ព្រះរាជអាជ្ញាខេត្តកំពង់ឆ្នាំង ដឹកនាំសមត្ថកិច្ចចុះស្រាវជ្រាវករណីគ្រោះថ្នាក់ចរាចរណ៍ស្លាប់ ៨ នាក់

នៅព្រឹកថ្ងៃទី ២៣ ខែឧសភា ឆ្នាំ ២០២៦ នេះ លោក ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង បានចាត់តាំងលោក ផាន់ រតនា ព្រះរាជអាជ្ញារង ដឹកនាំកម្លាំងសមត្ថកិច្ចពាក់ព័ន្ធ ចុះពិនិត្យ និង ស្រាវជ្រាវករណីគ្រោះថ្នាក់ចរាចរណ៍ដ៏រន្ធត់មួយ ដែលបានកើតឡើងនៅមុខសាលាបឋមសិក្សាសាលាលេខប្រាំ ស្ថិតក្នុងស្រុកកំពង់ត្រឡាច ខេត្តកំពង់ឆ្នាំង តាមនីតិវិធី។

តាមការស្រាវជ្រាវបឋមបានបញ្ជាក់ថា រថយន្តដឹកទំនិញធុនធ្ងន់ (V1) បានបើកទៅបុករថយន្តដឹកកម្មកររោងចក្រពីក្រោយ បណ្តាលឲ្យរថយន្តនោះជ្រុលទៅបុករថយន្តម៉ាក Nissan មួយគ្រឿងដែលធ្វើដំណើរស្របទិសគ្នា។ បន្ទាប់មក រថយន្ត Nissan ក៏បានជ្រុលទៅបុករថយន្តដឹកកម្មកររោងចក្រមួយគ្រឿងទៀត ដែលធ្វើដំណើរខ្វែងទិសគ្នា បង្កឲ្យមានអ្នកស្លាប់ និង របួសជាច្រើននាក់។ គ្រោះថ្នាក់នេះបណ្តាលឲ្យមនុស្សស្លាប់ចំនួន ៨ នាក់ ក្នុងនោះ មានប្រុស ១ នាក់ និង របួស ៤៥ នាក់ ក្នុងនោះ របួសស្រាល ៣៥ នាក់ និង របួសធ្ងន់ ១០ នាក់។ ជនរងគ្រោះ ត្រូវបានសមត្ថកិច្ច និង ក្រុមសង្គ្រោះ បញ្ជូនទៅសង្គ្រោះនៅមន្ទីរពេទ្យជាបន្ទាន់។

បច្ចុប្បន្ន សមត្ថកិច្ចជំនាញ កំពុងបន្តស្រាវជ្រាវ ដើម្បីកំណត់មូលហេតុពិត និង ចាត់វិធានការតាមផ្លូវច្បាប់ចំពោះអ្នកពាក់ព័ន្ធ។ គ្រោះថ្នាក់ចរាចរណ៍ដ៏ធ្ងន់ធ្ងរនេះ បានបង្កឲ្យមានការភ្ញាក់ផ្អើល និង សោកស្តាយយ៉ាងខ្លាំងពីសំណាក់ប្រជាពលរដ្ឋក្នុងមូលដ្ឋាន និង អ្នកធ្វើដំណើរតាមដងផ្លូវជាតិលេខ ៥៕
អត្ថបទ ៖ វ៉ាន់សេដ្ឋា