ព័ត៌មានអន្ដរជាតិ

តម្លៃប្រេងកើនឡើងថ្ងៃបើកការជួញដូរប្រចាំសប្ដាហ៍ ជុំវិញបញ្ហាអាមេរិក-វេណេស៊ុយអេឡា

បានផុស

៥ ខែ មុន

នៅ

ថ្ងៃចន្ទ ២២ ធ្នូ ២០២៥

ដោយ

តម្លៃប្រេងអន្តរជាតិបានកើនឡើងលើទីផ្សារអាស៊ីសម្រាប់ការជួញដូរនៅព្រឹកថ្ងៃចន្ទនេះ ដែលជាថ្ងៃបើកការជួញដូរប្រចាំសប្ដាហ៍ ជុំវិញការរំខានផ្នែកផ្គត់ផ្គង់ ក្នុងករណីអាមេរិករឹបអូសកប៉ាល់ដឹកប្រេងវេណេស៊ុយអេឡា។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃប្រេងឆៅនាពេលអនាគត ម៉ាក Brent បានកើនឡើង ៤៤ សេន ឬ ០,៧៣% ដល់ ៦០,៩១ ដុល្លារ/បារ៉ែល គិតត្រឹមម៉ោងជាង ៩ ព្រឹក នៅទីក្រុងហុងកុង ខណៈតម្លៃប្រេងអាមេរិក ម៉ាក West Texas Intermediate (WTI) បានកើនឡើង ៤០ សេន ឬ ០,៧១% ដល់ ៥៦,៩២ ដុល្លារ/បារ៉ែល។

កាលពីចុងសប្ដាហ៍កន្លងទៅ ឆ្មាំសមុទ្ររបស់អាមេរិកបានតាមស្ទាក់ចាប់កប៉ាល់ដឹកប្រេងលើដែនទឹកអន្តរជាតិក្បែរប្រទេសវេណេស៊ុយអេឡា។ កាលពីប៉ុន្មានសប្ដាហ៍មុន អាមេរិកបានរឹបអូសកប៉ាល់ដឹកប្រេងវេណេស៊ុយអេឡា ដែលជាប្រទេសផ្គត់ផ្គង់ប្រេងសំខាន់មួយសម្រាប់ទីផ្សារអន្តរជាតិ។ ហើយថ្មីនេះ ប្រធានាធិបតីអាមេរិក លោក ដូណាល់ ត្រាំ បានប្រកាសបញ្ជាឱ្យបិទផ្លូវទឹកសម្រាប់កប៉ាល់ដឹកប្រេងវេណេស៊ុយអេឡា ដែលជំរុញឱ្យតម្លៃប្រេងកើនឡើងនៅថ្ងៃចន្ទនេះ។

យ៉ាងណាមិញ ការរំខានផ្នែកផ្គត់ផ្គង់នៅតែមានកំណត់ ដោយសារតែតម្លៃប្រេងបានរងសម្ពាធដោយសារតែកង្វល់ពាក់ព័ន្ធនឹងការផ្គត់ផ្គង់លើសតម្រូវការ ក៏ដូចជាក្ដីរំពឹងពីដំណោះស្រាយសន្តិភាពនៃជម្លោះអ៊ុយក្រែន-រុស្ស៊ី។

តម្លៃប្រេងទាំង២ បានធ្លាក់ចុះប្រហែល ១% នៅសប្ដាហ៍មុន ដែលជាការបន្តពីការធ្លាក់ចុះ ៤% នៅសប្ដាហ៍មុនមួយទៀត៕