វីរះ ដារ៉ា ជាកីឡាករខ្មែរម្នាក់គត់ ស្ថិតក្នុងអ្នកឈ្នះ​ពានឯកត្តជន ពានសម្តេចតេជោរដូវកាលនេះ

ម្ចាស់ជើងឯកក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី ១៩ បានរកឃើញជាផ្លូវការ កាលពីយប់ថ្ងៃ អាទិត្យ ទី ២៤ ខែ ឧសភា ឆ្នាំ ២០២៦ ខណៈម្ចាស់ពានឯត្តជននីមួយៗក៏បានរកឃើញរួចរាល់ផងដែរ។

ក្រុមជើងឯកក្នុងពានសម្តេចតេជោរដូវកាលនេះ បានទៅលើក្រុម ព្រះខ័នរាជស្វាយរៀង បន្ទាប់ពីបានយកឈ្នះលើក្រុម វិសាខា នៅវគ្គផ្តាច់ព្រ័ត្រ ក្នុងវគ្គបាល់កាត់សេចក្តី ១១ ម៉ែត្រ ៥-៣ បន្ទាប់ពីឆ្លងកាត់ ១២០ នាទីស្មើគ្នា ៤-៤។ នេះជាលើកទី ៦ ហើយ ដែល ព្រះខ័នរាជស្វាយរៀង ឈ្នះពានសម្តេចតេជោ ហើយក៏ជាកំណត់ត្រាឈ្នះច្រើនជាងគេដែរ នៅក្នុងពានក្នុងស្រុកលំដាប់ទី ២ មួយនេះ។

ដោយឡែកកីឡាករឈ្នះពានរង្វាន់ស្បែកជើងមាសបានទៅលើខ្សែប្រយុទ្ធក្រុម វិសាខា កីឡាករ Nana Kwame បន្ទាប់ពីរកបាន ៧ គ្រាប់។ កីឡាករឈ្នះពានលេងល្អជាងគេប្រចាំព្រឹត្តិការណ៍បានទៅលើកីឡាករ Lancine Diakite របស់ក្រុម អាយអេសអាយ ដង្កោរសែនជ័យ។ កីឡាករឈ្នះពានស្រោមដៃមាស បានទៅលើអ្នកចាំទី វីរះ ដារ៉ា របស់ក្រុម ព្រះខ័នរាជស្វាយរៀង។

ងាកទៅមើលគ្រូបង្វឹកល្អជាងគេប្រចាំព្រឹត្តិការណ៍វិញម្តង គឺបានទៅលើលោក Matthew McConkey គ្រូបង្វឹករបស់ក្រុម ព្រះខ័នរាជស្វាយរៀង។ រីឯក្លិបបាល់ទាត់ វិសាខា បន្ទាប់ពីបានជើងឯករង គឺបានឈ្នះពានឯត្តជនមួយទៀត គឺពានរង្វាន់គោរពវិន័យល្អជាងគេ (Fair Play)៕

អត្ថបទ៖ សេម កុសល