យោធាថៃបើកការវាយប្រហារលើកម្ពុជាជាថ្មី ដោយប្រើអាវុធធុនធ្ងន់ មានទាំងយន្តហោះចម្បាំង F16

នៅថ្ងៃទី៨ ខែធ្នូ ឆ្នាំ២០២៥នេះ យោធាថៃបានបន្តបើកការបាញ់ប្រហារសាជាថ្មីមកលើកម្ពុជា នៅគ្រប់ទិសសមរភូមិខេត្តព្រះវិហារ និងឧត្តរមានជ័យ ដោយប្រើអាវុធធុនធ្ងន់ មានទាំងយន្តហោះចម្បាំង F16 និងបានបាញ់ផ្សែងពុល ក្រោយពីយោធាថៃបានបើកការបាញ់ប្រហារមកលើកម្ពុជា កាលពីរសៀលថ្ងៃទី៧ ខែធ្នូ ឆ្នាំ២០២៥ ម្សិលមិញ។

អ្នកនាំពាក្យក្រសួងការពារជាតិកម្ពុជា លោកស្រីឧត្តមសេនីយ៍ឯក ម៉ាលី សុជាតា បានថ្លែងឱ្យដឹងនៅវេលាម៉ោង១១ ថ្ងៃចន្ទនេះ ថា យោធាថៃបានបន្តបើកការបាញ់ប្រហារសាជាថ្មីលើកងកម្លាំងកម្ពុជា ចាប់ពីវេលាម៉ោងប្រមាណ០៥:០៤នាទីព្រឹក ដែលការវាយប្រហារនេះធ្វើឡើងនៅតំបន់អានសេះ ប្រាសាទតាមាន់ធំ តំបន់ប្រាសាទព្រះវិហារ ៥មករា ចំការចេក មុំបី ភ្នំខ្មោច គោល៨ ប្រាសាទតាក្របី និងនៅប្រាសាទខ្នារ។

បើតាមលោកស្រី ម៉ាលី សុជាតា គិតមកត្រឹមវេលាថ្ងៃត្រង់នេះ យោធាថៃនៅតែបន្តបាញ់ប្រហារមកលើកងទ័ព និងលើទីតាំងជនស៊ីវិលកម្ពុជានៅឡើយ។

ក្នុងការបាញ់វាយប្រហាររបស់យោធាថៃលើកម្ពុជាជាបន្តបន្ទាប់ ចាប់តាំងពីថ្ងៃទី៧​ ខែធ្នូ ម្សិលមិញ និងបន្តមកដល់ថ្ងៃទី៨ ខែធ្នូនេះ អ្នកនាំពាក្យក្រសួងការពារជាតិកម្ពុជា បានអះអាងថា ថៃបានប្រើអាវុធធុនធ្ងន់គ្រប់ប្រភេទ ដូចជាបាញ់កាំភ្លើងដៃ កាំភ្លើងយន្ត កាំភ្លើង MT60 បាញ់កាំភ្លើងត្បាល់ កាំភ្លើងធំ១៥៥mm រថក្រោះ រួមទាំងប្រើយន្តហោះចម្បាំងប្រភេទ F-16 នៅឃុំស្រអែម ស្រុកជាំក្សាន្ត ខេត្តព្រះវិហារ។

តាមសេចក្ដីថ្លែងការណ៍របស់អ្នកនាំពាក្យរូបនេះ កម្លាំងយោធាថៃ ក៏បានបាញ់ផ្សែងពុលចូលទីតាំងនៅតំបន់ភ្នំខ្មោច និងនៅតំបន់ប្រាសាទព្រះវិហារផងដែរ។

លើសពីនេះ ការបាញ់ប្រហាររបស់យោធាថៃបានឈានចូលដល់ក្នុងភូមិឋានរស់នៅរបស់ពលរដ្ឋក្នុងខេត្តឧត្តរមានជ័យ និងខេត្តព្រះវិហារ ដែលបណ្តាលឱ្យរបួសប្រជាជនស៊ីវិលមួយចំនួន និងឆេះផ្ទះសម្បែងប្រជាពលរដ្ឋស្លូតត្រូវអស់ជាច្រើនខ្នង ហើយធ្វើឱ្យប្រជាជន ក្មេងចាស់ ត្រូវបង្ខំចិត្តជម្លៀសរកទីកន្លែងសុវត្ថិភាពបណ្តោះអាសន្នភ្លាមៗ។

តែយ៉ាងនេះក្ដី លោកស្រី ថា កងកម្លាំងកម្ពុជាមិនទាន់បានតបតអ្វីនៅឡើយទេ ដោយប្រកាន់ខ្ជាប់បំផុតនូវការគោរព និងការអនុវត្តបទឈប់បាញ់ និងសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា និងថៃ រួមទាំងគោលការណ៍ដែលបានឯកភាពគ្នារវាងភាគីកម្ពុជា-ថៃ ដោយឈរលើមូលដ្ឋានដោះស្រាយរាល់បញ្ហាដោយសន្តិវិធី ត្រឹមត្រូវ និងស្រប តាមច្បាប់អន្តរជាតិ៕

អត្ថបទ៖ ធឿន វ៉ាន់សុង