កីឡា

កីឡាករ Nick Taylor បួងសួងឲ្យ«២០២៦»ជាឆ្នាំសុខសន្តិភាព

បានផុស

៦ ខែ មុន

នៅ

ថ្ងៃសុក្រ ២ មករា ២០២៦

ដោយ

កីឡាករបាល់ទាត់ជម្រើសជាតិកម្ពុជា Nick Taylor បានសួងសួងឲ្យឆ្នាំ ២០២៦ ក្លាយជាឆ្នាំ សុខសន្តិភាព សុភមង្គល និងជោគជ័យដល់ប្រទេសកម្ពុជា និងបងប្អូនទាំងអស់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករបានរៀបរាប់ថា ៖«ឆ្នាំនេះបានបញ្ចប់ទៅហើយ ខ្ញុំចង់និយាយអរគុណដល់អ្នកទាំងអស់គ្នាដែលរួមចំណែកឲ្យឆ្នាំនេះក្លាយជាឆ្នាំល្អបំផុតមួយ។ សូមទទួលស្វាគមន៍ឆ្នាំ ២០២៦ ខ្ញុំបួងសួងឲ្យព្រះជាម្ចាស់ជូនពរដល់អ្នកទាំងអស់គ្នា និងសូមឲ្យ «២០២៦» ក្លាយជាឆ្នាំ សុខសន្តិភាព សុភមង្គល និង ជោគជ័យ ដល់ប្រទេសជាតិយើង និងបងប្អូនទាំអស់គ្នា»។

«ខ្ញុំសង្ឃឹមថា អ្នកទាំងអស់អបអរសាទរឆ្នាំថ្មីដោយក្តីរីករាយ! សូមថែរក្សាខ្លួនឲ្យមានសុវត្ថិភាព និងរីករាយឆ្នាំថ្មីទាំងអស់គ្នា»។ កីឡាករបានបន្ថែម។

កីឡាករ Nick Taylor ទទួលបានជោគជ័យទាំងអាជីពបាល់ទាត់ និងការងារក្រៅពីទីលានបាល់ទាត់។ រូបគេបានផ្លាស់មកចូលរួមជាមួយក្លិបបាល់ទាត់ព្រះខ័នរាជស្វាយរៀង កាលពីឆ្នាំ ២០២៣ ដោយបានចំណាយពេលជាមួយក្លិបកម្ពុជានេះពីររដូវកាលបានឈ្នះជើងឯកលីគបាល់ទាត់កំពូលកម្ពុជា ២ លើក ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក និងជើងឯករង AFC Challenge League។

រូបគេបានចាកចេញពីក្លិប ព្រះខ័នរាជស្វាយរៀង នៅពេលរដូវកាល ២០២៤-២៥ បានបញ្ចប់ដើម្បីចូលរួមជាមួយក្លិប PT Prachuap សម្រាប់រដូវកាល ២០២៥-២៦។ រូបគេតែងតែទទួលបានការទុកចិត្តពីគ្រូបង្វឹកឲ្យលេងជម្រើស ១១ នាក់ដំបូងនៅក្នុងលីគកំពូលថៃ ហើយជាកីឡាកររកបានគ្រាប់បាល់មុនគេក្នុងលីគថៃរដូវកាលនេះ។

បើនិយាយពីការងារក្រៅបាល់ទាត់វិញ Nick Taylor ទទួលបានជោគជ័យទាំងជីវិតស្នេហា និងការថតផ្សាយពាណិជ្ជកម្ម។ រូបគេមានទំនាក់ទំនងស្នេហាជាមួយតារាចម្រៀង រ៉ាប៊ី រហូតបានរៀបមង្គលការនៅឆ្នាំ ២០២៥។ ជារឿយៗ រូបគេត្រូវបានឃើញថតផ្សាយពាណិជ្ជកម្មឲ្យផលិតផលជាច្រើននៅក្នុងប្រទេសកម្ពុជា។