ព័ត៌មានជាតិ

មុនឆ្នាំ ២០៣០ រដ្ឋាភិបាលដាក់គោលដៅជំរុញសហគ្រាសក្រៅប្រព័ន្ធ ចុះបញ្ចីចូលក្នុងប្រព័ន្ធឱ្យបានលើសពី ៩០%

បានផុស

២៨ វិនាទី មុន

នៅ

ថ្ងៃព្រហស្បតិ៍ ២៥ មិថុនា ២០២៦

ដោយ

មន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងពីយុទ្ធសាស្ត្ររបស់រដ្ឋាភិបាល ក្នុងការផ្តល់ការលើកទឹកចិត្តដល់សហគ្រាសធុនមីក្រូ តូច និងមធ្យម (MSMEs) ដែលស្ថិតនៅក្រៅប្រព័ន្ធ ដើម្បីឈានចុះបញ្ចីចូលទៅក្នុងប្រព័ន្ធឱ្យបានលើសពី ៩០% មុនឆ្នាំ ២០៣០។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈា ឡាយហ៊ី អគ្គនាយករងនៃអគ្គនាយកដ្ឋានសហគ្រាសធុនតូចនិងមធ្យម បានគូសបញ្ជាក់ថា យុទ្ធសាស្ត្រគន្លឹះមួយចំនួនដែលរដ្ឋាភិបាលដាក់ចេញ ដើម្បីទាក់ទាញឱ្យសហគ្រាសខ្នាតតូចនិងមធ្យម (MSEMs) ឲ្យចុះបញ្ចីចូលមកក្នុងប្រព័ន្ធ ដែលក្នុងនោះមានយន្តការផ្សព្វផ្សាយ និងអប់រំ។

លោកថា រដ្ឋាភិបាលមិនប្រើប្រាស់វិធានការចាប់បង្ខំឬដាក់បន្ទុកភ្លាមៗនោះទេ ប៉ុន្តែផ្តោតលើការចុះផ្សព្វផ្សាយ និងពន្យល់ណែនាំឱ្យម្ចាស់អាជីវកម្មក្រៅប្រព័ន្ធយល់ដឹងពីសារៈសំខាន់ និងអត្ថប្រយោជន៍រយៈពេលវែងនៃការចុះបញ្ជីក្នុងប្រព័ន្ធ។

«ការបង្ហាញពីអត្ថប្រយោជន៍សម្រាប់សហគ្រាសចុះបញ្ជីចូលក្នុងប្រព័ន្ធ។ ពួកគេនឹងទទួលបានឱកាសជាច្រើនដូចជា សមត្ថភាពក្នុងការពង្រីកទីផ្សារបានទូលំទូលាយ។ លទ្ធភាពក្នុងការស្នើសុំឥណទាន ឬប្រភពទុនពីរដ្ឋ ឬស្ថាប័នហិរញ្ញវត្ថុ/ធនាគារនានា រួមទាំងឱកាសក្នុងការនាំចេញផលិតផលទៅកាន់ទីផ្សារអន្តរជាតិ ជាពិសេសបណ្តាប្រទេសដែលមានកិច្ចព្រមព្រៀងពាណិជ្ជកម្មសេរី (FTA) ជាមួយកម្ពុជា»។ លោកពន្យល់។

ដើម្បីជំរុញដល់សហគ្រាសចុះបញ្ជីក្នុងប្រព័ន្ធ រដ្ឋាភិបាលបានបង្កើតប្រព័ន្ធចុះបញ្ជីរួមតាមរយៈថ្នាលប្រព័ន្ធបច្ចេកវិទ្យា (CamDX) ដែលជួយសម្រួលដល់ការចុះបញ្ជីតាំងពីក្រសួងពាណិជ្ជកម្ម រហូតដល់ក្រសួងឧស្សាហកម្ម ឱ្យមានភាពរហ័ស និងងាយស្រួល។

បើតាមលោក ឈា ឡាយហ៊ី ទិសដៅឆ្នាំ ២០២៦ ក្រសួងឧស្សាហកម្មដាក់ចេញនូវចក្ខុវិស័យក្នុងការធ្វើទំនើបកម្ម ដោយជំរុញផ្តល់សេវានិងការចុះបញ្ជីសាធារណៈទាំងអស់ អាចធ្វើឡើងតាមប្រព័ន្ធអនឡាញ ១០០% ដើម្បីកាត់បន្ថយនីតិវិធីស្មុគស្មាញ និងបង្កលក្ខណៈងាយស្រួលបំផុតដល់អាជីវករ៕