កីទ្បាករកូនកាត់ខ្មែរ-អាម៉េរិក Nick Taylor បាន​របួស​ដាច់​សរសៃ​ពួ​ជង្គង់ ACL កាល​ពី​ថ្ងៃ​ទី​២៥ ខែ​កុម្ភៈ ឆ្នាំ ២០២៦ នៅ​ពេល​រូប​គេ​លេង​ឲ្យ​ក្រុម PT Prachuap ទទួល​បាន​ជ័យជម្នះ ១-០ លើ​ក្រុម Chiangrai United ក្នុង​ជើង​ទី​២ វគ្គ​ ៨ ក្រុម​ចុង​ក្រោយ និង​បាន​ឡើង​ទៅ​កាន់​វគ្គ​ពាក់​កណ្តាល​ផ្តាច់​ព្រ័ត្រ ពាន​រង្វាន់ FA Cup។

Nick Taylor បាន​ប្រាប់​«កម្ពុជា​ថ្មី»​ថា របួស​របស់​ខ្លួន​ត្រូវ​បាន​ធ្វើ​ការ​វះ​កាត់​ដោយ​ជោគជ័យ​កាល​ពី​យប់​ថ្ងៃ​ទី១០ ខែ​មីនា ឆ្នាំ ២០២៦។ បន្ទាប់​ពី​ធ្វើ​ការ​វះ​កាត់​ រូប​គេ​នឹង​ធ្វើ​ដំណើរ​មក​ប្រទេស​កម្ពុជា​ជួប​ភរិយា​ក្នុង​រយៈ​ពេល​ខ្លី មុន​ពេល​ចេញ​ទៅ​ក្រៅ​ប្រទេស​វិញ​ដើម្បី​បន្ត​សម្រាក​ព្យាបាល។

ការ​សម្រាក​ព្យាបាល​នៅ​ក្រៅ​ទី​លាន​របស់ Nick Taylor រហូត​ដល់ចប់​​រហូត​កាល​នេះ។ រូប​គេ​មិន​អាច​ជួយ​ក្លិប និង​ជម្រើស​ជាតិ​កម្ពុជា​ក្នុង​ពាន​រង្វាន់ ASEAN Championship នា​ពាក់​កណ្តាល​ឆ្នាំ ២០២៦ បាន​ទេ។

Nick Taylor បាន​ចាក​ចេញ​ពី​ក្លិប ព្រះ​ខ័ន​រាជ​ស្វាយរៀង កាល​ពី​ចប់​រដូវ​កាល ២០២៤-២៥ ដើម្បី​ចូល​រួម​ជា​មួយ​ក្លិប​របស់​ថៃ PT Prachuap ដែល​បាន​ក្លាយ​ជា​កីឡាករ​សំខាន់​ម្នាក់​ក្នុង​ក្រុម​ទាំង​ក្នុង​លីគ​កំពូល​ថៃ និង​ពាន​រង្វាន់ FA Cup។ ជា​រឿយ​ៗ រូប​គេ​ជាប់​ជម្រើស ១១ នាក់​ដំបូង និង​បាន​ក្លាយ​ជា​កីឡាករ​ទី ១ ​រក​បាន​គ្រាប់​បាល់​មុន​គេ​នៅ​លីគ​កំពូល​ថៃ​នៅ​ក្នុង​រដូវ​កាល ២០២៥-២៦។

បន្ទាប់​ពី​របួស​ដាច់​សរសៃ ACL សមាជិក​របស់ក្រុម PT Prachuap តែង​តែ​លើក​អាវ​លេខ ៦៧ ដែល​ជា​លេខ​អាវ​របស់ Nick Taylor នៅ​ពេល​ពួក​គេ​រក​បាន​គ្រាប់​បាល់ និង​ជា​ការ​ផ្ញើ​សារ​លើក​ទឹក​ចិត្ត​ដល់​កីឡាករ​កម្ពុជាឲ្យ​ឆាប់​ជា​សះ​ស្បើយ​ពី​របួស៕

អត្ថបទ៖ វិរបុត្រ

The post Nick Taylor នឹង​មក​កម្ពុជា​រយៈ​ពេល​ខ្លី ក្រោយ​វះ​កាត់សរសៃ ACL ជោគជ័យ appeared first on Kampuchea Thmey Daily.

យោងតាមសារព័ត៌មានថៃ Ballthai បានឱ្យដឹងថា បញ្ហារបួសរបស់ Nick Taylor គឺធ្ងន់ធ្ងរ ហើយកីឡាករនឹងត្រូវសម្រាកនៅក្រៅទីលានរហូតដល់ទៅ ១០ ខែ។ ប្រការនេះមានន័យ ថា ខ្សែបម្រើប្រយុទ្ធសញ្ជាតិខ្មែរ-អាមេរិក វ័យ ២៧ ឆ្នាំ នឹងត្រូវអវត្តមានជាមួយក្រុម PT Prachuap ដល់ចប់រដូវកាល ២០២៥-២០២៦ តែម្តង។ ជាមួយគ្នានេះ ក៏នឹងត្រូវបន្តអវត្តមានដល់ដើមរដូវកាលក្រោយ​ថែម​ទៀត។

បញ្ហារបួសរបស់ Nick Taylor មិនត្រឹមតែជាកង្វល់សម្រាប់ក្លិប PT Prachuap ប៉ុណ្ណោះទេ ប៉ុន្តែក៏ជាកង្វល់មួយផងដែរសម្រាប់ក្រុមបាល់ទាត់ជម្រើសជាតិ កម្ពុជា។ ក្រុមជម្រើសជាតិ កម្ពុជា នឹងត្រូវបាត់បង់រូបគេ ដែលជាកម្លាំងសំខាន់ម្នាក់ នៅក្នុងការប្រកួតពាន ASEAN Championship ពីថ្ងៃទី ២៤ ខែ កក្កដា ដល់ថ្ងៃទី ២៦ ខែ សីហា ឆ្នាំ ២០២៦។

គួរបញ្ជាក់ ថា ក្នុងពាន ASEAN Championship ក្រុមគោព្រៃកម្ពុជា ស្ថិតនៅពូល A ជាមួយក្រុមជម្រើសជាតិ វៀតណាម សិង្ហបុរី ឥណ្ឌូណេស៊ី និងក្រុមឆ្លងផុតវគ្គជម្រុះ playoff រវាង ប្រ៊ុយណេ ឬ ទីម័រ៕

អត្ថបទ៖ សេម កុសល

The post Nick Taylor ដាច់សរសៃ ACL ត្រូវសម្រាករយៈពេលវែង ខណៈត្រូវអវត្តមាននៅ​ក្រុមកម្ពុជាផងដែរ appeared first on Kampuchea Thmey Daily.

មួយរយៈចុងក្រោយនេះ មានព័ត៌មានដ៏រសើបមួយអំពីកីឡាករជម្រើសជាតិ កម្ពុជា Nick Taylor អាចនឹងចាកចេញពីក្លិប PT Prachuap និង Takaki នឹងចាកចេញពី BG Pathum នៅខែ កុម្ភៈ ឆាប់ៗនេះ។ ជាមួយគ្នានេះ អ្នកគាំទ្របាននាំគ្នាសន្និដ្ឋាន បើកីឡាករទាំង ២ ពិតជាចាកចេញមែន នោះអាចមកពីអស់កិច្ចសន្យា ឬ ដោយសារបញ្ហាព្រំដែនដ៏ក្តៅគគុករវាង កម្ពុជា-ថៃ។ ដោយឡែកបញ្ហាទម្រង់លេង ទំនងមិនមែនជាបញ្ហាចោទនោះទេ ដោយសារអ្នកទាំង ២ តែងតែស្ថិតនៅក្នុងជម្រើស ១១ នាក់ដំបូងរបស់ក្រុមសឹងតែគ្រប់ការប្រកួត។

ទោះបីជាយ៉ាងណា នេះគ្រាន់តែជាការសន្និដ្ឋានប៉ុណ្ណោះ ហើយបើមើលពីសកម្មភាពរបស់ក្លិប និងកីឡាករជាក់ស្តែង គឺមិនទាន់មានតម្រុយណាមួយ ដែលបញ្ជាក់ ថា ពួកគេអាចនឹងចាកចេញនោះទេ។ ផ្ទុយទៅវិញ មានតែតម្រុយ ដែលអាច​សន្និដ្ឋាន ថា ពួកគេទាំង ២ នឹងលេងនៅទីនោះបន្តទៀត។

Nick Taylor ធ្លាប់បានឆ្លើយឆ្លងជាមួយសារព័ត៌មាន «កម្ពុជាថ្មី» អំពីពាក្យចចាមអារ៉ាមនៃការចាកចេញនេះ ដោយគ្រាន់តែបញ្ជាក់យ៉ាងខ្លី ថា ៖ «ខ្ញុំគិត ថា គ្រប់យ៉ាងនឹងល្អប្រសើរ»។ ថ្វីដ្បិត កីឡាករមិនបានបញ្ជាក់លម្អិតអំពីរឿងនេះ ប៉ុន្តែអ្វីដែលរូបគេចង់មានន័យ គឺ មិនទាន់មានដំណឹងអំពីការចាកចេញនៅឡើយទេ។ បើក្រឡេកមើលស្ថានភាពជាក់ស្តែង កាលពីថ្ងៃទី ២៨ ខែ មករា ម្សិលមិញ ក្លិប PT Prachuap ទើបតែបង្ហោះរូប Nick Taylor អំពីការប្រកួតបន្ទាប់។ ដោយឡែកកិច្ចសន្យាវិញ គឺ Nick នៅសល់ដល់ចុងបញ្ចប់រដូវកាលនេះឯណោះ។

ងាកទៅកាន់ Takaki វិញ គឺទើបតែត្រូវបានគ្រូបង្វឹករបស់ BG Pathum លោក Masatada Ishii ជ្រើសរើសចូលសន្និសីទកាសែត មុនការប្រកួតទល់នឹងក្រុម Cebu នៃពានរង្វាន់ Shopee Cup កាលពីថ្ងៃទី ២៨ ខែ មករា ម្សិល មិញ។ ចំណែកការប្រកួតកន្លងៗមក ខ្សែការពារវ័យ ៣០ ឆ្នាំរូបនេះក៏ទទួលបានឱកាសចូលលេង ១១ នាក់ដំបូងញឹកញាប់ផងដែរ។ បើមើលអំពីកិច្ចសន្យា គឺកីឡាករនៅសល់ដល់ខែ មិថុនា ឆ្នាំ ២០២៧ ឯណោះ។

ទាំងនេះជាសក្ខីភាព ដែលអាចបញ្ជាក់ ថា កីឡាករទាំង ២ ទំនងនឹងមិនចាកចេញពីលីគកំពូល ថៃ នៅខែ កុម្ភៈ ខាងមុខនេះនោះទេ។ ទោះបីជាយ៉ាងណា គ្រប់យ៉ាងមិនទាន់អាចបញ្ជាក់ច្បាស់លាស់នៅឡើយទេ។ ដូច្នេះយើងនឹងតាមដានមើលបន្តទៀត៕

អត្ថបទ៖ សេម កុសល

The post Nick Taylor និង Takaki មានតម្រុយនឹងបន្តលេងនៅលីគ ថៃ បន្តទៀត appeared first on Kampuchea Thmey Daily.

កីឡាករ Nick Taylor បាន​កំពុង​លេង​ឲ្យ​ក្លិប PT Prachuap ហើយ​កីឡាករ Takaki Ose កំពុង​លេង​ឲ្យ​ក្លិប BG Pathum United នៃ​លីគ​បាល់ទាត់​កំពូល​ថៃ។ កីឡាករ​ទាំង​ពីរ​ទទួល​បាន​ឱកាស​លេង​ច្រើន​ដូច​គ្នា​ ក្នុង​នោះ​ក៏​រួម​ចំណែក​ជួយ​ដល់ក្រុម​ឲ្យ​ទទួល​បាន​លទ្ធផល​ល្អ​គួរ​សម​ដែរ។ ការ​ប្រកួត​ឈាន​ចូល​ដល់​ជើង​ទី​២ ក៏​ស្រាប់​តែ​មាន​ដំណឹង​លេច​ឮ​ពី​ការ​ចាក​ចេញ​ពី​លីគ​ថៃ​នា​ពេល​ខាង​មុខ។

ជុំ​វិញ​ករណី​នេះ សារព័ត៌មាន«កម្ពុជា​ថ្មី»​បាន​សាក​សួរ​កីឡាករ Nick Taylor ដោយ​កីឡាករ​បាន​ឆ្លើយ​ថា ៖«អ្វី​ៗ​ល្អ​ប្រសើរ យើង​ទើប​តែ​ចាប់​ផ្តើម​ជើង​ទី​២។ ខ្ញុំ​ក៏​បាន​ឃើញ​គេ​បង្ហោះ​ច្រើន​ដែរ​ពី​ពាក្យ​ចចាមអារ៉ាម​​ចាក​ចេញ។ ខ្ញុំ​គិត​ថា អ្វី​ៗ​នឹង​ល្អ​ប្រសើរ»។

តាម​ពាក្យ​សំដី​ដែល​បាន​ឆ្លើយ​ខាង​លើ​នេះ​អាច​ជា​ការ​ពិត​សម្រាប់​ការ​ចាក​ចេញ ប៉ុន្តែ​កីឡាករ​បាន​បញ្ជាក់​ថា អ្វី​ៗ​នឹង​ល្អ​ប្រសើរ​។

ពាក់​ព័ន្ធ​នឹង​មូលហេតុនៃ​លទ្ធភាព​ដែល​អាច​​ចាក​ចេញ​នោះ​មិនដឹង​ច្បាស់​ឡើយ ប៉ុន្តែ​កីឡាករ​ទាំង​ពីរ ជា​ពិសេស Nick Taylor តែង​តែ​ទទួល​បាន​ឱកាស​បង្ហាញ​ខ្លួន​នៅ​លើ​ទី​លាន​ញឹកញាប់។ រូប​គេ​ភាគ​ច្រើន​ជាប់​ជម្រើស ១១ នាក់​ដំបូង និង​បាន​ក្លាយ​ជា​កីឡាករ​ទី១​រក​បាន​គ្រាប់​​បាល់​នៅ​លីគ​ថៃ​ក្នុង​រដូវ​កាល​នេះ។

ប្រសិន​បើ កីឡាករ​ជម្រើស​ជាតិ​ទាំង​ពីរ​ចាក​ចេញ​ពីលីគ​ថៃ ពួក​គេ​អាច​មាន​លទ្ធភាព​ខ្ពស់​ក្នុង​ការ​ចូល​រួម​ជា​មួយ​ក្លិប​ចាស់​របស់​ខ្លួន​គឺ ព្រះ​ខ័ន​រាជ​ស្វាយរៀង និង ភ្នំពេញក្រោន។ យ៉ាង​ណា ពួក​គេ​មិន​អាចលេង​ក្នុង​លីគ​កំពូល​កម្ពុជា និង​ពាន​រង្វាន់​ក្នុង​ស្រុក​បាន​ឡើយ ដោយសារ​ពេល​វេលា​នៃ​ការដោះ​ដូរ​កីឡាករ​ត្រូវ​បាន​បិទ​ហើយ ប៉ុន្តែ​ពាន​រង្វាន់​អន្តរជាតិ​ ជា​ពិសេស AFC Challenge League គឺ ពួក​គេ​អាច​លេង​បាន ប្រសិន​បើ​ក្លិប​ចុះ​ឈ្មោះ​ពួក​គេ​មុន​ការ​ប្រកួត ១៥ ថ្ងៃ៕

អត្ថបទ៖ វិរបុត្រ

The post កំពុង​ល្បី​ចាក​ចេញ Nick Taylor បានប្រាប់​ពីស្ថានភាព​របស់​ខ្លួន​នៅ​ថៃ appeared first on Kampuchea Thmey Daily.

កីឡាករកូនកាត់ខ្មែរ-អាមេរិក Nick Taylor បានផ្លាស់ទៅចូលរួមជាមួយក្រុម PT Prachuap FC នៅរដូវកាលនេះ បន្ទាប់ពីរួមរស់ជាមួយក្រុម ព្រះខ័នរាជស្វាយរៀង ២ រដូវកាល ពីឆ្នាំ ២០២៣ ដល់ ២០២៥។ ទោះទើបផ្លាស់ទៅទ្រនំថ្មីក្នុងរដូវកាលដំបូងក៏ពិតមែន ប៉ុន្តែខ្សែបម្រើប្រយុទ្ធវ័យ ២៧ ឆ្នាំ កំពុងដើរតួយ៉ាងសំខាន់ ដើម្បីជួយក្រុមនៅក្នុងក្របខណ្ឌលីគកំពូល ថៃ និងពាន Thai FA Cup។

ការចូលរួមជាមួយ PT Prachuap FC កីឡាករ Nick ត្រូវបានគ្រូបង្វឹក ដាក់ឱ្យលេងនៅ ៣ ទីតាំងផ្សេងគ្នា រួមមានខ្សែការពារឆ្វេង ខ្សែបម្រើស្លាបឆ្វេង និងខ្សែប្រយុទ្ធស្លាបស្តាំ។ នៅក្របខណ្ឌលីគកំពូល ថៃ PT Prachuap FC លេងបាន ១៧ ប្រកួត ខណៈ Nick ក៏លេងបានទាំង ១៧ ប្រកួតនោះផងដែរ ហើយភាគច្រើនជាប់ជាកីឡាករ ១១ នាក់ដំបូង។ ក្នុងលីគ Nick រួមចំណែករកបាន ១ គ្រាប់ និង បញ្ជូនឱ្យមិត្តរួមក្រុមស៊ុតបញ្ចូលទី ២ លើក។

ដោយឡែកនៅក្នុងពាន Thai FA Cup កីឡាករ Nick បង្ហាញខ្លួនបាន ១ លើក ដោយលេង ៩០ នាទីពេញ ក្នុងចំណោមការប្រកួត ២ ប្រកួត។ ផ្អែកតាមស្ថិតិនេះ បានបង្ហាញ ថា កីឡាករ​ជម្រើស​ជាតិ​កម្ពុជា​រូប​នេះ កំពុងក្លាយជាកីឡាករដ៏សំខាន់ម្នាក់របស់ក្រុម PT Prachuap FC នៅរដូវកាលនេះ ដោយលេងសរុបបានចំនួន ១៨ ប្រកួត ពីការប្រកួតសរុបរបស់ក្លិប ២០ ប្រកួត។

សញ្ញាណវិជ្ជមានរបស់ Nick Taylor ក្នុងការចាកចេញពី កម្ពុជា ផ្លាស់ទៅលេងក្លិបនៅក្រៅប្រទេសបានធ្វើឱ្យអ្នកគាំទ្រចាប់អារម្មណ៍ជាខ្លាំង ដោយសារប្រវត្តិកន្លងមក ក្រៅតែអំពីរូបគេ និង Takaki Ose ដែលកំពុងលេងនៅ BG Pathum គ្មានកីឡាករ កម្ពុជា រូបណា ក្នុងសតវត្សទី ២១ នេះជោគជ័យឡើយ ដូចជា ចាន់ វឌ្ឍនាកា ផ្លាស់ទៅលីគទី ៣ ជប៉ុន និងលីគ ម៉ាឡេស៊ី, ប្រាក់ មុន្នីឧត្តម កែវ សុផេង និងធារី ចន្ថាប៉ីន ផ្លាស់ទៅលីគកំពូល ម៉ាឡេស៊ី៕

អត្ថបទ៖ សេម កុសល

The post Nick Taylor កំពុង​ក្លាយ​ជា​តួសំខាន់​នៅ​ក្លិប Prachuap FC ដោយលេងស្ទើរ​គ្រប់តំបន់ appeared first on Kampuchea Thmey Daily.

កីឡាករ​បាន​រៀប​រាប់​ថា ៖«ឆ្នាំ​នេះ​បាន​បញ្ចប់​ទៅ​ហើយ ខ្ញុំ​ចង់​និយាយ​អរគុណ​ដល់​អ្នក​ទាំង​អស់​គ្នា​ដែល​រួម​ចំណែក​ឲ្យ​ឆ្នាំ​នេះ​ក្លាយ​ជា​ឆ្នាំល្អ​បំផុត​មួយ​។ ​សូម​ទទួល​ស្វាគមន៍​ឆ្នាំ ២០២៦ ខ្ញុំ​បួង​សួង​ឲ្យ​ព្រះ​ជា​ម្ចាស់​ជូន​ពរ​ដល់​​អ្នក​ទាំង​អស់​គ្នា និង​សូម​ឲ្យ​ «២០២៦» ​ក្លាយ​ជា​ឆ្នាំ សុខសន្តិភាព សុភមង្គល និង​ ជោគជ័យ​ ដល់​​ប្រទេស​​ជាតិ​យើង និងបង​​ប្អូន​ទាំអ​ស់​គ្នា»។

«ខ្ញុំ​សង្ឃឹម​ថា អ្នក​ទាំង​អស់​អបអរសាទរ​​ឆ្នាំ​ថ្មី​ដោយ​ក្តី​រីក​រាយ! សូម​ថែរក្សា​ខ្លួន​ឲ្យមាន​សុវត្ថិភាព និង​​រីក​រាយ​ឆ្នាំ​ថ្មី​ទាំង​អស់​គ្នា»។ កីឡាករ​បាន​បន្ថែម។

កីឡាករ Nick Taylor ​ទទួល​បាន​ជោគជ័យ​ទាំង​អាជីព​បាល់ទាត់ និង​ការងារ​ក្រៅ​ពី​ទី​លាន​បាល់ទាត់។ រូប​គេ​បាន​ផ្លាស់​មក​ចូល​រួម​ជា​មួយ​ក្លិប​បាល់ទាត់​ព្រះ​ខ័ន​រាជ​ស្វាយរៀង កាល​ពី​ឆ្នាំ ២០២៣ ដោយ​បាន​ចំណាយ​ពេល​ជា​មួយ​ក្លិប​កម្ពុជា​នេះ​ពីររដូវ​កាល​បាន​ឈ្នះ​ជើង​ឯក​លីគ​បាល់ទាត់​កំពូល​កម្ពុជា ២ លើក ឈ្នះ​ជើង​ឯក​ពាន​រង្វាន់​សម្តេច​តេជោ ហ៊ុន សែន ១ លើក និង​ជើងឯក​រង AFC Challenge League។

រូប​គេ​បាន​ចាក​ចេញ​ពី​ក្លិប ព្រះ​ខ័ន​រាជ​ស្វាយរៀង នៅ​ពេល​រដូវ​កាល ២០២៤-២៥ បាន​បញ្ចប់​ដើម្បី​ចូល​រួម​ជា​មួយ​ក្លិប PT Prachuap សម្រាប់​រដូវ​កាល ២០២៥-២៦។ រូប​គេ​តែង​តែ​​ទទួល​បាន​ការ​ទុក​ចិត្ត​ពី​គ្រូ​បង្វឹក​ឲ្យ​លេង​ជម្រើស​ ១១ នាក់​ដំបូង​នៅ​ក្នុង​លីគ​កំពូល​ថៃ ហើយ​ជា​កីឡាករ​រក​បាន​គ្រាប់​បាល់​មុន​គេ​ក្នុង​លីគ​ថៃ​រដូវ​កាល​នេះ។

បើ​និយាយ​ពី​ការងារក្រៅ​បាល់ទាត់​វិញ Nick Taylor ទទួល​បាន​ជោគជ័យ​ទាំង​ជីវិត​ស្នេហា និង​ការ​ថត​ផ្សាយ​ពាណិជ្ជកម្ម។ រូប​គេ​មាន​ទំនាក់​ទំនង​ស្នេហា​ជា​មួយ​តារា​ចម្រៀង រ៉ាប៊ី រហូត​​បាន​រៀបមង្គល​ការ​នៅ​ឆ្នាំ ២០២៥។ ជា​រឿយ​ៗ រូប​គេ​ត្រូវ​បាន​ឃើញ​ថត​ផ្សាយ​ពាណិជ្ជកម្ម​ឲ្យ​ផលិត​ផល​ជា​ច្រើន​នៅ​ក្នុង​ប្រទេស​កម្ពុជា។

សមិទ្ធផល​ទាំង​នេះ​ហើយ​ដែល​អាច​ចាត់​ទុក​កីឡាករ​ជម្រើស​ជាតិ​កម្ពុជា​ Nick Taylor ទទួល​បាន​ជោគជ័យ​​លើស​ពី​ការរំពឹង​ទុក​ក្នុង​រយៈ​ពេល ២ ឆ្នាំ​ចុង​ក្រោយ៕

អត្ថបទ៖ វិរបុត្រ

The post កីឡាករ Nick Taylor ​បួង​សួងឲ្យ«២០២៦​»​ជា​ឆ្នាំ​សុខសន្តិភាព appeared first on Kampuchea Thmey Daily.

កីឡាករ​បាន​សរសេរ​ក្រោយ​ចប់​កាល​ការ​ប្រកួតថា ៖«ការ​ខិត​ខំ​ប្រឹង​ប្រែង​របស់​ក្រុម​ថ្ងៃ​នេះ​ពិត​ជា​អស្ចារ្យ​ណាស់។ ពួក​យើង​ពិត​ជា​មាន​មោទនភាព​ចំពោះ​អ្វី​ដែល​យើង​បាន​បង្ហាញ​នៅ​លើ​ទី​លាន​យប់​នេះ។ ស៊ូ​ស៊ូ​កម្ពុជា»។

ការ​លើក​ឡើង​របស់​កីឡាករ​ខ្មែរ-អាមេរិក Nick Taylor បន្ទាប់​ពី​​ក្រុម​កម្ពុជា​បានបញ្ចប់​ដោយ​លទ្ធផល​ស្មើ​ ១-១ ជា​មួយ ហុងកុង ដែល​បាន​ដាក់​សម្ពាធ​ខ្លាំង​លើ​កម្ពុជា។ ទោះ​បី​ជា​ ហុងកុង បាន​ដាក់​សម្ពាធ និង​សម្រុក​ខ្លាំង​យ៉ាងណា​ក៏​ដោយ ក៏​កម្ពុជា​បាន​ស្មារតី​ប្រយុទ្ធ​ដ៏​​រឹង​មាំ​ ជា​ពិសេស​នៅ​តំបន់​ការងារ និង​វាយបក​​រហូត​​រក​បាន​គ្រាប់​បាល់​តាម​ស្មើ។ អ្វី​ដែល​គួរ​ឲ្យ​ចាប់​អារម្មណ៍​គឺ​នៅ​វគ្គ​ទី២ កម្ពុជាមាន​ឱកាស​ស៊ុត​ជា​ច្រើន​ក្នុង​ការ​វាយ​បក ប៉ុន្តែ​ស៊ុត​មិន​បាន​សម្រេច។

រឿង​មួយ​ដែល​អ្នក​គាំទ្រ​មិន​បាន​ដឹង​​នោះ​គឺ ​ម្ចាស់​ផ្ទះ ហុងកុង ខ្វះ​ការ​យក​ចិត្ត​ទុក​ដាក់​ដល់​ក្រុម​ភ្ញៀវ​ដែល​បាន​ធ្វើ​ឲ្យ​​យឹត​​ក្នុង​ការ​ធ្វើ​ដំណើរ​ទៅ​កាន់​ទី​លាន​ដើម្បី​កម្តៅ​សាច់​ដុំ​មុន​ការ​ប្រកួត។

Nick Taylor បាន​ទម្លាយ​ថា ៖«ទោះ​បី​ជា​យ៉ាង​ណា សមាគម​កីឡា​បាល់ទាត់​ហុងកុង ខ្វះ​វិជ្ជាជីវៈ ដោយ​មិន​បាន​​រៀបចំ​ឲ្យ​មាន​ម៉ូតូ​​ប៉ូលិស​នាំ​ផ្លូវ​ពួក​​យើង​ទៅ​កាន់​កីឡដ្ឋាន​ឡើយ។ យើង​បាន​ទៅ​ដល់​កីឡដ្ឋាន​យឹត ​ដោយ​មាន​ពេល​​ហាត់​កម្តៅ​សាច់​ដុំ​​ផ្លូវ​ការ​ត្រឹម​តែ ១៥ នាទី​ប៉ុណ្ណោះ។ ប្រការ​នេះ​​ធ្វើ​ឲ្យ​កីឡាករ​របស់​យើង​​ប្រឈម​​ហានិភ័យ​​គ្រោះ​ថ្នាក់»។

ការ​ប្រកួត​ជា​មួយ ហុងកុង លើក​នេះ កម្ពុជា​​ មិន​បាន​ប្រមូល​ផ្តុំ​សម្រាប់​ការ​ត្រៀម​ខ្លួន​ច្រើន​ថ្ងៃ​ឡើយ​ពោល​គឺ​ចេញ​បញ្ជីឈ្មោះ ហើយ​ធ្វើ​ដំណើរ​ទៅ​ប្រកួត​តែ​ម្តង។ លទ្ធផល​ស្មើ​គ្នា ១-១ គឺ​ជា​ការ​ស្មើ​គ្នា​លើក​ទី​៣ សម្រាប់​ការ​ប្រកួត​រវាង កម្ពុជា និង ហុងកុង ក្នុង​ប្រវត្តិ​ជួប​គ្នា ១១ លើក​ដោយ​ហុងកុងឈ្នះ ៨ លើក ខណៈ កម្ពុជា​ មិន​ទាន់​ធ្លាប់​ឈ្នះ​ហុងកុង​ឡើយ៕

អត្ថបទ៖ វីរបុត្រ

The post Nick Taylor មាន​មោទនភាព​ចំពោះ​ក្រុម​យប់​មិញ តែ​​​ម្ចាស់​ផ្ទះ​ហុងកុង​ខ្វះ​វិជ្ជាជីវៈ appeared first on Kampuchea Thmey Daily.

ខ្សែ​បម្រើ​ការពារ​ស្លាប Nick Taylor ដែល​បាន​ហោះ​មក​ពី​ប្រទេស​ថៃ​ចូល​រួម​ជា​មួយ​ក្រុម​ជម្រើស​ជាតិ​ចាត់​ទុក​ការ​ជួប​ជុំ​គ្នា​សម្រាប់​ការ​ប្រកួតអន្តរជាតិ​លើក​នេះ​ជា​កម្លាំង​ជំរុញ​ទឹក​ចិត្ត​ដ៏​សំខាន់​​ដើម្បី​ស្វែង​រក​ជ័យជម្នះ​ជូនអ្នក​គាំទ្រ និង​ប្រទេស​ជាតិ។

កីឡាករ​ខ្មែរ-អាមេរិក​បាន​ប្រាប់​«កម្ពុជា​ថ្មី​»​ថា ៖«សម្រាប់​ខ្លួន​ខ្ញុំ​ផ្ទាល់​គឺ​​ពិត​ជា​ត្រេក​អ​​ដែល​បាន​​វិល​មក​ចូល​រួម​ក្នុង​​ក្រុម​ជម្រើស​ជាតិ​ជា​ថ្មី បន្ទាប់​ពី​​​​មិន​មាន​ការ​ប្រកួត​​ច្រើន​ខែ ប៉ុន្តែ​អ្នក​គ្រប់​គ្នា​ទំនង​ជា​​រីក​រាយ​ណាស់​សម្រាប់​ការ​ជួប​ជុំ​គ្នា​​លើកនេះ។ តាម​ពិត​ទៅ ខ្ញុំ​គិត​ថា យើង​​ចង់​លេង​ក្នុង​ប្រទេស​​​នៅ​ចំពោះ​មុខ​អ្នក​គាំទ្រ​របស់​យើង​ ប៉ុន្តែ​​​នៅ​ពេល​នេះ​មិន​ទាន់​ទេ មាន​តែ​​រង់​បន្ត​ទៀត»។

សមាជិក​ក្លិប​ថៃ PT Prachaup FC បាន​សង្កត់​ធ្ងន់​ថា ៖«​ចំណុច​សំខាន់​សម្រាប់​ពួក​យើង​ដូច​ខ្ញុំ​បាន​លើក​ឡើង​នៅ​​ខាង​លើអីចឹង​គឺ កីឡាករ​​ម្នាក់​ៗ​គឺ​​សុទ្ធ​តែ​រីក​រាយ​​សម្រាប់​ការ​ប្រកួត​លើក​នេះ ដូច្នេះ​សង្ឃឹម​​ថា ​វា​នឹង​ក្លាយ​ជា​កម្លាំង​ចិត្ត​ដ៏​សំខាន់ និង​ជំរុញ​ពួក​យើង​ឲ្យ​ធ្វើ​បាន​ល្អ»។

កីឡាករ​បាន​បន្ត​ទៀត​ថា ៖«អ្វី​​ដែល​សោក​ស្តាយ គឺ​ដោយសារ​ការ​​ប្រកួត​លីគ​ទើប​ធ្វើ​ឲ្យ​យើង​គ្មាន​ពេល​វេលា​ច្រើន​ក្នុង​ការ​ហ្វឹក​ហាត់​ត្រៀម​ការ​ប្រកួត។ ទោះ​ជា​យ៉ាង​ណា​ ខ្ញុំ​គិត​ថា យើង​ស្គាល់​​គ្នា​ច្បាស់ និង​ដឹង​ពី​អ្វី​ដែល​​គ្រូ​ចង់​បាន​ ដូច្នេះ​ខ្ញុំ​គិត​ថា គ្មាន​បញ្ហា​ចោទ​ទេ»។

Nick Taylor បាន​បន្ថែម​ថា ៖«ខ្ញុំ​សង្ឃឹម​ថា អ្នក​គាំទ្រ​ទាំង​អស់​អាច​ទស្សនា និង​លើក​ទឹក​ចិត្ត​ពួក​យើងង​តាម​អនឡាញ ហើយ​យើង​ខ្ញុំ​នឹង​ប្រឹង​ឲ្យ​អស់​ពី​លទ្ធភាព​ដើម្បី​ស្វែង​រក​ជ័យជម្នះ​ជូន​​ប្រទេស​ជាតិ»។

នៅ​ក្នុង​ឆ្នាំ ២០២៥ ក្រុម​បាល់ទាត់​ជម្រើស​ជាតិ​កម្ពុជា​មិន​ទាន់​ស្គាល់​ពាក្យ​«ជ័យជម្នះ​»​ឡើយ​​សម្រាប់​ការ​ប្រកួត​មិត្តភាព​អន្តរជាតិ​ ៣ លើក​កន្លងគឺ​ចាញ់ វៀតណាម ១-២, ចាញ់ អារូបា ១-២ និង​ចាញ់ តាហ្ស៊ីគីស្ថាន ១-២។ ដូច្នេះ​ការ​ប្រកួតជា​មួយ ហុងកុង វេលា​ម៉ោង ៧ យប់​ថ្ងៃព្រហស្បតិ៍ ទី​១៣ ខែ​វិច្ឆិកា​នេះ អ្នក​គាំទ្រ​សង្ឃឹម​ទទួល​បាន​លទ្ធផល​ល្អ៕

អត្ថបទ៖ វីរបុត្រ

The post Nick Taylor ប្រាប់​ថា ការប៉ះ ហុងកុង ​លើក​នេះ​​កម្ពុជា​​​មាន​សន្ទុះ​ចិត្ត​ខ្លាំង ក្រោយ​ខក​ខាន​យូរ appeared first on Kampuchea Thmey Daily.