កីឡា

ចប់ជុំទី១ កម្ពុជា ចាញ់ទាំង ៤ ប្រកួត រកបាន១ពិន្ទុ ពាន SEA V. League

បានផុស

៩ ខែ មុន

នៅ

ថ្ងៃអាទិត្យ ១៣ កក្កដា ២០២៥

ដោយ

ក្រុមបាល់ទះជម្រើសជាតិ កម្ពុជា ធ្វើមិនបានល្អទេសម្រាប់ការចូលរួមប្រកួតពានរង្វាន់ SEA V. League ឆ្នាំ ២០២៥ ដោយបានចាញ់ទាំង ៤ ប្រកួត សម្រាប់ការប្រកួតជុំទី១ នៅប្រទេសហ្វីលីពីន។

ការប្រកួតទី១ កម្ពុជា បានចាញ់ វៀតណាម ដោយលទ្ធផល ០-៣, ការប្រកួតទី២ បានចាញ់ ឥណ្ឌូណេស៊ី ០-៣, ការប្រកួតទី៣ បានចាញ់ ហ្វីលីពីន ២-៣ និងការប្រកួតចុងក្រោយបានចាញ់ ថៃ ០-៣។ តាមរយៈលទ្ធផលនេះ កម្ពុជា រកបាន១ពិន្ទុ គត់ ស្ថិតនៅបាតតារាង។

ថៃបានក្លាយជាជើងឯក (មេដាយមាស) ហើយ ដោយសាររកបាន ៩ពិន្ទុ ខណៈការប្រកួតរវាង ឥណ្ឌូណេស៊ី និង ហ្វីលីពីន វេលាម៉ោង ៦ល្ងាចនេះ ត្រូវប្រជែងគ្នាដណ្តើមមេដាយ ប្រាក់ ខណៈមេដាយសំរិទ្ធ បានទៅវៀតណាម។

អ្វីដែលគួរឲ្យកត់សំគាល់ ក្រុមដែលកម្ពុជាធ្លាប់ឈ្នះក្នុងព្រឹត្តិការណ៍កីឡាស៊ីហ្គេមប៉ុន្មានឆ្នាំចុងក្រោយ គឺ ថៃ វៀតណាម និង ហ្វីលីពីន សុទ្ធចាញ់ កម្ពុជា ប៉ុន្តែក្នុងព្រឹត្តិការណ៍ SEA V. League នេះកម្ពុជាលេងមិនឈ្នះសោះ។ នេះជាកំណត់ត្រាដ៏អាក្រក់ដែលកម្ពុជាមានកីឡាករចេញទៅលេងនៅក្រៅប្រទេស មានលីគបាល់ទះ និងពានរង្វាន់ជាច្រើនទៀត ប៉ុន្តែបែរជាក្រុមជម្រើសជាតិមិនល្អទៅវិញ។

នៅថ្ងៃទី១៦ ខែកក្កដា ខាងមុខនេះ ការប្រកួតជុំទី២ នៅប្រទេសឥណ្ឌូណេស៊ី ដែលត្រូវប៉ះ ក្រុមទាំង៤សាថ្មី ដូច្នេះកម្ពុជាត្រូវការកែលំអចំណុចខ្វះខាតច្រើនមែនទែន ពីព្រោះមានកីឡាករវាយផ្តាច់ល្អហើយ ប៉ុន្តែនៅកីឡាករប៉ះសេនៅមានកម្រិត ហើយកម្លាំងស្មារតីក៏លេងមិនសូវយល់ចិត្តគ្នាថែមទៀត៕

អត្ថបទ៖ វីរបុត្រ

Related Topics:ក្រុមកីឡាបាល់ទះជម្រើសជាតិកម្ពុជា SEA V. League