សារ៉េត គ្រីយ៉ា បានក្លាយជាខ្សែការពារដ៏រឹងមាំម្នាក់របស់ ព្រះខ័នរាជស្វាយរៀង តាំងពីរដូវកាលមុនៗ​ ក្រោមការដឹកនាំរបស់លោក Pep Munoz រហូតមកដល់រដូវកាល ២០២៥-២០២៦ កំពុងស្ថិតក្រោមការដឹកនាំរបស់គ្រូបង្គោលលោក Matthew McConkey។

ខ្សែការពារជម្រើសជាតិ កម្ពុជា វ័យ ៣០ ឆ្នាំរូបនេះ តែងតែស្ថិតនៅក្នុងជម្រើសដំបូងរបស់ក្រុម ហើយចំណុចដ៏ពិសេសមួយទៀត ដ្បិតកីឡាករលេងតួនាទីជាខ្សែការពារក៏ពិតមែន ប៉ុន្តែឧស្សាហ៍រកបានបានគ្រាប់បាល់ជាញឹកញាប់។ ជាក់ស្តែង កាលពីថ្ងៃ ព្រហស្បតិ៍ ទី ១៦ ខែ មេសា កន្លងទៅ គ្រីយ៉ា ទើបតែបានរួមចំណែករកបាន ១ គ្រាប់ ជួយឱ្យ ព្រះខ័នរាជស្វាយរៀង យកឈ្នះក្រុម Manila Digger ៣-០ ក្នុងវគ្គពាក់កណ្តាលផ្តាច់ព្រ័ត្រពាន AFC Challenge League។

ក្រោយ សារ៉េត គ្រីយ៉ា បង្ហាញសមត្ថភាពយ៉ាងល្អ ដោយជួយការពារទីរបស់ក្រុម និងរួមចំណែករកបានគ្រាប់បាល់ផងនោះ បានធ្វើឱ្យលោក Pep Munoz បញ្ចេញមតិសរសើររូបគេនៅលើបណ្តាញសង្គម Instagram ដូច្នេះ ថា៖ «មិនអាចបញ្ឈប់គេបានទេ។ គាត់អាចសម្រេចស្នដៃទាំងឡាយណា ដែលគាត់ចង់បាន។ នេះជាវីរបុរសបាល់ទាត់កម្ពុជា ដែលកំពុងបន្តមានវត្តមាន»។

ការលើកសរសើរនេះ មិនមែនជាលើកទី ១ នោះទេសម្រាប់លោក Munoz ខណៈនៅរដូវកាលមុន អំឡុងពេលនៅដឹកនាំ ព្រះខ័នរាជស្វាយរៀង លោកក៏​បាន​សរសើរពីសមត្ថភាពរបស់ សារ៉េត គ្រីយ៉ា ផងដែរ បន្ទាប់ពីឈ្នះ អង្គរថាយហ្គឺរ​ ៤-២ ក្នុងលីគកំពូល កម្ពុជា នៅថ្ងៃទី ២៤ ខែ តុលា ឆ្នាំ ២០២៤។ នៅពេលនោះ គ្រូបង្វឹកសញ្ជាតិ អេស្ប៉ាញ បានសរសើរ គ្រីយ៉ា ថាលេងដូចសត្វព្រៃ ដោយសារ រូបគេលេងមិនហត់ ហើយអាចលេងការពារផង និងជួយក្រុមប្រយុទ្ធផង។

លោកបានមានប្រសាសន៍ ថា៖ «បាទ គាត់លេងជាមួយកម្រិតដ៏ល្អ។ យើងប្រើប្រាស់ គ្រីយ៉ា ដូចជាសត្វព្រៃ មិនថាការវាយលុក ការពារ ឬរកគ្រាប់បាល់។ […] គាត់បានលេង ៩០ នាទីក្នុងការប្រកួតដំបូងជាមួយក្រុមជម្រើសជាតិ ហើយក៏ ៩០ នាទីទៀតក្នុងការប្រកួតទីពីរថ្ងៃនេះ។ ខ្ញុំបានប្ដូរគាត់ចេញ ព្រោះខ្ញុំចង់ស្វែងរកជម្រើសវាយលុកគួរប្រកួតបន្ថែម ប៉ុន្តែមិនមែនដោយសារគាត់មិនអាចបន្តលេងបានទេ»។

គួរឱ្យដឹង ថា នៅរដូវកាលនេះ សារ៉េត គ្រីយ៉ា បានក្លាយជាកម្លាំងស្នូលនៅតំបន់ការពារដ៏សំខាន់សម្រាប់ ព្រះខ័នរាជស្វាយរៀង។ រូបគេកំពុងរួមចំណែកយ៉ាងធំធេង ក្នុងការជួយឱ្យ ព្រះខ័នរាជស្វាយរៀង ចូលរួមប្រជែងពានដល់ទៅ ៥ ផ្សេងគ្នាទាំងក្នុងស្រុក និងអន្តរជាតិ។

នៅ​រដូវ​កាល​នេះ ព្រះខ័នរាជស្វាយរៀង បានលើកពាន ២ ហើយរួមមានពាន Cambodian Super Cup និង Cambodian Premier League។ ទន្ទឹមនឹងនេះ ពួកគេកំពុងបន្តស្ថិតលើផ្លូវប្រជែងពាន ២ ទៀតរួមមានពានសម្តេចតេជោ និង AFC Challenge League៕

អត្ថបទ៖ សេម កុសល

The post លោក Munoz សរសើរ សារ៉េត គ្រីយ៉ា មិនដាច់ពីមាត់តាំងពីរដូវកាលមុនរហូតដល់​ឥឡូវ appeared first on Kampuchea Thmey Daily.

អតីតគ្រូបង្វឹក ព្រះខ័នរាជស្វាយរៀង និងបច្ចុប្បន្នជាគ្រូរបស់ក្រុម Bengaluru FC នៃលីគ ឥណ្ឌា រូបនេះយល់ ថា បច្ចុប្បន្នមានកីឡាករខ្មែរជាច្រើន​មានសមត្ថភាពដូចជាខ្សែបម្រើ​របស់​ក្លិប​ព្រះខ័នរាជស្វាយរៀងគឺ​ មិន រតនៈ, គឹម សុខយុទ្ធ និងខ្សែបម្រើ ភ្នំពេញក្រោន ប៊ុង សាំយូអែល។

លោកបានផ្តល់ជាដំបូន្មាន ថា កីឡាករកម្ពុជាទាំងនេះមានសមត្ថភាពទាំងនៅក្លិប និងនៅជម្រើសជាតិ ដែលចំណុចនេះក្លិបគួរតែផ្តល់ឱកាសឱ្យពួកគេលេងឱ្យបានច្រើនក្នុងការប្រកួតធំៗ ជាពិសេសពានអន្តរជាតិ។ បុរសវ័យ ៤៦ ឆ្នាំ ថា ជម្រើស​ជាតិ កម្ពុជា ពេលនេះឈានដល់ពេលមួយ ដែលមានកីឡាករស្ថិតក្នុងស្ថានភាពដ៏ល្អហើយ ដោយកីឡាករភាគច្រើន មិនចាស់ពេក និងមិនក្មេងពេក។

ថ្លែងប្រាប់សារព័ត៌មាន «កម្ពុជាថ្មី» លោក Pep Munoz បានមានប្រសាសន៍ ថា៖ «អ្នកមិនអាចភ្លេចបានថា នៅកម្ពុជា ក៏មានកីឡាករល្អៗផងដែរ។ ឥឡូវនេះយើងមានជំនាន់កីឡាករល្អមួយ ដែលមិនមែនក្មេងពេក ហើយក៏មិនចាស់ពេកដែរ។ នេះជាពេលវេលាដែលសមរម្យបំផុត។ ដូច្នេះ កីឡាករដូចជា រតនៈ, យុទ្ធ, សាំយូអ៊ែល ពី ភ្នំពេញក្រោន ជាដើម គឺជាជំនាន់ដែលត្រូវឲ្យពួកគេបានលេងលើឆាកអន្តរជាតិផងដែរ។ ត្រូវឲ្យពួកគេមាននាទីលេង។ ព្រោះវាល្អសម្រាប់ក្រុមជម្រើសជាតិ និងល្អសម្រាប់បាល់ទាត់កម្ពុជា»។

គួរបញ្ជាក់ ថា ការលើកឡើងដូច្នេះរបស់លោក Munoz បានកើតឡើង បន្ទាប់ពីសារព័ត៌មាន «កម្ពុជាថ្មី» សួរនាំអំពីទស្សនៈ «លីគគួរបន្ថែមកូតាកីឡាករបរទេស»។ ក្នុងពេលជាមួយគ្នានេះ លោកក៏បានរំលេចពីកីឡាករខ្មែរបច្ចុប្បន្ន ដែលសុទ្ធតែអ្នកមានគុណភាព អាចលេងបាននៅក្នុងការប្រកួតធំៗផ្សេង។ ដូច្នេះហើយ ទើបលោកយល់ ថា ជម្រើសជាតិ កម្ពុជា ឥឡូវនេះកំពុងស្ថិតនៅក្នុងរជ្ជកាលដ៏ល្អមួយ៕

អត្ថបទ៖ សេម កុសល

The post លោក Munoz មើលឃើញក្រុម​ជម្រើសជាតិ កម្ពុជា ពេលនេះមានកីឡាករកំពុងស្ថិតក្នុងរជ្ជកាលដ៏ល្អ appeared first on Kampuchea Thmey Daily.

អំឡុងសន្និសីទសារព័ត៌មានមុនការប្រកួតវគ្គ ៨ ក្រុមពាន AFC Challenge League កាលពីថ្ងៃទី ៤ ខែ មីនា ឆ្នាំ ២០២៦ លោក Oleg បានទទូចឱ្យលីគកំពូល កម្ពុជា គួរតែបន្ថែមកូតាកីឡាករបរទេសឱ្យច្រើនជាងបច្ចុប្បន្ន ដែលកំណត់ក្នុងមួយក្រុមមានកីឡាករបរទេស ៦ នាក់ ដោយសារនៅរដូវកាលក្រោយ ក្រុម កម្ពុជា ត្រូវប្រកួតពាន AFC Champions League Two។

អតីតគ្រូព្រះខ័នរាជស្វាយរៀង លោក Pep Munoz យល់ថា បើលីគឱ្យក្លិបនីមួយៗបន្ថែមកូតាកីឡាករបរទេស នោះនឹងជះឥទ្ធិពលធ្វើឱ្យកីឡាករខ្មែរមិនសូវមាននាទីលេង។ រឿងនេះវាចាំបាច់សម្រាប់ក្លិបអាជីព ប៉ុន្តែវានឹងប៉ះពាល់ដល់ជម្រើសជាតិ កម្ពុជា និងក្លិបតូចៗមួយចំនួន ដែលខ្វះធនធានហិរញ្ញវត្ថុ។

ថ្លែងប្រាប់ កម្ពុជាថ្មី លោក Munoz បានមានប្រសាសន៍ ថា ៖ «ខ្ញុំយល់ថា ក្នុងការប្រកួតអន្តរជាតិ អ្នកត្រូវការកីឡាករបរទេស។ អ្នកត្រូវការពួកគេ ប៉ុន្តែអ្នកមិនអាចភ្លេចបានថា នៅកម្ពុជា ក៏មានកីឡាករល្អៗផងដែរត្រូវឲ្យពួកគេមាននាទីលេង ព្រោះវាល្អសម្រាប់ក្រុមជម្រើសជាតិ និងល្អសម្រាប់បាល់ទាត់កម្ពុជា។»។

លោក Munoz បានបន្ត ថា៖ «មិនមែនគ្រប់ក្លិបទាំងអស់សុទ្ធ​តែ​អាចទិញកីឡាករបរទេស​ច្រើន​នោះទេ។ ក្លិប​ជា​ច្រើន​មានបញ្ហាក្នុងការ​នាំ​ចូល​កីឡាករបរទេសល្អៗ ពីព្រោះត្រូវចំណាយប្រាក់ខែខ្ពស់។ ដូច្នេះ វានឹងធ្វើឲ្យមានគម្លាតកាន់តែធំរវាងក្រុមខ្លាំង និងក្រុមខ្សោយ។ នេះមិនល្អសម្រាប់បាល់ទាត់កម្ពុជាទេ»។

លោក Munoz យល់ថា លីគអាចអនុញ្ញាតឱ្យក្លិបនីមួយៗចុះឈ្មោះកីឡាករបរទេសដោយសេរីបាន ប៉ុន្តែគួរតែរក្សាច្បាប់ដាក់កីឡាករបរទេសដូចបច្ចុប្បន្នដដែល ដោយក្នុងមួយប្រកួតមាន ៦ នាក់ ខណៈ ៥ នាក់ចូលលេង ហើយ ១ នាក់ទៀតបម្រុង។ ចំណែកកីឡាករបរទេសទាំងនោះ អាចលេងដោយប្តូរវេនគ្នា តាមគ្រូបង្វឹកចាត់ចែង។

ជុំវិញរឿងនេះលោក Munoz បានមានប្រសាសន៍ ថា ៖«អ្វីមួយដែលខ្ញុំអាចធ្វើបាន គឺអនុញ្ញាតឲ្យចុះឈ្មោះកីឡាករបរទេសដោយសេរី។ អ្នកអាចចុះឈ្មោះ ៣ នាក់ ឬច្រើនជាងនេះ តាមដែលអ្នកចង់បាន ប៉ុន្តែក្នុងលីគ ខ្ញុំនឹងរក្សាច្បាប់ដដែល គឺ ៥ នាក់នៅលើទីលាន ឬបន្ថែម ១ នាក់នៅលើកៅអីបម្រុង។ ហើយអ្នកអាចដាក់កីឡាករផ្សេងៗនៅក្រៅបញ្ជី ហើយធ្វើការប្តូរវេនគ្នាលេង។ នេះអាចជាវិធីល្អមួយ ដើម្បីរកតុល្យភាពរវាងកីឡាករក្នុងស្រុក និងកីឡាករបរទេស»៕

អត្ថបទ៖ សេម កុសល

The post លោក Munoz មើលឃើញផល​អវិជ្ជមាន ២ បើលីគ កម្ពុជា បន្ថែមកូតាកីឡាករបរទេស appeared first on Kampuchea Thmey Daily.

លោក Munoz ត្រូវបានគេចាត់ទុកជាគ្រូបង្វឹកដ៏ជោគជ័យម្នាក់ អំឡុងពេលដឹកនាំ ព្រះខ័នរាជស្វាយរៀង ២ រដូវកាលពីខែ មិថុនា ឆ្នាំ ២០២៣ ដល់ខែ ឧសភា ឆ្នាំ ២០២៥។ លោកបានជួយឱ្យក្រុមរហស្សនាមព្រះខ័នខៀវ ឈ្នះ​ពាន​លីគកំពូល កម្ពុជា Cambodian Premier League ២ លើក និងពានសម្តេចតេជោ ១ លើក។ ជាមួយគ្នានេះ លោកក៏បានជួយឱ្យ ព្រះខ័នរាជស្វាយរៀង ឡើងដល់វគ្គផ្តាច់ព្រ័ត្រពាន AFC Challenge League កាលពីរដូវកាល ២០២៤-២០២៥ ផងដែរ។

បន្ទាប់ពីគ្រូបង្វឹកសញ្ជាតិ អេស្ប៉ាញ រូបនេះចាកចេញពី ព្រះខ័នរាជស្វាយរៀង គឺមានអ្នកគាំទ្របាល់ទាត់ កម្ពុជា ជាច្រើន ចង់ឃើញលោកវិលមកកាន់ កម្ពុជា វិញ ដើម្បីដឹកនាំក្លិបណាផ្សេង ឬ ជម្រើសជាតិ កម្ពុជា។ ទោះបីជាយ៉ាងណា លោក Munoz បានបញ្ជាក់ច្បាស់ៗ ថា លោកចង់ស្វែងរកក្លិប ឬ លីគប្រទេសណាផ្សេង ដែលមានការប្រកួតប្រជែងខ្លាំងជាងនៅ​កម្ពុជា។ លោកបានសង្កត់ធ្ងន់ ថា មិនចង់ដឹកនាំក្រុមនៅលីគ កម្ពុជា ណាផ្សេង ក្រៅពី ព្រះខ័នរាជស្វាយរៀង នោះទេ ពីព្រោះលោកមានអារម្មណ៍ ថា ខ្លួនឯងជារបស់ ព្រះខ័នរាជស្វាយរៀង តែម្នាក់គាត់។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» លោក Pep Munoz បានមានប្រសាសន៍ ថា៖ «សម្រាប់ខ្ញុំ វាជាជំហានមួយដែលបានបញ្ចប់រួចហើយនៅពេលចាកចេញពី ព្រះខ័នរាជស្វាយរៀង។ ខ្ញុំចាកចេញពីកម្ពុជា ពីព្រោះខ្ញុំចង់ទៅលីគដែលមានការប្រកួតប្រជែងខ្ពស់ជាងនេះ មិនមែនមានតែ ៤ ឬ ៥ ក្រុមប៉ុណ្ណោះទេ។ ខ្ញុំចង់ទៅលីគដែលមានយ៉ាងហោចណាស់ ១៦ ឬ ១៨ ក្រុម ដែលអាចប្រកួតប្រជែងគ្នាបាន។ នៅទីនេះ យើងត្រូវលេងជាមួយក្រុមដដែលៗ ៦ ឬ ៧ ដង។ ឧទាហរណ៍ ស្វាយរៀង និង ភ្នំពេញក្រោន គឺតែងតែជួបគ្នាដដែលៗ»។

លោក Munoz បានបន្ត ថា៖ «អំពីការត្រឡប់មកវិញ អ្នកមិនអាចដឹងបានទេ។ ខ្ញុំគឺពណ៌ខៀវ។ ខ្ញុំមានអារម្មណ៍ថា ខ្ញុំជារបស់ ស្វាយរៀង។ ពួកគេបានផ្តល់អ្វីៗគ្រប់យ៉ាងមកឲ្យខ្ញុំ។ ទីនេះដូចជាគ្រួសាររបស់ខ្ញុំ។ […] អនាគត អ្នកមិនអាចដឹងបានទេ។ អ្នកមិនអាចនិយាយថា ទេ ទាំងស្រុងបានទេ ប៉ុន្តែខ្ញុំមើលមិន​ឃើញខ្លួនឯងត្រឡប់មក​ដឹក​នាំ​ក្លិបផ្សេងនៅកម្ពុជាទេ»។

គួរឱ្យដឹងផងដែរ ថា លោក Pep Munoz រកបានទ្រនំថ្មីដើម្បីដឹកនាំហើយ បន្ទាប់ពីលោកចាកចេញពីក្រុម Shenzhen Peng City កាលពីខែ វិច្ឆិកា ឆ្នាំ ២០២៥ ដោយកាលពីថ្ងៃទី ២៦ ខែ មីនា ឆ្នាំ ២០២៦ លោកត្រូវបានប្រកាសចូលរួមជាមួយក្រុម Bengaluru FC នៃលីគកំពូល ឥណ្ឌា៕

អត្ថបទ៖ សេម កុសល

The post លោក Munoz មានហេតុផលធំ ២ ធ្វើឱ្យលោកមិនចង់ដឹកនាំក្រុមកម្ពុជាផ្សេង ក្រៅពីព្រះខ័នរាជស្វាយរៀង appeared first on Kampuchea Thmey Daily.

ក្លិប Bengaluru FC នៃលីគកំពូល ឥណ្ឌា បានប្រកាសជាផ្លូវការនៅថ្ងៃ ព្រហស្បតិ៍ ទី ២៦ ខែ មីនា ឆ្នាំ ២០២៦ អំពីការចុះកិច្ចសន្យាយកលោក Pep Munoz មកដឹកនាំ ចាប់ពីពេលនេះតទៅ។ យ៉ាងណា មិនមានព័ត៌មានណាមួយ បញ្ជាក់អំពីកាលបរិច្ឆេទ និងតម្លៃនៃកិច្ចសន្យារបស់ភាគីទាំង ២ ឡើយ។

មុនប្រកាសតែងតាំងអតីតគ្រូបង្វឹកក្រុម ព្រះខ័នរាជស្វាយរៀង និង Shenzhen Peng City រូបនេះជាគ្រូបង្គោលថ្មី ក្លិប Bengaluru FC បានប្រើប្រាស់លោក Renedy Singh ជាគ្រូបណ្តោះអាសន្ន។ លទ្ធផលចាប់ផ្តើមរដូវកាល ៦ ប្រកួត ដែលដឹកនាំដោយលោក Renedy Singh គឺក្រុម Bengaluru FC ឈ្នះ ៣ ស្មើ ២ និងចាញ់ ១ មាន ១១ ពិន្ទុ ខណៈបច្ចុប្បន្នឈរនៅលេខរៀងទី ៥ ក្នុងលីគកំពូល ឥណ្ឌា។

ក្រុម Bengaluru FC នេះ ក៏ជាក្រុមជោគជ័យមួយផងដែរ កាលពីអតីតកាល។ ពួកគេធ្លាប់ឈ្នះជើងឯកលីគ ឥណ្ឌា បានចំនួន ៤ លើក គឺនៅរដូវកាល ២០១៣-១៤, ២០១៥-១៦, ២០១៧-១៨ និង ២០១៨-១៩។ បច្ចុប្បន្នពួកគេក៏នៅតែជាក្រុមលំដាប់មួយផងដែរក្នុងលីគកំពូល ឥណ្ឌា គ្រាន់តែពុំសូវជោគជ័យខ្លាំងដូចមុន។

រឿងដ៏ចាប់អារម្មណ៍មួយទៀត ក្លិប Bengaluru FC នេះ គឺជាទ្រនំរបស់វីរបុរសឥណ្ឌាកីឡាករ Sunil Chhetri ដែលលេងតាំងពីឆ្នាំ ២០១៥ ដល់បច្ចុប្បន្ន៕

អត្ថបទ៖ សេម កុសល

The post ផ្លូវការ! លោក Pep Munoz បានចុះកុងត្រាដឹកនាំក្លិបជើងឯកលីគ ឥណ្ឌា ៤ សម័យកាល appeared first on Kampuchea Thmey Daily.

លោក Pep Munoz បានដឹកនាំក្រុម ព្រះខ័នរាជស្វាយរៀង ២ រដូវកាលពីខែ មិថុនា ឆ្នាំ ២០២៣ ដល់ខែ ឧសភា ឆ្នាំ ២០២៥ ជាមួយភាពជោគជ័យជាច្រើន ដោយបានជួយឱ្យក្រុមរហស្សនាមព្រះខ័នខៀវ ឈ្នះពានលីគកំពូល កម្ពុជា Cambodian Premier League ២ លើក និងពានសម្តេចតេជោ ១ លើក។

យ៉ាងណាមិញ ចំពោះការដឹកនាំក្រុម ព្រះខ័នរាជស្វាយរៀង ២ រដូវកាលមកនេះ លោក Pep Munoz ហាក់មានអនុស្សាវរីយ៍ល្អៗជាច្រើននៅទីនេះ ប៉ុន្តែលោកបានបង្ហើប ថា ការចងចាំដ៏ល្អបំផុតរបស់លោក គឺអំឡុងពេលដឹកនាំក្រុម ជួបជាមួយ ភ្នំពេញក្រោន ក្នុងវគ្គផ្តាច់ព្រ័ត្រពានសម្តេចតេជោនៅរដូវកាល ២០២៣-២០២៤។

លោកឱ្យដឹងថា នៅពេលនោះ គឺជាយប់ដ៏អស្ចារ្យ បន្ទាប់ពីក្រុមលោកបានលើកពាន ព្រោះការប្រកួតនោះពិតជាស្វិត​ស្វាញខ្លាំងរហូតដល់ម៉ោងបន្ថែម។ ជាមួយគ្នានេះ ការប្រកួតមានអ្នកគាំទ្រចូលទស្សនាផ្ទាល់យ៉ាងច្រើនធ្វើឱ្យលោកមិននឹកស្មានដល់ ដោយមានចំនួនរហូតដល់ទៅ ៣ ម៉ឺននាក់ឯណោះ។

ថ្លែងនៅក្នុងកិច្ចសម្ភាសជាមួយ «កម្ពុជាថ្មី» គ្រូបង្វឹកសញ្ជាតិ អេស្ប៉ាញ បានមានប្រសាសន៍ ថា៖ «អំពីអនុស្សាវរីយ៍ល្អៗ ខ្ញុំគិតថា ការឈ្នះពានលីគពីរលើក និងពានសម្តេចហ៊ុន សែន គឺពិតជាអស្ចារ្យ។ ប៉ុន្តែបើត្រូវជ្រើសរើសមួយ ខ្ញុំនឹងជ្រើសរើសពានសម្តេចតេជោដំបូង ព្រោះវាប្រព្រឹត្តនៅពហុកីឡដ្ឋានអូឡាំពិក មានអ្នកទស្សនា ៣ ម៉ឺននាក់។ វាជាយប់ដ៏អស្ចារ្យណាស់ ជាមួយការប្រកួតបន្ថែមម៉ោង និងគ្រាប់បាល់សំខាន់ៗ។ ខ្ញុំមិនដឹងថាមានមនុស្សច្រើនដល់ប៉ុណ្ណឹងទេ រហូតដល់ចប់ការប្រកួត»។

ទោះបីជាយ៉ាងណា លោក Pep Munoz ក៏មានរឿងសោកស្តាយនៅក្នុងចិត្តផងដែរ អំឡុងពេលដឹកនាំក្រុម ព្រះខ័នរាជស្វាយរៀង។ លោកបានឱ្យដឹង ថា រឿងសោកស្តាយសម្រាប់លោក គឺមិនអាចជួយឱ្យ ព្រះខ័នរាជស្វាយរៀង ឈ្នះពាន AFC Challenge League បាន បន្ទាប់ពីឡើទៅដល់វគ្គផ្តាច់ព្រ័ត្រចាញ់ក្រុម FK Arkadag។ ផ្ទុយមកវិញ លោកមើលឃើញ ថា វាក៏មានរឿងវិជ្ជមាននៅក្នុងនោះផងដែរ ដ្បិតក្រុមបរាជ័យក៏ពិតមែន ប៉ុន្តែវាជាការសម្រេចបាននូវសមិទ្ធផលដ៏ធំមួយសម្រាប់ក្លិប និងបាល់ទាត់កម្ពុជា។

ថ្លែងប្រាប់ «កម្ពុជាថ្មី» លោក Pep បានមានប្រសាសន៍ ថា៖ «អំពីអនុស្សាវរីយ៍អាក្រក់ ប្រហែលជាការបរាជ័យនៅវគ្គផ្តាច់ព្រ័ត្រ AFC Challenge League។ វាជាការខកចិត្ត ប៉ុន្តែវាជាផ្នែកមួយនៃកីឡា។ ទោះបីជាយ៉ាងណា ពេលក្រឡេកមើលត្រឡប់ក្រោយ វាក៏ជាអនុស្សាវរីយ៍ល្អដែរ ព្រោះវាជាការសម្រេចបានដ៏ធំមួយសម្រាប់ក្លិប និងបាល់ទាត់កម្ពុជា»។

គួរបញ្ជាក់ផងដែរ ថា លោក Pep Munoz បច្ចុប្បន្នមិនទាន់មានការងារថ្មីនៅឡើយទេ បន្ទាប់ពីចាកចេញពី ព្រះខ័នរាជស្វាយរៀង និង Shenzhen Peng City៕

អត្ថបទ៖ សេម កុសល

The post លោក Munoz បង្ហើបរឿងចងចាំបំផុត និងសោកស្តាយបំផុត ពេលដឹកនាំ ព្រះខ័នរាជស្វាយរៀង appeared first on Kampuchea Thmey Daily.

លោក​គ្រូ​បង្វឹក​របស់​ព្រះខ័ន​រាជ​ស្វាយរៀងបច្ចុប្បន្ន និង​អតីត​គ្រូ​បង្វឹក​​​បាន​​លើក​ឡើង​ជា​រឿយ​ៗ​អំពី​​បញ្ហា​​ស្មៅ​​​នៅ​ក្នុង​ពហុកីឡដ្ឋាន​ជាតិ​អូឡាំពិក​មិន​ល្អ​។ ​លោក Pep Munoz បាន​មក​ទស្សនា​ការ​ប្រកួតចុង​ក្រោយ​របស់​លោក​នៅ​ពហុកីឡដ្ឋាន​ជាតិ​អូឡាំពិក កាល​ពី​ថ្ងៃ​ទី​៥ ខែ​មីនា ឆ្នាំ ២០២៦ ជា​ពេល​ ព្រះ​ខ័ន​រាជ​ស្វាយរៀង ​បាន​​ឈ្នះ ភ្នំពេញក្រោន ៤-១ ក្នុង​ពាន​រង្វាន់ AFC Challenge League។

ក្រោយ​ទស្សនា​ការ​ប្រកួត​នោះ​ លោក Pep Munoz បាន​ផ្តល់​បទ​សម្ភាស​ដល់​«កម្ពុជា​ថ្មី»។ ក្នុង​​បទ​សម្ភាស​នោះ បុរសញ្ជាតិ​អេស្ប៉ាញ​បាន​លើក​ឡើង​ថា ៖«គុណភាព​ស្មៅ​នៅ​ទី​លាន​ពហុកីឡដ្ឋាន​ជាតិ​អូឡាំពិក​ពិត​ បើ​យើង​មើល​ពី​កន្លែង​អង្គុយ​ទៅ យើង​មិន​អាច​មើល​ឃើញ​ច្បាស់ពី​បញ្ហា​យ៉ាង​ណា​ទេ ប៉ុន្តែ​បើ​ចុះ​ទៅ​ដល់​ទី​លាន​ផ្ទាល់ ហើយ​សាក​ល្បង​បញ្ជូន​បាល់។ យើង​នឹង​ឃើញ​ថា​ បាល់​លោត​ខ្លាំង ពិបាក​ទប់ ពិបាក​បញ្ឈប់ ពិបាក​គ្រប់​គ្រង។ យើង​អាច​ទប់​បាន តែ​មិនសូវ​បាន​​ល្អ ហើយ​ត្រូវ​ទប់​ពីរ​បី​​ដង​»។

ចំណែក​លោក Mattew McConkey បាន​​រិះ​គន់​ពី​ស្មៅ​ធម្មជាតិ​នៅ​ក្នុង​ពហុកីឡដ្ឋាន​ជាតិ​អូឡាំពិក​តាំង​ពី​ដើម​រដូវ​កាល​មក​ម្ល៉េះ​ពោល​គឺ​តាំង​ពី​លោក​ដឹក​នាំ ព្រះ​ខ័ន​រាជ​ស្វាយរៀង ប្រកួត​ជា​មួយ ភ្នំពេញ​ក្រោន ក្នុង​ពាន​រង្វាន់​បើក​រដូវ​កាល ខេមបូឌានស៊ុបភើ​ខាប់។ ការ​ប្រកួត​ជា​បន្ត​បន្ទាប់​ទៀត​នៅ​ទី​លាន​ដដែល​នេះ លោក​ក៏​តែង​តែ​លើក​ឡើង​ពី​បញ្ហា​​ស្មៅ​ជា​រឿយ​ៗ​ទៀត។

ចុង​ក្រោយ​បំផុត​នៅ​ពេល ព្រះ​ខ័ន​រាជ​ស្វាយរៀង ស្មើ​ជា​មួយ បឹងកេត ០-០ កាល​ពី​ថ្ងៃ​ទី២២ ខែ​មីនា ឆ្នាំ ២០២៦ ​លោក Mattew McConkey បានលើក​ឡើងទៀត​ថា ៖«ខ្ញុំ​បាន​និយាយអំពី​ស្មៅ​​នៅ​ទី​នោះ​រាល់​ពេល​ចប់​ការ​ប្រកួត រាប់​ចាប់​តាំង​ពី​ពាន Super Cup លីគ និង​សន្និសីទ​ក្រោយ​ការ​ប្រកួត AFC។ សូមអ្នក​រាល់​គ្នា​ទៅ​មើល​ដោយសេរី។ វា​មិន​មែន​ជា​លេស​ទេ តែ​វា​ពិត​ជា​ប៉ះ​ពាល់​ដល់​ការ​ប្រកួត​មែន»។

រហូត​ដល់​ពេល​​នេះ លោក Mattew McConkey បាន​ដឹក​នាំ​ក្រុម​ប្រកួត​នៅ​ទី​លាន​ពហុកីឡដ្ឋាន​ជាតិ​អូឡាំពិក​ចំនួន ៤​ លើក​ហើយ​ក្នុង​នោះ​ឈ្នះ ២ ស្មើ ១ និង​ចាញ់ ១ មាន​ដូច​ជា ឈ្នះ ភ្នំពេញ​ក្រោន ដោយ​ប៉េណាល់ទី​ ៥-៣ បន្ទាប់​ពី​ស្មើ​គ្នា ២-២ ពាន​បើករ​ដូវ​កាលខេមបូឌានស៊ុបភើខាប់, ឈ្នះ ភ្នំពេញក្រោន ៤-១ ក្នុង​ពាន AFC និង​ការ​ប្រកួត​ក្នុង​លីគ​បាន​ចាញ់ បឹងកេត ១-២ មុន​ពេល​ស្មើ ០-០៕

អត្ថបទ៖ វិរបុត្រ

The post លោក McConkey និង លោក Munoz សុទ្ធ​តែ​រិះ​គន់​​ស្មៅ​ស្តាត​អូឡាំពិក​មិន​ល្អ appeared first on Kampuchea Thmey Daily.

អំឡុងពេលក្រុមម្ចាស់ផ្ទះ ភ្នំពេញក្រោន ចាញ់ក្រុម ព្រះខ័នរាជស្វាយរៀង ៤-១ ក្នុងការប្រកួតជើងទី ១ នៅពហុកីឡដ្ឋានជាតិអូឡាំពិក កាលពីថ្ងៃ ព្រហស្បតិ៍ ទី ៥ ខែ មីនា លោក Pep Munoz បានទៅទស្សនាផ្ទាល់ផងដែរ។ លោកយល់ ថា នៅវគ្គទី ១ ភ្នំពេញក្រោន ធ្វើបានល្អជាង ដោយពួកគេអាចមានឱកាសរកបានដល់ ២ គ្រាប់ ប៉ុន្តែពួកគេសម្រេចបានត្រឹមតែ ១ គ្រាប់។

យ៉ាងណា លោកបាន​សរសើរពី ព្រះខ័នរាជស្វាយរៀង នៅរដូវកាលនេះ ពិតជាល្អខ្លាំង។ ពួកគេមាន Kwame Peprah, Patrick Robson, Cristian Roque និង Connor។ តាមរយៈសមាសភាពកីឡាករទាំងនេះ លោកយល់ ថា ព្រះខ័នរាជស្វាយរៀង ពិតជាមិនពិបាកក្នុងការរកគ្រាប់បាល់ទេសម្រាប់ការប្រកួតនីមួយៗ យ៉ាងហោចណាស់ក៏ ១ ប្រកួតរកបាន ១ គ្រាប់ដែរ។

ដោយឡែកការប្រកួតជើងទី ២ នៅថ្ងៃ ព្រហស្បតិ៍ ទី ១២ ខែ មីនា ឆ្នាំ ២០២៦ លោកបានបង្ហាញនូវការវិភាគសុទិដ្ឋិនិយមមួយ ថា ភ្នំពេញក្រោន អាចមានលទ្ធភាព វាយបកយកឈ្នះ ព្រះខ័នរាជស្វាយរៀង វិញ ព្រោះ «បាល់ទាត់ អ្វីក៏អាចកើតឡើងបានដែរ»។ ជាមួយគ្នានេះ លោកបានបន្ថែម ថា ព្រះខ័នរាជស្វាយរៀង ជាក្រុមដែលមានគុណភាពខ្លាំង។ ដូច្នេះបើ ភ្នំពេញក្រោន ចង់យកឈ្នះ គឺត្រូវតែលេងឱ្យបាន«ល្អឥតខ្ចោះ»។

ថ្លែងប្រាប់សារព័ត៌មាន «កម្ពុជាថ្មី» បុរសសញ្ជាតិ អេស្ប៉ាញ វ័យ ៤៦ ឆ្នាំបានមានប្រសាសន៍ ថា ៖ «ទោះ​ជា​ ព្រះខ័នរាជស្វាយរៀងឈ្នះក្នុងលទ្ធផល ៤-១ ពិតមែន តែការប្រកួតទីពីរមិនទាន់ចប់ទេ។ វាជាបាល់ទាត់ អ្វីក៏អាចកើតឡើងបាន។ ដូច​ខ្ញុំបាននិយាយ វាពិបាកស្រមៃថា ស្វាយរៀង នឹងមិនអាចរកបានគ្រាប់បាល់ណាស់ ព្រោះពួកគេមានកីឡាករល្អនៅខាងមុខ ប៉ុន្តែ ភ្នំពេញក្រោន ត្រូវលេងឱ្យល្អឥតខ្ចោះ។ ប្រសិនបើពួកគេលេងបានល្អឥតខ្ចោះ ពួកគេក៏មានឱកាសដែរ។ វាមាន ៩០ ទៅ ៩៥ នាទី ។ ពួកគេត្រូវព្យាយាមឈ្នះនៅកន្លះម៉ោងដំបូង ហើយបន្ទាប់មកព្យាយាមឈ្នះវគ្គទីពីរ។ នៅចុងក្រោយ ចាំមើលលទ្ធផល»។

គួរបញ្ជាក់ជាថ្មី ថា ការប្រកួតជើងទី ២ វគ្គ ៨ ក្រុមពាន ACGL រវាង ព្រះខ័នរាជស្វាយរៀង និង ភ្នំពេញក្រោន នឹងធ្វើឡើងនៅ ពហុកីឡដ្ឋានជាតិមរតកតេជោ ថ្ងៃ ព្រហស្បតិ៍ ទី ១២ ខែ មីនា ឆ្នាំ ២០២៦។ យ៉ាងណា សម្រាប់ការប្រកួតជើងទី ២ នេះ បើ ភ្នំពេញក្រោន ចង់ឡើងទៅវគ្គបន្ត គឺត្រូវតែយកឈ្នះ ព្រះខ័នរាជស្វាយរៀង ចាប់ពី ៤ គ្រាប់ឡើងទៅ៕

អត្ថបទ៖ សេម កុសល

The post លោក Pep វិភាគថា ភ្នំពេញក្រោន អាចមានលទ្ធភាពវាយបក ព្រះខ័នរាជស្វាយរៀង ជើងទី ២ appeared first on Kampuchea Thmey Daily.