គ្រោះថ្នាក់ចរាចរណ៍លើកដំបូងលើផ្លូវល្បឿនលឿន បណ្ដាលឲ្យមនុស្ស៣នាក់រងរបួស

មនុស្សចំនួន ៣ នាក់ បានរងរបួសក្នុងហេតុការណ៍គ្រោះថ្នាក់ចរាចរណ៍រវាងរថយន្តពីរគ្រឿង បើកលើផ្លូវល្បឿនលឿនភ្នំពេញ ព្រះសីហនុ ដែលជាករណីដំបូងបង្អស់នៅផ្លូវល្បឿនលឿនសម្រាប់ប្រទេសកម្ពុជា។

ហេតុការណ៍គ្រោះថ្នាក់នេះបានកើតឡើង កាលពីថ្ងៃទី ០៥ ខែមិថុនា ឆ្នាំ ២០២២ វេលាម៉ោង ១២ និង ១០ នាទី ស្ថិតលើផ្លូវល្បឿនលឿន ចន្លោះគីឡូ ១៣៤-១៣៥ ស្ថិតក្នុងភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សីលា ខេត្តព្រះសីហនុ។

យោងតាមរបាយការណ៍សមត្ថកិច្ចបានឲ្យដឹងថា មុនពេលកើតហេតុមានរថយន្តមួយគ្រឿង ម៉ាកPRUIS ពណ៌ឈាមជ្រូក ពាក់ស្លាកលេខ កំពង់ស្ពឺ2C-2141 ធ្វើដំណើរទិសដៅពីភ្នំពេញទៅខេត្តព្រះសីហនុ បើកបរដោយឈ្មោះ ឡុក សៅ ភេទប្រុស អាយុ ៣៣ ឆ្នាំ រស់នៅខេត្តកំពង់ស្ពឺ និងមានអ្នករួមដំណើរចំនួន ៨ នាក់ រងរបួស ០២ នាក់។

របាយការណ៍បានបញ្ជាក់ថា ពេលមកដល់ចំណុចខាងលើបានបុកជាមួយរថយន្តមួយគ្រឿង ម៉ាកLUXES 350 ពណ៌ស ពាក់ស្លាកលេខ ព្រះសីហនុ 2D-1838 ទិសដៅព្រះសីហនុ ទៅភ្នំពេញ បើកបរដោយឈ្មោះ បុន សុខុន ភេទប្រុស អាយុ ៦០ ឆ្នាំ រស់នៅខេត្តព្រះសីហនុ អ្នករួមដំណើរចំនួន ០១ នាក់ ឈ្មោះ ហូរ ម៉ារី ភេទស្រី អាយុ ៥៤ ឆ្នាំ រងរបួសចុកទ្រូង ត្រូវបានសាច់ញាតិយកទៅពេទ្យភ្នំពេញ។

ក្រោយកើតហេតុ សមត្ថកិច្ចបានចុះដល់ទីតាំងកើតហេតុធ្វើការវាស់វែងយកវត្ថុតាងរថយន្តពីរគ្រឿងមករក្សាទុកនៅអធិការដ្ឋាននគរបាលស្រុកកំពង់សិលា រង់ចាំធ្វើការដោះស្រាយនៅពេលក្រោយ៕

អត្ថបទ ៖ សុខុម