ចរាចរណ៍

បើករថយន្តដឹកប្រេងឥន្ធនៈធ្លាក់ប្រឡាយទឹកស្អុយ ហើយគេចខ្លួនបាត់

បានផុស

៥ years មុន

នៅ

ថ្ងៃអង្គារ ១ មិថុនា ២០២១

ដោយ

រថយន្តដឹកប្រេងឥន្ធនៈធុនធំមួយគ្រឿងបើករេចង្កូតធ្លាក់ចូលទៅក្នុងប្រលាយទឹកស្អុយ តែសំណាងល្អមិនមានបង្កគ្រោះថ្នាក់ដល់អ្នកដំណើរដទៃ ។

គ្រោះថ្នាក់នេះ កើតឡើងនៅតាមបណ្តោយផ្លូវជាតិលេខ៤ ខាតលិចអគ្គបញ្ជាការកងទ័ពជើងគោក ស្ថិតក្នុងសង្កាត់កន្ទោក ខណ្ឌកំបូល កាលពីវេលាម៉ោង២៣ ថ្ងៃទី៣១ ខែឧសភា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានឲ្យដឹងថា នៅមុនកើតហេតុ រថយន្តដឹកប្រេងឥន្ធនៈខាងលើ ពាក់ស្លាកលេខ ភ្នំពេញ 4A-4368 បើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ៤ ក្នុងទិសដៅពីកើតទៅលិច លុះបើកដល់ចំណុចកើតហេតុខាងលើ រថយន្តស្រាប់តែរេចង្កូតធ្លាក់ចូលទៅក្នុងប្រឡាយតែម្តងទៅ តែមិនបានបង្កឲ្យមានគ្រោះថ្នាក់ដល់អ្នកដំណើរដទៃណាម្នាក់ឡើយ ។

ក្នុងករណីគ្រោះថ្នាក់ដោយខ្លួនឯងខាងលើនេះ គេនៅពុំទាន់ដឹងថា កកើតឡើងដោយសារតែរថយន្តខាងលើជួបនឹងឧបសគ្គអ្វី ឬជាការធ្វេសប្រហែសរបស់តៃកុងរថយន្តដោយកត្តាណាមួយនោះឡើយ ព្រោះក្រោយកើតហេតុនោះ បុរសជាអ្នកបើកបរបានរត់គេចចេញពីកន្លែងកើតហេតុបាត់ស្រមោលបន្សល់ទុកតែរថយន្តនៅកន្លែងកើតហេតុ ។

ជុំវិញករណីនេះ សមត្ថកិច្ចបានចុះដល់កន្លែងកើតហេតុ ប៉ុន្តែមិនបានធ្វើការវាស់វែងតាមជំនាញឡើយ ព្រោះជាករណីបើកធ្លាក់ប្រឡាយដោយខ្លួនឯង មិនបានបណ្តាលឲ្យខូចខាតដល់ទ្រព្យសម្បត្តិសាធារណៈ ឬប៉ះពាល់បង្កគ្រោះថ្នាក់ដល់អ្នកដទៃឡើយ ដូច្នោះហើយសម្រេចទុករថយន្តនៅក្នុងប្រឡាយនោះចោលជាបណ្តោះអាសន្នសិន រងចាំម្ចាស់មកទទួលយកវិញដោយខ្លួនឯងនៅពេលក្រោយចុះ ៕

អត្ថបទ ៖ សុខា