មេដឹកនាំជប៉ុន និងកូរ៉េខាងត្បូងជួបគ្នា ខណៈចិនបង្ហាញសាច់ដុំ

នាយករដ្ឋមន្ត្រីជប៉ុន Sanae Takaichi នឹងទទួលស្វាគមន៍ប្រធានាធិបតីកូរ៉េខាងត្បូង Lee Jae Myung សម្រាប់កិច្ចពិភាក្សានាថ្ងៃអង្គារទី១៣មករានេះ ដោយមានគោលបំណងបង្ហាញពីចំណងមិត្តភាពដ៏ស្និទ្ធស្នាលរបស់ពួកគេ ខណៈដែលទីក្រុងប៉េកាំងដាក់សម្ពាធលើទីក្រុងតូក្យូ នៃជំហររបស់ខ្លួនលើកោះតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសារព័ត៌មាន Yahoo មេដឹកនាំទាំងពីរនឹងជួបគ្នានៅតំបន់ Nara ដែលជាស្រុកកំណើតរបស់លោកស្រី Takaichi នៅភាគខាងលិចប្រទេសជប៉ុន ប៉ុន្មានថ្ងៃបន្ទាប់ពីលោក Lee បានទៅជួបមេដឹកនាំចិន ស៊ី ជិនពីង នៅទីក្រុងប៉េកាំង។

អ្វីដែលលេចធ្លោនៅក្នុងជំនួបរវាងមេដឹកនាំទាំងពីររូបនេះ នោះគឺជម្លោះការទូតដ៏ក្តៅគគុករបស់ជប៉ុនជាមួយចិន ដែលបង្កឡើងដោយការលើកឡើងដោយលោកស្រី Takaichi កាលពីខែវិច្ឆិកាថា «ជប៉ុនអាចធ្វើអន្តរាគមន៍យោធា ប្រសិនបើចិនវាយប្រហារតៃវ៉ាន់»។

កន្លងមក ចិនតែងចាត់ទុកតៃវ៉ាន់ជាទឹកដីរបស់ខ្លួន ហើយប្រតិកម្មដោយកំហឹងនិងរារាំងការនាំចេញទៅកាន់ជប៉ុននូវរបស់របរប្រើប្រាស់បានពីរយ៉ាង ដែលមានសក្តានុពលសម្រាប់ការប្រើប្រាស់យោធា ដោយជំរុញឲ្យមានការព្រួយបារម្ភនៅក្នុងប្រទេសជប៉ុនថា ទីក្រុងប៉េកាំងអាចរារាំងការផ្គត់ផ្គង់រ៉ែដ៏កម្រដែលត្រូវការខ្លាំង។

យ៉ាងណាមិញ លោក Lee បាននិយាយនៅក្នុងបទសម្ភាសន៍មួយជាមួយអ្នកផ្សាយព័ត៌មានសាធារណៈជប៉ុន NHK ដែលបានចាក់ផ្សាយកាលពីថ្ងៃចន្ទថា វាមិនមែនជាកន្លែងរបស់លោកក្នុងការជ្រៀតជ្រែក ឬក៏ចូលរួម នៅក្នុងជម្លោះរវាងជប៉ុន និងចិននោះទេ។

លោកមានប្រសាសន៍ថា «ពីទស្សនៈនៃសន្តិភាព និងស្ថិរភាពនៅអាស៊ីឦសាន ការប្រឈមមុខដាក់គ្នារវាងចិន និងជប៉ុនគឺមិនគួរឲ្យចង់បានទេ។ យើងអាចរង់ចាំតែចិន និងជប៉ុនដោះស្រាយបញ្ហាដោយសន្តិវិធីតាមរយៈការសន្ទនាប៉ុណ្ណោះ»។

ដោយឡែក លោក Benoit Hardy-Chartrand អ្នកជំនាញខាងភូមិសាស្ត្រនយោបាយអាស៊ីបូព៌ានៅបរិវេណសាកលវិទ្យាល័យ Temple ក្នុងទីក្រុងតូក្យូ បានលើកឡើងថា ភូមិសាស្ត្រនយោបាយក្នុងតំបន់ដ៏តានតឹង អាចផ្តល់កម្លាំងចលករបន្ថែមទៀតដល់លោកស្រី Takaichi និងលោក Lee សម្រាប់ការចង់កសាងទំនាក់ទំនងឲ្យកាន់តែរឹងមាំ។

លោកបានបញ្ចាក់បន្ថែមទៀតថា នៅពីក្រោយទ្វារបិទជិត រវាងមេដឹកនាំទាំងពីរប្រាកដជានឹងពិភាក្សាអំពីវិបត្តិជប៉ុន-ចិនបច្ចុប្បន្ន ដោយសារវិធានការសងសឹករបស់ទីក្រុងប៉េកាំង រួមទាំងការគ្រប់គ្រងការនាំចេញ នឹងមានផលប៉ះពាល់ដល់ប្រទេសកូរ៉េផងដែរ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ជប៉ុន ចាប់ផ្តើមរុករករ៉ែកម្រ ខណៈ ចិន រឹតបន្តឹងកាន់តែខ្លាំងឡើង