ពលរដ្ឋថៃ ក្តៅចិត្តនឹង អានុទីន ក្រោយ ម៉ាឡេស៊ី ​សងសឹក​ ដោយហាមនាំចូល បង្គា ថៃ

ពលរដ្ឋថៃ នៅភាគខាងត្បូង កំពុងក្តៅចិត្តខ្លាំង នឹងរដ្ឋាភិបាលដឹកនាំដោយ នាយករដ្ឋមន្ត្រី ​អានុទីន ​ឆាន់វីរៈគុល ​ដែល​ហាមឃាត់​ការនាំចូលត្រីឆ្ពុង ពីប្រទេសម៉ាឡេស៊ី ធ្វើឲ្យទីក្រុងគូឡាឡាំពួ ចាត់វិធានការសងសឹកវិញ ដោយ​ហាមឃាត់ការនាំចូល បង្គាពីប្រទេសថៃ ដូចគ្នា បង្កជាផលប៉ះពាល់យ៉ាងខ្លាំង ជាពិសេសអ្នកចិញ្ចឹមបង្គា។

ជម្លោះផ្តើមចេញពីថៃមុន ដែលហាមឃាត់ការនាំចូលត្រីឆ្ពុង ពីម៉ាឡេស៊ី ដោយអះអាងថា រកឃើញសារធាតុគីមីក្នុងត្រីនោះ ទើប ម៉ាឡេស៊ី សងសឹកវិញ ដោយហាមឃាត់ ការនាំចូលបង្គាថៃ ចំនួន ៤ប្រភេទ។

ចំណាត់ការរបស់រដ្ឋាភិបាលទីក្រុងបាងកក ធ្វើឲ្យពលរដ្ឋនៅភាគខាងត្បូងប្រទេសថៃ ក្តៅចិត្តមិនស្ទើរឡើយ ដោយពួកគេត្អូញត្អែរអំពីទុក្ខលំបាក និងជំរុញឲ្យ អានុទីន ពិភាក្សាជាមួយម៉ាឡេស៊ី ជាបន្ទាន់។

តាមការផ្សាយរបស់ Bangkok Post នៅថ្ងៃចន្ទ ទី១ ខែមិថុនា ឆ្នាំ២០២៦ លោក ព្រីឆា សុខកាសេម អនុប្រធានសមាគមបង្គាថៃ និយាយថា ចំណាត់ការរបស់ម៉ាឡេស៊ី ពិតជាជះឥទ្ធិពលដល់កសិករ នៅតាមបណ្តាខេត្តភាគខាងត្បូង ដែលនាំចេញបង្គា ទៅកាន់ប្រទេសម៉ាឡេស៊ី និងសិង្ហបុរី។

ទន្ទឹមនោះ សមាជិកសភាខេត្ត Songkhla លោក Chaiyong Maneerungsakul បាននិយាយចំៗថា នាយករដ្ឋមន្ត្រី, ក្រសួងពាណិជ្ជកម្ម និងក្រសួងកសិកម្ម ត្រូវតែធ្វើការជាមួយគ្នា ដើម្បីដោះស្រាយបញ្ហានេះ ជាបន្ទាន់។

សូមជម្រាបថា ម៉ាឡេស៊ី គឺជាទីផ្សារបង្គាដ៏សំខាន់មួយរបស់ថៃ ដោយមួយឆ្នាំៗ ការនាំចេញបង្គាថៃទៅ ម៉ាឡេស៊ី មានបរិមាណចន្លោះពី ១៥ ០០០ ទៅ ២៥ ០០០ តោន បើគិតជាទឹកប្រាក់ គឺស្មើនឹងប្រហែលពី ៦០ ទៅ ៩០ លានដុល្លារអាមេរិក។

យ៉ាងណា ទិន្នន័យនេះអាចមានការប្រែប្រួលតិចតួចទៅតាមឆ្នាំ និងកត្តាទីផ្សារ៕

អត្ថបទ៖ សុខ សុវណ្ណ