ព័ត៌មានអន្ដរជាតិ

[វិចារណកថា] ព្រឹត្តិការណ៍ចុះហត្ថលេខាកិច្ចព្រមព្រៀងសន្តិភាពកម្ពុជា-ថៃ គ្របដណ្តបមាតិកាព័ត៌មានសកលលោក

បានផុស

៧ ខែ មុន

នៅ

ថ្ងៃអាទិត្យ ២៦ តុលា ២០២៥

ដោយ

ក្នុង២ថ្ងៃចុងក្រោយនេះពោលគឺចាប់ពីព្រឹកថ្ងៃសៅរ៍រហូតដល់ថ្ងៃអាទិត្យ ទី២៥-២៦ ខែតុលាឆ្នាំ២០២៥ ព្រឹត្តិការណ៍ចុះហត្ថលេខាលើកិច្ចព្រមព្រៀងសន្តិភាពរវាងកម្ពុជានិងថៃ បានគ្រប់ដណ្តប់ទិដ្ឋភាពនៃកិច្ចប្រជុំកំពូលអាស៊ានស្ទើរទាំងស្រុង និងជាប្រភពនៃការប្រមាញ់ព័ត៌មានសំខាន់បំផុតរបស់បណ្តាញសារព័ត៌មានអន្តរជាតិនៅទូទាំងសកលលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ដែលផ្ទុះការចាប់អារម្មណ៍ដំបូងដោយសារតែរាជវាំងថៃ បានបញ្ចេញការបញ្ជាក់ជាផ្លូវការអំពីការសោយទិវង្គតរបស់មហាក្សត្រយានីថៃ សិរីគិត (Sirikit) ក្នុងព្រះជន្មាយុ៩៣ឆ្នាំ ដែលបានក្លាយជាដើមហេតុ ដែលនាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ស្ថិតក្នុងស្ថានភាពមិនច្បាស់លាស់អំពីការលុបចោលដំណើរទៅចូលរួមកិច្ចប្រជុំកំពូលអាស៊ាន ដែលពេលនោះនឹងមានការចុះហត្ថលេខាលើកិច្ចព្រមព្រៀងសន្តិភាពរវាងកម្ពុជានិងថៃ។

ភាពស្រពិចស្រពិលនេះហើយ បានក្លាយទៅជារឿងចម្លែកដ៏គួរឲ្យចាប់អារម្មណ៍ដែលភាគីថៃអាចប្រើជាលេសដើម្បីគេចវេសពីការចងភ្ជាប់កាតព្វកិច្ចមេដឹកនាំរបស់ជាតិទៅនឹងច្បាប់អន្តរជាតិ ព្រោះថាថៃមិនដែលពេញចិត្តក្នុងការដំណើរការចរចាពហុភាគីសម្រាប់ការបញ្ចប់ជម្លោះព្រំដែនរវាងប្រទេសទាំងពីរឡើយ។

បណ្តាញសារព័ត៌មានអន្តរជាតិសំខាន់ៗក្នុងសកលលោក ពិតណាស់ ពិតជាបានតាមប្រមាញ់ឥតឈប់ឈរអំពីដំណើរវិវឌ្ឍន៍ជាលំដាប់អំពីដំណើរឆ្ពោះទៅមុខនៃការចុះហត្ថលេខាលើកិច្ចព្រមព្រៀងសន្តិភាពដែលកម្ពុជាចង់បានបំផុត ហើយស្របទៅនឹងការជ្រុមជ្រែងពីប្រធានាធិបតីសហរដ្ឋអាមេរិក លោក ដូណាល់ ត្រាំ និង នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាអ្នកតស៊ូប្រជាធិបតេយ្យដ៏យូរអង្វែងនោះ។

ក្នុងដំណើរមិនច្បាស់លាស់ជាសាធារណៈចុងក្រោយ គឺថា មន្ត្រីរដ្ឋាភិបាលថៃ និងសារព័ត៌មានថៃជាច្រើនហាក់ព្យាយាមលេងល្បែងចិត្តសាស្ត្រចុងក្រោយ ដោយការបញ្ចេញ និងផ្សព្វផ្សាយព័ត៌មានជាច្រើនជុំវិញភាពមិនច្បាស់លាស់នៃដំណើរចូលរួមកិច្ចប្រជុំកំពូលអាស៊ានរបស់នាយករដ្ឋមន្ត្រីថៃ លោក អានុទីន ឆានវីរៈគុល។

ក្នុងរយៈពេលដ៏ខ្លីបន្ទាប់ពីការផ្សព្វផ្សាយជាសាធារណៈនៃការសោយទិវង្គតរបស់អតីតមហាក្សត្រយានីថៃ សារព័ត៌មានថៃជាច្រើនបានផ្សព្វផ្សាយដោយសំអាងលើការអះអាងពីការបញ្ជាក់ពីមន្ត្រីរដ្ឋាភិបាលថៃ អំពីលទ្ធភាពដែលនាយករដ្ឋមន្ត្រី អានុទីន លុបចោលដំណើរទៅចូលរួមកិច្ចប្រជុំកំពូលអាស៊ាននៅទីក្រុងកូឡាឡាំពូ និងជាពិសេសបំផុតនោះ គឺការមិនចូលរួមចុះហត្ថលេខាលើកិច្ចព្រមព្រៀងសន្តិភាពជាមួយកម្ពុជា ដែលមានប្រធានាធិបតីសហរដ្ឋអាមេរិក លោក ដូណាល់ ត្រាំ ជាសាក្សី និង មានការរៀបចំសម្របសម្រួលដោយរដ្ឋាភិបាលម៉ាឡេស៊ី។

ដំណើរការចរចារកដំណោះស្រាយក្នុងជម្លោះព្រំដែនរវាងថៃនិងកម្ពុជា បានប្រព្រឹត្តទៅក្រោមការតាមដានដ៏យកចិត្តទុក្ខបំផុតពីរដ្ឋបាលរបស់រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដែលប្រាថ្នាចង់ឃើញកិច្ចព្រមព្រៀងសន្តិភាពផ្លូវការដំបូងនៅតំបន់អាស៊ីអាគ្នេយ៍ (ASEAN) ប្រព្រឹត្តទៅក្រោមវត្តមានរបស់លោក។

ការចរចាសន្តិភាពរវាងប្រទេសកម្ពុជានិងថៃ បានប្រព្រឹត្តទៅក្នុងពេលវេលាដ៏តានតឹងបំផុតនិងរយៈពេលខ្លី មុនឈានដល់ការចុះហត្ថលេខាជាផ្លូវការនៅថ្ងៃទី២៦ខែតុលានេះ។ ការចរចារកដំណោះស្រាយដែលថៃមិនចង់ធ្វើ គ្មានឆន្ទៈធ្វើ ប៉ុន្តែថៃមិនអាចគេចវេសរួចនេះ គឺដោយសារតែការដាក់សម្ពាធរបស់រដ្ឋបាលរបស់ប្រធានាធិបតី ដូណាល់ ត្រាំ ដែលតែងតែពោលថា «បញ្ឈប់ការសម្លាប់ជីវិតមនុស្ស»។

វាជាសំណាងល្អមួយសម្រាប់កិច្ចព្រមព្រៀងសន្តិភាពដែលកម្ពុជាចង់បានបំផុត ក្នុងនាមជាប្រទេសតូចជាងថៃ មានសេដ្ឋកិច្ចខ្សោយជាងថៃ និងធ្លាប់ជួបសង្គ្រាមរ៉ាំរៃច្រើនទសវត្សរ៍ ដោយសារតែចាប់តាំងពីសម្រាប់បានកិច្ចព្រមព្រៀងបទឈប់បាញ់កាលថ្ងៃទី២៨ខែកក្កដា គឺសហរដ្ឋអាមេរិកជំរុញឲ្យម៉ាឡេស៊ីរៀបចំកិច្ចប្រជុំចរចាជាបន្តបន្ទាប់ ដើម្បីឈានទៅរកដំណោះស្រាយសន្តិភាពយូរអង្វែង និងមានយន្តការដោះស្រាយជាក់លាក់បែបនេះ។

ជាការពិតកិច្ចព្រមព្រៀងសន្តិភាពរវាងកម្ពុជានិងថៃ គឺគ្មានភាគីណាមួយអាចលុបចោលដោយចិត្តឯងចង់បាននោះទេ ពីព្រោះថា ក្នុងរយៈពេលដ៏ខ្លីកិច្ចប្រជុំគ្រប់លំដាប់ថ្នាក់ ចាប់តាំងកម្រិតយោធភូមិភាគ (RBC) គណៈកម្មការព្រំដែនចម្រុះ ((JBC) គណៈកម្មការព្រំដែនទូទៅ (GBC) និងកិច្ចប្រជុំកម្រិតអន្តរជាតិចតុភាគី ដោយមានសហរដ្ឋអាមេរិក ម៉ាឡេស៊ី និងភាគីជម្លោះទាំងពីរ គឺសុទ្ធតែបានធ្វើរួចរាល់ និង បានសម្រេចចុះហត្ថលេខាលើកិច្ចព្រមព្រៀងរៀងរាល់លើក។ ដូចនេះ ភាគីថៃ ឬនាយករដ្ឋមន្ត្រីថៃ គ្មានហេតុផលណាគេចវេសពីការចុះហត្ថលេខាលើឯកសារផ្លូវការនេះទេ៕

រ៉ាន់ រើយ

ព័ត៌មានអន្ដរជាតិ២១ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា