កីឡា

Nick Taylor ប្រាប់ថា ការប៉ះ ហុងកុង លើកនេះកម្ពុជាមានសន្ទុះចិត្តខ្លាំង ក្រោយខកខានយូរ

បានផុស

២ ថ្ងៃ មុន

នៅ

ថ្ងៃពុធ ១២ វិច្ឆិកា ២០២៥

ដោយ

ក្រុមបាល់ទាត់ជម្រើសជាតិកម្ពុជា ត្រូវប្រកួតមិត្តភាពអន្តរជាតិផ្លូវការជាមួយ ហុងកុង នៅថ្ងៃទី១៣ ខែវិច្ឆិកា ឆ្នាំ ២០២៥ បន្ទាប់ពីខកខានសម្រាប់ការប្រកួតនៅក្នុងថ្ងៃ FIFA Day រយៈពេល២លើកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ខ្សែបម្រើការពារស្លាប Nick Taylor ដែលបានហោះមកពីប្រទេសថៃចូលរួមជាមួយក្រុមជម្រើសជាតិចាត់ទុកការជួបជុំគ្នាសម្រាប់ការប្រកួតអន្តរជាតិលើកនេះជាកម្លាំងជំរុញទឹកចិត្តដ៏សំខាន់ដើម្បីស្វែងរកជ័យជម្នះជូនអ្នកគាំទ្រ និងប្រទេសជាតិ។

កីឡាករខ្មែរ-អាមេរិកបានប្រាប់«កម្ពុជាថ្មី»ថា ៖«សម្រាប់ខ្លួនខ្ញុំផ្ទាល់គឺពិតជាត្រេកអដែលបានវិលមកចូលរួមក្នុងក្រុមជម្រើសជាតិជាថ្មី បន្ទាប់ពីមិនមានការប្រកួតច្រើនខែ ប៉ុន្តែអ្នកគ្រប់គ្នាទំនងជារីករាយណាស់សម្រាប់ការជួបជុំគ្នាលើកនេះ។ តាមពិតទៅ ខ្ញុំគិតថា យើងចង់លេងក្នុងប្រទេសនៅចំពោះមុខអ្នកគាំទ្ររបស់យើង ប៉ុន្តែនៅពេលនេះមិនទាន់ទេ មានតែរង់បន្តទៀត»។

សមាជិកក្លិបថៃ PT Prachaup FC បានសង្កត់ធ្ងន់ថា ៖«ចំណុចសំខាន់សម្រាប់ពួកយើងដូចខ្ញុំបានលើកឡើងនៅខាងលើអីចឹងគឺ កីឡាករម្នាក់ៗគឺសុទ្ធតែរីករាយសម្រាប់ការប្រកួតលើកនេះ ដូច្នេះសង្ឃឹមថា វានឹងក្លាយជាកម្លាំងចិត្តដ៏សំខាន់ និងជំរុញពួកយើងឲ្យធ្វើបានល្អ»។

កីឡាករបានបន្តទៀតថា ៖«អ្វីដែលសោកស្តាយ គឺដោយសារការប្រកួតលីគទើបធ្វើឲ្យយើងគ្មានពេលវេលាច្រើនក្នុងការហ្វឹកហាត់ត្រៀមការប្រកួត។ ទោះជាយ៉ាងណា ខ្ញុំគិតថា យើងស្គាល់គ្នាច្បាស់ និងដឹងពីអ្វីដែលគ្រូចង់បាន ដូច្នេះខ្ញុំគិតថា គ្មានបញ្ហាចោទទេ»។

Nick Taylor បានបន្ថែមថា ៖«ខ្ញុំសង្ឃឹមថា អ្នកគាំទ្រទាំងអស់អាចទស្សនា និងលើកទឹកចិត្តពួកយើងងតាមអនឡាញ ហើយយើងខ្ញុំនឹងប្រឹងឲ្យអស់ពីលទ្ធភាពដើម្បីស្វែងរកជ័យជម្នះជូនប្រទេសជាតិ»។

នៅក្នុងឆ្នាំ ២០២៥ ក្រុមបាល់ទាត់ជម្រើសជាតិកម្ពុជាមិនទាន់ស្គាល់ពាក្យ«ជ័យជម្នះ»ឡើយសម្រាប់ការប្រកួតមិត្តភាពអន្តរជាតិ ៣ លើកកន្លងគឺចាញ់ វៀតណាម ១-២, ចាញ់ អារូបា ១-២ និងចាញ់ តាហ្ស៊ីគីស្ថាន ១-២។ ដូច្នេះការប្រកួតជាមួយ ហុងកុង វេលាម៉ោង ៧ យប់ថ្ងៃព្រហស្បតិ៍ ទី១៣ ខែវិច្ឆិកានេះ អ្នកគាំទ្រសង្ឃឹមទទួលបានលទ្ធផលល្អ៕