២០តំបន់ក្នុងទីក្រុងបាងកក ត្រូវគ្របដណ្តប់ដោយខ្យល់ពុល កម្រិតគ្រោះថ្នាក់

បញ្ហាខ្យល់ពុលនៅតែរួមរឹតប្រទេសថៃ ជាពិសេសក្នុងរាជធានីបាងកកតែម្តង ដោយនៅព្រឹកថ្ងៃចន្ទទី១២ខែមករាឆ្នាំ២០២៦ តំបន់ចំនួន២០ក្នុងទីក្រុងនេះ ត្រូវគ្របដណ្តប់ដោយកំហាប់ភាគល្អិត (PM2.5) លើសកម្រិតសុវត្ថិភាព ដែលបង្កផលប៉ះពាល់ខ្លាំងដល់សុខភាពមនុស្ស។

តាមការផ្សាយរបស់ Amarin ដោយដកស្រង់ប្រភពពីមជ្ឈមណ្ឌលព័ត៌មានគុណភាពខ្យល់ទីក្រុងបាងកក, PM2.5 នៅរាជធានីប្រទេសថៃ បានឈានដល់កម្រិតគ្រោះថ្នាក់ពណ៌ទឹកក្រូច គិតត្រឹមម៉ោង៧ព្រឹក។

ក្នុងនោះកន្លែងដែលមានការបំពុលខ្លាំងជាងគេគឺខ័ណ្ឌ Pathumwan ដោយ PM2.5 ឈានដល់ ៤៩.៩មីក្រូក្រាមក្នុងមួយម៉ែត្រគូបនៃខ្យល់ បន្ទាប់មកគឺខ័ណ្ឌ Bang Rak ៤៦.៣មីក្រូក្រាមក្នុងមួយម៉ែត្រគូបនៃខ្យល់ និងខ័ណ្ឌ Chatuchak ៤៤.១មីក្រូក្រាមក្នុងមួយម៉ែត្រគូបនៃខ្យល់។

PM2.5 ដែលហក់ឡើងដល់កម្រិតនេះ គឺប៉ះពាល់ខ្លាំងណាស់ដល់សុខភាពផ្លូវដង្ហើមជាពិសេសមនុស្សមនុស្សវ័យចំណាស់និងអ្នកដែលមានជំងឺរ៉ាំរ៉ៃ។

មុននេះដែរ រដ្ឋបាលក្រុងបាងកក ក៏បានណែនាំឲ្យបុគ្គលិកក្រុមហ៊ុនខ្លះ ធ្វើការពីផ្ទះផងដែរ ព្រោះតែខ្យល់ពុលធ្ងន់ធ្ងរខ្លាំងពេក។

យោងតាមទិន្នន័យក្នុងឆ្នាំ២០២៥ ប្រជាជនថៃរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពលនៃខ្យល់ពុល PM2.5។

ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។ ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង៕

អត្ថបទ៖ សុខ សុវណ្ណ