ថៃ ជួបព្យុះភ្លៀងថ្មីទៀត ដែលវាយប្រហារ ពេញមួយសប្តាហ៍ បង្កជាជំនន់រហ័ស និងបំណាក់ដី

ប្រទេសថៃ បានចេញការព្រមានថា ព្យុះភ្លៀងថ្មីមួយ នឹងវាយប្រហារប្រទេស ពេញមួយសប្តាហ៍នេះ ដែលនឹងបង្កជាជំនន់រហ័ស និងបំណាក់ដី ខណៈតំបន់មួយសមុទ្រ មានហានិភ័យខ្ពស់។

កាសែត Bangkok Post បានដកស្រង់សេចក្តីប្រកាស របស់នាយកដ្ឋានឧតុនិយម ដែលព្រមានថា ​តំបន់ភាគច្រើននឹងជួបប្រទះ គ្រោះធម្មជាតិនេះ ប៉ុន្តែខេត្តដែលមានហានិភ័យខ្ពស់ជាងគេគឺ Mae Hong Son, Chiang Mai, Kanchanaburi, Prachuap Khiri Khan, Phuket និង Krabi។

យោងតាមនាយកដ្ឋាន, ភ្លៀងធ្លាក់ខ្លាំង នឹងវាយប្រហារចាប់ពីថ្ងៃទី១ ដល់ទី៦ ខែមិថុនា ដែលឥទ្ធិពលដ៏ខ្លាំងរបស់វា នឹងបណ្តាលឲ្យមានទឹកជំនន់រហ័ស ព្រមទាំងបំណាក់ដី ផងដែរ។

ព្យុះភ្លៀងនេះ កើតឡើងមិនដល់មួយសប្តាហ៍ផង បន្ទាប់ពីប្រទេសថៃ​ ប្រកាសអាសន្ន ក្នុងខេត្តចំនួន៥ ដោយសារគ្រោះបំណាក់ដី និងទឹកជំនន់ហូរបុកយ៉ាងគំហុក។

ខេត្តទាំងនោះ សុទ្ធតែស្ថិតនៅភាគខាងត្បូង ដែលមានដូចជា៖ Phang Nga, Ranong, Krabi, Phuket និង Satun។

ឲ្យតែនិយាយពីគ្រោះធម្មជាតិនៅភាគខាងត្បូង, ប្រជាជនថៃ នៅមិនទាន់បាត់ភាពឈឺចាប់ឡើយ ​ចំពោះសោកនាដកម្មទឹកជំនន់នៅទីនោះ កាលពីចុងឆ្នាំ២០២៥ ដែលផ្តាច់ជីវិត មនុស្សរាប់រយនាក់ ជាពិសេសក្នុងក្រុង Hat Yai។

តួលេខក្រៅផ្លូវការ នៃមនុស្សស្លាប់ ដោយគ្រោះទឹកជំនន់ដ៏សាហាវនោះ មានប្រមាណ ១៨០នាក់ ក្នុងខេត្ត Songkhla ជាកន្លែងរងគ្រោះធ្ងន់ធ្ងរជាងគេ៕

អត្ថបទ៖ សុខ សុវណ្ណ