ចរាចរណ៍

រថយន្តដឹកកម្មកររោងចក្រ បើកក្រឡាប់ចាក់មនុស្ស ស្លាប់ម្នាក់ និងរងរបួស៥នាក់

បានផុស

៤ years មុន

នៅ

ថ្ងៃអង្គារ ២០ មេសា ២០២១

ដោយ

ស្ត្រីកម្មការិនីម្នាក់ បានស្លាប់និង៥នាក់ផ្សេងទៀត បានរងរបួសស្រាលដោយសាររថយន្តដឹកកម្មកររោងចក្របានក្រឡាប់ទាំងយប់។ ហេតុការណ៍ខាងលើនេះ បានកើតឡើងនៅម៉ោង៨និង៤៥នាទីយប់កាលពីថ្ងៃទី១៩ ខែមេសា ឆ្នាំ២០២១ នៅក្នុងភូមិត្រដក់ពង ឃុំខ្នារកណ្តាល ស្រុកសាមគ្គីមានជ័យ ខេត្តកំពង់ឆ្នាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អធិការនគរបាលស្រុកសាមគ្គីមានជ័យ លោកវរសេនីយ៍ទោ សេង ចិន្តា បានឲ្យដឹងនៅល្ងាចថ្ងៃទី២០មេសា២០២១នេះថា រថយន្តខាងលើនេះ បានដឹកកម្មកររោងចក្រត្រឡប់មកពីធ្វើការហើយដើរដាក់តាមភូមិលុះមកដល់ចំណុចភូមិខ្នារកណ្ដាល ផ្លូវក្រោះក្រហមតូចកោងរថយន្តក៏រេចង្កូតធ្លាក់ផ្លូវក្រឡាប់ បណ្តាលឲ្យមនុស្សម្នាក់ស្លាប់ ឈ្មោះ យ៉េត សុខេន ភេទស្រី អាយុ៣៥ឆ្នាំ រស់នៅភូមិស្រែអ៊ុក ឃុំអភិវឌ្ឍ ស្រុកទឹកផុស ខេត្តកំពង់ឆ្នាំង ស្លាប់នៅកន្លែងកើតហេតុ និងមនុស្ស៥នាក់ផ្សេងទៀត រងរបួសស្រាលត្រូវបានសមត្ថកិច្ចនិងអ្នកភូមិដឹកយកទៅព្យាបាលនៅមន្ទីរពេទ្យ។ ចំណែកអ្នកស្លាប់ ត្រូវបានក្រុមគ្រួសារដឹកយកមកលំនៅឋានរៀបចំធ្វើបុណ្យតាមប្រពៃណី។

ក្រោយពេលកើតហេតុអ្នកបើកបររថយន្តដឹកកម្មកររោងចក្របានរត់គេចខ្លួនបាត់ទាំងយប់ ដោយបន្សល់ទុករថយន្តនៅកន្លែងកើតហេតុ។ ករណីនេះ រថយន្តត្រូវបានសមត្ថកិច្ចស្ទូចនាំយកមករក្សាទុករង់ចាំដោះស្រាយតាមនីតិវិធី។ ចំណែកអ្នកបើកបររថយន្តបង្កគ្រោះថ្នាក់ គឺសមត្ថកិច្ចបានស្គាល់អត្តសញ្ញាណអស់ហើយ និងកំពុងស្វែងរក ដើម្បីឲ្យមកឲ្យទទួលខុសត្រូវតាមផ្លូវច្បាប់ និងចំពោះគ្រួសារជនរងគ្រោះ៕

អត្ថបទ៖ ឈៀងថារិទ្ធ

សូមចុចអាន៖ អតីតព្រះចៅអធិការវត្ត២អង្គ នៅស្រុកបសេដ្ឋ ត្រូវតុលាការកាត់ទោស ក្រោយល្មើសបម្រាបរដ្ឋបាល