ការផ្ទុះនៅរោងចក្រការពារជាតិ កូរ៉េខាងត្បូង ស្លាប់មនុស្ស ៥នាក់

ការផ្ទុះដ៏ធំបង្កជាអគ្គិភ័យ នៅរោងចក្រមួយ ក្នុងប្រទេសកូរ៉េខាងត្បូង បានបណ្តាលឲ្យមនុស្សចំនួន ៥នាក់បាត់បង់ជីវិត  និង ២នាក់ទៀត រងរបួស។

តាមការផ្សាយរបស់ CNA, ការផ្ទុះនេះកើតឡើងនៅរោងចក្រ ដែលដំណើរការដោយក្រុមហ៊ុនការពារជាតិ Hanwha Aerospace ក្នុងទីក្រុង Daejeon នាវេលាម៉ោង ១១ព្រឹក ថ្ងៃចន្ទ ទី១ ខែមិថុនា ឆ្នាំ២០២៦។

ទោះបីជាយ៉ាងណាក៏ដោយ អត្តសញ្ញាណជនរងគ្រោះ មិនត្រូវបានគេបញ្ចេញទេ ខណៈមូលហេតុនៃការផ្ទុះ ក៏មិនទាន់ត្រូវបានគេបញ្ជាក់ដែរ។

សូមជម្រាបថា Hanwha Aerospace គឺជាបុត្រសម្ព័ន្ធ របស់សម្ព័ន្ធក្រុមហ៊ុន Hanwha Group ដោយផ្តោតសំខាន់ លើការផលិតអាវុធទំនើបៗ ប្រព័ន្ធការពារជាតិ ម៉ាស៊ីនយន្តហោះចម្បាំង និងបច្ចេកវិទ្យាអាកាសចរណ៍/អវកាស។

Hanwha Aerospace ដើរតួនាទីយ៉ាងសំខាន់ ក្នុងការផ្គត់ផ្គង់យុទ្ធភណ្ឌ និងបរិក្ខារយោធា សម្រាប់កងទ័ពកូរ៉េខាងត្បូង ក៏ដូចជាការនាំចេញអាវុធ ទៅកាន់បណ្តាប្រទេសជាច្រើន នៅទូទាំងពិភពលោកផងដែរ៕

អត្ថបទ៖ សុខ សុវណ្ណ