គម្រោងសាងសង់ទំនប់អាងទឹកវិទ្យាស្ថានតេជោ​សែន ក្នុងឃុំត្រពាំងក្រញូង រួចរាល់​៦០% គ្រោងបញ្ចប់នៅចុងខែកុម្ភៈខាងមុខនេះ

គិតមកដល់ពេលនេះ គម្រោងសាងសង់ទំនប់អាងទឹកវិទ្យាស្ថានតេជោសែន ស្ថិតក្នុងឃុំត្រពាំងក្រញូង ស្រុកត្រាំកក់ ខេត្តតាកែវ ត្រូវបានសាងសង់រួចរាល់ប្រមាណ៦០%ហើយ និងគ្រោងបញ្ចប់ការងារសាងសង់នៅចុងខែកុម្ភៈ ឆ្នាំ២០២៦ខាងមុខនេះ។ គម្រោងសាងសង់ទំនប់អាងទឹកវិទ្យាស្ថានតេជោសែន មានការងារសំខាន់ៗ ទី១ សាងសង់ទំនប់អាងទឹក ប្រវែង ១៣០ម៉ែត្រ និងទី២ សាងសង់សំណង់សិល្បការ្យសរុបចំនួន ២កន្លែង។

លោក ថាំង វីយុទ្ធដា ប្រធាននាយកដ្ឋានវិស្វកម្ម ក្នុងដំណើរដឹកនាំមន្ត្រីបច្ចេកទេសក្រសួង ចុះពិនិត្យជាក់ស្តែងវឌ្ឍនភាពការងារសាងសង់ កាលពីថ្ងៃទី១១ ខែមករា ឆ្នាំ២០២៦ បានឲ្យដឹងថា ការសាងសង់ទំនប់អាងទឹកវិទ្យាស្ថានតេជោសែន នេះ គឺក្នុងគោលបំណងស្តុកទឹកទុកសម្រាប់ប្រើប្រាស់ប្រចាំថ្ងៃជូនដល់ប្រជាពលរដ្ឋដែលរស់នៅតំបន់នោះ។ គម្រោងនេះនឹងជួយបង្កើនសមត្ថភាពស្រោចស្រពបន្ថែមដល់ផ្ទៃដាំដុះដំណាំចំការ ចំនួន ១៥០ហិកតា ជូនដល់ប្រជាកសិករប្រមាណ ១១៦គ្រួសារ ក្នុងភូមិត្រពាំងក្រញូង នៃឃុំត្រពាំងក្រញូង ស្រុកត្រាំកក់ ខេត្តតាកែវ។

លោក ថាំង វីយុទ្ធដា ក៏បានណែនាំដល់ក្រុមការងារសាងសង់ឱ្យអនុវត្តការងារទៅតាមបទដ្ឋានបច្ចេកទេសឱ្យបានហ្មត់ចត់ និងជំរុញអនុវត្តការងារឱ្យសម្រេចបានតាមផែនការគ្រោងទុក៕