ថៃ ត្រៀមជម្លៀសពលរដ្ឋនៅព្រំដែន ជាប់មីយ៉ាន់ម៉ា

ស្របពេលស្ថានការណ៍នៅព្រំដែនភាគខាងជើងរឹតតែតានតឹងទៅៗនោះ ប្រទេសថៃ បានបញ្ជាក់ពីការត្រៀមលក្ខណៈជម្លៀសពលរដ្ឋខ្លួនក្នុងករណីចាំបាច់ ព្រោះថា នៅខាងមីយ៉ាន់ម៉ាឯណោះ កំពុងមានការប្រយុទ្ធគ្នាខ្លាំងមែនទែន ធ្លាយទាំងគ្រាប់ចូលដីថៃយ៉ាងញឹកញាប់ផងដែរ។

តាមការផ្សាយរបស់ Bangkok Post កាលពីថ្ងៃសៅរ៍ទី៦ខែធ្នូឆ្នាំ២០២៥ មេទ័ពថៃ Ukrit Boontanon បានប្រកាសថា កងកម្លាំងត្រៀមរួចជាស្រេចនូវផែនការជម្លៀសប្រជាជនចេញពីតំបន់មានហានិភ័យខ្ពស់នៅព្រំដែនជាពិសេសភូមិ Mae Kon Ken និង Huai Mahawong នៅស្រុក Mae Sot។

ទន្ទឹមនោះ លោក Ukrit ក៏ព្រមានផងដែរថានឹងចាត់វិធានការម៉ឺងម៉ាត់ បន្ទាប់ពីគ្រាប់កាំភ្លើងធំ ធ្លាក់លើទឹកដីថៃ បណ្តាលឲ្យជនស៊ីវិលរងរបួសនៅក្នុង ខេត្ត Tak។ ភាគីប្រយុទ្ធទាំងសងខាងត្រូវបានព្រមានជាផ្លូវការថា ការរំលោភបំពានបែបនេះ មិនត្រូវកើតឡើងម្តងទៀតទេ ហើយលោកត្រៀមរួចជាស្រេចដើម្បីអនុវត្តច្បាប់ប្រយុទ្ធ ប្រសិនបើឧបទ្ទវហេតុដដែលៗនេះកើតឡើងម្តងទៀត។

រឿងនេះកើតឡើង បន្ទាប់ពីការប្រយុទ្ធគ្នា​យ៉ាងខ្លាំងក្លា​រវាង​កងទ័ព​មីយ៉ាន់ម៉ា និង​ក្រុមប្រដាប់អាវុធ​ជនជាតិភាគតិច​តាម​បណ្តោយ​ព្រំដែន​ទល់មុខ​ភូមិ Mae Ko Ngen ​បណ្តាល​ឲ្យ​គ្រាប់​បេ​ទំហំ​៨១​មិល្លីម៉ែត្រ​មួយ​គ្រាប់​ធ្លាក់​ចូល​ក្នុង​ទឹកដី​ថៃ​កាលពី​ថ្ងៃ​សុក្រ បណ្តាល​ឲ្យ​​មនុស្ស​២​នាក់​​រង​របួស។

អ្នកស្រុក Mae Sot បាន​រាយការណ៍​ពី​ការបាញ់ប្រហារ និង​ការផ្ទុះ​ជា​បន្តបន្ទាប់​ពី​ខាង​មីយ៉ាន់ម៉ា ក្បែរ​ភូមិ Ban Millapa ជាទី​ដែល​ការប៉ះទង្គិច​គ្នា​នៅតែ​បន្ត​ ដោយមាន​ការប្រើប្រាស់​ទាំង​អាវុធ​ធុន​តូច និង​អាវុធ​ធុន​ធ្ងន់​។ នៅ​ម៉ោង​ប្រហែល​១១​និង​៥០​ព្រឹក គ្រាប់​បេ​មួយ​គ្រាប់​បាន​ធ្លាក់​នៅ​ជិត​វត្ត Huai Mahawong ក្នុង​ភូមិ Moo 9 ឃុំ Mahawan ដែល​បណ្តាល​ឲ្យ​មាន​ការផ្ទុះ​យ៉ាងខ្លាំង​។

កងទ័ព​មកពី​កម្លាំង​ពិសេស Naresuan បាន​ឆ្លើយតប​បន្ទាប់ពី​អ្នកភូមិ​បាន​រាយការណ៍​ពី​ជនរងគ្រោះ​។ បុរស​ម្នាក់​វ័យ​៦៨​ឆ្នាំ ​បាន​​រងរបួសធ្ងន់ ដោយសារ​ត្រូវ​បំណែក​គ្រាប់​នៅ​​ក្រោម​ពោះ​ ខណៈ​កំពុង​ដើរ​តាមផ្លូវ​ក្នុងភូមិ ហើយ​ត្រូវ​បាន​ដឹក​​ទៅ​សង្គ្រោះ​នៅ​​មន្ទីរពេទ្យ Mae Sot​៕

អត្ថបទ៖ សុខ សុវណ្ណ