២ខ័ណ្ឌក្នុងទីក្រុងបាងកក ត្រូវវាយប្រហារដោយខ្យល់ពុល កម្រិតគ្រោះថ្នាក់

ដ្បិតតំបន់មួយចំនួនក្នុងទីក្រុងបាងកក រៀងធូរស្បើយដោយខ្យល់ពុលក៏ដោយ ប៉ុន្តែកំហាប់ភាគល្អិត PM2.5 ក្នុងកម្រិតគ្រោះថ្នាក់ នៅតែគ្របដណ្តប់ខ័ណ្ឌចំនួន២ នៅព្រឹកថ្ងៃសៅរ៍ទី៣ខែមករាឆ្នាំ២០២៦។

តាមការផ្សាយរបស់ Bangkok Post ដោយផ្អែកលើទិន្នន័យរបស់រដ្ឋបាលក្រុង, នៅខ័ណ្ឌ Pathumwan កម្រិត PM2.5 បានឈានដល់៤១.១មីក្រូក្រាមក្នុងមួយម៉ែត្រគូបនៃខ្យល់ ខណៈ Chatuchak មាន ៣៨.៨មីក្រូក្រាមក្នុងមួយម៉ែត្រគូបនៃខ្យល់។

កម្រិតទាំងនេះ គឺលើសពីកម្រិតសុវត្ថិភាពដែលកំណត់ដោយរដ្ឋាភិបាលថៃ ដែលដាក់នៅត្រឹម ៣៧.៥មីក្រូក្រាមក្នុងមួយម៉ែត្រគូបនៃខ្យល់ប៉ុន្តែ ហើយវាត្រូវបានចាត់ថ្នាក់ជាកម្រិតគ្រោះថ្នាក់ពណ៌ទឹកក្រូច ដែលប៉ះពាល់ដល់សុខភាព។

សូមជម្រាបថា កាលពីថ្ងៃព្រហស្បតិ៍ទី១ខែមករា ខ័ណ្ឌ Chatuchak ត្រូវខ្យល់ពុលវាយប្រហារខ្លាំងមែនទែន ដោយកម្រិត PM2.5 បានឈានដល់ ៧០.៣មីក្រូក្រាមក្នុងមួយម៉ែត្រគូបនៃខ្យល់។ 

ខ័ណ្ឌនេះជាកន្លែងរងការវាយប្រហារដោយខ្យល់ពុលខ្ពស់ជាងគេបំផុតក្នុងទីក្រុងបាងកក បន្ទាប់មកគឺ Don Mueang ៦៨.៧មីក្រូក្រាមក្នុងមួយម៉ែត្រគូប ខណៈ Lat Krabang និង Prawet ៦៨.២មីក្រូក្រាមក្នុងមួយម៉ែត្រគូប ដូចគ្នា។

កម្រិតដ៏អាក្រក់នេះ បានបង្កជាគ្រោះថ្នាក់ដល់សុខភាពពលរដ្ឋថៃ ជាពិសេសមនុស្សចាស់ជរានិងអ្នកមានជំងឺរ៉ាំរ៉ៃដូចជាជំងឺសួតនិងបេះដូង។ ទន្ទឹមនោះ រដ្ឋបាលក្រុងព្រមានថា ក្រុមមនុស្សដែលមានហានិភ័យ គួរតែចៀសវាងសកម្មភាពក្រៅផ្ទះ៕

អត្ថបទ៖ សុខ សុវណ្ណ