មន្ត្រីនគរបាលម្នាក់ស្លាប់ភ្លាមៗនៅកន្លែងកើតហេតុ ករណីគ្រោះថ្នាក់ចរាចរណ៍

មន្ត្រីនគរបាលមួយរូបបានស្លាប់ភ្លាមៗនៅកន្លែងកើតហេតុ បន្ទាប់ពីបានជួបឧបទ្ទវហេតុគ្រោះថ្នាក់ចរាចរណ៍រវាងរថយន្ត និងម៉ូតូ។

ហេតុការណ៍នេះបានកើតឡើងកាលពីថ្ងៃទី១៣ ខែកក្កដា ឆ្នាំ២០២២ វេលាម៉ោង៨និង៣០នាទីយប់ នៅលើកំណាត់ផ្លូវជាតិ​លេខ​៥៩ ចន្លោះបង្គោលគីឡូម៉ែត្រ លេខ១០៣និង១០៤ ស្ថិតក្នុងភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង។

បើតាមរបាយការណ៍របស់សមត្ថកិច្ចបានបញ្ជាក់ថា ករណីគ្រោះថ្នាក់ចរាចរណ៍នេះ គឺកើតឡើងរវាងរថយន្តនិងម៉ូតូ ក្នុងទិសដៅច្រាស់ទិសគ្នា ដោយរថយន្តម៉ាកសាំយ៉ុង ពណ៌បៃតង ពាក់ស្លាកលេខ ភ្នំពេញ 2AA-1550 បើកពីកើតទៅលិច ហើយបានបុកជាមួយម៉ូតូម៉ាកហុងដាZoomer ពណខ្មៅ ពាក់ស្លាកលេខ ប៉ៃលិន 1C-9848 ជិះម្នាក់ឯង បើកពីលិចទៅកើត ដោយអ្នកបើកបរមានឈ្មោះ សៀង នេត ភេទប្រុស អាយុ៤៣ឆ្នាំ រស់នៅភូមិថ្មី ឃុំត្រាង ស្រុកកំរៀង ខេត្តបាត់ដំបង មុខរបរជាមន្ត្រីនគរបាល បណ្តាលអោយស្លាប់នៅកន្លែងកើតហេតុ(គ្មានពាក់មួកសុវត្ថិភាព)។

ក្រោយពេលកើតហេតុ កម្លាំងសណ្តាប់ធ្នាប់ស្រុកបានចុះដល់កន្លែងកើតហេតុដើម្បីធ្វើការត្រួតពិនិត្យ និងប្រគល់សពទៅអោយក្រុមគ្រួសារយកទៅធ្វើបុណ្យ ដោយឡែកអ្នកបើកបររថយន្តបានរត់គេចខ្លួនបាត់ស្រមោល៕

អត្ថបទ៖ សោ និយមរ័ត្ន