ចរាចរណ៍

បើករថយន្តបុកចូលផ្ទះថតរូប និងបោះពុម្ព ហើយនាំគ្នាចុះគេចខ្លួនបាត់អស់

បានផុស

៤ years មុន

នៅ

ថ្ងៃអង្គារ ៨ កុម្ភៈ ២០២២

ដោយ

បុរសម្នាក់បើករថយន្តNISSANមួយគ្រឿងរួមដំណើរជាមួយមនុស្សប្រុសស្រីមួយក្រុមសង្ស័យស្រវឹងស្រាបើកក្នុងល្បឿនលឿនជ្រុលបុកចូលផ្ទះថតរូប និងបោះពុម្ព បណ្ដាលឲ្យរងការខូចខាតយ៉ាងដំណំ ហើយនាំគ្នាបើកទ្វាររថយន្ដចុះគេចខ្លួនបាត់អស់ បន្សល់រថយន្ដនៅកន្លែងកើតហេតុ។

ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១២និង៤០នាទីរំលងអាធ្រាត្រឈានចូលថ្ងៃទី០៨ ខែកុម្ភៈ ឆ្នាំ២០២២ នៅចំណុចផ្ទះលេខ៥៩ផ្លូវ២០០៥ បុរីហាយលែន ក្រុមទី១ ភូមិដីថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពពីបុរសជាម្ចាស់ផ្ទះដែលបានឆែកមើលកាមេរ៉ាសុវត្ថិភាពបានឲ្យដឹងថា មុនកើតហេតុគេឃើញមនុស្សប្រុសស្រីមួយក្រុមប្រមាណជា៦នាក់ ប្រុស២ ស្រី៤ បើករថយន្តNISSANមួយគ្រឿងពណ៌ខ្មៅពាក់ស្លាកលេខភ្នំពេញ2AV-8617 ធ្វើដំណើរតាមបណ្ដោយផ្លូវ២០០៥ ទិសដៅពីរត្បូងទៅជើង លុះមកដល់ចំណុចកើតហេតុខាងលើ សង្ស័យអ្នកបើកបរស្រវឹង បានរេចង្កូតមកខាងឆ្វេងដៃបុកចូលផ្ទះពេញទំហឹងបណ្ដាលឲ្យរងការខូចខាត និងបែកបាក់រាយប៉ាយ ចំណែករថយន្តកល់ជាប់ទៅមុខលែងរួច។ បន្ទាប់មកគេឃើញអ្នករួមដំណើរ និងអ្នកបើកបរប្រញ៉ាប់ប្រញ៉ាលបើកទ្វាររថយន្តចេញមកក្រៅ រួចនាំគ្នាគេចខ្លួនចេញពីកន្លែងកន្លែងបាត់អស់។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញហៅរថយន្តស្ទូចយកទៅអធិការដ្ឋាននគរបាលខណ្ឌសែនសុខ រង់ចាំម្ចាស់ចូលខ្លួនមកដោះស្រាយគ្នាទៅតាមផ្លូវច្បាប់៕

អត្ថបទ៖ សុខា