ព័ត៌មានជាតិ

មន្រ្តីក្រសួងឧស្សាហកម្មប្រាប់តិកនិកសម្គាល់ផលិតផលខ្មែរ ចៀសវាងទិញផលិតផលនាំចូលវៃស្លាកផលិតក្នុងស្រុក

បានផុស

៩ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

មន្ត្រីក្រសួងឧស្សាហកម្មបានពន្យល់ពីការសម្គាល់មើលពីផលិតផលផលិតក្នុងស្រុក ខណៈកន្លងទៅពលរដ្ឋសង្ស័យមានផលិតផលខ្លះនាំចូលពីក្រៅប្រទេសដោយវៃស្លាកជាផលិតផលក្នុងស្រុក ដែលនាំឲ្យមានការមិនទុកចិត្តពីពលរដ្ឋក្នុងការបន្តគាំទ្រផលិតផលខ្មែរ។

លោក គង់ បញ្ញារិទ្ធ មន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ប្រាប់បច្ចេកទេសសម្គាល់ផលិតផលក្នុងស្រុក ដែលទទួលស្គាល់ពីក្រសួងឧស្សាហកម្ម បច្ចេកវិទ្យា និងនវានុវត្តន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធការសម្គាល់ផលិតផលក្នុងស្រុក មន្រ្តីក្រសួងឧស្សាហកម្ម បច្ចេកវិទ្យា និងនវានុវត្តន៍បានបញ្ជាក់ថា គឺមានការបិទនិមិត្តសញ្ញា «ចបផ» នៅលើសំបកវេចខ្ចប់ដែលអាចបញ្ជាក់បានថាជាផលិតផលក្នុងស្រុក។

នៅក្នុង «វេទិកា និងពិព័រណ៍ទេសចរណ៍មូស្លីមកម្ពុជាឆ្នាំ២០២៥» ដែលរៀបចំឡើងកាលពីពេលថ្មីៗនេះ លោក គង់ បញ្ញារិទ្ធ បានឆ្លើយតបសំនួររបស់កម្ពុជាថ្មីថា «ផលិតផលដែលមានបិទនិមិត្តសញ្ញា «ចបផ» បានន័យថាជាផលិតផលផលិតក្នុងស្រុក មានការទទួលស្គាល់ពីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍»។

យ៉ាងណាមិញ ពាក់ព័ន្ធផលិតផលក្នុងស្រុកនេះដែរ មន្រ្តីក្រសួងឧស្សាហកម្មបានបញ្ជាក់ថា មិនប្រាកដត្រូវប្រើប្រាស់វត្ថុធាតុដើមក្នុងស្រុក ក្នុងការផលិតចេញជាផលិតផលសម្រេចទាំងស្រុងនោះទេ។ សហគ្រាសអាចនាំចូលវត្ថុធាតុដើមពីក្រៅប្រទេសមួយចំនួន ដើម្បីផលិតចេញជាផលិតផលសម្រេចលក់នៅលើទីផ្សារ។

បើតាមមន្រ្តីក្រសួងឧស្សាហកម្ម និមិត្តសញ្ញា «ចបផ» ក្រៅពីបញ្ជាក់បានថាជាផលិតផលដែលផលិតក្នុងស្រុក ក៏ធានាថាជាផលិតផលដែលមានសុវត្ថិភាព បានឆ្លងកាត់ការពិសោធន៍រកសារធាតុហាមឃាត់ដែលអាចបង្កគ្រោះថ្នាក់ និងនាំឲ្យប៉ះពាល់ដល់សុខភាព។

នៅពេលខាងមុខ លោក គង់ បញ្ញារិទ្ធ បានបញ្ជាក់ថា ក្រសួងឧស្សាហកម្ម ក៏នឹងបំពាក់ប្រព័ន្ធបច្ចេកវិទ្យាដែលអាចឲ្យពលរដ្ឋស្កេនលើផលិតផលណាមួយ ដើម្បីបង្កើនទំនុកចិត្តក្នុងការទិញយកទៅប្រើប្រាស់ដោយមិនបារម្ភពីផលប៉ះពាល់ដល់សុខភាព។

ការចុះបញ្ជីផលិតផល (ចបផ) គឺជាការកំណត់អត្តសញ្ញាណកម្មសម្គាល់លើផលិតផលដែលបានចុះបញ្ជីនៅក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្ត។ ការបិទស្លាកស្លាកសញ្ញា ចបផ អនុវត្តចំពោះរាល់ផលិតផលម្ហូបអាហារ ដែលបានវេចខ្ចប់រួចមុនបញ្ចេញលក់លើទីផ្សារអតិថិជន។

ដើម្បីទទួលបានការចុះបញ្ជីផលិតផល (ចបផ) ក្រុមហ៊ុន/រោងចក្រ/សហគ្រាស/សិប្បកម្ម ត្រូវមកដាក់ពាក្យស្នើសុំនៅច្រកចេញចូលតែមួយរបស់វិទ្យាស្ថានស្តង់ដារកម្ពុជា។ បន្ទាប់ពីទទួលបានការចុះបញ្ជីផលិតផល (ចបផ) ស្របតាមបទប្បញ្ញតិ្ត ក្រុមហ៊ុន/រោងចក្រ/សហគ្រាស/សិប្បកម្ម នឹងទទួលបានអត្ថប្រយោជន៍អាចទប់ស្កាត់នូវផលិតផល និងទំនិញក្លែងក្លាយ ដែលធ្វើឱ្យផលិតផលមានភាពទាក់ទាញ និងកាន់តែមានប្រជាប្រិយ មានការទទួលស្គាល់ពីអ្នកប្រើប្រាស់ បង្កើនការការពារអ្នកប្រើប្រាស់ និងចូលរួមលើកកម្ពស់សុខុមាលភាពសាធារណៈ៕