កីឡា

ពាន SEA V. League ចាប់ផ្តើមថ្ងៃស្អែក កម្ពុជាធ្លាប់ឈ្នះក្រុមខ្លាំង ៣ នេះ លើកលែងឥណ្ឌូណេស៊ី

បានផុស

១២ ខែ មុន

នៅ

ថ្ងៃពុធ ៩ កក្កដា ២០២៥

ដោយ

ការប្រកួតពានបាល់ទះកម្រិតទី ១ ប្រចាំតំបន់អាស៊ាន SEA V. League ឆ្នាំ ២០២៥ ជុំទី១ នឹងចាប់ផ្តើមនៅថ្ងៃទី១០ ខែកក្កដា ដោយប្រជុំដោយក្រុមបាល់ទះជម្រើសជាតិខ្លាំងទាំង ៥ ប្រចាំតំបន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជុំទី១នេះ មានម្ចាស់ផ្ទះ ហ្វីលីពីន ឥណ្ឌូណេស៊ី ថៃ វៀតណាម និង កម្ពុជា។ កម្ពុជាអាចចាត់ទុកជាក្រុមក្មេងខ្ចី និងមានកម្រិតទាបជាងគេនៅក្នុងពានរង្វាន់នេះ ប៉ុន្តែបើគិតប្រវត្តិជួបគ្នានៅក្នុងការប្រកួតផ្សេងៗឃើញថា កម្ពុជាសុទ្ធតែធ្លាប់ឈ្នះលើ ៣ ប្រទេស លើកលែងតែឥណ្ឌូណេស៊ីមួយគត់។

ដោយគ្មានព័ត៌មានច្បាស់ការមុនសម័យសង្គ្រាម ប៉ុន្តែគិតត្រឹមកីឡាស៊ីហ្គេម ពីឆ្នាំ ២០១១ ដល់ ឆ្នាំ ២០២៣ ក្រុមបាល់ទះកម្ពុជា និង ឥណ្ឌូណេស៊ី ធ្លាប់ជួបគ្នាចំនួន ៦ លើក គឺ កម្ពុជា ចាញ់ទាំងអស់ ហើយធ្លាប់ឈ្នះតែ១សិតគត់។

ជាមួគ្នានេះ កម្ពុជា និង ថៃ ធ្លាប់ជួបគ្នា ៦ លើកដែរ ក្នុងនោះថៃ ឈ្នះ ៤ លើកដំបូង ប៉ុន្តែ ២ លើកចុងក្រោយគឺកម្ពុជាជាអ្នកឈ្នះ។ នៅឆ្នាំ ២០២១ កម្ពុជា បានយកឈ្នះ ថៃ ដោយលទ្ធផល ៣-២ នៅប្រទេសវៀតណាម និង ឆ្នាំ ២០២៣ បានឈ្នះ ៣-២ នៅទឹកដីកម្ពុជា។

ចំពោះការជួបគ្នាជាមួយ ហ្វីលីពីន គឺចំនួន ៣ ដង ក្នុងនោះ កម្ពុជា ចាញ់ ១លើក ដោយលទ្ធផល ០-៣ នៅឆ្នាំ ២០១៩ ប៉ុន្តែនៅឆ្នាំ ២០២១ កម្ពុជា បានឈ្នះដោយលទ្ធផល ៣-១ និងឆ្នាំ ២០២៣ បានឈ្នះ ៣-០។

វៀតណាម និង កម្ពុជា ធ្លាប់ជួបគ្នា ៣ លើក ក្នុងនោះ កម្ពុជា ចាញ់ ២ លើក និងឈ្នះ ១ លើក។ ការឈ្នះរបស់កម្ពុជា ក្នុងកីឡាស៊ីហ្គេម ឆ្នាំ ២០១៩ ដោយលទ្ធផល ៣-២។ ចាប់តាំងពីពេលនោះមក កម្ពុជា និង វៀតណាម មិនធ្លាប់ជួបគ្នាទៀតទេ។

ថ្ងៃទី ១០ ខែកក្កដា នេះ កម្ពុជា នឹងជួប វៀតណាម លើកទី៤ សម្រាប់បើកឆាកពានរង្វាន់ SEA V. League មុនពេលជួប ឥណ្ឌូណេស៊ី ថ្ងៃទី១១ ខែកក្កដា, ជួប ហ្វីលីពីន ថ្ងៃទី១២ ខែកក្កដា និងចុងក្រោយជួប ថៃ ថ្ងៃទី១៣ ខែកក្កដា។