលនេះ ដែលជាលើកទី ៦ នៅក្នុងប្រវត្តិសាស្ត្រក្លិប។

ជាមួយគ្នានេះ ក៏មានកំណត់ត្រាធំ ៣ ផងដែរ ត្រូវបានចារសម្រាប់ក្រុម ព្រះខ័នរាជ​ស្វាយរៀង បន្ទាប់ពីបានឈ្នះពានសម្តេចតេជោនៅរដូវកាលនេះ។

ទី ១. ព្រះខ័នរាជស្វាយរៀង បន្តកំណត់ត្រាឈ្នះពានរង្វាន់សម្តេចតេជោ ច្រើនជាងគេបង្អស់ ពោលគឺចំនួន ៦ ដង។ បច្ចុប្បន្ន គ្មានក្រុមណាមួយ ដែលស្ថិតនៅក្បែរកំណត់ត្រានេះរបស់ក្រុម ព្រះខ័នរាជស្វាយរៀង នោះទេ ស្របពេលក្រុមស្ថិតនៅលំដាប់លេខ ២ ដូចជា ភ្នំពេញក្រោន កងយោធពលខេមរភូមិន្ទ និង វិសខា គឺទើបឈ្នះបាន ៣ លើកប៉ុណ្ណោះ។

ទី ២. ក្រុមជើងឯកលីគកំពូល កម្ពុជា បានក្លាយជាក្រុមដំបូងគេ ដែលបានបញ្ចប់កំណត់ត្រាមិនចាញ់សោះនៅវគ្គផ្តាច់ព្រ័ត្ររបស់ក្រុម វិសាខា។ វិសាខា បានកាន់កំណត់ត្រាមិនចាញ់សោះនៅវគ្គផ្តាច់ព្រ័ត្រពានសម្តេចតេជោ ដោយឡើង ៣ លើក កាលពីឆ្នាំ ២០២០, ២០២១ និង ២០២២ ពួកគេបានឈ្នះទាំងអស់។ យ៉ាងណា កំណត់ត្រានេះត្រូវបានបញ្ចប់ដោយ ព្រះខ័នរាជស្វាយរៀង បន្ទាប់ពីជួបគ្នានៅឆ្នាំ ២០២៦។

ទី ៣. ព្រះខ័នរាជស្វាយរៀង បានសាងកំណត់ត្រាជាលើកដំបូងនៅក្នុងប្រវត្តិសាស្ត្ររបស់ខ្លួន ដោយអាចឈ្នះពានក្នុងស្រុកទាំងអស់ក្នុងមួយរដូវកាល ពោលគឺចំនួន ៣ ពាន។ រដូវកាល ២០២៥-២០២៦ ពួកគេបានឈ្នះពានក្នុងស្រុកទាំងអស់ រួមមានពានបើករដូវកាល Cambodian Super Cup, លីគកំពូល កម្ពុជា Cambodian Premier League និងពានសម្តេចតេជោ៕

អត្ថបទ៖ សេម កុសល

The post ព្រះខ័នរាជស្វាយរៀង ធ្វើបានកំណត់ត្រាធំ ៣ បន្ទាប់ពីឈ្នះពានសម្តេចតេជោ appeared first on Kampuchea Thmey Daily.

ក្រុមជើងឯកក្នុងពានសម្តេចតេជោរដូវកាលនេះ បានទៅលើក្រុម ព្រះខ័នរាជស្វាយរៀង បន្ទាប់ពីបានយកឈ្នះលើក្រុម វិសាខា នៅវគ្គផ្តាច់ព្រ័ត្រ ក្នុងវគ្គបាល់កាត់សេចក្តី ១១ ម៉ែត្រ ៥-៣ បន្ទាប់ពីឆ្លងកាត់ ១២០ នាទីស្មើគ្នា ៤-៤។ នេះជាលើកទី ៦ ហើយ ដែល ព្រះខ័នរាជស្វាយរៀង ឈ្នះពានសម្តេចតេជោ ហើយក៏ជាកំណត់ត្រាឈ្នះច្រើនជាងគេដែរ នៅក្នុងពានក្នុងស្រុកលំដាប់ទី ២ មួយនេះ។

ដោយឡែកកីឡាករឈ្នះពានរង្វាន់ស្បែកជើងមាសបានទៅលើខ្សែប្រយុទ្ធក្រុម វិសាខា កីឡាករ Nana Kwame បន្ទាប់ពីរកបាន ៧ គ្រាប់។ កីឡាករឈ្នះពានលេងល្អជាងគេប្រចាំព្រឹត្តិការណ៍បានទៅលើកីឡាករ Lancine Diakite របស់ក្រុម អាយអេសអាយ ដង្កោរសែនជ័យ។ កីឡាករឈ្នះពានស្រោមដៃមាស បានទៅលើអ្នកចាំទី វីរះ ដារ៉ា របស់ក្រុម ព្រះខ័នរាជស្វាយរៀង។

ងាកទៅមើលគ្រូបង្វឹកល្អជាងគេប្រចាំព្រឹត្តិការណ៍វិញម្តង គឺបានទៅលើលោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង។ រីឯក្លិបបាល់ទាត់ វិសាខា បន្ទាប់ពីបានជើងឯករង គឺបានឈ្នះពានឯត្តជនមួយទៀត គឺពានរង្វាន់គោរពវិន័យល្អជាងគេ (Fair Play)៕

អត្ថបទ៖ សេម កុសល

The post វីរះ ដារ៉ា ជាកីឡាករខ្មែរម្នាក់គត់ ស្ថិតក្នុងអ្នកឈ្នះ​ពានឯកត្តជន ពានសម្តេចតេជោរដូវកាលនេះ appeared first on Kampuchea Thmey Daily.

Kwame បានក្លាយជាកម្លាំងចលករដ៏សំខាន់ក្នុងការជួយជ្រុំជ្រែងឱ្យ ព្រះខ័នរាជស្វាយរៀង ឈ្នះពានសម្តេចតេជោនៅរដូវកាល ២០២៥-២០២៦ នេះ បន្ទាប់ពីកីឡាកររួមចំណែកស៊ុតបញ្ចូលទី ៣ គ្រាប់នៅវគ្គផ្តាច់ព្រ័ត្រ ជួយឱ្យក្រុមរហស្សនាម ព្រះខ័នខៀវ តាមស្មើ វិសាខា ៤-៤ ក្នុងរយៈពេល ១២០ នាទី។ ចុងក្រោយ ព្រះខ័នរាជស្វាយរៀង បានយកឈ្នះ ដោយបាល់ប៉េណាល់ទី ៥-៣។

បន្ទាប់ពីបង្ហាញគុណផលដ៏ល្អបែបនេះ Kwame បានបង្កើតកំណត់ត្រាធំមួយ ដោយក្លាយជាកីឡាករដំបូងគេ ដែលអាចរកបានគ្រាប់បាល់ hat-trick នៅក្នុងវគ្គផ្តាច់ព្រ័ត្រពានរង្វាន់សម្តេចតេជោ។ ពានរង្វាន់សម្តេចតេជោ បានឆ្លងកាត់់ការប្រកួតវគ្គផ្តាច់ព្រ័ត្រថ្នាក់ជាតិចំនួន ១៩ លើកមកហើយ ដោយគិតទាំងលើកនេះ ប៉ុន្តែគ្មានកីឡាករណាម្នាក់អាចរកបាន hat-trick ក្រៅពីខ្សែប្រយុទ្ធសញ្ជាតិ ហ្គាណា វ័យ ២៥ ឆ្នាំឡើយ។

អត្ថបទ៖ សេម កុសល

The post Kwame Peprah បំបែកកំណត់ត្រាធំ ១ ក្រោយ​ជួយ ព្រះខ័នរាជស្វាយរៀង ឈ្នះពានសម្តេច​តេជោ appeared first on Kampuchea Thmey Daily.

លោក McConkey នឹងត្រូវដឹកនាំក្រុម ព្រះខ័នរាជស្វាយរៀង ប្រកួតតទល់នឹងក្រុម វិសខា នៅក្នុងវគ្គផ្តាច់ព្រ័ត្រពានសម្តេចតេជោ នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៤ ខែ ឧសភា ឆ្នាំ ២០២៦។ មុនជំនួបដ៏ធំនេះមកដល់ គ្រូបង្វឹកសញ្ជាតិ អៀរឡង់ វ័យ ៣២ ឆ្នាំ បានសរសើរពីការដឹកនាំរបស់លោក Cooper នាមួយរយៈចុងក្រោយនេះ ដែលក្រុមមិនទាន់ចាញ់ទាល់តែសោះ។

ទន្ទឹមនឹងនេះ លោកក៏បានលើកឡើងពីការព្រួយបារម្ភ ចំពោះចំណុចគ្រោះថ្នាក់ ដែលក្រុម វិសខា មានផងដែរ នោះគឺការប្តូររបៀបលេងលឿន តាមរយៈការប្តូរពីការពារ ទៅប្រយុទ្ធវាយបក។ លោក McConkey បានមានប្រសាសន៍នៅក្នុងសន្និសីទសារព័ត៌មាន ថា៖ «ខ្ញុំយល់ឃើញ ថា ក្រុម វិសាខា លេងដោយមានវិន័យ នៅពេលដែលពួកគេការពារ ឬគ្មានបាល់»។

គ្រូបង្វឹកក្រុម ព្រះខ័នរាជស្វាយរៀង បានបន្ត ថា៖ «ពួកគេមានភាពគ្រោះថ្នាក់ច្រើន នៅពេលពួកគេផ្លាស់ប្តូរចង្វាក់លេង ហើយនៅពេលពួកគេមានបាល់វិញ គឺព្យាយាមប្រយុទ្ធលឿន ទៅតាមគុណភាពកីឡាករ ដែលមាន។ខ្ញុំក៏បានដឹងដែរ ថា គ្រូរបស់ វិសាខា ធ្វើបានល្អ ក្នុងរយៈពេលប៉ុន្មានប្រកួតចុងក្រោយនេះ។ លទ្ធផលប៉ុន្មានប្រកួតចុងក្រោយនេះ គាត់បានឈ្នះគ្រប់ការប្រកួត។ សង្ឃឹម ថាការប្រកួតថ្ងៃស្អែក នឹងក្លាយជាការប្រកួតដ៏ល្អមួយសម្រាប់ពូកយើង»។

លោក McConkey និងខ្សែប្រយុទ្ធ Patrick Robson ដែលបានចូលរួមសន្និសីទសារព័ត៌មាន បានបញ្ជាក់ ថា ក្រុមរបស់លោកបានត្រៀមខ្លួនរួចរាល់ហើយ ដើម្បីដណ្តើមយកជ័យជម្នះ និងពានសម្តេចតេជោរដូវកាល ២០២៥-២០២៦៕

អត្ថបទ៖ សេម កុសល

The post មុនជួបគ្នាស្អែក លោក McConkey បង្ហើបចំណុចគ្រោះថ្នាក់មួយរបស់ វិសាខា ក្រោមការដឹកនាំរបស់គ្រូថ្មី appeared first on Kampuchea Thmey Daily.

លោក Cooper នឹងត្រូវដឹកនាំក្រុម វិសាខា ប្រកួតតទល់នឹងក្រុម ព្រះខ័នរាជស្វាយរៀង នៅក្នុងវគ្គផ្តាច់ព្រ័ត្រពានសម្តេចតេជោ នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៤ ខែ ឧសភា ឆ្នាំ ២០២៦។ មុនជំនួបដ៏ធំនេះមកដល់ គ្រូបង្វឹកសញ្ជាតិ អៀរឡង់ វ័យ ៥៥ ឆ្នាំ បានសារភាពដោយត្រង់ ថា លទ្ធផលដ៏ល្អរបស់ក្រុមលោក ជាពិសេសការឡើងមកកាន់វគ្គផ្តាច់ព្រ័ត្រនេះ គឺភាគច្រើនជួបសុទ្ធតែក្រុមកម្រិតទាបប៉ុណ្ណោះ។

ផ្ទុយពីក្រុម ព្រះខ័នរាជស្វាយរៀង ដែលបានឆ្លងកាត់នូវផ្លូវពិបាកៗជាច្រើន ដោយត្រូវប្រកួតក្នុងកាលវិភាគដ៏មមារញឹក ហើយការប្រកួតនៅក្នុងលីគ ត្រូវជួបក្រុមក្នុងលំដាប់កំពូលទាំង ៦។ ជាមួយគ្នានេះ ពួកគេទើបប្រកួតវគ្គផ្តាច់ព្រ័ត្រពាន AFC Challenge League ហើយមុនឡើងមកដល់វគ្គផ្តាច់ព្រ័ត្រពានសម្តេចតេជោនេះទៀតសោត បានឆ្លងកាត់ការប្រកួតដ៏ពិបាកជាមួយនឹងក្រុម បឹងកេត ថែមទៀត។

ថ្លែងនៅក្នុងសន្និសីទសារព័ត៌មាននាព្រឹកថ្ងៃ សៅរិ៍ ទី ២៣ ខែ ឧសភា ឆ្នាំ ២០២៦ លោក Cooper បានមានប្រសាសន៍ ថា៖ «យើងត្រូវនិយាយដោយស្មោះត្រង់ អំពីទិន្ន័យជាក់ស្តែង។ វិសាខា ស្ថិតនៅលេខ ៧ ក្នុងលីគ។ យើងឈ្នះច្រើន ដោយសារយើងលេងតែជាមួយក្រុមនៅលំដាប់ខាងក្រោម។ យើងមិនដូច ព្រះខ័នរាជស្វាយរៀង ទេ ដែលបានលេងជាមួយក្រុមលំដាប់កំពូលទាំង ៦ សុទ្ធតែក្រុមខ្លាំងៗ»។

លោក Cooper បានបន្តទៀត ថា៖ «[…] មុនឡើងមកដល់វគ្គផ្តាច់ព្រ័ត្រពានសម្តេចតេជោនេះ គឺ ពួកគេបានឈ្នះក្រុម បឹងកេត ដែលដឹកនាំដោយលោក Conor Nestor ជាគ្រូបង្វឹកពោរពេញដោយទេពកោលស្យម្នាក់។ មានន័យ ថា មុនមកដល់វគ្គផ្តាច់ព្រ័ត្រនេះ គឺផ្លូវធ្វើដំណើររបស់ពួកគេខុសពីយើងដាច់តែម្តង។ ពួកគេជួបសុទ្ធតែក្រុមកំពូលៗ ហើយប៊ិះនឹងឈ្នះពាន AFC Challenge League ទៀត»។

ទោះបីជាយ៉ាងណា លោក Cooper បានសង្កត់ធ្ងន់ ថា លោកមិនបានខ្លាចទៅលើក្រុម ព្រះខ័នរាជស្វាយរៀង នោះទេ ដោយការលើកឡើងខាងលើ គឺជាការគោរពរបស់លោកទៅលើក្រុមម្ចាស់ជើងឯកលីគកំពូល កម្ពុជា។ លោកប្តេជ្ញា ថា ការប្រកួតស្អែក ក្រុមលោកនឹងប្រឹងប្រយុទ្ធឱ្យអស់ពីសមត្ថភាពពេញ ៩០ នាទី ដើម្បីយកជ័យជម្នះ និងពានឱ្យបាន៕

អត្ថបទ៖ សេម កុសល

The post លោក Cooper ថា ព្រះខ័នរាជស្វាយរៀង ពិបាកជាង វិសាខា ដាច់ មុនឡើងដល់វគ្គផ្តាច់​ព្រ័ត្រ​ពានសម្តេចតេជោ appeared first on Kampuchea Thmey Daily.

ការប្រកួតវគ្គផ្តាច់ព្រ័ត្រពានសម្តេចតេជោនៅចុងសប្តាហ៍នេះ ត្រូវបានគេរំពឹង ថា នឹងក្លាយជាការប្រកួតដ៏កក្រើក ដោយសារជាការជួបគ្នារវាងក្រុមខ្លាំង ២ ប្រចាំប្រទេស កម្ពុជា គឺ ព្រះខ័នរាជស្វាយរៀង និង វិសាខា។ ជំនួបនេះ ក៏ជាការសងសឹករបស់ ព្រះខ័នរាជស្វាយរៀង ផងដែរ បន្ទាប់ពីពួកគេធ្លាប់បរាជ័យក្រោមថ្វីជើងក្រុម វិសាខា នៅវគ្គផ្តាច់ព្រ័ត្រពានសម្តេចតេជោម្តង កាលពីឆ្នាំ ២០២១។

ព្រះខ័នរាជស្វាយរៀង ជាក្រុមជោគជ័យជាងគេ ដោយធ្លាប់ឈ្នះពានសម្តេចតេជោដល់ទៅ ៥ លើក ខណៈ វិសាខា មិនដែលចាញ់នៅវគ្គផ្តាច់ព្រ័ត្រសោះ ក្នុងការឡើងបាន ៣ លើក។ ដូច្នេះការប្រកួតនេះធានា ថា នឹងរំភើបសម្រាប់អ្នកគាំទ្រទៅទស្សនាផ្ទាល់។

ដូចបានបញ្ជាក់ពីខាងដើម ក្រៅពីការប្រកួត នៅមានការសម្តែងពិសេសៗជាច្រើនទៀត ដើម្បីកំដរអ្នកទស្សនា ដូចជានៅពេលបញ្ចប់វគ្គទី ១ នឹងមានការសម្តែងការលេងបាល់ទាត់ហ្វ្រីស្ទាយ៍ ដោយក្រុមហ្វ្រីស្ទាយ៍កម្ពុជា ដែលដឹកនាំដោយលោក ឡុង គឹមហេង និងក្រុមសិល្បៈហ៊ិបហប (Sela Pak HipHop)។ ក្រៅពីនេះ អ្នកគាំទ្រក៏នឹងសប្បាយរីករាយជាមួយការចាក់ចង្វាក់ EDM ដោយ DJ FII YAA ផងដែរ។

កុំ​ភ្លេច ចូល​រួម​គាំទ្រ និង​ទស្សនា​ឲ្យ​បាន​ច្រើន​កុះករ នាល្ងាច ថ្ងៃអាទិត្យ ទី​២៤ ខែ​ឧសភា នេះ​នៅ​ពហុកីឡដ្ឋាន​ជាតិ​មរតក​តេជោ ដែល​មាន​អ្វី​ពិសេស​ច្រើន​លើស​ពី​ការ​ប្រកូត​បាល់ទាត់​ថែម​ទៀត៕

អត្ថបទ៖ សេម កុសល

The post វគ្គផ្តាច់ព្រ័ត្រពានសម្តេចតេជោ ថ្ងៃអាទិត្យនេះ ទទួល​បាន​ភាព​រីក​រាយ លើស​ពី​បាល់ទាត់ appeared first on Kampuchea Thmey Daily.

វិសាខា ជា​ក្រុម​មួយ​ដែល​មិន​ទាន់​ស្គាល់​បរាជ័យ​ឡើត​​រាល់​ពេល​ពួក​គេ​បាន​ឡើង​ដល់​វគ្គ​ផ្តាច់​ព្រ័ត្រ ៣ ដង នៃ​ពាន​រង្វាន់សម្តេច​តេជោ ហ៊ុន សែន​ ​គឺ លើក​ទី១ ឆ្នាំ ២០២០ ពួក​គេ​បាន​ឈ្នះ ណាហ្គាវើលដ៍ ២-០, លើក​ទី​២ ឆ្នាំ ២០២១ បាន​ឈ្នះ ព្រះ​ខ័ន​រាជ​ស្វាយរៀង ដោយប៉េណាល់​ទី ៥-៤ បន្ទាប់​ពី​ស្មើ​គ្នា ២-២ និង​លើក​ទី​៣ ឆ្នាំ ២០២២ បាន​ឈ្នះ បឹងកេត ដោយ​លទ្ធផល ៤-៣ សម្រាប់​ការ​ប្រកួត ១២០​នាទី​ពេញ។

ដូច្នេះ វិសាខា កាន់​កំណត់​ត្រា​មិន​ដែល​ចាញ់​ក្នុង​វគ្គ​ផ្តាច់​ព្រ័ត្រ ហើយ​ប្រសិន​បើ​ពួក​គេឈ្នះ​ជើង​ឯក​នៅ​ថ្ងៃអាទិត្យ​នេះ នឹង​ឡើង​ទៅ​ឈរ​ចំណាត់​ថ្នាក់​លេខ ២ ក្នុង​នាម​ជាក្រុម​ឈ្នះ​ជើង​ឯក​ច្រើន​ជាង​គេ។

ព្រះ​ខ័ន​រាជ​ស្វាយរៀង កំពុង​កាន់​កំណត់​ត្រា ២ សំខាន់​ក្នុង​ពាន​រង្វាន់​សម្តេច​តេជោ ហ៊ុន សែន ។ ទី១ ពួក​គេ​ជា​ក្រុម​ដែល​បាន​ឡើង​ដល់​វគ្គ​ផ្តាច់​ព្រ័ត្រ​ច្រើន​ជាង​គេ​បំផុត​គឺ​ចំនួន ១១ លើក​គិត​ទាំង រដូវ​កាលឆ្នាំ​ ២០២៥-២៦នេះ​។ ទី​២ ពួក​គេ​ជា​ក្រុម​ដែល​បាន​ឈ្នះ​ជើង​ឯក​ពាន​រង្វាន់​សម្តេច​តេជោ ច្រើន​ជាង​គេ​ពោល​គឺ​ចំនួន ៥ ដង គឺ​ឆ្នាំ ២០១១ ២០១២ ២០១៥ ២០១៧ និង ២០២៣-២៤។

វិសាខា កំពុង​ស្ថិត​នៅ​ក្នុង​ទម្រង់​ល្អ​ក្រោម​ការ​ដឹក​នាំ​របស់​គ្រូ​បបង្វឹក​លោក Scott Cooper សម្រាប់​ ១០ ប្រកួត​ចុង​ក្រោយ​ពោល​គឺ​ឈ្នះទាំង​អស់។ ជា​ពិសេស ពួក​គេ​មានពេល​វេលា​សម្រាក​ត្រៀម​ខ្លួន​បាន​យូរជាង ព្រះ​ខ័ន​រាជ​ស្វាយរៀង។ ការ​ប្រកួត​ចុងក្រោយ​របស់ វិសាខា បាន​ឈ្នះ គិរីវង់សុខសែន​ជ័យ កាល​ពី​ថ្ងៃ​សៅរ៍ ទី​១៦ ខែ​ឧសភា។

ចំណែក ព្រះ​ខ័ន​រាជ​ស្វាយរៀង ទើប​តែ​ប្រកួតឈ្នះ បឹងកេត ដោយ​លទ្ធផល ៣-២ កាល​ពី​ថ្ងៃពុធ ទី​២០ ខែ​ឧសភា ថ្មី​ៗ​នេះ ហើយ​ពេល​ពេល​រហូត​ដល់ ១២០​នាទី​ថែម​ទៀត ដូច្នេះ​ពួក​គេ​មាន​ការហត់​នឿយ​ច្រើន។

មុន​ឈាន​ដល់​វគ្គ​ផ្តាច់​ព្រ័ត្រ ព្រះ​ខ័ន​រាជ​ស្វាយរៀង បានឈ្នះ ក្រុម​បាត់ដំបង យូណៃធីត ទាំងពីរ​ជើង ១៧-៣ នៅ​វគ្គ ១៦ ក្រុម​ចុង​ក្រោយ និង​ឈ្នះគិរីវង់សុខសែន​ជ័យ​ទាំង​ពីរ​ជើង ៥-៣ នៅ​វគ្គ ៨ ក្រុម​ចុង​ក្រោយ ហើយឈ្នះ បឹងកេត ទាំង​ពីរ ៤-៣ ក្នុង​វគ្គ​ពាក់​កណ្តាល​ផ្តាច់​ព្រ័ត្រ។

ចំពោះ​ វិសាខា វិញ បាន​ឡើង​វគ្គ​ផ្តាច់​ព្រ័ត្រ តាំង​ពីថ្ងៃ​ទី​២៩ ខែ​មេសា បន្ទាប់​ពី​ឈ្នះ អាយអេសអាយ ដង្កោសែន​ជ័យ ៣-០ ក្នុង​ជើង​ទី១ និង​ជើង​ទី​២ ឈ្នះ ៤-១ សរុប​ទាំង​ពីរ​ជើង​ឈ្នះ ៧-១ ក្នុង​វគ្គ​ពាក់​កណ្តាល​ផ្តាច់​ព្រ័ត្រ។ វគ្គ ១៦ ក្រុម​ចុង​ក្រោយ ពួក​គេ​បានឈ្នះ ក្រុម​ភ្នំពេញហ្គាឡាក់ស៊ី ទាំង​ពីរជើង ២២-០ និង​វគ្គ ៨ ក្រុម​ចុង​ក្រោយ ឈ្នះ ណាហ្គាវើលដ៍ ទាំង​ពីរ​ជើង ៦-២។

កុំ​ភ្លេច ចូល​រួម​គាំទ្រ និង​ទស្សនា​ឲ្យ​បាន​ច្រើន​កុះករ នាល្ងាច ថ្ងៃអាទិត្យ ទី​២៤ ខែ​ឧសភា នេះ​នៅ​ពហុកីឡដ្ឋាន​ជាតិ​មរតក​តេជោ ដែល​មាន​អ្វី​ពិសេស​ច្រើន​លើស​ពី​ការ​ប្រកូត​បាល់ទាត់​ថែម​ទៀត៕

អត្ថបទ៖ វិរបុត្រ

The post ព្រះ​ខ័ន​រាជ​ស្វាយរៀង ឬ វិសាខា ជា​ជើង​ឯក​ពាន​សម្តេច​តេជោ ថ្ងៃអាទិត្យ​នេះ? appeared first on Kampuchea Thmey Daily.