ពលរដ្ឋស្រុកជាំក្សាន្ត ខេត្តព្រះវិហារ ជាង ៥ពាន់នាក់ ត្រូវបានភ្លៀសខ្លួនមកកាន់ទីទួលសុវត្ថិភាព

ក្នុងហេតុការណ៍ថៃបើកការវាយប្រហារឈ្លានពានដែនអធិបតេយ្យភាពកម្ពុជាជាថ្មី យ៉ាងហោចណាស់ប្រជាពលរដ្ឋក្នុងស្រុកជាំក្សាន្ត ខេត្តព្រះវិហារ សរុបចំនួន១ ៤៩១ គ្រួសារ ស្មើនឹងចំនួនមនុស្ស ៥ ៥៩៧ នាក់ ក្នុងនោះស្រី ៣ ១១៥ នាក់ បានរត់ភៀសខ្លួនមកកាន់ទីទួលសុវត្ថិភាព។ នេះបើយោងតាមរបាយការណ៍បឋមរបស់រដ្ឋបាលខេត្តព្រះវិហារ។

គិតត្រឹមល្ងាចថ្ងៃទី៨ ខែធ្នូ ឆ្នាំ មណ្ឌលសុវត្ថិភាពវត្តពោធិ៍ ៥ ០០០ មានជនភៀសសឹកចំនួន២១គ្រួសារ ស្មើនឹង១២២នាក់, មណ្ឌលសុវត្ថិភាពវត្តឧត្តមគិរីទួលអណ្ដែត មានជនភៀសសឹក ចំនួន៤១២គ្រួសារ ស្មើនឹង៣.៧៤៣នាក់, មណ្ឌលសុវត្ថិភាពវត្តត្រាវកៀត មានជនភៀសសឹក ចំនួន៧៦នាក់ ស្មើនឹង៣៨៣នាក់, មណ្ឌលសុវត្ថិភាពវត្តពើងអង្គកាម មានជនភៀសសឹក ចំនួន៣៩៨គ្រួសារ ស្មើនឹង២.២៣៧នាក់, មណ្ឌលសុវត្ថិភាពវត្តពើងព្រះគោ មានជនភៀសសឹក ចំនួន២០៨គ្រួសារ ស្មើនឹង១.១៣៥នាក់, មណ្ឌលសុវត្ថិភាពវត្តគីឡូលេខ៨ មានជនភៀសសឹក ចំនួន១៤៧គ្រួសារ, មណ្ឌលសុវត្ថិភាពវត្តកំពង់សង្កែ ចំនួន ២២៩គ្រួសារ ស្មើនឹង ១.០៩២នាក់។

ក្រោមការយកចិត្តទុកដាក់ពីសុខទុក្ខប្រជាពលរដ្ឋ ក្នុងពេលដែលជួបគ្រោះអាសន្នរងការវាយប្រហារដោយភាគីថៃ លោក គីម រិទ្ធី អភិបាល​នៃ​គណៈ​អភិបាល​ខេត្ត​ព្រះវិហារ អញ្ជើញ​ចុះ​ពិនិត្យ​ទីតាំង​ ភៀសសឹក និង​សួរសុខទុក្ខ​បងប្អូន​ប្រជាពលរដ្ឋ​ដោយ​ផ្ទាល់​ដល់​មណ្ឌល​សុវត្ថិភាព វត្តទួលអណ្ដែត ឃុំថ្មី ស្រុកគូលែន។

សូមជម្រាបថា នៅថ្ងៃទី៨ ខែធ្នូ ឆ្នាំ២០២៥នេះ យោធាថៃបានបើកការបាញ់ប្រហារសាជាថ្មីមកលើកងកម្លាំងកម្ពុជា ចាប់ពីវេលាម៉ោងប្រមាណ ០៥:០៤នាទីព្រឹក ការបើកការវាយប្រហារនេះធ្វើឡើង នៅក្នុងតំបន់អានសេះ តំបន់ប្រាសាទព្រះវិហារ នៅ៥មករា នៅចំការចេក នៅមុំបី នៅភ្នំខ្មោច នៅគោល៨ ។ ក្រោយមកទៀត យោធាថៃ បានពង្រីកការឈ្លានពានទឹកដីកម្ពុជានៅក្នុងភូមិសាស្ត្រខេត្តព្រះវិហារ ឧត្តរមានជ័យ បន្ទាយមានជ័យ ដល់ខេត្តពោធិ៍សាត់។

សកម្មភាពឈ្លានពានដោយប្រដាប់អាវុធរបស់ភាគីថៃ មកលើកម្ពុជាជាលើកទី២នេះ គឺបានបង្ហាញយ៉ាងច្បាស់ក្រឡែតនូវចេតនារបស់ភាគីថៃ ក្នុងការឈ្លានពានវាតយកទឹកដីប្រទេសជិតខាង៕