SEA V. League Archives - Kampuchea Thmey Daily

ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League

Kosal Sem — Sat, 19 Jul 2025 03:00:12 +0000

នាម៉ោង ៧ ល្ងាចនេះ ថ្ងៃ សៅរិ៍ ទី ១៩ ខែកក្កដា ឆ្នាំ ២០២៥ ក្រុមបាល់ទះជម្រើសជាតិ កម្ពុជា នឹងត្រូវមានភារកិច្ចប្រកួតចុងក្រោយក្នុងពាន SEA V League ២០២៥ ទល់នឹងក្រុមបាល់ទះជម្រើសជាតិ ឥណ្ឌូណេស៊ី។

ក្រុមបាល់ទះជម្រើសជាតិ កម្ពុជា

ការជួបគ្នាកាលពីថ្ងៃទី ១១ ខែកក្កដា ឆ្នាំ ២០២៥ នៅប្រទេសហ្វីលីពីន ក្នុងជុំទី១ នៃពានរង្វាន់ដដែលនេះ កម្ពុជា ធ្វើមិនបានល្អនោះទេ ដោយការប្រកួតនោះបានចាញ់ ឥណ្ឌូណេស៊ី ក្នុងលទ្ធផល ៣ សិតទល់នឹង ០។

យ៉ាងណា ទាំងការប្រកួត កាលពីជើងទី ១ និងជើងទី ២ នេះ ដែលកំពុងប្រព្រឹត្តទៅនៅ ឥណ្ឌូណេស៊ី គឺ កម្ពុជា មិនទាន់រកបានជ័យជម្នះសូម្បីមួយប្រកួតនៅឡើយទេ ដោយឆ្លងកាត់ការប្រកួតសរុប ៧ ប្រកួត ចាញ់ទាំង ៧ ប្រកួត។ តាមរយៈលទ្ធផលនេះ បានធ្វើឱ្យ កម្ពុជា កំពុងប្រឈមជួបស្ថានភាពមិនល្អ ដោយអាចធ្លាក់ទៅលេងពានទី ២ SEA V. League Challenge វិញនៅឆ្នាំក្រោយ ២០២៦។

ក្រុមបាល់ទះជម្រើសជាតិ ឥណ្ឌូណេស៊ី

គួរឱ្យដឹងថា ការប្រកួតទល់នឹង ឥណ្ឌូណេស៊ី ល្ងាចនេះ គឺជាការប្រកួតទី ៤ ក្នុងជើងទី ២ នេះ ហើយក៏ជាការប្រកួតចុងក្រោយសម្រាប់ កម្ពុជា ក្នុងពាននេះផងដែរ។ ប្រវត្តិជួបគ្នា ៦ លើកចុងក្រោយគិតចាប់តាំងពីឆ្នាំ ២០១១ មក កម្ពុជា មិនទាន់ទាន់ស្គាល់ជ័យជម្នះលើ ឥណ្ឌូណេស៊ី សូម្បីម្តង។

ខាងក្រោមនេះជាលទ្ធផលជួបគ្នាទាំង ៦ លើករវាងក្រុមបាល់ទះ កម្ពុជា និង ហ្វីលីពីន៖

កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ២០១១)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០១៥)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០១៩)
កម្ពុជា ចាញ់ ឥណ្ឌូណេស៊ី ១-៣ (កីឡាស៊ីហ្គេម ឆ្នាំ ២០២១)
កម្ពុជា ចាញ់ ឥណ្ឌូណេស៊ី ០-៣ (កីឡាស៊ីហ្គេម ឆ្នាំ ២០២៣)
កម្ពុជា ចាញ់ ឥណ្ឌូណេស៊ី ០-៣ (ជើងទី ១ ពាន SEA V League ២០២៥)៕

កម្ពុជា និង ឥណ្ឌូណេស៊ី កាលស៊ីហ្គេម ២០២៣

អត្ថបទ៖ សេម កុសល

The post ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League appeared first on Kampuchea Thmey Daily.

ទើបចាញ់ថ្មីៗ ក្រុមបាល់ទះ កម្ពុជា ប៉ះ វៀតណាម ម្តងទៀត រសៀលនេះ

chean virakbot — Wed, 16 Jul 2025 01:16:54 +0000

ម៉ោង ៤ រសៀល ថ្ងៃទី ១៦ ខែកក្កដា ឆ្នាំ ២០២៥ ក្រុមបាល់ទះជម្រើសជាតិ កម្ពុជា ត្រូវប្រកួតជាមួយ ក្រុមបាល់ទះជម្រើសជាតិ វៀតណាម ក្នុងពាន SEA V. League ជុំទី២ នៅប្រទេសឥណ្ឌួណេស៊ី។

ប្រធានក្រុមវៀតណាម និង ប្រធានក្រុមកម្ពុជា

ជួបគ្នាកាលពីថ្ងៃទី១០ ខែកក្កដា ឆ្នាំ ២០២៥ នៅប្រទេសហ្វីលីពីន ក្នុងជុំទី១ ពានរង្វាន់ដដែលនេះ កម្ពុជា បានចាញ់ វៀតណាម ដោយមិនអាចតដៃរួច ក្នុងលទ្ធផល ០-៣ ។ បន្ទាប់មក កម្ពុជា ចាញ់ ឥណ្ឌូណេស៊ី ហ្វីលីពីន និងថៃ ហើយរកបានតែ១ពិន្ទុប៉ុណ្ណោះស្ថិតនៅបាតតារាង។ វៀតណាម ទទួលបានមេដាយសំរិទ្ធ។

កម្ពុជា ស្ថិតនៅលេខ៥ ដោយទទួលបានប្រាក់ ៩០០០ដុល្លារ

ការប្រកួតជុំទី២ ក្រុមបាល់ទះកម្ពុជាត្រូវខិតខំប្រឹងប្រែង និងកែប្រែចំណុចខ្វះខាតមែនទែនដើម្បីធ្វើឲ្យប្រសើរឡើង។ ជាពិសេសធ្វើយ៉ាងណា កម្ពុជាត្រូវរក្សាកៅអីឲ្យបានទៅឆ្នាំក្រោយទៀតក្នុងពានរង្វាន់នេះ។ ម្យ៉ាងវិញ ការចាញ់ ៤ លើកកាលពីជុំទី១ កម្ពុជា បានធ្លាក់ពីចំណាត់ថ្នាក់លេខ ៦៦ ដល់ ៧៥ ក្នុងតារាងបាល់ទះពិភពលោក FIVB Ranking ដែលបាត់បង់ពិន្ទុជាច្រើន។

ប្រវត្តិជួបគ្នា ៤ លើកចុងក្រោយគិតចាប់តាំងពីឆ្នាំ ២០១១ កម្ពុជា បានឈ្នះ១លើក ខណៈ វៀតណាម បានឈ្នះ ៣លើក។

វៀតណាម ទទួលបានមេដាយសំរិទ្ធ បានប្រាក់ ១១០០០ដុល្លារ

ខាងក្រោមនេះជាលទ្ធផលជួបគ្នាទាំង ៤ លើករវាងក្រុមបាល់ទះ កម្ពុជា និងវៀតណាម៖

កម្ពុជា ចាញ់ វៀតណាម ០-៣ ក្នុងស៊ីហ្គេមឆ្នាំ ២០១១
កម្ពុជា ចាញ់ វៀតណាម ០-៣ ក្នុងស៊ីហ្គេមឆ្នាំ ២០១៥
កម្ពុជា ឈ្នះ វៀតណាម ៣-២ ក្នុងកីឡាស៊ីហ្គេម ឆ្នាំ ២០១៩
កម្ពុជា ចាញ់ វៀតណាម ០-៣ ក្នុងពាន SEA V League ឆ្នាំ ២០២៥

អត្ថបទ៖ កុសល

The post ទើបចាញ់ថ្មីៗ ក្រុមបាល់ទះ កម្ពុជា ប៉ះ វៀតណាម ម្តងទៀត រសៀលនេះ appeared first on Kampuchea Thmey Daily.

ក្រុមបាល់ទះកម្ពុជា ធ្លាក់ច្រើនលេខពីតារាង FIVB ក្រោយចប់ SEA V. League ជុំទី១

chean virakbot — Mon, 14 Jul 2025 02:36:43 +0000

បរាជ័យ ៤ ប្រកួតជាប់គ្នាក្នុងព្រឹត្តិការណ៍ SEA V. League ជុំទី១ ឆ្នាំ ២០២៥ ក្រុមបាល់ទះជម្រើសជាតិ កម្ពុជា បានធ្លាក់ពីលេខ ៦៦ ដល់ លេខ ៧៥ ក្នុងតារាងចំណាត់ថ្នាក់បាល់ទះពិភពលោក FIVB Ranking។

ក្រុមកម្ពុជាឈ្នះមេដាយប្រាក់ស៊ីហ្គេម ២០២៣

សហព័ន្ធកីឡាបាល់ទះអន្តរជាតិ (FIVB) បានបញ្ចូលចំណាត់ថ្នាក់របស់ក្រុមបាល់ទះ កម្ពុជា ជាផ្លូវការកាលពីថ្ងៃទី ១០ ខែកក្កដា ឆ្នាំ ២០២៥ ស្ថិតនៅចំណាត់ថ្នាក់លេខ ៦៦ ដោយមាន ៤២.២៦ ពិន្ទុ។ ការទទួលបានចំណាត់ថ្នាក់ល្អនេះ បន្ទាប់ពីប៉ុន្មានឆ្នាំចុងក្រោយ កម្ពុជាធ្វើបានល្អទាំងក្នុងព្រឹត្តិការណ៍កីឡាស៊ីហ្គេម និង SEA V. League Challenge ឆ្នាំ២០២៤។

ក្រុមកម្ពុជា ទទួលប្រាក់ ៩០០០ដុល្លារ

ទោះបីជាយ៉ាងណា ការចាញ់ ៤ លើកជាប់គ្នាក្នុងព្រឹត្តិការណ៍ SEA V. League ជុំទី១ដែលបញ្ចប់ទៅកាលពីថ្ងៃទី១៣ ខែកក្កដា កម្ពុជាបាត់បង់ពិន្ទុចំនួន ២៥.១៥ ដែលធ្វើឲ្យធ្លាក់ដល់ចំណាត់ថ្នាក់លេខ ៧៥ ដោយនៅសល់ត្រឹមតែ ២៤.៨៥ពិន្ទុ។ កម្ពុជា ចាញ់ វៀតណាម ០-៣ បាត់បង់ ៧.៧៤ពិន្ទុ, ចាញ់ ឥណ្ឌូណេស៊ី ០-៣ បាត់បង់ ៧.៤៥ពិន្ទុ, ចាញ់ ហ្វីលីពីន ២-៣ បាត់បង់ ៣.៦២ពិន្ទុ និងចាញ់ ថៃ ០-៣ បាត់បង់ ៦.៣៤ពិន្ទុ។

ប្រទេសនៅតំបន់អាស៊ានមានតែ ថៃ ឥណ្ឌូណេស៊ី វៀតណាម ហ្វីលីពីន និង កម្ពុជា ដែលមាននៅក្នុងតារាងចំណាត់ថ្នាក់ FIVB Ranking រហូតដល់ពេលនេះ ខណៈប្រទេសផ្សេងទៀត ដូចជា ម៉ាឡេស៊ី សិង្ហបុរី ឡាវ មីយ៉ាន់ម៉ា ព្រុយណេ និង ទីម័រខាងកើត មិនទាន់មានទេ។

តារាងចំណាត់ថ្នាក់ក្រុមតំបន់អាស៊ាន

ថៃ លេខ ៥៥ មាន ៦៥.៤០ពិន្ទុ
ឥណ្ឌូណេស៊ី លេខ ៦០ មាន ៦១.៨៤ពិន្ទុ
វៀតណាម លេខ ៦១ មាន ៥៤.១០ពិន្ទុ
ហ្វីលីពីន លេខ ៧០ មាន ៣៤.៦៨ពិន្ទុ
កម្ពុជា លេខ ៧៥ មាន ២៤.៨៥ពិន្ទុ

អត្ថបទ៖ វីរបុត្រ

The post ក្រុមបាល់ទះកម្ពុជា ធ្លាក់ច្រើនលេខពីតារាង FIVB ក្រោយចប់ SEA V. League ជុំទី១ appeared first on Kampuchea Thmey Daily.

ក្រុមបាល់ទះកម្ពុជា ទទួលបានប្រាក់ ៩០០០ដុល្លារពីការចូលរួមប្រកួតពាន SEA V. League ជុំទី១

chean virakbot — Mon, 14 Jul 2025 01:11:45 +0000

ក្រុមបាល់ទះជម្រើសជាតិ កម្ពុជា បានបញ្ចប់ចំណាត់ថ្នាក់លេខ ៥ សម្រាប់ការចូលរួមប្រកួតពានរង្វាន់ SEA V. League ឆ្នាំ ២០២៥ បន្ទាប់ពីបានចាញ់ទាំង ៤ ប្រកួត សម្រាប់ការប្រកួតជុំទី១ នៅប្រទេសហ្វីលីពីន។

ការប្រកួតទី១ កម្ពុជា បានចាញ់ វៀតណាម ដោយលទ្ធផល ០-៣, ការប្រកួតទី២ បានចាញ់ ឥណ្ឌូណេស៊ី ០-៣, ការប្រកួតទី៣ បានចាញ់ ហ្វីលីពីន ២-៣ និងការប្រកួតចុងក្រោយបានចាញ់ ថៃ ០-៣។ តាមរយៈលទ្ធផលនេះ កម្ពុជា រកបាន១ពិន្ទុ គត់ ស្ថិតនៅបាតតារាង។

ថៃបានក្លាយជាជើងឯក (មេដាយមាស) ដោយសាររកបាន ៩ពិន្ទុ ទទួលបានប្រាក់រង្វាន់ ១៣០០០ដុល្លារអាមេរិក។ ចំណាត់ថ្នាក់លេខ ២ បានទៅ ឥណ្ឌូណេស៊ី ដោយទទួលបានប្រាក់រង្វាន់ ១២០០០ដុល្លារ។ លេខ៣ បានទៅ វៀតណាម ដោយទទួលបាន ១១០០០ដុល្លារ។ លេខ៤ បានទៅម្ចាស់ផ្ទះ ហ្វីលីពីន ដោយទទួលបានប្រាក់រង្វាន់ ១០០០០ ដុល្លារ និងលេខ៥ បានទៅកម្ពុជា ដោយទទួលបានប្រាក់រង្វាន់ ៩០០០ ដុល្លារអាមេរិក។

នៅថ្ងៃទី១៦ ខែកក្កដា ខាងមុខនេះ ការប្រកួតជុំទី២ នៅប្រទេសឥណ្ឌូណេស៊ី ដែលក្រុមទាំង ៥ ត្រូវប្រកួតគ្នាសាថ្មី ដូច្នេះកម្ពុជាត្រូវការកែលំអចំណុចខ្វះខាតច្រើនមែនទែន ពីព្រោះមានកីឡាករវាយផ្តាច់ល្អហើយ ប៉ុន្តែកីឡាករប៉ះសេនៅមានកម្រិត ហើយកម្លាំងស្មារតីក៏លេងមិនសូវយល់ចិត្តគ្នាថែមទៀត៕

ក្រុមកីឡាករល្អប្រចាំការប្រកួតមាន

កីឡាករល្អប្រចាំព្រឹត្តិការណ៍ គឺ Amorntep Konhan (ថៃ)
អ្មកប៉ះសេល្អ គឺ Jasen Natanael (ឥណ្ឌូណេស៊ី)
ស្មាត់ស្តាំល្អ គឺ Nguyen Ngoc Thuan (វៀតណាម) និង Boy Arnez (ឥណ្ឌូណេស៊ី)
ស្មាត់ឆ្វេងល្អគឺ Leo Ordiales (ហ្វីលីពីន)
អ្នកការពារល្អ គឺ Kissada Nilsawai (ថៃ) និង Tran Duy Tuyen (វៀតណាម)
លីប៊ើរ៉ូល្អ៖ Tanapat Charoensuk (ថៃ)

អត្ថបទ៖ វីរបុត្រ

The post ក្រុមបាល់ទះកម្ពុជា ទទួលបានប្រាក់ ៩០០០ដុល្លារពីការចូលរួមប្រកួតពាន SEA V. League ជុំទី១ appeared first on Kampuchea Thmey Daily.

ចប់ជុំទី១ កម្ពុជា ចាញ់ទាំង ៤ ប្រកួត រកបាន១ពិន្ទុ ពាន SEA V. League

chean virakbot — Sun, 13 Jul 2025 08:25:44 +0000

ក្រុមបាល់ទះជម្រើសជាតិ កម្ពុជា ធ្វើមិនបានល្អទេសម្រាប់ការចូលរួមប្រកួតពានរង្វាន់ SEA V. League ឆ្នាំ ២០២៥ ដោយបានចាញ់ទាំង ៤ ប្រកួត សម្រាប់ការប្រកួតជុំទី១ នៅប្រទេសហ្វីលីពីន។

ថៃបានក្លាយជាជើងឯក (មេដាយមាស) ហើយ ដោយសាររកបាន ៩ពិន្ទុ ខណៈការប្រកួតរវាង ឥណ្ឌូណេស៊ី និង ហ្វីលីពីន វេលាម៉ោង ៦ល្ងាចនេះ ត្រូវប្រជែងគ្នាដណ្តើមមេដាយ ប្រាក់ ខណៈមេដាយសំរិទ្ធ បានទៅវៀតណាម។

អ្វីដែលគួរឲ្យកត់សំគាល់ ក្រុមដែលកម្ពុជាធ្លាប់ឈ្នះក្នុងព្រឹត្តិការណ៍កីឡាស៊ីហ្គេមប៉ុន្មានឆ្នាំចុងក្រោយ គឺ ថៃ វៀតណាម និង ហ្វីលីពីន សុទ្ធចាញ់ កម្ពុជា ប៉ុន្តែក្នុងព្រឹត្តិការណ៍ SEA V. League នេះកម្ពុជាលេងមិនឈ្នះសោះ។ នេះជាកំណត់ត្រាដ៏អាក្រក់ដែលកម្ពុជាមានកីឡាករចេញទៅលេងនៅក្រៅប្រទេស មានលីគបាល់ទះ និងពានរង្វាន់ជាច្រើនទៀត ប៉ុន្តែបែរជាក្រុមជម្រើសជាតិមិនល្អទៅវិញ។

នៅថ្ងៃទី១៦ ខែកក្កដា ខាងមុខនេះ ការប្រកួតជុំទី២ នៅប្រទេសឥណ្ឌូណេស៊ី ដែលត្រូវប៉ះ ក្រុមទាំង៤សាថ្មី ដូច្នេះកម្ពុជាត្រូវការកែលំអចំណុចខ្វះខាតច្រើនមែនទែន ពីព្រោះមានកីឡាករវាយផ្តាច់ល្អហើយ ប៉ុន្តែនៅកីឡាករប៉ះសេនៅមានកម្រិត ហើយកម្លាំងស្មារតីក៏លេងមិនសូវយល់ចិត្តគ្នាថែមទៀត៕

អត្ថបទ៖ វីរបុត្រ

The post ចប់ជុំទី១ កម្ពុជា ចាញ់ទាំង ៤ ប្រកួត រកបាន១ពិន្ទុ ពាន SEA V. League appeared first on Kampuchea Thmey Daily.

ក្រុមបាល់ទះកម្ពុជា ប៉ះ វៀតណាម រសៀលថ្ងៃនេះ នៅហ្វីលីពីន

Kosal Sem — Thu, 10 Jul 2025 00:59:38 +0000

រសៀល ថ្ងៃ ព្រហស្បតិ៍ ទី ១០ ខែ កក្កដា ឆ្នាំ ២០២៥ ក្រុមបាល់ទះជម្រើសជាតិកម្ពុជា នឹងត្រូវប្រកួតបើកឆាកទល់នឹងក្រុមបាល់ទះជម្រើសជាតិ វៀតណាម នៅក្នុងការពាន SEA V League ២០២៥។

ការប្រកួតរបស់ក្រុមបាល់ទះជម្រើសជាតិ កម្ពុជា នាវេលាម៉ោង ១:៣០ នារីរសៀល គឺជាការប្រកួតដំបូងបង្អស់តែម្តង ដែលកម្ពុជាបានចូលរួមក្នុងពាន SEA V League នេះ។ ការប្រកួតបើកឆាកកាលពីម្សិលមិញ វៀតណាម បានចាញ់ ហ្វីលីពីន ដោយលទ្ធផល ០-៣ ហើយនេះជាការប្រកួតទី២ ពេលជួបកម្ពុជា ដែលជាការប្រកួតទី១។

នៅក្នុងប្រវត្តិពានរង្វាន់អាស៊ានមួយនេះ វៀតណាម ធ្លាប់បានចូលរួម ៣ លើកហើយ គិតតាំងពីឆ្នាំ ២០២៣ គឺពួកគេមិនដែលបានបាត់មុខពីការប្រកួតប្រជែងសូម្បីម្តងឡើយ។ សម្រាប់កម្ពុជា ជាលើកដំបូងដែលបានចូលរួមប្រកួតពាននេះក្នុងនាមជាក្រុមជើងឯក SEA V. League Challenge ឆ្នាំ២០២៤។

បើងាកមកមើលអំពីប្រវត្តិជួបគ្នាកន្លងមក ដោយរាប់តាំងពីឆ្នាំ ២០១១ មក កម្ពុជា និង វៀតណាម ធ្លាប់ជួបគ្នាបានចំនួន ៣ លើក នៅក្នុងព្រឹត្តិការណ៍កីឡាស៊ីហ្គេមប៉ុណ្ណោះ។ ក្នុងនោះជាលទ្ធផលក្រុម វៀតណាម ឈ្នះ ២ លើក និងកម្ពុជា ឈ្នះ ១ លើក។

ខាងក្រោមនេះជាលទ្ធផលជួបគ្នាទាំង ៣ លើករវាងក្រុមបាល់ទះ កម្ពុជា និងវៀតណាម៖

ស៊ីហ្គេមឆ្នាំ ២០១១៖

កម្ពុជា ចាញ់ វៀតណាម ០-៣។

ស៊ីហ្គេមឆ្នាំ ២០១៥៖

កម្ពុជា ចាញ់ វៀតណាម ០-៣។

ស៊ីហ្គេមឆ្នាំ ២០១៩៖

កម្ពុជា ឈ្នះ វៀតណាម ៣-២។

គួរបញ្ជាក់ថា កាលពីថ្ងៃទី ៩ ខែ កក្កដា ឆ្នាំ ២០២៥ ម្សិលមិញ ពាន SEA V League ២០២៥ បានបញ្ចប់ការប្រកួតចំនួន ២ គូហើយ ក្នុងនោះក្រុមជម្រើសជាតិ ថៃ បានឈ្នះ ឥណ្ឌូនេស៊ី ៣ សិតទល់នឹង ១ និងមួយគូទៀត ក្រុមជម្រើសជាតិ ហ្វីលីពីន បានយកឈ្នះ វៀតណាម ៣-០។

ដោយឡែកការប្រកួតនៅថ្ងៃទី ១០ ខែ កក្កដា នេះ ក្រៅពីជំនួបរវាង កម្ពុជា និង វៀតណាម វេលាម៉ោង ១:៣០ នាទីរសៀល គឺនៅមានមួយគូទៀត ដែលជាការជួបគ្នារវាងក្រុមជម្រើសជាតិ ថៃ និងហ្វីលីពីន វេលាម៉ោង ៦:០០ ល្ងាច៕

អត្ថបទ៖ កុសល

The post ក្រុមបាល់ទះកម្ពុជា ប៉ះ វៀតណាម រសៀលថ្ងៃនេះ នៅហ្វីលីពីន appeared first on Kampuchea Thmey Daily.

ពាន SEA V. League ចាប់ផ្តើមថ្ងៃស្អែក កម្ពុជាធ្លាប់ឈ្នះក្រុមខ្លាំង ៣ នេះ លើកលែងឥណ្ឌូណេស៊ី

chean virakbot — Wed, 09 Jul 2025 03:00:47 +0000

ការប្រកួតពានបាល់ទះកម្រិតទី ១ ប្រចាំតំបន់អាស៊ាន SEA V. League ឆ្នាំ ២០២៥ ជុំទី១ នឹងចាប់ផ្តើមនៅថ្ងៃទី១០ ខែកក្កដា ដោយប្រជុំដោយក្រុមបាល់ទះជម្រើសជាតិខ្លាំងទាំង ៥ ប្រចាំតំបន់។

ក្រុមបាល់ទះកម្ពុជា

ការប្រកួតជុំទី១នេះ មានម្ចាស់ផ្ទះ ហ្វីលីពីន ឥណ្ឌូណេស៊ី ថៃ វៀតណាម និង កម្ពុជា។ កម្ពុជាអាចចាត់ទុកជាក្រុមក្មេងខ្ចី និងមានកម្រិតទាបជាងគេនៅក្នុងពានរង្វាន់នេះ ប៉ុន្តែបើគិតប្រវត្តិជួបគ្នានៅក្នុងការប្រកួតផ្សេងៗឃើញថា កម្ពុជាសុទ្ធតែធ្លាប់ឈ្នះលើ ៣ ប្រទេស លើកលែងតែឥណ្ឌូណេស៊ីមួយគត់។

ដោយគ្មានព័ត៌មានច្បាស់ការមុនសម័យសង្គ្រាម ប៉ុន្តែគិតត្រឹមកីឡាស៊ីហ្គេម ពីឆ្នាំ ២០១១ ដល់ ឆ្នាំ ២០២៣ ក្រុមបាល់ទះកម្ពុជា និង ឥណ្ឌូណេស៊ី ធ្លាប់ជួបគ្នាចំនួន ៦ លើក គឺ កម្ពុជា ចាញ់ទាំងអស់ ហើយធ្លាប់ឈ្នះតែ១សិតគត់។

ក្រុមបាល់ទះឥណ្ឌូណេស៊ី

ជាមួគ្នានេះ កម្ពុជា និង ថៃ ធ្លាប់ជួបគ្នា ៦ លើកដែរ ក្នុងនោះថៃ ឈ្នះ ៤ លើកដំបូង ប៉ុន្តែ ២ លើកចុងក្រោយគឺកម្ពុជាជាអ្នកឈ្នះ។ នៅឆ្នាំ ២០២១ កម្ពុជា បានយកឈ្នះ ថៃ ដោយលទ្ធផល ៣-២ នៅប្រទេសវៀតណាម និង ឆ្នាំ ២០២៣ បានឈ្នះ ៣-២ នៅទឹកដីកម្ពុជា។

ក្រុមបាល់ទះថៃ

ចំពោះការជួបគ្នាជាមួយ ហ្វីលីពីន គឺចំនួន ៣ ដង ក្នុងនោះ កម្ពុជា ចាញ់ ១លើក ដោយលទ្ធផល ០-៣ នៅឆ្នាំ ២០១៩ ប៉ុន្តែនៅឆ្នាំ ២០២១ កម្ពុជា បានឈ្នះដោយលទ្ធផល ៣-១ និងឆ្នាំ ២០២៣ បានឈ្នះ ៣-០។

ក្រុមបាល់ទះហ្វីលីពីន

វៀតណាម និង កម្ពុជា ធ្លាប់ជួបគ្នា ៣ លើក ក្នុងនោះ កម្ពុជា ចាញ់ ២ លើក និងឈ្នះ ១ លើក។ ការឈ្នះរបស់កម្ពុជា ក្នុងកីឡាស៊ីហ្គេម ឆ្នាំ ២០១៩ ដោយលទ្ធផល ៣-២។ ចាប់តាំងពីពេលនោះមក កម្ពុជា និង វៀតណាម មិនធ្លាប់ជួបគ្នាទៀតទេ។

ថ្ងៃទី ១០ ខែកក្កដា នេះ កម្ពុជា នឹងជួប វៀតណាម លើកទី៤ សម្រាប់បើកឆាកពានរង្វាន់ SEA V. League មុនពេលជួប ឥណ្ឌូណេស៊ី ថ្ងៃទី១១ ខែកក្កដា, ជួប ហ្វីលីពីន ថ្ងៃទី១២ ខែកក្កដា និងចុងក្រោយជួប ថៃ ថ្ងៃទី១៣ ខែកក្កដា។

ក្រុមបាល់ទះវៀតណាម

ប្រវត្តិក្រុមបាល់ទះកម្ពុជា ប៉ះ ឥណ្ឌូណេស៊ី ថៃ ហ្វីលីពីន និង វៀតណាម ក្នុងព្រឹត្តិការណ៍កីឡាស៊ីហ្គេម ពីឆ្នាំ ២០១១ ដល់ ២០២៥។

ស៊ីហ្គេម ឆ្នាំ ២០១១

កម្ពុជា ចាញ់ ឥណ្ឌូណេស៊ី ០-៣
កម្ពុជា ចាញ់ វៀតណាម ០-៣
កម្ពុជា ចាញ់ ថៃ ០-៣

ស៊ីហ្គេម ឆ្នាំ ២០១៣

កម្ពុជា ចាញ់ ថៃ ០-៣

ស៊ីហ្គេម ឆ្នាំ ២០១៥

កម្ពុជា ចាញ់ វៀតណាម ០-៣
កម្ពុជា ចាញ់ ឥណ្ឌូណេស៊ី ០-៣

ស៊ីហ្គេម ឆ្នាំ ២០១៧

កម្ពុជា ចាញ់ ថៃ ០-៣

ស៊ីហ្គេម ឆ្នាំ ២០១៩

កម្ពុជា ចាញ់ ឥណ្ឌូណេស៊ី ០-៣
កម្ពុជា ចាញ់ ហ្វីលីពីន ០-៣
កម្ពុជា ឈ្នះ វៀតណាម ៣-២

ស៊ីហ្គេម ឆ្នាំ ២០២១

កម្ពុជា ឈ្នះ ហ្វីលីពីន ៣-១
កម្ពុជា ចាញ់ ថៃ ២-៣
កម្ពុជា ចាញ់ ឥណ្ឌូណេស៊ី ១-៣
កម្ពុជា ឈ្នះ ថៃ ៣-២ (ទទួលបានមេដាយ សំរិទ្ធ)

ស៊ីហ្គេម ឆ្នាំ ២០២៣

កម្ពុជា ឈ្នះ ហ្វីលីពីន ៣-០
កម្ពុជា ចាញ់ ឥណ្ឌូណេស៊ី ០-៣
កម្ពុជា ឈ្នះ ថៃ ៣-២
កម្ពុជា ចាញ់ ឥណ្ឌូណេស៊ី ០-៣ (ទទួលបានមេដាយ ប្រាក់)

អត្ថបទ៖ វីរបុត្រ

The post ពាន SEA V. League ចាប់ផ្តើមថ្ងៃស្អែក កម្ពុជាធ្លាប់ឈ្នះក្រុមខ្លាំង ៣ នេះ លើកលែងឥណ្ឌូណេស៊ី appeared first on Kampuchea Thmey Daily.

SEA V. League Archives - Kampuchea Thmey Daily

ល្ងាចនេះ កម្ពុជា ជួប ឥណ្ឌូណេស៊ី ជាឱកាសចុងក្រោយរកជ័យជម្នះក្នុងពាន SEA V League

ទើប​ចាញ់​ថ្មីៗ ក្រុម​បាល់ទះ​ កម្ពុជា ប៉ះ វៀតណាម ម្តងទៀត រសៀលនេះ

ក្រុម​បាល់ទះ​កម្ពុជា ធ្លាក់​ច្រើន​លេខពី​តារាង FIVB ក្រោយ​ចប់ SEA V. League ជុំទី១

ក្រុម​បាល់ទះ​កម្ពុជា ទទួល​បាន​ប្រាក់ ៩០០០​ដុល្លារ​ពី​ការ​ចូល​រួម​ប្រកួត​ពាន SEA V. League ជុំទី១

ចប់​ជុំ​ទី១ កម្ពុជា ចាញ់​ទាំង ៤ ប្រកួត រក​បាន១ពិន្ទុ ពាន SEA V. League