ខ្យល់ពុលគ្រោះថ្នាក់ គ្របដណ្តប់ខ័ណ្ឌចំនួន៥ ក្នុងទីក្រុងបាងកក

ស្ថានភាពខ្យល់ពុលនៅទីក្រុងបាងកក ប្រទេសថៃ​ កំពុងតែធ្ងន់ធ្ងរ ដោយ PM2.5 ក្នុងខ័ណ្ឌចំនួន៥ បានឈានដល់កម្រិតគ្រោះថ្នាក់ដល់សុខភាព។ 

ធម្មតា រដ្ឋាភិបាលថៃ បានកំណត់កម្រិតខ្យល់សុវត្ថិភាពក្នុងទីក្រុងបាងកក ត្រឹម២៥មីក្រូក្រាមក្នុងមួយម៉ែត្រគូបនៃខ្យល់ប៉ុណ្ណោះ។

យ៉ាងណា តាមការផ្សាយរបស់ The Standard, គិតត្រឹមម៉ោង ៧ព្រឹកថ្ងៃពុធទី១០ខែធ្នូ, ខ្យល់ពុល PM2.5 នៅខ័ណ្ឌចំនួន៥ក្នុងទីក្រុងបាងកក បានឈានដល់កម្រិតលើសសុវត្ថិភាព ពោលគឺនៅ Nong Khaem ខ្យល់ពុលបានឈានដល់ ៤២.៣ មីក្រូក្រាមក្នុងមួយម៉ែត្រគូបនៃខ្យល់, Lat Krabang ៤១.១មីក្រូក្រាម, Bang Rak ៤១.៥មីក្រូក្រាម, Sathorn ៤០.៥មីក្រូក្រាម និង Thawi Watthana ៣៧.៩មីក្រូក្រាម។

ដ្បិតថាខ្យល់ពុលថ្មីនេះមិនទាន់ឈានដល់កម្រិតគ្រោះថ្នាក់ធ្ងន់ធ្ងរពណ៌ក្រហមក៏ពិតមែន ប៉ុន្តែវាបានឈានដល់កម្រិតពណ៌ទឹកក្រូចហើយ ដែលប៉ះពាល់ដល់សុខភាពខ្លាំងក្លា។

ពាក់ព័ន្ធបញ្ហានេះដែរ ថៃបានព្រមានរួចទៅហើយថា ខ្យល់ពុលក្នុងកម្រិតគ្រោះថ្នាក់ធ្ងន់ធ្ងរ នឹងគ្របដណ្តប់រាជធានីបាងកកនិងខេត្តមួយចំនួនទៀត ពេញមួយខែធ្នូនេះតែម្តង៕

អត្ថបទ៖ សុខ សុវណ្ណ